Tu Lilembeleki Pokati ‘ca Piãla Enene Cilo’
“Tu likapiko pokati . . . , tu lipamisi pokati, ca piãla enene eci tu limbuka okuti eteke li kasi ocipepi.”—VA HEVERU 10:24, 25.
1. Momo lie upostolo Paulu a vetiyila Akristão va Heveru oco va lipamise pokati ‘ca piãla enene cilo’?
KOCITA catete, upostolo Paulu wa ecele elungulo Kakristão va Heveru hati: “Tu likapiko pokati ndomo tu livetiya locisola kuenda ovilinga viwa, ka tu ka liwekipo oku liongolola kolohongele vietu ndeci vamue va lingainga, pole, tu lipamisi pokati, ca piãla enene eci tu limbuka okuti eteke li kasi ocipepi.” (Va Heveru 10:24, 25) Citava okuti, vamanji va kala oku lipula esunga lieci Paulu a va vetiyila oku lipamisa pokati. Noke yoku pita anyamo atãlo, vamanji va limbuka esunga liaco. Kotembo yaco, va limbuka okuti eteke liesombiso lia Yehova ko Yerusalãi lia kala ocipepi. Ovo va limbukavo okuti va sukilile oku tunda volupale ndomo Yesu a va sapuilile. (Luka 21:20-22; Ovilinga 2:19, 20) Kuenje eteke lia Yehova lieya kunyamo wa 70, eci va Roma va nyõla o Yerusalãi.
2. Momo lie tu sukilila oku livetiya pokati ca piãla enene koloneke vilo?
Yoeli 2:11) Olondaka viuprofeto Sofoniya viokuti: “Eteke linene lia Yehova li li ocipepi; li li ocipepi muẽle, lia yayulako,” vi tiamisiwilavo kotembo yetu. (Sofoniya 1:14) Eli olio esunga lieci tu sukilila oku “likapako pokati ndomo tu livetiya locisola kuenda ovilinga viwa.” (Va Heveru 10:24, etosi.) Tu sukila oku kapako calua vamanjetu ca piãla enene eci va sukila elembeleko.
2 Koloneke vilo, tu sangiwavo vekalo limuamue. ‘Eteke linene lia Yehova halio li linga usumba’ li kasi ocipepi. (HELIE O SUKILA ELEMBELEKO?
3. Nye upostolo Paulu a popia catiamẽla koku pamisa? (Tala ociluvialuvia kefetikilo liocipama.)
3 Kelivulu Liolosapo 12:25 ku popia hati: “Ohele vutima womunu yu petamisa, ondaka yohenda puãi yu petula.” Omo liaco, vosi yetu olonjanja vimue tu sukila elembeleko. Paulu wa lekisa okuti, ndaño muẽle vana va kuete ocikele coku pamisa vakuavo, va sukilavo oku pamisiwa. Eye wa sonehela vamanji ko Roma hati: “Ndi lavoka oku vu moli, okuti ndu wĩhi ongavelo yespiritu oco vu pamisiwi; loku sanga evelo lioku likolisa pokati, okuti ekolelo liene li ñuatisa ame kuenda ekolelo liange liu kuatisivo ene.” (Va Roma 1:11, 12) Ndaño muẽle upostolo Paulu olonjanja vimue, wa sukililevo oku pamisiwa.—Tanga Va Roma 15:30-32.
4, 5. Helie o sukila elembeleko kuenda momo lie?
4 Koloneke vilo, tu sukila oku pandiya vamanji va kasi oku vumba Yehova kupange wotembo yosi, ndeci akundi votembo yosi vakuekolelo. Valua pokati kavo va leluisa omuenyo wavo oco va linge akundi votembo yosi. Tu sukilavo oku pandiya olomisionaliu, vana va talavaya ko Betele, vana va nyũla akongelo lakãi vavo kuenda vana va talavaya koloseketa vioku pongoluila alivulu kalimi. Vosi yavo va likolisilako oku eca otembo yalua kupange wa Yehova. Omo liaco, tu sukila oku va pandiya. Vamanji valua va yongola oku litumbika kupange wotembo yosi, pole, ekalo liavo ka li va ecelela. Ovo va sanjuka calua eci va tambula elembeleko.
5 Helie vali o sukila elembeleko? Tu sukila oku lembeleka vamanji vana okuti, handi ka va kuelele omo va yongola oku pokola kocihandeleko ca Yehova coku kuelela “lika vu Ñala.” (1 Va Korindo 7:39) Akãi va pamisiwa eci alume vavo va va sapuila okuti va soliwe loku sanjukila ovina viosi va siata oku linga. (Olosapo 31:28, 31) Vamanji vana va pandikisa kalambalalo ale vana va vela, va sukilavo elembeleko. (2 Va Tesalonike 1:3-5) Yehova la Yesu va siata oku lembeleka vosi vakuekolelo. Tanga —2 Va Tesalonike 2:16, 17.
AKULU VEKONGELO VA PONDOLA OKU TU LEMBELEKA
6. Nye tu lilongisa catiamẽla kocikele cakulu vekongelo va tukuiwa kelivulu lia Isaya 32: 1, 2?
6 Tanga Isaya 32:1, 2. Tu kasi kotembo ya tĩla, omo liaco ci leluka oku sumua loku hongua. Yesu Kristu wa nõla vamanjaye olombuavekua kuenda ‘olombiali’ via koleliwa vi panga onepa kolomeme vikuavo oco vi tu lembeleke. Olombiali viaco, okuti akulu vekongelo ka ci lomboloka okuti “vacime” cekolelo lietu, pole, va “talavayela” esanju lietu. Ovo va kuete onjongole yoku tu kuatisa oco tu kuate esanju kuenda oku pama kekolelo.—2 Va Korindo 1:24.
7, 8. Akulu vekongelo va eca ndati elembeleko ku va manji?
7 Akulu vekongelo va sukila oku setukula upostolo Paulu, okuti olonjanja viosi wa likolisilako oku pamisa vamanjaye. Eye wa sonehela Akristão vo ko Tesalonike vana va kala oku lambalaliwa hati: “Omo tuo kuateli ohenda, ka tua nõlele lika oku wĩhi olondaka viwa via Suku, pole, tuo wĩhivo ovimuenyo vietu, momo vu soliwi letu.”—1 Va Tesalonike 2:8.
8 Ocili okuti Akulu vekongelo va pondola oku lembeleka calua lolondaka viavo. Anga hẽ eci oco lika va sukila oku linga? Paulu wa sapuila akulu vo ko Efeso hati: “Kuatisi vana va hongua kuenda ivaluki olondaka via Ñala Yesu, eci eye muẽle a popia hati: ‘Esanju li tunda koku eca olio lia velapo, li tunda koku tambula li sule.’” (Ovilinga 20:35) Paulu wa nõlelepo oku ‘pesila cosi’ ku vamanjaye. Eye wa lekisa kovilinga viaye okuti wa nõlelepo oku va lingila ovina viwa. (2 Va Korindo 12:15) Akulu vekongelo va sukilavo oku lekisa okuti va kapako vamanji, halolondakako lika vielembeleko pole, te lovilinga.—1 Va Korindo 14:3.
9. Akulu vekongelo va eca ndati elungulo lonjila yimue yi lembeleka?
9 Akulu vekongelo oco va pamise vamanji, olonjanja vimue va sukila oku eca elungulo. Ovo va sukila oku kuama olonumbi Viembimbiliya poku eca elungulo liaco lonjila yimue yi vetiya. Yesu wa sia ongangu yiwa yoku eca elungulo eci a tuma oku sonehela akongelo o ko Asia Menor, noke yolofa viaye kuenda epinduko. Eye wa eca alungulo amue a sukiliwile kakongelo o ko Efeso, ko Pergamo kuenda ko Tuatera. Pole, osimbu ka ecele alungulo aco, eye wa eca epandiyo kovina viosi viwa va kala oku linga. (Esituluilo 2:1-5, 12, 13, 18, 19) Yesu wa sapuila ekongelo lio ko Laodikea hati: “Vosi vana ndi sole, ndi va lungula loku va pindisa. Omo liaco, kala ukuambili kuenda likekembela.” (Esituluilo 3:19) Akulu vekongelo va kuãivo ongangu ya Kristu poku eca elungulo.
HACIKELEKO LIKA CAKULU VEKONGELO
Alonjali, vu kasi hẽ oku pindisa omãla vene oco va lembeleke vakuavo? (Tala ocinimbu 10)
10. Tu pondola oku lipamisa ndati pokati?
10 Akulu vekongelo havoko lika va sukila oku lembeleka vakuavo. Paulu wa vetiya Akristão vosi oco va vangule “ondaka yiwa yi kolisa, haiyo ya soka lotembo yaco, okuti yi kuatisa” vakuavo. (Va Efeso 4:29) Omo liaco, omunu lomunu pokati ketu o sukila oku limbuka eci vakuavo va sukila oco tu va kuatise. Paulu wa sonehela Akristão va Heveru hati: “Pamisi ovaka a leñela kuenda olongolo via hongua, loku suñamisa olonjila violomãhi viene, oco okuti oku lemãla ka ku livokiya, puãi ku sakuiwa.” (Va Heveru 12:12, 13) Vosi yetu, tu pondola oku lipamisa loku lilembeleka pokati kovina tu popia, ndaño okuti tuamãlehe.
11. Nye ca kuatisa manji Marthe eci a sumuĩle calua?
11 Manji umue ukãi o tukuiwa hati Marthe, wa sumuile calua vokuenda kuotembo yimue. * (Tala etosi pombuelo yemẽla.) Eye wa soneha hati: “Eteke limue, nda likutilila oco a tume umue o ñuatisa. Noke nda sanga manji umue ukãi ukulu. Eye wa ndi tata lohenda kuenda ocikembe okuti ovio ovina nda sukilile vepuluvi liaco. Eye wa ndomboluila ndomo a yula ovitangi ndevi nda kala oku liyaka lavio. kuenje nda limbuka okuti sia kaile lika liange.” Citava okuti manji yaco ka limbukile okuti olondaka viaye vieya oku kuatisa manji Marthe!
12, 13. Tu kapako ndati elungulo li sangiwa kelivulu lia Va Filipoi 2:1-4?
12 Paulu wa sonehela Akristão vo ko Filipoi hati: “Nda vu kuete ekoliso vu Kristu, pamue elembeleko liocisola, ale oku likapako omunu lukuavo, ohenda kuenda ocikembe, suisipo esanju liange poku kala lutima umuamue, locisola cimuamue, loku kala vomunga kuenda oku kuata ovisimĩlo vimuamue. Ko ka lingi cimue loku hoya pamue oku lipanda, pole, loku omboka tendi vakuene okuti va velapo ene vu sule, ko ka sokololi ovina viene lika, puãi sokololivo ovina via vakuene.”—Va Filipoi 2:1-4.
13 Vosi yetu tu sukila oku sanda apuluvi oku likuatisa pokati. Tu pondola oku eca “elembeleko liocisola,” oku “likapako omunu lukuavo” oku likuatela “ohenda kuenda ocikembe” oco tu lembeleke vamanjetu.
OLONJILA VIMUE VIOKU ECA ELEMBELEKO
14. Onjila yipi tu pondola oku kuama poku eca elembeleko?
14 Ci sanjuisa calua oku kũlĩha okuti vana tua kuatisa kosimbu va kasi oku amamako lekolelo. Upostolo Yoano wa soneha hati: “Eci ndi yeva okuti: omãla vange va kasi 3 Yoano 4) Akundi valua votembo yosi va sanjuka calua poku limbuka okuti omanu vana va kuatisa oku kũlĩha ocili, toke cilo va kasi oku amamako oku vumba Yehova lekolelo, citava okuti vamue pokati kavo akundi votembo yosi. Pole, nda akundi votembo yosi va sumua, tu sukila oku va ivaluisa ovina viosi viwa va siata oku linga, poku kuatisa vakuavo.
oku endela vocili, ci ndi sanjuisa calua.” (15. Nye tu sukila oku linga oco tu lembeleke vana va kasi oku vumba Yehova lekolelo?
15 Vamanji valua va nyula akongelo va siata oku popia okuti, ovo kumue lakãi vavo va lembelekiwa eci va tambula epandiyo noke yoku nyula ekongelo limue. Cimuamue haico lakulu vekongelo, lolomisionaliu, lakundi votembo yosi, vamanji va talavaya ko Betele kuenda ku vosi va kasi oku vumba Yehova lekolelo. Poku eca epandiyo kokuavo, tu va pamisa calua.
NDOMO VOSI YETU TU ECA ELEMBELEKO
16. O pondola oku lembeleka ndati omunu umue?
16 Nda o kuete osõi yoku lembeleka umue nye o sukila oku linga? Ocili okuti, oku lembeleka vakuetu ka ca tĩlile calua. Seteka oku lama omunu umue loku eca ocinjola cukamba. Nda omunu waco ka yolelevo, ci lekisa okuti eye o kuete ocitangi cimue. Citava okuti nda wo yevelela, eye o lembelekiwa.—Tiago 1:19.
17. Nye ca kuatisa manji umue ukuenje wa sumuile?
17 Manji umue ukuenje o tukuiwa hati, Henri wa sumuĩle calua eci vamue vakuepata liaye va siapo oku vumba Osamo 46, Sofoniya 3:17, kuenda Marko 10:29, 30.
Yehova. Umue pokati kavo isiaye, okuti wa kala ukulu wekongelo. Manji ukuakunyula akongelo wa limbuka okuti, Henri wa sumua kuenje wo laleka oku yuvila okafe. Manji ukuakunyula akongelo wa yevelela lutate ndomo Henri a situlula ovisimĩlo viaye. Ombangulo yaco ya kuatisa Henri oku limbuka okuti oku kakatela ku Yehova, oyo lika onjila yoku kuatisa vakuepata liaye oku tiuka vocili. Eye wa lembelekiwavo poku tangaVosi yetu tu pondola oku lipamisa kuenda oku lilembeleka pokati (Tala ocinimbu 18)
18. (a) Soma Salomone nye a soneha catiamẽla kelembeleko? (b) Onumbi yipi upostolo Paulu a tukula?
18 Nye tu lilongisila kovolandu a manji Marthe la Henri? Vosi yetu tu pondola oku pamisa kuenda oku lembeleka manji o sukila elembeleko. Soma Salomone wa soneha ndoco: “Oku popia ondaka ya sesamẽla otembo yaco ku sanjuisa u wa yi popia. U ya kuatisa, hesanjuko-o! asapulo awa a pamisa akepa.” (Olosapo 15:23, 30) Wa kũlĩha hẽ omunu umue okuti o kasi lesumuo lialua? Nye ku lingila ovina vimue kokuaye ndeci, oku u tangela Utala Wondavululi ale ocipama cimue vonumbi yetu yo Internet? Paulu wa lombololavo okuti oku imbila kumosi ovisungo Viusoma ci pondola oku tu lembeleka. Eye wa soneha ndoco: “Lilongisi loku likolisa pokati lolosamo, loku sivaya Suku, loku imba ovisungo violopandu kuenda oku imbila Yehova ovisungo vovitima viene.”—Va Kolosai 3:16; Ovilinga 16:25.
19. Momo lie elembeleko li kuetele esilivilo lialua kuenda nye tu sukila oku linga?
19 Omo okuti eteke lia Yehova li kasi ocipepi, ci kuete esilivilo lialua oku lipamisa pokati. (Va Heveru 10:25) Omo liaco, tu kuata esanju nda tua kapako elungulo lia Paulu liokuti: “Amamiko oku likolisa pokati loku lipamisa, ndeci vu kasi ale oku ci linga.”—1 Va Tesalonike 5:11.
^ tini. 11 Olonduko via pongoluiwa.