1, 2. Nye manji umue a limbuka catiamẽla kokuaye muẽle kuenda nye a linga?

TU KŨLĨHĨSI ulandu wa manji Robert. Eye wa papatisiwa eci a kala umalẽhe, pole ka velisilepo ocili komuenyo waye. Eye wa popia hati: “Sia la linga cimue civĩ, pole nda kala ño oku pita vapongoloko. Nda kala ndu okuti nda pama kespiritu, omo lioku endaenda kolohongele loku talavaya ndukundi wasokamo olonjanja vimue vunyamo. Pole, pa kambele cimue.”

² Manji Robert wa limbuka lika eci co kambelele noke yoku kuela. Eye lukãi waye va lingaile apulilo atiamẽla Kembimbiliya. Ukãi waye wa kũlĩhile ciwa Embimbiliya kuenda wa enda oku tambulula apulilo aco lonjila yimue ya leluka. Pole, manji Robert ka kũlĩhĩle ndomo a tambulula kuenje wa kuataile osõi. Eye wa popia hati: “Ca kala ndu okuti sia kũlĩhĩle cimue. Kuenje nda sokolola ndoco: ‘Omo okuti ame ndutue wukãi wange, ndi sukila oku linga cimue.’” Noke wa ci linga. Eye wa popia hati: “Nda tanga Embimbiliya olonjanja vialua kuenda nda kuata elomboloko kuenje ukamba wange la Yehova wa livokiya.”

3. (a) Nye tu lilongisa kulandu wa manji Robert? (b) Apulilo api tu konomuisa vocipama cilo?

 ³ Ulandu wa manji Robert u tu longisa ovina vialua. Ndaño okuti tu kuete ukũlĩhĩso Wembimbiliya, loku endaenda kolohongele kuenda kupange woku kunda, pole ovina viaco havioko lika vi tu kuatisa oku kula konepa yespiritu. Pamue tu kasi oku likolisilako oco tu loñolohe konepa yespiritu pole, eci tu likũlĩhĩsa etu muẽle tu limbuka okuti tu sukila oku mioñoloha kovina vimue. (Va Filipoi 3:16) Vocipama cilo, tu ka tambulula apulilo atatu a kuete esilivilo: (1) Nye ci tu kuatisa oku limbuka nda tua kula konepa yespiritu? (2) Nye tu sukila oku linga oco tu pame konepa yespiritu? (3) Oku pama konepa yespiritu ci tu kuatisa ndati komuenyo wetu weteke leteke?

4. Elungulo li sangiwa kelivulu lia va Efeso 4:23, 24 li tiamisiwila ku lie?

⁴ Eci tua fetika oku vumba Yehova, tua linga apongoloko komuenyo wetu. Apongoloko aco ka a sulile noke liepapatiso. Momo Embimbiliya li tu sapuila ndoco: “Amamiko oku kuata ovituwa viokaliye.” (Va Efeso 4:23, 24) Omo okuti ka tua lipuile, tu sukila oku amamako oku linga apongoloko. Ndaño okuti tu kasi oku vumba Yehova vokuenda kuanyamo alua, tu sukila oku amamako oku pamisa ukamba wetu laye.—Va Filipoi 3:12, 13.

5. Apulilo api a tu kuatisa oku kũlĩha nda tua tiamisila utima kovina viespiritu?

⁵ Ci kale okuti tuamalẽhe ale tuakulu, tu sukila oku likũlĩhĩsa etu muẽle lutete. Tu pondola oku lipula ndoco: ‘Anga hẽ nda tiamisila utima kovina viespiritu? Ndi kasi hẽ oku setukula Kristu? Ovituwa viange lekalo ndi lekisa kolohongele vi situlula nye? Ovina ndi popia vi lekisa okuti ndi yongola oku kuata omuenyo ko pui? Ovituwa viange vioku lilongisa, luwalo wange, loku liposuisa kuange kuenda ndomo ndi tava kalungulo ci situlula nye kokuange? Ovituwa vipi ndi lekisa eci ndi setekiwa oku linga cimue civĩ? Ndi lekisa hẽ okuti Ndukristão umue wa kula konepa yespiritu? (Va Efeso 4:13) Apulilo aco a tu kuatisa oku kũlĩha ndomo tu pondola oku kula konepa yespiritu.

6. Ocina cipi cikuavo ci tu kuatisa oku kũlĩha nda tua tiamisila utima kovina vespiritu?

⁶ Olonjanja vimue tu sukila ekuatiso lia vakuetu oco tu kũlĩhe nda tua kula konepa yespiritu. Upostolo Paulu wa lombolola okuti omunu ukuetimba, ka kũlĩhĩle okuti ekalo liaye li sumuisa Suku. Pole, omunu ukuespiritu wa kũlĩha ndomo Suku a tenda ovina. Eye wa kũlĩha okuti Yehova ka sanjukila oku tiamisila utima kolonjongole vietimba. (1 Va Korindo 2:14-16; 3:1-3) Akulu vekongelo va kuete ovisimĩlo ndevi via Kristu, va limbuka lonjanga eci vamanji va fetika oku tiamisila utima kovina vietimba kuenje  va va kuatisa. Nda akulu vekongelo va yongola oku tu kuatisa, tu tava hẽ kekuatiso liavo kuenda tu linga apongoloko tu sukila? Nda tua ci linga, tu lekisa okuti tu yongola oku pamisiwa konepa yespiritu.—Ukundi 7:5, 9.

7. Tua kũlĩha ndati okuti omunu ukuespiritu ka sukila lika oku kuata ukũlĩhĩso Wembimbiliya?

⁷ Oku kuata lika ukũlĩhĩso Wembimbiliya oco tu pame konepa yespiritu, ka ci tẽla. Soma Salomone wa kũlĩhĩle ovina vialua viatiamẽla ku Yehova kuenda vimue pokati kolondaka viaye via sonehiwa Vembimbiliya. Pole, noke ukamba waye la Yehova wa tepuluka kuenje ekolelo liaye lia hongua. (1 Olosoma 4:29, 30; 11:4-6) Oco hẽ nye tu sukila vali oku linga oco tu vokiye ukũlĩhĩso wetu Wembimbiliya? Tu sukila oku amamako oku pamisa ekolelo lietu. (Va Kolosai 2:6, 7) Tu ci linga ndati?

8, 9. (a) Nye ci tu kuatisa oku pamisa ekolelo lietu? (b) Ocimãho cipi tu sukila oku kuata eci tu lilongisa embimbiliya loku sokolola ovina tua tanga? (Tala ociluvialuvia kefetikilo liocipama.)

⁸ Kocita catete, Paulu wa vetiya Akristão “oku kala akulu vendamba.” (Va Heveru 6:1) Tu kapako ndati elungulo liaco koloneke vilo? Onjila yimue yiwa yoku ci linga oku tanga elivulu losapi hati, Kali Vocisola ca Suku. Elivulu liaco li ku kuatisa ndomo o kapako olonumbi Viembimbiliya komuenyo wove. Nda wa lilongisa ale elivulu liaco, kuli alivulu akuavo o pondola oku lilongisa oco a ku kuatise oku pamisa ekolelo liove. (Va Kolosai 1:23) Tu sukilavo oku sokolola kovina tua tanga loku pinga ku Yehova oco a tu kuatise oku kapako ovina viaco.

⁹ Eci tu lilongisa Embimbiliya loku sokolola ovina tua lilongisa, tu sukila oku kuata ocimãho coku amamako oku sanjuisa Yehova loku pokola kokuaye. (Osamo 40:8; 119:97) Tu sukilavo oku yuvula ovina vi tu tateka oku kula konepa yespiritu.—Tito 2:11, 12.

10. Nye amalẽhe va sukila oku linga oco va pame konepa yespiritu?

¹⁰ Nda ove umalẽhe o kuete hẽ ovimãho konepa yespiritu? Manji umue o kasi ko Betele  olonjanja vialua, o sapela lamalẽhe va ka papatisiwa kohongele yaco yimbo kuenje amalẽhe vaco vo sapuila ovimãho viavo. Eye o limbuka okuti valua va kuete ovisimĩlo via sunguluka via tiamẽla konjongole yavo yoku vumba Yehova kovaso yoloneke. Vamue va linga esokiyo lioku litumbika kupange wotembo yosi ale oku ilukila kovitumãlo kuli esukila liakundi. Pole, vamue ka va kũlĩhĩle ndomo va tambulula epulilo liaye. Anga hẽ ci lomboloka okuti ka va kuete ovimãho viespiritu? Nda ove umalẽhe lipula ndoco: ‘Nda siata hẽ oku enda kolohongele kuenda kupange woku kunda omo olonjali viange vi yongola okuti ndi ci linga? Ale ndi ci linga omo liukamba ndi kuete la Yehova?’ Ocili okuti vosi yetu tu pondola oku kuata ovimãho viespiritu, ci kale okuti tuamalẽhe ale tuakulu. Ovimãho viaco vi tu kuatisa oku pama konepa yespiritu.—Ukundi 12:1, 13.

11. (a) Nye tu sukila oku linga oco tu kuatisiwe konepa yespiritu? (b) Ulandu upi Wembimbiliya tu sukila oku setukula?

¹¹ Noke yoku limbuka ovina tu sukila oku mioñolola, tu linga apongoloko. Eci ci kuete esilivilo nda tu yongola oku kala lomuenyo. (Va Roma 8:6-8) Yehova wa kũlĩha okuti ka tua lipuile, omo liaco o tu ihã espiritu sandu oco li tu kuatise. Pole, tu sukila oku likolisilako oku linga apongoloko. Manji John Barr, wa tiamẽlele kosungu Yolombamgi Via Yehova onjanja yimue wa lombolola elivulu lia Luka 13:24 hati: “Omanu vamue va lueya omo ka va likolisilako  oku pama konepa yespiritu.” Tu sukila oku kala nda Yakoba wa liyaka lungelo okuti, ka liwekelepo toke eci ungelo o sumũluisa. (Efetikilo 32:26-28) Ndaño okuti elilongiso Liembimbiliya li sanjuisa, ka tu ka li tendi ndocitalukilo cimue conovela. Tu sukila oku likolisilako oco tu sange ovina via velapo vi tu kuatisa.

12, 13. (a ) Nye ci tu kuatisa oku kapako elivulu lia Va Roma 13:5? (b) Ongangu ya Petulu kuenda elungulo liaye vi tu kuatisa ndati? (c) Nye o sukila oku linga oco o kule konepa yespiritu? (Tanga okakasia losapi hati “ Ovina o Sukila Oku Linga Oco o Kule Konepa Yespiritu.”)

¹² Nda tu likolisilako oku kula konepa yespiritu, espiritu sandu li tu kuatisa oku pongolola ovisimĩlo vietu. Kuenje kamue kamue, tu lilongisa oku kuata ovisimĩlo ndevi via Kristu. (Va Roma 15:5) Handi vali, espiritu Sandu li tu kuatisa oku yuvula olonjongole vĩvi kuenda oku kuata ovituwa vi sanjuisa Suku. (Va Galatia 5:16, 22, 23) Nda tua limbuka okuti tu kasi oku tiamisila utima kovokuasi ale kayele, ka tu ka liwekipo oku linga apongoloko. Tu amamiko oku pinga espiritu sandu lia Yehova oco li tu kuatise oku tiamisila utima kovina via sunguluka. (Luka 11:13) Tu ivaluki upostolo Petulu. Eye olonjanja viosi ka kuataile ovisimĩlo ndevi via Kristu. (Mateo 16:22, 23; Luka 22:34, 54-62; Va Galatia 2:11-14) Pole ka liwekelepo, Yehova wo kuatisa. Kuenje kamue kamue, Petulu wa lilongisa oku kuata ovisimĩlo ndevi via Kristu. Tu pondolavo oku ci linga.

¹³ Noke Petulu wa tukula ovituwa vi tu kuatisa. (Tanga 2 Petulu 1:5-8.) Tu sukila oku likolisilako oku kuata ocituwa coku likandangiya, coku pandikisa, coku sola vamanji kuenda coku kuata ovituwa viwa. Olonjanja viosi, tu sukila oku lipula ndoco: ‘Ocituwa cipi ndi sukila oku kuata ci ndi kuatisa oku pama konepa yespiritu?’

14. Oku tiamisila utima kovina viespiritu ci tu kuatisa ndati?

¹⁴ Nda tua kuata ovisimĩlo ndevi via Kristu, ci tu kuatisa oku lekisa ovituwa via sunguluka kupange, kosikola, poku sapela kuenda ndomo tu nõla onjila tu yongola oku kuama eteke leteke. Ovina tu linga ovio vi situlula nda tu kasi oku setukula Kristu. Omo okuti tua tiamisila utima kovina viespiritu, ka tu yongola oku linga cimue ci nyõla ukamba wetu la Yehova. Eci tu setekiwa oku linga cimue cĩvi, ekolelo lietu li ka tu kuatisa oku tamalãla kayonjo. Omo liaco, osimbu ka tua nõlele onjila yimue, tu sukila oku sokolola lutate loku lipula ndoco: ‘Ovinimbu vipi Viembimbiliya vi pondola oku ñuatisa? Nye Kristu nda a linga kocitangi eci? Nye ci sanjuisa Yehova?’ Olonjanja viosi, tu sukila oku sokolola lutate onjila tu nõla. Omo liaco tu kũlĩhĩsa vimue pokati kovina viaco. Omunu lomunu, o sukila oku kũlĩhĩsa olonumbi Viembimbiliya vi pondola oku u kuatisa oku nõla lolondunge onjila yimue.

15, 16. Oku kuata ovisimĩlo ndevi via Kristu ci tu kuatisa ndati oku nõla onjila ya sunguluka ya tiamẽla (a) poku nõla omunu tu kuela laye? (b) poku nõla akamba?

¹⁵ Poku nõla omunu o kuela laye. Onumbi Yembimbiliya yi sanguiwa kelivulu 2 Va Korindo 6:14, 15. (Tanga.) Paulu wa lekisa okuti omanu vakuespiritu ka va tendi ovina ndomo omanu vakuetimba va vi tenda. Onumbi eyi yi ku kuatisa ndati poku nõla omunu o kuela laye?

¹⁶ Poku nõla akamba. Onumbi Yembimbiliya yi sanguiwa kelivulu 1 Va Korindo 15: 33. (Tanga.) Omunu ukuespiritu ka lingi ukamba lomanu va nyõla ekolelo liaye. Sokolola ndomo o kapako ocinimbu eci volonepa via litepa. Onumbi eyi yi ku kuatisa ndati poku nõla akamba vo internet? Yi ku kuatisa ndati poku nõla olomapalo o linga lomanu kua kũlĩhĩle vo internet?

17-19. Oku pama kespiritu ci ku kuatisa ndati (a) oku yuvula ovina ka via sungulukile? (b) oku kuata ovimãho? (c) oku tetulula atatamiso?

¹⁷ Ovilinga vi nyõla ekalo lietu konepa yespiritu. Tu pondola oku sanga elungulo li kuete esilivilo kelivulu lia Va Heveru 6:1. (Tanga.) Nye ci lomboloka “ovilinga viaño” tu sukila oku yuvula? Vi lomboloka ovina vi tu honguisa konepa yespiritu. Elungulo liatiamẽla kovilinga viaño vi tu kuatisa oku tambulula apulilo ndeci: ‘Anga hẽ ovilinga viaco vi ñuatisa ale sio? Citava hẽ okuti ndi li tumbika kovilinga viaco? Momo lie ndi sukilila oku yuvula oku panga onepa kocimunga comanu va seteka oku pongolola ekalo lioluali?’

¹⁸ Ovimãho viespiritu. Vohundo Yesu a lingila Komunda, wa tu ihã olonumbi viwa viatiamẽla kovimãho. (Mateo 6:33) Omunu ukuespiritu o pitisa kovaso Usoma komuenyo waye. Ocisonehua eci ci tu kuatisa oku tambulula apulilo ndeci: ‘Citava hẽ okuti ndi iñila kosikola ya velapo noke yoku malusula elilongiso lia pita pokati? Ndi tava hẽ oku linga upange umue?’

¹⁹ Atatamiso. Elungulo Paulu a eca Kakristão vo ko Roma, li tu kuatisa oku tetulula ovitangi la vakuetu. (Va Roma 12:18) Omo okuti tu setukula Kristu, tu yongola oku kala “vakuambembua lomanu vosi.” Ovituwa vipi tu lekisa eci tu litatamisa la vakuetu? Anga hẽ ci tĩla calua kokuetu oku tava kovisimĩlo via vakuetu? Ale tua kũlĩhiwa okuti tua kua ku koka ombembua?​—Tiago 3:18.

20. Momo lie o yonguila oku amamako oku pama konepa yespiritu?

²⁰ Ovolandu tua konomuisa ndeti, a lekisa ndomo olonumbi Viembimbiliya vi pondola oku tu kuatisa oku nõla onjila yi lekisa okuti, tu kasi oku songuiwa lespiritu lia Suku. Nda tua tiamisila utima kovina viespiritu, tu kuata esanju komuenyo. Manji Robert wa tukuiwa kefetikilo wa popia hati: “Noke yoku pamisa ukamba wange la Yehova nda linga ulume umue uwa kuenda onjali yimue yiwa. Cilo ñuete esanju lialua.” Nda vosi yetu tua amamako oku tiamisila utima kovina viespiritu, tu ka kuata asumũlũho alua. Nda tua ci linga, tu ka kuata omuenyo wesanju cilo kuenda “omuenyo wocili” kovaso yoloneke.​—1 Timoteo 6:19.