OCIPAMA CELILONGISO 4
OCISUNGO 18 Tu Eca Olopandu Omo Liocisembi
Ocisembi ci tu Longisa Nye?
“Ocisola ca Suku ca situluiwa.”—1 YOA. 4:9.
OCIMÃHO CELILONGISO
Tu konomuisa eci ocilumba ca Yesu ci tu longisa catiamẽla kovituwa viwa Yehova la Yesu va lekisa.
1. Momo lie ci kuetele esilivilo oku kala Konjivaluko violofa via Kristu anyamo osi?
OCILI okuti, ove o tava okuti ocisembi ombanjaile yimue yi kuete esilivilo lialua! (2 Va Kor. 9:15) Yesu omo lioku eca omuenyo waye ndocilumba, vosi yetu tu pondola oku kuata ukamba umue uwa la Yehova. Handi vali, ocisembi ca tu ĩha epuluvi lioku kuata omuenyo ko pui. Tu kuete asunga alua oku lekisa olopandu, omo liocisola Yehova a lekisa kokuetu poku tu ĩha omõlaye wa soliwa. (Va Rom. 5:8) Oco tu kuatisiwe oku amamako oku eca olopandu loku ivaluka ocisembi, Yesu wa tu vetiya oku linga Onjivaluko violofa viaye anyamo osi.—Luka 22:19, 20.
2. Nye tu konomuisa vocipama cilo?
2 Unyamo ulo Onjivaluko violofa via Yesu, yi ka lingiwa vo Casapalo 12 ya Kupupu wo 2025. Ocili okuti, vosi yetu tu kasi oku linga esokiyo lioku ka kala konjivaluko yaco. Tu kopa esilivilo lialua Konjivaluko yunyamo ulo, nda tua sokolola lutate a kovina Yehova la Yesu va siata oku tu lingila. Vocipama cilo, tu konomuisa eci ocisembi ci tu longisa catiamẽla ku Yehova kuenda Komõlaye. Ocipama cikuavo, ci ka tu kuatisa oku kuata elomboloko lieci ocisembi ci kuetele esilivilo kokuetu kuenda ndomo tu lekisa olopandu kokuayo.
CECI OCISEMBI CI TU LONGISA CATIAMẼLA KU YEHOVA
3. Ocilumba comunu umosi ci pondola oku yovola ndati olohuluwa viomanu? (Talavo ociluvialuvia.)
3 Ocisembi ci tu longisa ovina vialua viatiamẽla kesunga lia Yehova. (Esin. 32:4) Ndamupi? Sokolola okuti, omo liesino lia Adama etu tua piñala ekandu kuenda olofa. (Va Rom. 5:12) Oco tu yovuiwe kekandu kuenda kolofa, Yehova wa tuma omõlaye oco a tu file. Pole, ocilumba comunu umosi ca ponduile oku yovola ndati olohuluwa viomanu? Upostolo Paulu wa lombolola hati: “Ndeci valua va lingisua vakuakandu omo liesino liomunu umosi [Adama], cimuamue haico, omo liepokolo liomunu umosi [Yesu], valua va ka tendiwa ndavakuesunga.” (Va Rom. 5:19; 1 Tim. 2:6) Volondaka vikuavo omo liesino liomunu umosi, tua linga apika vekandu kuenda violofa. Cimuamue haico okuti, omo liepokolo liomunu umosi tu pondola oku yovuiwa.
Omo liomunu umosi Adama, vosi yetu tua piñala ekandu kuenda okufa. Cimuamue haico okuti, omo liomunu umosi Yesu, tu pondola oku yovuiwa kekandu kuenda kolofa (Tala ocinimbu 3)
4. Momo lie Yehova ka ecelelele okuti ovitumbukila via Adama vakuepokolo va kala komuenyo otembo ka yi pui?
4 Anga hẽ Yesu wa sukilile muẽle oku fa oco a tu yovole? Momo lie Yehova ka ecelele ovitumbulukila via Adama vakuepokolo oku kala komuenyo otembo ka yi pui? Pamue tu sima okuti eyi nda ya kala onjila yiwa yoku potolola ocitangi caco. Pole, eci nda ka ca lekisile esunga lia lipua lia Yehova. Yehova ukuesunga, eye nda lalimue eteke a ecelela elinga ka lia sungulukile lia Adama.
5. Momo lie tu kolelela okuti Yehova olonjanja viosi o linga eci ca sunguluka?
5 Nye ci popiwa nda okuti, Yehova ka ecele ocisembi kuenda ka lekisile esunga liaye loku ecelela okuti, omãla va Adama ka va lipuile va kala otembo ka yi pui? Nda oco ca pitile, vokuenda kuotembo omanu nda va fetika oku tatãla esunga lia Yehova kovina vikuavo. Ndeci, vamue nda va sima ndoco: ‘Anga hẽ Yehova o ka tẽlisa muẽle olohuminyo viaye viosi?’ Pole, etu ka tu sukila oku sakalala lovina viaco. Omo lia Yehova oku lekisa esunga, loku eca omõlaye o soliwe calua oco a tu file, uvangi wokuti olonjanja viosi eye o linga eci ca sunguluka.
6. Konepa yipi ocisembi ci lekisa okuti Yehova o tu sole? (1 Yoano 4:9, 10)
6 Ocisembi ka ci tu kuatisa lika oku kuata elomboloko liokuti Yehova ukuesunga, pole, ci tu kuatisavo oku kuata elomboloko liokuti eye o tu sole. (Yoa. 3:16; tanga 1 Yoano 4:9, 10.) Ocisembi ci tu longisa okuti, Yehova o yongola okuti tu kala otembo ka yi pui loku panga onepa kepata liaye. Sokolola ndoco: Eci Adama a linga ekandu ka ponduile vali oku panga onepa kepata lia Yehova. Omo liaco, vosi yetu eci tua citiwa ka tua pangele onepa kepata lia Yehova. Pole, omo liocisembi, omanu vosi vana va kuete ekolelo ku Suku kuenda vakuepokolo, va pondola oku tiamẽla kepata liaye. Cilo, Yehova o pondola oku ecela akandu etu, loku kuata ukamba laye kuenda la vamanji. Kuenje ka tu sukila oku kuata atatahãi vokuti Yehova o tu sole!—Va Rom. 5:10, 11.
7. Momo lie ohali Yesu a tala yi tu kuatisila oku kuata elomboloko liokuti Yehova o tu sole calua?
7 Tu pondola oku kuata elomboloko liasuapo liocisola calua Yehova a tu kuetele, nda tua sokolola ndomo eye a yeva evalo poku feta ocisembi. Satana wa popia hati, layumue ufendeli wa Yehova wa ponduile oku amamako lekolelo kokuaye nda wa pita loseteko yimue. Oco ku lekisiwe okuti eci uhembi, Yehova wa ecelela okuti omõlaye o tala ohali osimbu ka file. (Yovi 2:1-5; 1 Pet. 2:21) Yehova wa mola omanu oku pembula omõlaye kuenda oku u tipula. Wa molavo Yesu oku valeliwa kuti wekangiso kuenda ohali yosi a kala oku tala toke eci a tula omuenyo. (Mat. 27:28-31, 39) Yehova wa kuatele unene woku malako ovina viaco viosi. Ndeci, vepuluvi limue omanu va popia okuti: “Kaliye Suku o popele nda Eye o yongola oku u kuatisa.” (Mat. 27:42, 43) Pole, nda Yehova wa ci lingile ocisembi nda ka ca fetiwile kuenda nda ka tua kuatele elavoko. Omo liaco, Yehova wa ecelela okuti, Omõlaye o tala ohali toke a tula omuenyo.
8. Momo lie tua kolelela okuti Yehova wa yeva evalo lialua poku mola Omõlaye oku talisiwa ohali? (Talavo ociluvialuvia.)
8 Ka tu ka simi okuti Yehova ka kuete ocikembe omo okuti Ukuonene Wosi! Eye wa tu lulika lesatahãlo liaye kuenda luloño woku lekisa ocikembe. Omo okuti Embimbiliya li popia okuti, tua lulikiwa lesetahãlo liaye, ci lekisa okuti Yehova o kuetevo ocikembe. Embimbiliya li lombolola okuti, Yehova o yeva “evalo” kuenda “esumuo.” (Osa. 78:40, 41) Ivalukavo ulandu wa Avirahama kuenda wa Isake. Yehova wa pinga ku Avirahama oco a ece omõlaye wongunga ndocilumba. (Efet. 22:9-12; Va Hev. 11:17-19) Sokolola evalo kuenda esumuo Avirahama a yeva poku lipongiya oco a ponde omõlaye. Citava okuti, Yehova wa yeva vali evalo lialua poku mola omõlaye oku tipuiwa lungangala toke kolofa! —Tala vo jw.org ovideo losapi hati Setukuli Ekolelo Liavo—Avirahama, Onepa 2.
Ca tĩlile calua ku Yehova oku mola Omõlaye oku tala ohali (Tala ocinimbu 8)
9. Nye tua lilongisa kolondaka vi sangiwa ku Va Roma 8:32, 38, 39 catiamẽla kocisola ca Yehova?
9 Ocisembi ci tu longisa okuti, lomue o tu sole vali okuti Yehova ci sule, ndaño muẽle ekamba lietu lia velapo ale umue ukuepata lietu tu sole calua. (Tanga Va Roma 8:32, 38, 39.) Tua kolela okuti ocisola Yehova a tu kuetele, ca velapo okuti ocisola tu likuetele etu muẽle ci sule. Ove hẽ o yongola oku kala komuenyo otembo ka yi pui? Yehova o yongola calua okuti ove o kala komuenyo otembo ka yi pui. Ove hẽ o yongola okuti akandu ove a eceliwa? Yehova o yongola calua oku ecela akandu ove. Pole, ocina Yehova a tu pinga lika, oku lekisa olopandu kocisembi, oku lekisa ekolelo kuenda oku kala vakuepokolo. Ocisembi ombanjaile yimue yi situlula okuti Yehova o tu sole calua. Voluali luokaliye, tu ka lilongisa vali calua catiamẽla kocisola Yehova a tu kuetele.—Uku. 3:11.
CECI OCISEMBI CI TU LONGISA CATIAMẼLA KU YESU
10. (a) Momo lie Yesu a yevela esakalalo eci a kala oku panda koku fa? (b) Yesu wa situlula ndati okuti Satana ohembi? (Talavo okakasia losapi hati: “ Yesu Poku Lekisa Ekolelo wa Situlula Okuti Satana Ohembi.”)
10 Yesu wa kapoko calua onjila ndomo omanu va tenda Isiaye. (Yoa. 14:31) Osimbu Yesu ka file, wa lundiliwa okuti wa popia atonãi Suku kuenda eye ongangala. Yesu wa yeva esakalalo lialua poku sima okuti, elundi liaco lia ponduile oku vetiya omanu oku kuatela ocisimĩlo ka ca sungulukile Isiaye. Eli olio esunga lieci eye a likutilila hati: “A Tate, nda citava, njupe okopo eyi.” (Mat. 26:39) Yesu poku amamako lekolelo toke kolofa, wa lekisa okuti Satana ohembi.
11. Yesu wa lekisa ndati ocisola calua a kuetele omanu? (Yoano 13:1)
11 Ocisembi ci tu longisavo okuti Yesu wa kapako calua omanu, ca piãla enene olondonge viaye. (Olosap. 8:31; tanga Yoano 13:1.) Ndeci, Yesu wa kũlĩhĩle okuti wa laikele oku liyaka lovitangi vialua palo posi, oku kongelamo oku fa lonjila yimue yi sumuisa. Yesu wa tẽlisa ovina viaco ka via lelukile, hamomoko Yehova o tuma oku vi linga, pole, wa vi linga omo a solaile omanu. Yesu wa lekisa ocisola calua komanu poku va kundila loku va longisa kuenda oku va kuatisa. Toke muẽle keteke lia sulako liomuenyo waye, Yesu wa sanda epuluvi lioku sukula ovolu olondonge, loku va ĩha olonumbi kuenda oku va pamisa. (Yoa. 13:12-15) Ndaño ceci a kala kuti we kangiso levalo lialua, wa eca elavoko kongangala yina ya kala ponele yaye kuenda wa pinga ku Yoano oco a tate ina yaye. (Luka 23:42, 43; Yoa. 19:26, 27) Eci ci lekisa okuti, Yesu ka lekisile lika ocisola calua komanu omo a eca omuenyo waye, pole, kovina viosi eye a linga eci a kala palo posi, via situlula ocisola kuenda ocikembe caye.
12. Nye Yesu a kasi oku tu lingila cilo?
12 Ocili okuti, Yesu wa fa “onjanja yimosi lika,” pole, toke cilo o kasi oku amamako oku tu lingila ovina vialua. (Va Rom. 6:10) Ndamupi? Eye o kasi oku amamako oku talavaya oco a tu ĩhe ovina viosi viwa pocakati cocisembi. Eye o kasi oku talavaya Ndosoma yetu haiye Ocitunda Cinene kuenda utue wekongelo. (1 Va Kor. 15:25; Va Efe. 5:23; Va Hev. 2:17) Yesu o kuetevo ocikele coku kongela olombuavekua kuenda owiñi wakahandangala. Upange waco u ka sulila lika eci handi esulilo liohali ya piãla ka ya pitĩlile. b (Mat. 25:32; Mar. 13:27) Eye o kasivo oku talavaya lukuenje wa kolelua, oco va tu ĩhe okulia kuespiritu tu sukila okuti, tu amamako oku vumba Yehova lekolelo koloneke vilo via sulako. (Mat. 24:45) Eci Yesu a ka tu viala vokuenda kuohulukãi yanyamo, eye o kamamako oku talavaya oco tu kuatisiwe. Ocili okuti, Yehova wa eca omõlaye kokuetu!
AMAMAKO OKU LILONGISA OVINA VIOKALIYE
13. Nye ci ka ku kuatisa oku amamako oku lilongisa catiamẽla kocisola ca Yehova kuenda ca Yesu?
13 Ci tẽliwa oku amamako oku lilongisa catiamẽla kocisola Yehova la Yesu va tu kuetele, nda tua sokolola kovina ovo va siata oku tu lingila toke cilo. Unyamo ulo, kolosemana vina okuti ka kua lingiwile handi Ocipito Conjivaluko kuenda noke lioku pita Ocipito caco, o pondola oku tanga lutate Evangeliu limosi ale akuavo. Pole, ku ka seteke oku tanga ovipama vialua votembo yimuamue. Omo liaco, ku ka kuate onjanga kuenda seteka oku sanga asunga akuavo oku sola vali calua Yehova kuenda Yesu. Ku ka ivaleko oku sapuilako vakuene ovina wa limbuka.
14. Oku linga akonomuiso ci tu kuatisa ndati oku amamako oku lilongisa catiamẽla kocisembi kuenda kalongiso akuavo? (Osamo 119:97 kuenda ketosi) (Talavo ociluvialuvia.)
14 Nda ove wa papatisiwa ale vokuenda kuanyamo alua, pamue o lipula nda okuti handi o pondola oku lilongisa catiamẽla kesunga lia Suku, kocisola caye kuenda kocisembi. Pole, olonjanja viosi tu ka kuata ovina viokaliye vioku lilongisa. Omo liaco, nye o sukila oku linga? Likolisilako oku tanga loku lilongisa alivulu etu. Nda wa tanga ovina vimue Vembimbiliya okuti ka via ku lombolokele, linga akonomuiso. Kuenje vokuenda kueteke sokolola kovina ove wa lilongisa catiamẽla ku Yehova, Komõlaye kuenda kocisola ovo va ku kuetele.—Tanga Osamo 119:97 kuenda etosi.
Ndaño okuti tu kasi ale anyamo alua vocili, handi tu pondola oku vokiya olopandu vietu kocisembi (Tala ocinimbu 14)
15. Momo lie ci kuetele esilivilo oku amamako oku lilongisa ovina viokaliye Vembimbiliya?
15 Ku ka sumue nda okuti olonjanja viosi o tanga Embimbiliya, ale o linga akonomuiso, ku sangi ocina cimue co kaliye. Ci kasi ndu okuti ove o kasi oku sandiliya ulu. Olonjanja vimue omunu o kasi oku sanda ulu, o sukila oku pita olowola vialua ale ateke, toke eci a sanga ocinimbu cimue culu. Ndaño ndoco, eye ka liwekapo, momo kokuaye ocinimbu locinimbu ci kuete esilivilo. Pole, ocili ci sangiwa Vembimbiliya ca velapo vali okuti ulu u sule! (Osa. 119:127; Olosap. 8:10) Omo liaco, kala ukuepandi kuenda ku ka liwekepo oku sanda ovina viokaliye Vembimbiliya.—Osa. 1:2.
16. Tu pondola oku setukula ndati Yehova la Yesu?
16 Poku lilongisa, likolisilako oku kapako ovina o kasi oku lilongisa komuenyo wove. Ndeci, setukula esunga lia Yehova poku yuvula oku tata vakuene lolonepele. O pondolavo oku setukula ocisola Yesu a kuetele Isiaye kuenda omanu vakuavo. Onjila yimue yoku ci linga, oku lieca olumue koku linga eci Yehova a yongola kuenda oku kuatisa vakuene, ndaño olonjanja vimue ka ca lelukile. Onjila yikuavo, poku kundila omanu oco va kũlĩhe ovina vi komõhisa Yehova a siata oku lingila omanu kuenda oku lekisa ekolelo kocisembi.
17. Nye tu ka lilongisa vocipama cikuãimo?
17 Osimbu tu lilongisa vali calua catiamẽla kocisembi kuenda oku kapako esilivilo liayo, ocisola tu kuetele Yehova la Yesu ci livokiya. Kuenje nda tua ci linga Yehova la Yesu va ka tu solavo. (Yoa. 14:21; Tia. 4:8) Omo liaco, tu sukila oku talavaya ciwa laliangiliyo a Yehova kuenda oku amamako oku lilongisa catiamẽla kocisembi. Vocipama cikuãimo, tu ka lilongisa amue pokati kasumũlũho tu ka kuata omo liocisembi kuenda ndomo tu lekisa olopandu omo liocisola ca Yehova.
OCISUNGO 107 Ongangu Yiwa Yocisola
a OLONDAKA VIA LOMBOLUIWA: Oku “sokolola” ku lomboloka oku tiamisila ovisimĩlo viove kueci o kasi oku lilongisa kuenda oku lilongisa ovina vikuavo oco o kuate elomboloko liwa.
b Ku Va Efeso 1:10 Paulu wa tukula eci catiamẽla koku kongela “ovina vio kovailu.” Ku Mateo 24:31 kuenda ku Marko 13:27, Yesu wa tukula oku kongeliwa kua “vana va nõliwa.” Paulu la Yesu va kasi oku vangula ovina via litepa. Paulu o kasi oku vangula otembo Yehova a nõla vana va ka viala la Yesu poku va waveka lespiritu sandu. Yesu o kasi oku tukula otembo eci olombuavekua vi ka kala handi posi, vokuenda kuohali ya piãla okuti va kongoluiwa oco va ende kilu.
