1, 2. (a) Onima yipi afendeli va Yehova va lavoka oku tambula? (b) Nye ci tu kuatisa oku tiamisila utima konima yaco? (Tala elitalatu kefetikilo liocipama.)

AKRISTÃO olombuavekua va kuete elavoko. Elavoko liaco lioku enda kilu. Upostolo Paulu wa tukula elavoko liaco hati: “Onima ku Suku yekovongo liokilu.” (Va Filipoi 3:14) Ovo va lavoka lesanju oku ka viala la Yesu Kristu Vusoma waye loku linga upange woku kuatisa omanu oco va lipue. (Esituluilo 20:6) Elavoko limue likomoĩsa! Olomeme vikuavo vikuete elavoko lialitepa. Ovio vi lavoka lesanju oku kala otembo ka yi pui Voluali Luokaliye palo posi!—2 Petulu 3:13.

² Paulu wa yonguile oku kuatisa Akristão olombuavekua oco va amameko lekolelo loku tambula onima yavo. Eye wa va sapuila hati: “Tiamisili ovitima viene kovina vio kilu.” (Va Kolosai 3:2) Ovo va sukilile oku tiamisila utima kelavoko liavo liokilu. (Va Kolosai 1:4, 5) Oku sokolola kasumũlũho Yehova a ka  lingila afendeli vaye, ci tu kuatisa oku tiamisila utima kelavoko, ci kale okuti elavoko lietu oku kala kilu ale palo posi.—1 Va Korindo 9:24.

3. Eci Paulu a sonehela va Kolosai nye a popia?

³ Paulu wa sapuilavo Akristão catiamẽla kovina vimue via ponduile oku va tateka oku tambula onima. Vukanda a sonehela vamanji va Kolosai wa tukula eci Akristão vesanda va enda oku popia vati, oku kuama Ocihandeleko ca eciwile ku Mose oco ca velapo okuti oku kolela Kristu ci sule. (Va Kolosai 2:16-18) Paulu wa tukulavo ovina vikuavo okuti toke cilo vi pondola oku tu tateka oku tambula onima yomuenyo. Eye wa lombolola ndomo tu yuvula olonjongole vĩvi kuenda ndomo tu tetulula ovitangi lepata lietu kuenda lavamanjetu vekongelo. Elungulo lia Paulu li tu kuatisavo koloneke vilo. Omo liaco, tu konomuisa alungulo amue vukanda Paulu a sonehela va Kolosai.

4. Momo lie olonjongole vĩvi vi tu tatekela oku kuata onima?

⁴ Upostolo Paulu noke yoku ivaluisa vamanji vo ko Kolosai catiamẽla kelavoko liavo, wa soneha ndoco: “Omo liaco, ipayi ovimatamata vietimba liene okuti vio kilu lieve, ndeci evĩho liukahonga, eliño, oloñeyi viukahonga, oloñeyi vĩvi kuenda ocipululu.” (Va Kolosai 3:5) Olonjongole vĩvi vi pondola oku livokiya calua loku tu vetiya oku nyõla ukamba wetu la Yehova kuenda elavoko lietu lio kovaso yoloneke. Manji umue wa ecelela oku yapuisiwa lo lonjongole vĩvi, okuti noke wa likekembela wa popia hati: “Olonjongole vĩvi via livokiyile calua, nda ci limbuka tupu nda kupukila ale veyonjo liaco.”

5. Ovina vipi vi kapa kohele ekalo lietu kuenda tu liteyuila ndati?

⁵ Pamue tu liyaka lovitangi vi tu vetiya oku sinĩla olonumbi via Yehova. Omo liaco, tu sukila oku kuata utate lolonjongole vĩvi. Vana va kasi oku namulãla va sukila oku limbuka ohele yoku kala lika liavo. Handi vali, eci va fetika oku namulãla va sukila oku sapela ndomo va yuvula ovina via tiamẽla koku lisipula, loku lisisita. Nda va ci linga, ci va kuatisa oku namulãla lonjila yimue ya sunguluka. (Olosapo 22:3) Ocina cikuavo ci koka ohele, ceci tu linga ungende woku enda kupange ale poku talavaya lulume ale lukãi okuti ohueli yetuko. (Olosapo 2:10-12, 16) Nda oco ocitangi cove, sapuila vakuene kupange okuti Vumbangi ya Yehova, lekisa esumbilo kuenda ivaluka okuti oku linga ocitiokoso ka ca sungulukile. Tu pondolavo oku setekiwa oku linga ovina ka via sungulukile eci tu sumua, ale ceci tu liyeva okuti tu kasi ulika. Vepuluvi liaco, pamue tu kuata onjongole yalua yoku kala la umue o tu lembeleka lonjila yi likasi. Pamue tu pua elavoko kuenje tu tava omunu wosi wa lekisa onjongole kokuetu yoku namunãlala. Ovina viaco, vi koka ohele. Nda eteke limue wa kuata ovisimĩlo viaco, ku ka ecelele okuti cimue ci ku tateka oku tambula onima. Sanda ekuatiso lia Yehova kuenda lia vamanji.—Tanga Osamo 34:18; Olosapo 13:20.

6. Momo lie tu sukilila oku kuata utate lovina tu tala levi tu yeva?

⁶ Oco ka tu ka kuate olonjongole vĩvi tu sukila oku yuvula ovitalukilo via vĩha. Koloneke vilo, ovitalukilo via siata oku sandekiwa, vi tu ivaluisa ovina via enda oku lingiwa vo Sodomo lo Gomora. (Yuda 7) Ovisoko vi panga ovitalukilo viaco, vi lekisa okuti oku  linga ukahonga ka cĩviko. Omo liaco, tu sukila oku lavulula. Tu sukilavo oku nõla ciwa ovina tu tala levi tu yeva. Ka tu ka eceleli okuti ovitalukilo tu nõla vi tu tateka oku tambula onima yomuenyo.—Olosapo 4:23.

7. Ovitangi vipi vi pondola oku iya vekongelo?

⁷ Olohongele vietu vi tu kuatisa oku tiamisila utima konima. Kolohongele viaco, tu lilongisa Embimbiliya loku li pamisa pokati locisola la vamanji. Omo liaco, esumũlũho linene oku panga onepa kekongelo Liakristão. Pole, olonjanja vimue pokati ketu peya ovitangi vioku litatamisa. Nda ka via tetuluiwile vi pondola oku koka esumuo locikumbiti.—Tanga 1 Petulu 3:8, 9.

8, 9. (a) Ovituwa vipi vi ka tu kuatisa oku tambula onima? (b) Nye tu sukila oku linga nda manji umue wa tu sumuisa?

⁸ Ka tu ka eceleli okuti ocikumbiti ci tu tateka oku tambula onima. Paulu wa lombolola eci Akristão va sukila oku linga hati: “Omo okuti wa nõliwi la Suku kuenje vu kola, haene wa soliwi, wali ohenda locikembe, lumbombe, loku omboka kuenda epandi. Amamiko oku likapako omunu lukuavo, oku liecela pokati lutima wosi, nda umue o kuetele ondaka ukuavo. Ndeci Yehova o weceli lutima wosi, cimuamue haico vu linga. Pole, kovina evi viosi, ca velapo wali ocisola, momo ci tokeka omanu vomunga yimuamue.”—Va Kolosai 3:12-14.

⁹ Ocisola kuenda ohenda vi tu kuatisa oku ecela vakuetu. Nda wa sumua omo liocina cimue manji umue a popia ale a linga, sokolola apuluvi ove wa popele ale wa lingile cimue ca sumuisa ukuene kuenje wa ku ecela. Ove wa liyeva ndati eci a ku ecela locisola kuenda lohenda? (Tanga Ukundi 7:21, 22.) Tu eca olopandu omo okuti, Kristu lohenda wa kongela afendeli vocili. (Va Kolosai 3:15) Vosi yetu tu fendela Suku umuamue, tu kunda esapulo limuamue kuenda tua siata oku liyaka lovitangi vimuamue. Omo liaco, nda tua kala vakuahenda kuenda vakuakuecela vakuetu, omunga yetu yi ka amamako vekongelo kuenda tu ka tiamisila utima konima.

10, 11. (a) Momo lie esepa likokela ohele? (b) Tu yuvula ndati esepa oku kala vutima wetu?

¹⁰ Vembimbiliya tu sangamo ovolandu a tu kuatisa oku limbuka ndomo esepa, li tu tateka oku tambula onima. Kaini omo liesepa wa ponda manjaye Abele. Kora, la Datana kuenda Avirama, va popia lavĩ Mose momo vo kuatela esepa. Soma Saulu wa kuatelavo esepa Daviti kuenje wa seteka oku u ponda. Eli olio esunga lieci Embimbiliya li popela okuti: “Apa pali ukuse lalivelo, pa kalavo onjuela kuenda ovina viosi via vĩha.”—Tiago 3:16.

¹¹ Oco tu yuvule esepa kuenda onya, tu sukila oku kala vakuacisola kuenda vakuahenda. Ondaka ya Suku yi popia okuti: “Ocisola ci pandikisa kuenda ci lingainga eci ciwa. Ocisola ka ci kuete onya.” (1 Va Korindo 13:4) Onjila yimue yoku yuvula esepa oku kala vutima wetu, oku tenda ovina ndomo Yehova a vi tenda. Yehova o tenda vamanji  vosi vekongelo ndetimba limuamue. Embimbiliya li popia okuti: “Nda ocimatamata cimue ci pandiyiwa, ovimatamata viosi vi yolelela kumuamue laco.” (1 Va Korindo 12:16-18, 26) Nda vamanjetu, va sanjuka omo liocina cimue ciwa, etu tu sanjukavo, ka tu va kuatela onya. Sokolola ongangu yiwa ya Yonatão omõla a Saulu. Eci Daviti a nõliwa oco a linge osoma, Yonatão ko kuatelele esepa. Pole, wo vetiya kuenda wo kuatisa. (1 Samuele 23:16-18) Ndeci Yonatão a linga, tu sukilavo oku kala vakuacisola kuenda vakuahenda.

12. Elungulo lipi Liembimbiliya li kuatisa apata oku tambula onima yomuenyo?

¹² Nda tua kapako alungulo Embimbiliya, vosi vepata tu kuata ombembua kuenda esanju kuenje tu tambula onima. Tu kũlĩhĩsi elungulo Paulu a eca kapata: “Ene akãi, pokoli kalume vene, ndeci vu Ñala. Ene alume, amamiko oku sola akãi vene, ko ka va kuateli onyeño. Ene amãla, pokoli kolonjali viene kovina viosi, momo eci ci sanjuisa Ñala. Ene a vaisia, ko ka wenguli onyeño yomãla vene, oco ka va ka sumue.” (Va Kolosai 3:18-21) Ku tava hẽ okuti epata liove li kuata esanju nda lia kapako elungulo eli?

13. Manji ukãi okuti ulume waye Hambangiko ya Yehova okuatisa ndati ulume waye oku kuata onjongole yoku lilongisa ocili?

¹³ Pamue, ulume wove Hambangiko ya Yehova. Nye o linga nda wa limbuka okuti eye ka ku tati lonjila yimue ya sunguluka? Anga hẽ oku tema laye kuenda oku lihoya cu kuatisa oku pongolola ovituwa viaye?  Ocituwa cove ci ko vetiya hẽ oku lekisa onjongole kocili? Sio. Nda wa lekisa esumbilo kokuaye ndutue wepata, o ka kuatisa epata liove oku kuata ombembua kuenje ci ka sivaya Yehova. Ovituwa viove viwa, vi ka kuatisavo ulume wove oku lilongisa ocili. Kuenje vosi yene vu ka tambula onima.—Tanga 1 Petulu 3:1, 2.

14. Nye manji ulume a sukila oku linga nda ukãi waye okuti Hambangiko ya Yehova ko tati lesumbilo?

¹⁴ Pamue, ukãi wove Hambangiko ya Yehova. Nye o linga nda wa limbuka okuti eye ka ku tati lesumbilo? Anga hẽ oku vangula lukãlu kuenda oku lihoya ci ko vetiya oku ku sumbila? Sio! Yehova o yongola okuti, o kala ulume umue ukuacisola poku setukula ovituwa via Yesu. (Va Efeso 5:23) Yesu utue wekongelo, olonjanja viosi ukuepandi kuenda ukuacisola. (Luka 9:46-48) Nda wa kuama ongangu ya Yesu, citava okuti ukãi wove o ka lekisavo onjongole yoku vumba Yehova.

15. Ulume ukristão o lekisa ndati okuti o sole ukãi waye?

¹⁵ Paulu wa vetiya alume vakuele hati: “Amamiko oku sola akãi vene, ko ka va kuateli onyeño.” (Va Kolosai 3:19) Ulume ukuacisola o sumbila ukãi waye. Ndamupi? Eye u yevelela lutate kuenda o lekisa okuti wa kapako ovisimĩlo viaye. (1 Petulu 3:7) Ndaño okuti, olonjanja vimue ka pondola oku linga ovina ukãi waye a yongola, pole, poku u yevelela lutate cu kuatisa oku nõla onjila yimue ya sunguluka. (Olosapo 15:22) Ulume ukuacisola ka kisika ukãi waye oku u sumbila. Eye o likolisilako oku linga ovina vi vetiya ukãi waye oku lekisa esumbilo kokuaye. Nda ulume o lekisa ocisola kukãi lo komãla vaye,  ci va kuatisa oku vumba kumuamue Yehova loku tambula onima yomuenyo.

16, 17. Ene wamalẽhe, nye ci vu kuatisi eci olonjali viene vi vu lunguli?

¹⁶ Amalẽhe valua va sima okuti olonjali viavo ka via kapeleko ekalo liavo kuenda vi kũlĩhĩsa cosi va yongola oku linga. Wa siatavo oku liyeva ndoco? Citava okuti, o sumua omo liovina viaco kuenje o fetika oku kuata atatahãi nda oku vumba Yehova ci kuete esilivilo ale sio. Pole, nda wa liwekapo oku vumba Yehova o ka limbuka okuti, lomue voluali oku sole vali calua okuti olonjali viove Akristão kuenda vamanji vekongelo ci sule.

¹⁷ Sokolola ndoco: Nda olonjali viove lalimue eteke via ku lunguile, pamue o sima okuti, ‘ka via ku ka kapeleko.’ (Va Heveru 12:8) Nye o linga nda onjila ndomo olonjali viove vi ku lungula ku yi sanjukila? Ku ka tiamisile utima kovina viaco. Ivaluka okuti ovio ka via lipuile. Kuata elomboloko lieci va ci lingila. Likandangiya kuenda ku ka teme lonjanga. Ondaka ya Suku yi popia okuti: “Ukuakukandangiya olondaka viaye eye wa lunguka; u wa tula utima eye ukualondunge.” (Olosapo 17:27) Tu mbika ocimãho coku kala omunu umue ukualondunge okuti o tava kalungulo kuenda ka sandi oku tiamisila utima konjila ndomo alungulo aico a eciwa. (Olosapo 1:8) Ivaluka okuti, oku kuata olonjali vi sole Yehova, ombanjaile imue ya velapo. Ovio vi yongola oku ku kuatisa oku kuata omuenyo ko pui.

18. Momo lie wa nolẽlapo oku tiamĩsila utima konima yomuenyo?

¹⁸ Ci kale okuti o kuete elavoko lioku enda kilu ale lioku kala palo posi, vosi yetu tu tiamĩsili utima konima tu ka tambula kovaso yoloneke. Elavo lietu, liocili. Olio lia kunamẽla kohuminyo Yululiki woluali luosi, una wa popia hati: “Kilu lieve ku yuka ukũlĩhĩso wa Yehova.” (Isaya 11:9) Tu ka kuata esanju lialua eci vosi palo posi va ka longisiwa la Yehova! Omo liaco, tu likolisiliko oco tu ka tambule onima yaco. Olonjanja viosi, ivaluka olohuminyo via Yehova kuenda ku ka ecelele okuti cimue ci ku tateka oku tambula onima yomuenyo!