1, 2. Momo lie olonjali vimue via siatela oku sakalala nda omãla vavo va yongola oku papatisiwa?

OMANU valua va lilongisa Embimbiliya va litumbika ku Yehova loku papatisiwa. Valua pokati kavo amalẽhe kuenda va kulila vocili kuenje va nõlapo oku kuata omuenyo wa velapo. (Osamo 1:1-3) Nda unjali yimue Ukristão, citava okuti o lavoka lesanju eteke omõlove a ka papatisiwa.—Sokisa 3 Yoano 4.

² Pamue o kuata esakalalo. Momo wa siata oku mola amalẽhe vamue va papatisiwa, pole, noke va fetika oku kuata atatahãi nda okuti, oku kapako olonumbi via Suku komuenyo wavo ci kuete esilivilo. Vakuavo va siapo ocili. Omo liaco, ove o kuatavo ohele yokuti pamue omõlove o ka fetika oku vumba Yehova pole, noke ocisola a kuetele ocili ci tepuluka. Kuenje, omõlove o kala Ndakristão vamue vo kocita catete ko Efeso vana Yesu a sapuila hati: “Ocisola wa kuatele tete wa ci yanduluka.” (Esituluilo 2:4) O kuatisa ndati omõlove oku amamako  locisola ca pama kuenda oku ‘kula oco a popeliwe’? (1 Petulu 2:2) Tu pondola oku lilongisila kongangu ya Timoteo.

3. (a) Otembo yipi Timoteo a linga Ukristão? (b) Timoteo wa kapeleko ndati ovina a lilongisa? (c) Ovina vipi vitatu Paulu a sapuila Timoteo?

³ Upostolo Paulu wa nyula onjanja yatete olupale luo Lustra kunyamo wa 47. Citava okuti kotembo yaco eci Timoteo a kala omõla, oco a lilongisa catiamẽla kalongiso a Yesu. Eye wa kapeleko ovina a lilongisa kuenje noke lianyamo avali, wa fetika oku linga ovongende la Paulu. Eci pa pita 16 kanyamo, Paulu wa sonehela Timoteo hati: “Ove puãi amamako lovina wa lilongisa havio wa vetiyiwa oku tava, loku limbuka vana va ku vi longisa, omo okuti tunde vutila wa kũlĩha ovisonehua vi kola, vina vi ka ku popela omo lioku kolela Kristu Yesu.” (2 Timoteo 3:14, 15) Kũlĩhĩsa okuti Paulu wa sapuila Timoteo hati, (1) kũlĩha ovisonehua vi kola, (2) wa vetiyiwa oku tava ovina wa lilongisa kuenda (3) vina vi ka ku popela omo lioku kolela Kristu Yesu.

4. Nye wa siata oku kuama oco o longise omãla vove? (Tala elitalatu kefetikilo liocipama.)

⁴ Omo okuti unjali yimue Ukristão, o yongola okuti omõlove o kũlĩha ovisonehua vi kola, okuti koloneke vilo mua kongela Ovisonehua vio Heveru kuenda vio Helasi. Omãla ndaño okuti vatito, va pondola oku lilongisa catiamẽla komanu kuenda kovolandu a sangiwa Vembimbiliya. Ocisoko ca Yehova ca siata oku sandeka alivulu alua, olombrocura kuenda olovideo, olonjali vi pondola oku talavaya lavio oco vi kuatise omãla vavo. Anga hẽ alivulu aco a sangiwa kelimi liove? Omãla vove va sukila oku kũlĩha ciwa Embimbiliya oco va pamise ukamba wavo la Yehova.

5. (a) “Oku vetiyiwa oku tava” ku lomboloka nye? (b) Nye ci lekisa okuti Timoteo wa kuata ekolelo?

⁵ Oco o kuatise omãla vove oku kala ekamba lia Yehova ku sukila lika oku va longisa catiamẽla Kembimbiliya. Ivaluka okuti Timoteo wa “vetiyiwa oku tava.” Kovisonehua vio Helasi ondaka Paulu a tukula, yi lomboloka “oku kuata elomboloko” ale “oku tava okuti ocina cimue cocili.” Timoteo wa kũlĩhile ciwa Ovisonehua vio Helasi “tunde vutila.” Noke ovina viaco vio vetiya oku kolela okuti Yesu eye wa kala Mesiya. Ekolelo lia Timoteo lia pamele calua okuti wa papatisiwa kuenda wa talavaya la Paulu kupange wumisionaliu.

6. O kuatisa ndati omãla vove oku kolela Kondaka ya Suku?

⁶ O kuatisa ndati omãla vove oku kuata ekolelo ndeli lia Timoteo, oco va “vetiyiwe oku tava”? Tete, kala ukuepandi. Momo oco omunu a kuate ekolelo lia pama, ci sukila otembo. Nda wa kolela kocina cimue, ka ci lomboloka okuti omõlove o ka kolelavo kocina caco vocipikipiki. Omõla lomõla,  o sukila oku talavaya ‘luloño waye woku sokolola’ oco a kolele Kembimbiliya. (Tanga Va Roma 12:1.) Omo okuti unjali, o sukila oku likolisilako oku kuatisa omãla vove oku pamisa ekolelo liavo capiãla enene eci va linga apulilo. Tu konomuisa eci tu lilongisa kulandu wa isia umue.

7, 8. (a) Manji Thomas o lekisa ndati epandi poku longisa omõlaye ukãi? (b) Momo lie ci kuetele esilivilo oku lekisa epandi?

⁷ Manji Thomas, okuti omõlaye ukãi o kuete 11 kanyamo wa popia hati: “Olonjanja vimue omõlange o linga apulilo amue ndeci: ‘Anga hẽ Yehova wa ecelela okuti ovina vi kasi lomuenyo vongongo vi tukuluka ño?’ ale ‘Momo lie ka tu likongelela vopulitika oco tu mioñolole ekalo liomanu?’ Olonjanja vialua, ndi sukila oku likandangiya oco si ka ece etambululo lonjanga. Pole, noke ndi ivaluka okuti oco omõlange a kuate ekolelo si sukila oku u sapuila ovina vialua vonjanja yimosi. Ca velapo ceci okuti, vokuenda kuotembo o ka limbuka eye muẽle okuti tu pondola oku kolela kocili Cembimbiliya.

⁸ Manji Thomas wa kũlĩhĩle okuti wa sukililevo oku kuata epandi oco a longise omõlaye. Ocili okuti, Akristão vosi va sukila oku kuata epandi. (Va Kolosai 3:12) Manji Thomas wa limbukile okuti, ca sukilile otembo kuenda oku sapela olonjanja vialua lomõlaye oco o kuatise oku kolela kovina a tava. Wa sukililevo oku sapela lomõlaye catiamẽla kovina a lilongisa Vembimbiliya. Manji Thomas wa popia hati: “Ame lukãi wange tu likolisilako oku limbuka nda omõletu wa kolela muẽle kovina a lilongisa ca piãla enene ovina vi kuete esilivilo. Nda eye o linga apulilo, tu sanjuka calua. Ocili okuti, ndi sakalala calua nda eye o tava lika kovina viosi pole, ka lingi apulilo.”

9. O kuatisa ndati omãla vove oku kuata ukũlĩhĩso wa suapo Wembimbiliya?

⁹ Nda olonjali vi lekisa epandi poku longisa omãla vavo, vokuenda kuotembo va ka kũlĩha “ciwa upati, lusõvi loku lepa kuenda oku longa” kuekolelo. (Va Efeso 3:18) Tu va longisa ndomo ci likuata lutunga wavo kuenda elomboloko liavo. Osimbu ekolelo liavo li livokiya, ci leluka oku vangula la vakuavo catiamẽla kovina va tava oku kongelamo vana va tangela kumosi. (1 Petulu 3:15) Anga hẽ omãla vove va tẽla oku lombolola lekuatiso Liembimbiliya eci ci pita lomunu noke yoku fa? Anga hẽ elomboluilo Liembimbiliya lia va lomboloka? * (Tala etosi pombuelo yemẽla.) Ivaluka okuti oku longisa omãla vove ci sukila epandi pole, oku ci linga ci nena onima.—Esinumuĩlo 6:6, 7.

10. Oco o kuatise omãla vove oku kuata ekolelo ocina cipi ca velapo?

¹⁰ Ongangu yove yi kuetevo esilivilo oco o kuatise omãla vove oku kuata ekolelo.  Manji Stephanie okuti onjali yimue yomõla vatatu, wa popia hati: “Tunde vutila wo malavange nda siata oku lipula ndoco: ‘Anga hẽ ndi sapela lomãla vange esunga lieci nda kolelela ku Yehova, kocisola caye kuenda kovilinga viaye viesunga? Omãla vange va tẽla hẽ oku limbuka okuti ndi sole muẽle Yehova?’ Nda ekolelo liange ka liapamele si lavoka okuti omãla vange va kuata ekolelo liapama.

11, 12. Olondunge vi lomboloka nye? (b) Nye ci sukiliwa oco omõlove a kuate olondunge?

¹¹ Tua lilongisa okuti Timoteo wa kuata (1)  ukũlĩhĩso wovisonehua kuenda (2)  wa kolelele okuti ovina a lilongisa viocili. Pole, nye Paulu a yonguile oku vangula eci a popia hati ovisonehua vi kola via laikele oku kuatisa Timoteo ‘oku popeliwa’?

¹² Elivulu Estudo Perspicaz das Escrituras, volume 3, li lekisa okuti “olondunge uloño woku kapako ukũlĩhĩso loku kuata elomboloko liasuapo poku tetulula ovitangi, oku yuvula ovina vi koka ohele, oku tẽlisa ovimãho vimue ale oku lungula omanu vakuavo.” Olondunge via litepa lesanda. Embimbiliya li popia okuti “vutima womõla muli esanda.” (Olosapo 22:15) Omo okuti olondunge via litepa lesanda, ovio ondimbukiso yimue yoku kula. Omunu umue wa kula kespiritu o sumbila Yehova kuenda o pokola kokuaye, ka ci lingi omo okuti wa kula ketimba.—Tanga Osamo 111:10.

13. Amalẽhe va lekisa ndati okuti va kuete olondunge?

¹³ Amalẽhe vana va kuete olondunge ka “va pungoka lakimba okuti va imbiwa oko loko” lolonjongole viavo ale oku vetiyiwa lovisĩmilo via malẽhe vakuavo. (Va Efeso 4:14) Handi vali, “Omo lioku pindisa olondunge viavo” va tẽla “oku tepisa pokati keci ciwa leci cĩvi.” (Va Heveru 5:14) Ovo va nõla lolondunge onjila vakuama ndaño ceci ka va letiwe lolonjali viavo ale lomanu vakuavo akulu. (Va Filipoi 2:12) Olondunge viaco vi va kuatisa oku popeliwa. (Tanga Olosapo 24:14.) O kuatisa ndati omõla vove oku kuata olondunge? Poku lekisa kokuavo ovina wa velisapo komuenyo wove. Kolondaka viove lo kovilinga lekisa kokuavo okuti wa kapako olonumbi Viembimbiliya komuenyo wove.—Va Roma 2:21-23.

14, 15. (a) O kuatisa ndati omãla vove oku kũlĩha eci ciwa leci cĩvi? (b) Nye omõlove a sukila oku limbuka osimbu ka papatisiwile?

¹⁴ Oco o kuatise omãla vove oku kuata ekolelo, ku sukila lika oku va sapuila eci ciwa leci cĩvi. O sukilavo oku va kuatisa oku sokolola kapulilo ndeci: ‘Momo lie Embimbiliya lipisila ovina vi molẽha ndu okuti viwa? Ndi kolela ndati okuti olonumbi Viembimbiliya vi kuete esilivilo kokuange?’—Isaya 48:17, 18.

¹⁵ Nda omõlove o yongola oku papatisiwa, u kuatisa oku sokolola lutate ovikele vi tunda koku papatisiwa. Eye o vi tenda ndati? Asumulũho api eyililako? Alikolisilo api  a sukila oku linga? Momo lie oku papatisiwa kunenela asumulũho alua okuti ovitangi ci sule? (Marko 10:29, 30) Ci kuete esilivilo oku sokolola lutate ovina viaco osimbu kua papatisiwile. Kuatisa omõlove oku sokolola kasumulũho a tunda kepokolo kuenda ovitangi vi tunda kesino. Kuenje ci ka leluka kokuaye oku tava okuti oku kuama olonumbi Viembimbiliya olonjanja viosi ci kuete esilivilo kokuaye.—Esinumuĩlo 30:19, 20.

16. Nye olonjali vi sukila oku linga nda omõlavo wa papatisiwa o fetika oku kuata atatahãi?

¹⁶ Nye o linga nda omõlove o fetika oku kuata atatahãi atiamẽla kocili noke yepapatiso? Ci tava okuti omõlove ulume ale ukãi o fetika oku vetiyiwa oku sola ovina violuali. Ale o fetika oku kuata atatahãi nda oku kuama olonumbi Viembimbiliya oyo onjila ya velapo komuenyo. (Osamo 73:1-3, 12, 13) Ovituwa viove ovio vi u kuatisa oku amamako oku vumba Yehova ale sio. Ku ka kisike omõlove oku tava kovina viaco, ndaño okuti umalẽhe calua. Pole, u kuatisa oku limbuka okuti ove u sole calua kuenda o yongola oku ukuatisa.

17, 18. Nye o sukila oku linga oco o kuatise umalẽhe umue o kuete atatahãi?

¹⁷ Umalẽhe umue wa papatisiwa wa litumbika ku Yehova. Eyi, ohuminyo yimue yavelapo  yoku sola Yehova kuenda yoku u vumba. (Tanga Marko 12:30.) Yehova o tenda ohuminyo yaco okuti yi kuete esilivilo. (Ukundi 5:4, 5) Omo liaco, ivaluisa omõlove esilivilo liohuminyo ya velapo a linga ku Yehova. Pole, catete tanga loku lilongisa ovolandu a sokiyiwila olonjali a siata oku sandekiwa locisoko ca Yehova. Noke, vepuluvi lia sokiyiwa ciwa, locisola sapuila komõlove okuti onjila a nõlapo yoku litumbika ku Yehova kuenda yoku papatiwa, yikuete esilivilo lialua kuenda yu konenela asumulũho.

¹⁸ O pondola oku sanga olonumbi viwa velivulu Os Jovens Perguntam —Respostas Práticas, Volume 1 kocipama losapi hati, “Os Pais Perguntam.” Ocipama caco ci lombolola ndoco: “Ku ka sime lonjanga okuti, omõlove o kasi oku likala ovina a lilongisa. Citava okuti eye o kuete esunga liaco.” Pamue o kasi oku liyeva ulika, ale o sima okuti, lalimue eteke a ka kala ndamalẽhe vakuavo va kasi oku amamako kupange wa Yehova. Ale, o kasi oku lambalaliwa la vana a tangela lavo kosikola. Elivulu liaco li lombololavo ndoco: “Apulilo aco ka a tiamisiwila calua kolonumbi via kunamela Kembimbiliya. Pole, a tiamisiwila enene kovitangi vi pondola oku seteka ekolelo.” Olio, liecavo olonumbi ndomo olonjali vi kuatisa omõlavo o kasi loku liyaka lovitangi viaco.

19. Olonjali vi kuatisa ndati omãla vavo oku kuata “ukũlĩhĩso oco va popeliwe”?

¹⁹ Omo okuti unjali, o kuete ocikele cinene kuenda esumũlũho lioku kuatisa omãla vove poku “va pindisa lovilongua via Yehova.” (Va Efeso 6:4) Ndomo tua ci konomuisa, ci lomboloka okuti o sukila oku longisa komãla vove eci Embimbiliya lipopia loku vakuatisa oku kolela kovina va lilongisa. Nda ekolelo liavo lia pama, va ka vetiyiwa oku litumbika ku Yehova loku pitisa kovaso upange waye. Omo liaco, lekuatiso Liondaka ya Suku, lespiritu liaye, li kolisilako o kuatisa omãla vove oku kuata “ukũlĩhĩso oco va popeliwe.”