1. Momo lie epapatiso likuetele esilivilo? (Tala ociluvialuvia kefetikilo liocipama.)

ANYAMO osi, valua va lilongisa Embimbiliya va siata oku litumbika ku Yehova kuenda oku papatisiwa. Valua pokati kavo amalẽhe. Citava okuti, va citiwila vocili. Anga hẽ ove u umue pokati kavo? Nda oco, ca sunguluka. Momo epapatiso enanga limue li kuete esilivo liavelapo. Olondonge viosi via Kristu vi sukila oku papatisiwa oco vi popeliwe.—Mateo 28:19, 20; 1 Petulu 3:21.

2. Momo lie ku sukilila oku kuata ohele yoku litumbika ku Yehova?

² Eci o papatisiwa, Yehova oku sumũluisa volonjila vialua. Pole, o kuatavo ocikele cinene. Ndamupi? Eteke wa papatisiwa, manji wa linga ohundo yepapatiso liove, wa pula ndoco: “Vonduko yocilumba ca Yesu Kristu, wa likekembela akandu ove kuenda wa litumbika ku Yehova oco o linge ocipango  caye?” Ove wa tambulula hati, oco. Wa likuminya okuti oku sola Yehova loku u vumba, oco ocina ca velapo komuenyo wove. Anga hẽ o livela omo wa linga ohuminyo yaco yi kuete esilivilo? Ocili okuti kuliveli! Lalimue eteke o ka livela poku ecelela okuti Yehova o songuila omuenyo wove. Vana ka va vumbi Yehova, vatiamẽla ku Satana. Pole, Eye ka kapeleko epopelo liavo. Omo liaco, eye o sanjuka calua nda ove wa likala elavoko liove lioku kala otembo ka yi pui, momo o yanduluka Yehova kuenda o tiamẽla kokuaye.

3. Eci omunu umue a litumbika ku Yehova asumũlũho api a tambula?

³ Sokolola ndomo Yehova a siata oku ku sumũluisa omo lioku litumbika kokuaye kuenda oku papatisiwa. Nda wa tumbika omuenyo wove ku Yehova o pondola oku popia lekolelo hati: “Eci Yehova a kasi lame si kuata usumba. Omunu hẽ, o ndinga nye?” (Osamo 118:6) Ka kuli esumũlũho lia velapo okuti oku tiamẽla ku Yehova loku kũlĩha okuti wa ku sanjukila ci sule.

4, 5. Momo lie tu popela tuti elitumbiko ocikele cimue comunu lomunu? (b) Ovitangi vipi Akristão vosi va siata oku liyaka lavio?

⁴ Oku litumbika ku Yehova ocikele comunu lomunu. Eci ci lomboloka okuti noke liepapatiso o kuete ocikele coku teyuila epopelo liove. Elitumbiko ka li kasi “ndesokiyo limue lioku teyuila epata liosi kuvei umue.” Ndaño o kasi lolonjali viove, oco ukamba wove la Yehova wa amamako ocikele cove. Momo lie ci kuetele esilivilo oku ci ivaluka? Momo kua kũlĩhĩle ndomo ekolelo liove li ka setekiwa kovaso yoloneke. Citava okuti wa papatisiwa eci wa kala omõla. Pole, omo okuti cilo wa linga umalẽhe o kuete ovisimĩlo viokaliye kuenda ovitangi viokaliye. Umalẽhe umue wa popia hati: “Omõla umue ka liwekapo oku kala Ombangi ya Yehova omo okuti ka citava okulia okanepa kamue kekende lioku sambiliya ocipito cimue kosikola. Pole, eci omunu a kula, okuti onjongole yoku lipekela yi fetika oku livokiya, o sukila oku kolela okuti oku pokola kolonumbi via Yehova oco ocina ca velapo.

⁵ Amalẽhe havoko lika va liyaka lovitangi viaco viokaliye. Ndaño vana va papatisiwa okuti akulu, ekelelo liavo lia siatavo oku setekiwa lonjila yimue ka va lavokaile. Oloseteko viavo pamue vi tunda volohuela viavo, ku hayele ale kupange wavo. Kuenje ci kale okuti tua kulu ale sio, vosi yetu tu liyaka lovitangi vi seteka ekolelo lietu ku Yehova volonjila via litepa.—Tiago 1:12-14.

6. (a) Nye wa likuminya ku Yehova eci wa litumbika kokuaye? (b) Nye o lilongisa kolondaka vi sangiwa kelivulu lia Va Filipoi 4:11-13?

⁶ Oco o kuatisiwe oku amamako lekolelo, olonjanja viosi ivaluka okuti o huminyo wa linga ku Yehova ka yi pongoloka. Eci ci lomboloka okuti wa likuminya oku vumba Ukuonenewosi ndaño lovitangi, ale akamba lolonjali viove va liwekapo oku ci linga. (Osamo 27:10) Oku ivaluka ohuminyo yaco, ci ku kuatisa oku amamako lekolelo. Kuenda kolela okuti Yehova o ka ku ihã ongusu o sukila oco o tẽlise ohuminyo wa linga kokuaye.—Tanga Va Filipoi 4:11-13.

7. Olondaka vi sangiwa kelivulu lia Va Filipoi 2:12 vi lomboloka nye?

⁷ Yehova o yongola okuti o kala ekamba liaye. Pole, o sukila oku likolisilako oku pamisa ukamba waco kuenda oku amamako oku linga eci ci koka epopelo liove. Kelivulu lia va Filipoi 2:12 ku popia hati: “Kolisiko  oku linga eci ci koka epopelo liene lusumba loku luluma.” Eci ci lomboloka okuti, o sukila oku likolisilako oku pamisa ukamba wove la Yehova kuenda oku amamako lekolelo ndaño lovitangi. Ka tu ka popi okuti ca leluka oku ci linga. Ivaluka okuti ndaño muẽle vana va vumba Yehova vokuenda kuotembo yalua, ekolelo liavo lia tepuluka. Nye o sukila oku linga oco amameko lekolelo kuenda oku linga eci ci koka epopelo liove?

8. (a) Voku linga elilongiso Liembimbiliya pokolika mua kongela nye? (b) Momo lie ci kuetele esilivilo?

⁸ Oco tu kale akamba va Yehova, tu sukila oku u yevelela kuenda oku sapela laye. Onjila ya velapo yoku yevelela Yehova oku linga elilongiso Liembimbiliya pokolika. Voku ci linga mua kongela oku tanga loku sokolola Kondaka ya Suku kuenda kalivulu akuavo a kunamẽla Vembimbiliya. Pole, ku ka tende elilongiso liove Liembimbiliya ndoku tẽlisa upange umue wo kosikola. Ocimãho cove a ku patekelako ovolandu ndu okuti, o linga oseteko yimue kosikola. Oku lilongisa Embimbiliya ci kasi ndoku linga ungende umue ukomohĩsa muna o sanda loku limbuka ovina viokaliye viatiamẽla ku Yehova. Nda wa ci linga ci ka pamisa ukamba wove la Yehova.—Tiago 4:8.

9. Ovimalẽho vipi via siata oku ku kuatisa kelilongiso liove lio pokolika?

⁹ Ocisoko ca Yehova ca siata oku sandeka  ovimalẽho vialua vi ku kuatisa kelilongiso liove. Ndeci, ovipama vi tukuiwa hati “Ovopange oku Lilongisa Embimbiliya” ponepa “Amalẽhe” vi sangiwa vo jw.org, vi ku kuatisa oku kapako ovolandu wa lilongisa Vembimbiliya. Vo jw.org o sangamovo onepa hati, olonumbi vioku lilongisa pokasapi “Embimbiliya li Longisa Nye?” ovipama viaco vi ku kuatisa oku pamisa ekolelo liove loku sapuila vakuene ovina o lilongisa. O pondolavo oku sanga olonumbi vikuavo vi ku kuatisa kelilongiso liove liopokolika vo Despertai! ya Kupupu 2009 ponepa “Amalẽhe va Pula  . . . Como Tornar a Leitura da Bíblia Agradável?” Oku lilongisa loku sokolola ci kuete esilivilo koku amamako oku linga eci ci koka epopelo liove.​—Tanga Osamo 119:105.

10. Momo lie ci kuetele esilivilo oku likutilila?

¹⁰ Poku lilongisa Embimbiliya, o yevelela Yehova kuenda eci o likutilila o sapela laye. Ko ka sime okuti ohutililo ocihilahila cimue ale ‘ociteka ceca osoloti.’ Ohutililo yi lomboloka oku sapela Lululiki wetu. Yehova o yongola oku yevelela ovina o popia! (Tanga Va Filipoi 4:6.) Omo liaco, eci o kuata asakalalo, “tuika Yehova ocitele cove.” (Osamo 55:22) Vamanji valua va limbuka okuti ci kuete esilivilo oku kuama onumbi yaco. Oku likutilila ku ku kuatisavo!

11. Momo lie ci kuetele esilivilo oku pandula Yehova olonjanja viosi?

¹¹ Ohutililo epuluviko lika lioku pinga ekuetiso ku Yehova, pole, lioku ecavo olopandu kokuaye. Embimbiliya li tu ivaluisa okuti: “Eci olopandu.” (Va Kolosai 3:15) Olonjanja vimue tu tiamĩsila calua utima kovitangi vietu kuenje ka tu limbuka ovina viwa Yehova a siata oku tu ĩha. Omo liaco seteka ndoco: Oloneke viosi sokolola ovina vitatu wa sanjukila kuenje pandula Yehova omo liovina viaco. Umalẽhe umue o tukuiwa hati Abigail okuti wa papatisiwa eci a kuata 12 kanyamo, wa popia hati: “Yehova o sesamẽla olopandu vietu okuti omunu ukuavo voluali ci sule. Olonjanja viosi nda citava, tu eci olopandu kokuaye omo liovina a siata oku tu ĩha.” Onjanja yimue nda yevele ondaka ya ndi komõhisa. Kuenje nda lipula doco: “Nda poku pasuka ñuete lika ovina nda panduile Yehova hẽla, nye ndi kuata vali?”

12, 13. (a) Momo lie ci kuetele esilivilo oku limbuka ekuatiso lia Yehova komuenyo wove? (b) Vapuluvi api wa limbuka ohenda ya Yehova?

¹² Soma Daviti wa liyaka lovitangi vialua, pole, Yehova wo kuatisa. Eli olio esunga Daviti a popia hati: “Seteki oco vu limbuke okuti Yehova ukuahenda. Omunu wosi o wunda kokuaye o sumũlũha.” (Osamo 34:8) Ocinimbu eci ci lekisa okuti ci kuete esilivilo oku limbuka ohenda ya Yehova. Eci wenda kolohongele ale ceci o tanga Embimbiliya kuenda alivulu akuavo, o limbuka ndomo Yehova a kuatisa vakuene oku amamako lekolelo. Pole, o sukila oku limbuka  ekuatiso lia Yehova komuenyo wove muẽle. Momo lie? Momo ci ku kuatisa oku pamisa ukamba wove la Yehova. Ivaluka hẽ apuluvi wa limbuka okuti Yehova ukuahenda?

¹³ Onjila yimue yi lekisa ohenda ya Yehova yeyi okuti eye wa nõla omonu lomunu pokati ketu oco o vumbe. Yesu wa popia hati: “Lomue iya kokuange, te Isia wa numa, u koka.” (Yoano 6:44) Wa limbuka hẽ okuti Yehova wa ku kokela kokuaye oco u vumbe? Umalẽhe umue pamue o sima ndoco: ‘Yehova wa nõla olonjali viange. Nda ovo ka va kaile Olombangi Via Yehova, sia kũlĩhĩle nda eye nda wa ndi kokela kokuaye. Pole, ivaluka okuti eci o litumbika ku Yehova loku papatisiwa, o fetika oku kuata ukamba laye. Embimbiliya li tu sapuila okuti: “Nda umue o sole Suku, eye wa kũlĩhĩwa laye.” (1 Va Korindo 8:3) Omo liaco, velisapo esumũlũho o kuete lioku kala ekamba lia Yehova.

14, 15. Nye ci ku kuatisa oku kuata utõi woku kunda?

¹⁴ Onjila yikuavo yoku limbuka ohenda ya Yehova, poku kuata utõi woku vangula catiamẽla kekolelo lietu. Vamue va kuete ohele yoku kundila omanu va tangela kumosi kosikola. Ovo va kuata usumba konjila ndomo va ka va tambulula. Kuenje, ka ci leluka kokuavo oku lomboluila vakuavo catiamẽla kekolelo liavo. Nye ci ku kuatisa oku kuata utõi woku kundila omanu o tangela lavo kosikola?

¹⁵ Eci o lipongiya ciwa loku kolela okuti alongiso ove ocili, ekolelo liove li pamisiwa kuenda o kuata onjongole yoku sapuila komanu vakuavo catiamẽla ku Yehova. (Yeremiya 20:8, 9) Omo liaco, o sukila oku pamisa ekolelo liove. Oco o kuatisiwe, kũlĩhĩsa nda olonumbi vioku lilongisa vi sangiwa vo jw.org via sandekiwa kelimi liene. Ovio via sokiyiwa oco vi ku kuatise oku kuata elomboloko lia suapo kovina o lilongisa kuenda esunga lieci wa kolelela kovina viaco. Ovio vi ku kuatisavo ndomo olombolola alongiso ove.

16. Nye umalẽhe umue a linga oco a tẽle oku eca uvangi kosikola?

¹⁶ Ndaño okuti wa lipongiya ciwa, pamue o kuata ohele yoku kundila vana o tangela lavo kosikola. Manji umue ukãi o kuete 18 kanyamo, okuti wa papatisiwa eci a kuata 13 kanyamo, wa popia hati: “Eci ndi yongola oku kundila omunu umue kosikola, ndi kuata ohele yoku popia ovina nda kũlĩha.” Nye a linga oco a yule ocitangi caco? Eye wa popia hati: “Ndi likolisilako oku vangula catiamẽla kalongiso etu lonjila yimue ya leluka. Omanu tu tangela kumosi ka vakuete ohele yoku vangula ovina va linga. Kuenje ndi likolisilakovo oku ci linga. Osimbu tu sapela, ndi vangula ondaka yimue ndeci: ‘Eteke limue nda kala oku longisa Embimbiliya kuenje’ . . . Noke ndamamako lulandu wange. Pole poku ci linga, si tiamisila lonjanga ombangulo yange Kembimbiliya. Kuenje olonjanja vialua vana tu tangela kumosi, va kuata onjongole yoku kũlĩha ndomo elilongilo liaco li lingiwa. Poku kuama onjila  yaco, ca siata oku ñuatisa oku eca uvangi kosikola.”

17. Nye ci ku kuatisa oku eca uvangi lonjila yimue ya sunguluka?

¹⁷ Nye ci ku kuatisa oku eca uvangi lonjila yimue ya sunguluka? Poku lekisa esumbilo loku kapako ovisimĩlo viomunu o sapela laye. Nda wa ci linga, ci leluka oku ku yevelela. Manji Olivia o kuete 17 kanyamo, wa popia hati: “Olonjanja viosi nda kuataile usumba woku kongela Embimbiliya vombangulo yange loku sima okuti, vakuetu va ka ndi tenda okuti nda kakatela calua ketavo.” Nye ca kuatisa manji Olivia oku yula usumba waco? Eye wa sokolola lutate kesilivilo lioku sapuila vakuavo catiamẽla ku Yehova. Eye wa popia hati: “Amalẽhe valua ka va kũlĩhĩle lacimue catiamẽla ku Yehova. Omo liaco, ovisimĩlo viavo viatiamẽla kokuetu via tamba lika kueci tu popia leci tu linga. Nda okuti tu kuete osõi ale ohele yoku vangula catiamẽla kekolelo lietu, nye va ka sima? Nda poku vangula lavo tu petamisa utue, va ka sima okuti tu kuete osõi yoku kala Olombangi Via Yehova. Pamue, va tu tata lãvi. Omo liaco, nda tu vangula lavo lekolelo kuenda lonjila yimue ya sunguluka catiamẽla kalongiso etu, ci leluka kokuavo oku tu sumbila.”

18. Nye o sukila oku linga oco o likolisileko oku linga eci ci koka epopelo liove?

¹⁸ Ndomo tua ci konomuisa, omunu lomunu o kuete ocikele coku likolisilako oku linga eci ci koka epopelo liaye. Voku ci linga, mua kongela oku tanga Ondaka ya Suku, loku sokolola kueci tua tanga, loku pinga ekuatiso ku Yehova poku likutilila kuenda oku sokolola kasumũluho a siata oku tu ihã. Ovina viaco, vi tu kuatisa oku velisapo ukamba wetu la Yehova. Kuenje tu kuatavo onjongole yoku sapuila vakuetu catiamẽla kekolelo lietu.—Tanga Osamo 73:28.

19. Momo lie ci kuetele esilivilo oku likolisilako oku linga eci ci koka epopelo liove?

¹⁹ Yesu wa popia hati: “Nda umue o yongola oku ñuama, ka ka lisokolole vali eye muẽle a tikule uti waye wekangiso kuenje a ñuame.” (Mateo 16:24) Ocisonehua eci ci situlula okuti, Ukristão wosi o kuete ocikele coku kuama Kristu. Omo liaco, o sukila oku litumbika ku Yehova kuenda oku papatisiwa. Vana va fendela Yehova va kuete asumũlũho alua cilo oku kongelamo elavoko lioku kala otembo ka yipui voluali luokaliye. Omo liaco, ci kuete esilivilo oku amamako oku likolisilako oku linga eci ci koka epopelo liove!