1. Oku imba ku tu vetiya oku linga nye?

USONEHI umue wovisungo wa popia ndoco: “Olondaka vi ku vetiya oku sokolola. Ocileñi ci vetiya ovisimĩlo. Oku imba ku situlula eci o yevite vutima.” Ovisungo vietu vi situlula esivayo locisola tu kuetele Isietu wokilu, Yehova. Ovio vi pamisa calua ukamba wetu laye. Eli olio esunga oku imba ku kuetele esilivilo kefendelo liocili, ci kale okuti tu imba lika lietu ale la vamanjetu.

2, 3. (a) Vamue va liyeva ndati poku imba vekongelo? (b) Apulilo api tu sukila oku linga?

² O liyeva ndati poku imba vekongelo? Wa siata hẽ oku kuata osõi? Kapata amue, alume vakuete osõi yoku imbila pokati ka vakuavo. Omo liaco, vamanji vamue ka va imbi kolohongele kuenje va lisandela ovopange amue vokuenda kuocisungo. Ocituwa caco, ci pondola oku lisanduila vekongelo, ca piãla enene nda akulu vekongelo loloñuatisi viekongelo ka va eci ongangu yiwa.—Osamo 30:12.

³ Oku imba ku panga onepa kefendelo lietu ku Yehova. Tu sukila oku yuvula oku tunda vokuenda kuocisungo ale oku  pumba epuluvi liaco liohongele. Omo liaco, tu sukila oku lipula ndoco: ‘Ocituwa cipi ndi lekisa poku imba kolohongele? Nye ndi linga oco ndi yule ohele yoku imba kolohongele? Kuenda ndi pondola oku imba ndati ovisungo lutima wosi?’

4, 5. Esokiyo lipi lioku imba ovisungo lia lingiwa vonembele ko Isareli yosimbu?

⁴ Tunde kosimbu afendeli va Yehova va siata oku u sivaya lovisungo. Eci va Isareli va enda oku vumba Yehova lekolelo, va velisilepo calua ovisungo kefendelo liavo. Daviti eci a linga eliangiliyo lioku tunga onembele, wa sokiya eci soka 4.000 kolonjimbi via va Lewi oco vi sivaye Yehova lovisungo. Pokati kavo, ci soka 288 komanu, “va longisiwa oku imbila Yehova ovisungo.”—1 Asapulo 23:5; 25:7.

⁵ Eci onembele ya tumbikiwa, va Isareli va sivaya Yehova lovisungo. Embimbiliya li tu sapuila hati: “Eci vakuakusika olombeta lolonjimbi va katuila pamosi ocisungo coku sivaya loku pandula Yehova, leci ocisungo ca totãla kumue lolombeta layundu lovisikilo vikuavo, kuenje va sivaya Yehova, . . . ulamba wa Yehova wa yukisa onjo ya Suku.” Sokolola ndomo epuluvi liaco lia pamisa ekolelo lia va Isareli!—2 Asapulo 5:13, 14; 7:6.

6. Esokiyo lipi Nehemiya a linga eci a kala ombiali yo ko Yerusalãi?

⁶ Eci Nehemiya a kala oku viala ko Yerusalãi, wa linga esokiyo oco va Isareli va tumbulule ovimbaka vio Yerusalãi kuenda wa lingavo esokiyo liokuti, va Lewi va imba loku sika ovisungo. Ombili va lekisa ya ecelela okuti, oku tumbikiwa kuovimbaka ku kala epuluvi limue liesanju. Nehemiya wa sokiya “ovimunga vivali vinene viava va imba ovisungo.” Ocimunga cimue colonjimbi ca pita konele yondio cikuavo konele yepĩli toke eci va li sanga kovaso yonembele. Ocileñi cavo ca yevala komanu va kala ocipãla. (Nehemiya 12:27, 28, 31, 38, 40, 43) Ocili okuti, Yehova wa sanjukile calua eci a mola afendeli vaye va kala oku imba ovisungo viesiyo lesanju.

7. Yesu wa lekisa ndati okuti oku imba ovisungo ku kuete esilivilo kefendelo Liakristão?

⁷ Koloneke via Yesu, ovisungo via amamako oku kuata esilivilo kefendelo liocili. Tu ci limbukila kueci ca pita kuteke wa velapo womuenyo waye palo posi. Yesu noke yoku lia Ondalelo ya Ñala kumue lolondonge viaye, vosi yavo va imba ovisungo vioku sivaya Yehova.—Tanga Mateo 26:30.

8. Ongangu yipi Akristão vo kocita catete va eca yoku sivaya Yehova lovisungo?

⁸ Akristão vo kocita catete, va eca ongangu yiwa yoku sivaya Yehova lovisungo. Ovo va enda oku lingila olohongele viavo volonjo via vamanji. Pole, ka va liwekelepo oku imbila Yehova ovisungo lutima wosi. Eli, olio esunga lieci upostolo Paulu a vetiyila vamanji Akristão hati: “Lilongisi loku likolisa pokati lolosamo, loku sivaya Suku,  loku imba ovisungo violopandu kuenda oku imbila Yehova ovisungo vovitima viene.” (Va Kolosai 3:16) Ovisungo vielivulu lietu liovisungo, te vi imbiwa ‘lolopandu,’ momo viatiamẽla ‘kokulia ukuenje wa kolelua haeye wa lunguka a siata oku tu ĩha votembo ya sokiyiwa.’—Mateo 24:45.

9. (a) Momo lie vamue vakuetele ohele yoku imba lesanju kolohongele vietu viekongelo kuenda kolohongele vinene? (b) Tu pondola oku imba ndati ovisungo kuenda velie va sukila oku eca ongangu yiwa? (Tala ociluvialuvia kefetikilo liocipama.)

⁹ Vamue vakuete ohele yoku imbila pokati komanu momo ka ca siatele vepata liavo. Vakuavo va siata oku yevelela olonjimbi via loñoloha vovingungu viasapulo ale vo televisão, kuenje eci va li sokisa lavo va sima okuti ka va ci tẽla oku imba. Pole, vosi yetu tu kuete ocikele coku imbila Yehova ovisungo viesivayo. Omo liaco, katula elivulu liove liovisungo, petula utue kuenje imba lesanju! (Esera 3:11; Tanga Osamo 147:1.) Olonjango vialua Viusuma koloneke vilo, vikuete o Televisão, yi lekisa olondaka viovisungo vietu, kuenje ci tu kuatisa oku mioñolola ondaka yetu. Cilo, oku imba ovisungo Viusoma ku pangavo onepa Kosikola Yupange Wusoma yakulu vekongelo. Eci ceca uvangi wokuti akulu, vekongelo va sukila oku eca ongangu yiwa koku imba ovisungo kolohongele viekongelo.

10. Nye tu sukila oku ivaluka nda tu kuete ohele yoku imba?

¹⁰ Valua va kuete ohele yoku imba lolukandi momo va sima okuti ka vakuete elaka liwa. Pole, tu ivaluki okuti,  “vosi yetu tuakuakulueya olonjanja vialua” poku vangula, puãi ka tu liwekapo oku vangula. (Tiago 3:2) Anga hẽ tu liwekapo oku imbila Yehova ovisungo viesivayo omo okuti olondaka vietu ka via lipuile?

11, 12. Tu mioñolola ndati oku imba kuetu?

¹¹ Pamue tu kuata ohele yoku imba momo ka tua kũlĩhĩle ndomo tu imba. Pole, kuli olonumbi vimue via leluka vi tu kuatisa oku mioñolola elaka lietu. *​—Tala etosi pombuelo yemẽla.

¹² Oco wimbe longusu, o sukila oku oku fuima ciwa. Ndeci ocimihĩlo cimue ci sukila ongusu yolusu oco ci taime, ondaka yetu yi sukilavo ongusu poku vangula ale poku imba. O sukila oku imba lolukandi okuti poku vangula ci sule. (Tanga olonumbi vi sangiwa velivulu Kuatisiwa Losikola Yupange Wakristão, kemẽla 181 toke 184, vemehi liokasapi hati, “Oku Fuima Ciwa.”) Embimbiliya lilekisa okuti, oku imba lolukandi ci kuete esilivilo, eli olio esunga lieci li tu vetiyila hati: “Yoleli.”​—Osamo 33:1-3.

13. Lombolola ndomo tu pondola oku imba lekolelo.

¹³ Vokuenda kuefendelo liepata ale kelilongiso liove lio pokolika, kuama olonumbi evi: Nõla ocisungo cimue o sole calua velivulu lietu liovisungo. Tanga olondaka viaco, longusu kuenda lekolelo. Noke, kuama elaka limuamue, poku tukula olondaka viosi vonjanja yimosi. Noke, imba olondaka viaco longusu. (Isaya 24:14) Nda wa ci linga, o mioñolola elaka liove lioku imba kuenje ci ku kuatisa. Omo liaco, ku ka kuate ohele ale osõi poku imba!

14. (a) Onjila ndomo tu yikula omẽla yi kuatisa ndati oku imba ovisungo? (Tala pokakasia losapi hati, “ Ndomo tu Mioñolola Oku Imba Kuetu.”) (b) Olonumbi vipi vi ku kuatisa oku yula ocitangi condaka yove poku imba?

¹⁴ Oco wimbe ciwa, o sukila oku yikula omela wove. Omo liaco, osimbu o kasi oku imba yikula ciwa omela okuti, poku vangula ci sule. Pole, nye o sukila oku linga nda wa limbuka okuti ondaka yove ya hongua ale yetungu? O pondola oku sanga olonumbi vimue vi ku kuatisa pokakasia losapi hati, “Oku Yula Ocitangi Cimue Catiamẽla Kondaka,” ka sangiwa velivulu  Kuatisiwa Losikola Yupange Wakristão, kemẽla 184.

15. (a) Esapulo lipi lia lingiwa kohongele yunyamo wo 2016? (b) Momo lie velivulu liovisungo mua lingiwila apongoloko?

¹⁵ Kunyamo wo 2016, vosi va kala kohongele ya siata oku lingiwa unyamo lunyamo, va kuata esanju lialua eci Manji Stephen Lett watiamẽla Kosungu Yolombangi Via Yehova, a sandeka elivulu liokaliye liovisungo losapi hati, ‘Tu imbili Yehova’ Lesanju. Noke Manji Lett, wa lombolola okuti esunga lieci tu sukilila elivulu liokaliye liovisungo lieli okuti, upopi waco u likuata lo Tradução do Novo Mundo mua lingiwa apongoloko. Upopi waco wa pongoluiwa momo olondaka vimue ka vi sangiwa vali vo Tradução do Novo Mundo. Handi vali, kua vokiyiwa ovisungo viokaliye vi lombolola catiamẽla kupange woku kunda kuenda kocisembi. Omo okuti ovisungo vikuete esilivilo kefendelo lietu, Osungu Yolombangi Via Yehova, yi yongola okuti elivulu liaco li pangiwa lovimãleho viapama. Omo liaco, okapa yaco yi ka kala ndeyi yo Tradução do Novo Mundo.

16, 17. Apongoloko api akuavo a lingiwa velivulu liokaliye liovisungo?

¹⁶ Oco elivulu liovisungo li leluke poku likuama, ovisungo viosi via sokiyiwa ovimunga ndomo ci likuata ulandu lulandu. Ndeci ovisungo viatete 12, vi lombolola eci catiamẽla ku Yehova, noke ovisungo vi kũaimo 8, vi lombolola eci catiamẽla ku Yesu, kocisembi kuenda  kovina vikuavo. Kefetikilo lielivulu liovisungo, ku sangiwa ulala wolosapi viosi. Eci ci kuatisa manji linga ohundo oku nõla ocisungo cimue.

¹⁷ Oco omanu vosi va imbe ovisungo lutima wosi, olondaka vimue via pongoluiwa oco esapulo liovisungo viaco vi lomboloke ciwa. Olondaka vina okuti ka vi tukuiwa olonjanja vialua ndeci, “o sukila,” via piñanyiwavo. Cimuamue haico okuti, ocisungo losapi hati, “Epandi” ca piñanyiwa ndoco, “Lekisi Epandi” kuenda olondaka viocisungo caco via pongoluiwavo. Ca sukilavo oku pongolola osapi yocisungo hati, “Lava Utima Wove,” oyo ya kala ocihandeleko cimue, kaliye ca linga onumbi yokuti, “Tu Lavi Utima Wetu.” Momo lie? Momo olondaka viocisungo caco, via kala ndoku eca elungulo kekongelo. Pole, kolohongele vietu kua siata oku kala omanu valua okuti handi ka va kuete omoko yoku eca alungulo ndeci, amalẽhe, vamanji akãi kuenda vana va lilongisa Embimbiliya. Kuenje poku imba ocisungo caco, citava okuti vamue ka va liyevi ciwa.

18. Momo lie tu sukilila oku lilongisa ciwa ovisungo vietu? (Tala etosi pombuelo yemẽla.)

¹⁸ Ovisungo vialua vi sangiwa velivulu ‘Tu imbili Yehova’ Lesanju, vi sokisiwa lolohutililo. Ovisungo viaco vi tu kuatisa oku situluila Yehova ovisimĩlo vietu. Ovisungo vikuavo, vi tu kuatisa oku lekisa “ocisola kuenda ovilinga viwa.” (Va Heveru 10:24) Tu sukila oku kũlĩha ciwa ovileñi kuenda olondaka viovisungo vietu. Onjila yimue yi tu kuatisa oku ci linga, oku yevelela olondaka via vamanji va imba ovisungo vi sangiwa vonumbi yetu yo jw.org. Omo liaco, nda wa kuata ocituwa coku imba ovisungo konjo yove, o lilongisa oku imba lutima wosi.  *​—Tala etosi pombuelo yemẽla.

19. Vosi vekongelo va pondola ndati oku fendela Yehova?

¹⁹ Ivaluka okuti, oku imba ku panga onepa kefendelo lietu. Poku ci linga, tu lekisa okuti tu sole Yehova kuenda tua sanjukila ovina viosi a siata oku tu lingila. (Tanga Isaya 12:5.) Nda ove imba lesanju, o vetiya vakuene oku ci lingavo. Vosi vekongelo ci kale amalẽhe lakulu, ale vana va fetika ndopo oku lilongisa Embimbiliya, va pondolavo oku fendela Yehova lonjila yaco. Kuenje, ku ka kuate osõi yoku imba lutima wosi. Pokola konumbi yukualosamo wa popia hati: “Imbili Yehova.” Omo liaco, imba lonjolela!​—Osamo 96:1.