1. Omo liekambo lioku lipua, afendeli valua va Yehova va siata oku liyeva ndati?

UPOSTOLO Paulu wa popia hati: “Ngongo yange we!” (Va Roma 7:24) Koloneke vilo, afendeli valua va Yehova va siatavo oku yeva esumuo kuenda asakalalo ndeci ca pita la Paulu. Momo lie? Omo liekambo lioku lipua, pamue tu linga ovina vi sumuisa Yehova kuenje tu sumua. Vamanji vamue va lingile akandu anene kosimbu va simĩle okuti, ka va sesamẽla ongecelo ya Yehova.

2. (a) Elivulu Liosamo 34:22, li lekisa ndati okuti Afendeli va Yehova ka va sukila oku livetela evelo? (b) Nye tu lilongisa vocipama cilo? (Tanga okakasia losapi hati, “ Ocimãho Celilongiso Eli.”)

² Embimbiliya li tu sapuila okuti nda tua sanda ocivundilo ku Yehova, ka tu sukila oku livetela evelo. (Tanga Osamo 34:22.) Oku sanda ocivundilo ku Yehova ci lomboloka nye? Nye tu sukila oku linga nda tu yongola oku kuatisiwa lohenda ya Yehova kuenda ongecelo yaye? Tu pondola oku sanga atambululo aco poku lilongisa catiamẽla kovaimbo ocitililo ko  Isareli yosimbu. Eliangiliyo liaco lia pangele onepa kocisila Cocihandeleko cina ca piñanyiwa Kopendekoste yunyamo wa 33. Pole, Ocihandeleko caco ca tunda ku Yehova. Omo liaco, keliangiliyo liovaimbo ocitililo, tu lilongisako ndomo Yehova a tenda ekandu, la vana va linga akandu kuenda oku likekembela. Tete, tu kũlĩhĩsa esunga lieci va Isareli va kuatela ovaimbo ocitililo kuenda eci va enda oku lingamo.

3. Nye ca enda oku pita nda u Isareli umue wa ponda ocipango?

³ Yehova ka sanjukilile oku pondiwa kuomunu umue ko Isareli. Nda umue wa ponda ukuavo ocipango, ukuepata liomunu wa fa okuti “ukuakufetuluinya osonde,” wa kuatele omoko yoku pondavo omondi yaco. (Atendelo 35:19) Lonjila eyi, omondi ya ponduile oku feta omuenyo waye muẽle omo lioku pesela osonde yomunu ka kuete eko. Ocihandeleko caco ca enda oku kuatisa oku yelisa, Ofeka Yohuminyo. Yehova wa handelekele hati: “Ka citava oku vĩhisa ofeka wa tungi” omo lioku pesela osonde, okuti oku ponda omunu umue.—Atendelo 35:33, 34.

4. Nye ca enda oku pita nda u Isareli umue ka pondele ocipango?

⁴ Nye ca enda oku pita nda u Isareli umue ka pondele ocipango? Ndaño okuti omunu ka pondele ocipango, eye wa kuata eko omo lioku pesela osonde. (Efetikilo 9:5) Pole, kua kala eliangiliyo limue liwa lioku teyuila u wa pita locitangi caco. Omunu waco, wa sukilile oku tila ukuakufetuluinya osonde poku enda pokati kovaimbo epandu ocitililo. Pole, eye wa ponduile oku kalako toke eci ocitunda cinene ci fa.—Atendelo 35:15, 28.

5. Momo lie esokiyo liovaimbo ocitililo li tu kuatisila oku kuata elomboloko lia suapo liohenda ya Yehova?

⁵ Esokiyo liovaimbo ocitililo ka lia tundile kovisĩmilo viomanu. Olio lia tunda ku Yehova. Eye, wa handelekele Yehosua hati: “Sapuila va Isareli siti, ‘Linõleli ene muẽle ovaimbo ocitililo.’” (Yehosua 20:1, 2, 7, 8) Yehova wa sokiya okuti ovaimbo aco a likalela. Esokiyo liaco li tu longisa ovina vialua  viatiamẽla ku Yehova. Li tu kuatisa oku kuata elomboloko liasuapo liohenda ya Yehova. Li tu longisavo ndomo tu sanda ocivundilo ku Yehova koloneke vilo.

6, 7. (a) Nye akulu va enda oku linga nda kua moleha ocitangi cimue comunu wa ponda ukuavo okuti ka ci lingile ocipango? (Tala elitalatu kefetikilo liocipama.) (b) Momo lie ca sungulukile okuti omondi yi sapuilako akulu?

⁶ Nda u Isareli umue wa ponda ukuavo okuti ka cilingile ocipango, eye wa sukilile oku ‘lombolola ocitangi caye’ kakulu pombundi yimbo liocitililo. Akulu va sukilile oku u yolela. (Yehosua 20:4) Noke, ovo vo tiuwiya oco a sombisiwe lakulu vo vimbo muna mua pita ocitangi caco. (Tanga Atendelo 35:24, 25.) Nda akulu va limbuka okuti olofa viaco haviocipangoko, va tuma omondi yaco kimbo liocitililo.

⁷ Momo lie omondi ya sukilile oku sapuilako akulu? Oco akulu va kũlĩhe okuti, ekongelo liosi lia va Isareli lia yelisiwa kuenda oku kuatisa omunu waco oco a kuatisiwevo lohenda ya Yehova. Onoño yimue ukuakukonomuisa Embimbiliya ya soneha okuti, nda omondi ka yandele kakulu, ya sesamẽlele oku pondiwa. Kuenje oyo yi kuata eko omo lioku ponda, momo ka ya pokuile kocihandeleko ca Yehova. Omunu una ka pondele ocipango, wa sukilile oku pinga ekuatiso kuenda oku tava kekuatiso liaco, oco a kale lomuenyo. Nda eye ka endele kimbo liocitilio, ukuepata liomunu wa fa wa kuatele omoko yoku u pondavo.

8, 9. Momo lie manji wa linga ekandu linene a sukilila oku sapuilako akulu vekongelo?

⁸ Koloneke vilo, nda manji umue wa linga ekandu linene o sukila oku enda kakulu vekongelo okuti vo kuatisa oco a tumbulule ukamba waye la Yehova. Momo lie ci kuete esilivilo? Catete, Yehova eye wa sokiya okuti akulu vekongelo va sombisa akandu anene. (Tiago 5:14-16) Cavali, akulu vekongelo va kuatisa vana va likekembela oco va taviwe vali la Yehova kuenda oku yuvula oku pitulula akandu aco. (Va Galatia 6:1; Va Heveru 12:11) Catatu, akulu vekongelo va nõliwa kuenda va pindisiwa oco va kuatise vana va likekembela oku li mbuka okuti Yehova handi o va sole, loku tepulula esumuo liavo kuenda ovisimĩlo vioku livetela evelo. Yehova o sokisa akulu vekongelo “ndocivundilo coku tila ofela.” (Isaya 32:1, 2) Esokiyo liaco, onjila yimue Yehova a siata oku kuama oco a lekise ohenda yaye kokuetu.

⁹ Afendeli valua va Yehova, va limbuka okuti oku sanda ekuatiso kakulu vekongelo ci kavuluisa. Tu kũlĩhĩsi ulandu wa manji Daniel wa lingile ekandu linene, pole, pa pitile olosãi vialua okuti ka sapuilileko akulu vekongelo. Eye wa popia hati: “Noke yoku pita otembo yalua, nda simĩle okuti akulu vekongelo ka va ponduile oku ndi kuatisa. Pole, da kũlĩhĩle okuti ndi ka kuata ovitangi omo liovina nda linga. Olonjanja viosi nda enda oku likutilila ku Yehova osimbu sia popele cimue, nda sukilile oku pinga ongecelo.” Noke, manji Daniel wa pinga ekuatiso kakulu vekongelo. Eye wa amisako hati: “Nda kuatele  usumba woku sapela lakulu vekongelo. Pole, eci nda sapela lavo nda kala ndu okuti umue wa njupa ocilemo kapepe ange. Cilo, lacimue ci tateka ukamba wange la Yehova.” Manji Daniel o kuete utima wa yela kuenda wa linga oñuatisi yekongelo.

10. Oco omunu una ka pondele ocipango a tatiwe lohenda nye a sukilile oku linga?

¹⁰ Oco omunu una ka pondele ocipango a tatiwe lohenda, wa sukilile oku tilila lonjanga kimbo limue liocitililo lia kala ocipepi. (Tanga Yehosua 20:4.) Eye wa ponduile lika oku kala lomuenyo nda wa pitĩla lonjanga vimbo liaco loku kalamo toke eci ocitunda cinene ci fa. Ka ca lelukile oku ci linga. Momo wa sukilile oku sia upange waye, onjo yaye kuenda elianjo liaye lioku linga ovongende. * (Tala etosi pombuelo yemẽla.) (Atendelo 35:25) Pole, a likolisilo aco a kuatele esilivilo. Momo nda wa tundile vimbo liocitililo vepuluvi a yongola, nda wa lekisa okuti ka kapeleko eko liaye kuenje nda wa kapa kohele omuenyo waye.

11. Nye manji umue a sukila oku linga oco a kuatisiwe lohenda ya Yehova?

¹¹ Koloneke vilo, ondingakandu ya likekembela, yi sukilavo oku likolisilako oku linga ovina vimue oco Yehova o wecele. Oyo yi sukilavo oku siapo ovilinga ka via sungulukile. Vovina viaco, mua kongela oku yuvula ovina vi vetiya oku linga ekandu. Upostolo Paulu wa lombolola eci Akristão va likekembela vo ko Korindo va linga. Eye wa soneha hati: “Esunga lialua lio kokeli esumuo li sanjuisa Suku, lio neneli oku liyelisa, oku suvuka eci cĩvi, oku sumbila Suku, onjongole yovutima, ombili kuenda oku pengulula eci ca vĩha!” (2 Va Korindo 7:10, 11) Omo liaco, nda tu likolisilako oku yuvula oku linga akandu, tu lekisa ku Yehova okuti tua kapako ocitangi cetu loku yuvula oku sima okuti, tu pondola oku kuata ohenda ya Yehova ndaño ka tua likolisilileko.

12. Nye manji umue a sukila oku linga oco a mameko oku kuatisiwa lohenda ya Yehova?

¹² Nye manji umue a sukila oku linga oco a mameko oku kuatisiwa lohenda ya Yehova? Eye o sukila oku likolisilako oku siapo ovina a sole, nda viu vetiya oku linga ekandu. (Mateo 18:8, 9) Nda akamba vove va ku vetiya oku linga ovina vi sumuisa Yehova, o ka liwekapo hẽ oku livala ukamba lavo? Nda ku tẽla oku likandangiya oku nyua ovina vi koluisa, o ka yuvula hẽ apuluvi a ku vetiya oku nyua calua? Nda ku tẽla oku likandangiya kolonjongole viukahonga, o yuvula hẽ oku tala olofilme, lovipama vio Internet, ale ovina vikuavo vi ku vetiya oku kuata ovisimĩlo via vĩha? Ivaluluka okuti a likolisilo osi o linga oku pokola kovihandeleko via Yehova a kuete esilivilo lialua. Omo liaco, ci sumuisa calua poku limbuka okuti Yehova wa ku yanduluka. Oku kuata “ocisola ka ci pui” ca Yehova oco ocina ca velapo.—Isaya 54:7, 8.

13. Momo lie omunu wa tilila vimbo liocitililo a ponduilile oku kolapo kuenda oku kuata esanju?

¹³ Osimbu omondi ya kala vokati kimbo liocitililo, ya kolelepo. Yehova wa lombolola eci catiamẽla kovaimbo aco hati: “Alinga ndocitililo cimue kokuene.” (Yehosua 20:2, 3) Yehova ka kisikile okuti omondi yaco yi sombisiwa vali omo lieko liayo. Handi vali, ka sukilile oku kuata usumba momo ukuakufetuluinya osonde ka kuatele omoko yoku iñila vimbo liaco oco o ponde. Osimbu yi kala vimbo liaco, Yehova wa enda  oku yi teyuila. Imbo liocitililo ka lia kaile okayike. Momo omunu wa ponduile oku kuata esanju komuenyo, oku talavaya, oku kuatisa vakuavo, loku vumba Yehova lombembua.

14. Akristão vana va likekembela va sukila oku kuata ekolelo lipi?

¹⁴ Afendeli vamue va Yehova okuti, va lingile akandu anene va siata oku livetela evelo ndaño okuti va likekembela ale. Vamue va sima okuti Yehova lalimue eteke a ka ecela akandu avo. Nda o kuete ovisimĩlo viaco, kolela okuti Yehova nda wa ecela akandu ove ka a sokolola vali. Ku sukila vali oku livetela evelo. Eci oco ca pita lamanji Daniel, wa tukuiwa vocipama cilo. Eci akulu vekongelo volungula loku u kuatisa oco a kuate vali utima wa yela, wa yeva ekavuluko lialua. Eye wa popia hati: “Sia la kuata vali ovisimĩlo vioku livetela evelo. Momo ekandu liaco lia eceliwa ale.” Ndomo Yehova a ci popia, eye o kapa ocipãla a kulueya ove. Lalimue eteke o ka a mola vali.” Omondi noke yoku kala vimbo liocitililo, ka ya sukilile vali oku kuata ohele yokuti ukuakufetuluinya osonde iya kuenje u ponda. Cimuamue haico, okuti Yehova noke yoku ecela akandu etu, ka tu sukila vali oku kuata  ohele yokuti eye o ka tu sombisa vali omo liakandu aco.—Tanga Osamo 103:8-12.

15, 16. Oku kũlĩha okuti Yesu wa feta ocisembi haeye Ocitunda cetu Cinene, ci pamisa ndati ekolelo liove kohenda ya Yehova?

¹⁵ Tu kuete asunga alua oku kolela kohenda ya Yehova okuti, va Isareli ci sule. Kosimbu, ocitunda cinene oco ca enda oku kuatisa va Isareli oku kolela okuti Yehova o pondola oku ecela akandu avo. Pole, lekuatiso Liocitunda cetu Cinene Yesu, tu kuete esunga lioku kolela okuti “tu tambula ocali kuenda oku sanga ohenda ya piãla eci tu sukila ekuatiso.” (Va Heveru 4:15, 16) Yesu, “o tẽla oku popela vana va likutilila ku Suku vonduko yaye, momo otembo yosi o va pingilako.” (Va Heveru 7:24, 25) Omo okuti Yesu wa feta ocisembi, tu pondola oku kuata utima wa yela kuenda ombembua yo vutima. (Va Heveru 9:13, 14) Paulu noke yoku popia hati “Ndukuelamba we” omo ka tẽlele oku pokola ku Yehova lonjila yimue ya lipua, wa amisako hati: “Ngeca olopandu ku Suku vonduko ya Yesu Kristu Ñala yetu!” (Va Roma 7:25) Nye a yonguile oku popia? Ndaño okuti Paulu wa liyaka lolonjongole vĩvi kuenda wa lingile akandu kosimbu, eye wa likekembela. Eye wa kolelele okuti Yehova wo wecela omo liocilumba cocisembi ca Yesu.

¹⁶ Oco Yehova a kale ocivundilo cove, o sukila oku kolela kocilumba ca Yesu. Ku ka kuate lika ocisimĩlo cokuti, ocisembi ombanjaile yimue ya Yehova yoku yovola omanu. Oco ove o kuatisiwe, o sukila oku kolela okuti ocisembi eliangiliyo lia Yehova lioku ku yovola. (Va Galatia 2:20, 21) Kolela okuti omo liocisembi, Yehova wa ecela akandu ove. Kolela okuti ocisembi, ca eca kokuove elavoko lioku kala otembo ka yi pui. Ocilumba ca Yesu ombanjaile yimue Yehova a eca kokuove!

17. Momo lie wa nõlelapo oku sanda ocivundilo ku Yehova?

¹⁷ Ovaimbo ocitililo a tu kuatisa oku limbuka ohenda ya Yehova. Eliangiliyo liaco lia Yehova, li tu longisa okuti omuenyo u kola. Olio li tu longisavo ndomo akulu vekongelo va tu kuatisa oku limbuka eci ci lomboloka elikekembelo liocili kuenda esunga lieci tu kolelela okuti Yehova ecela muẽle akandu etu. Wa siata hẽ oku sanda ocivundilo ku Yehova? Ka kuli ocivundilo cikuavo ca koka okuti ca Yehova ci sule! (Osamo 91:1, 2) Vocipama ci kuãimo, tu ka konomuisa ndomo ovaimbo ocitililo a pondola oku tu kuatisa oku setukula Yehova ongangu ya velapo yesunga kuenda yohenda.