1. Ocisola ca velapo ca kunamẽla pi kuenda o ci lombolola ndati? (Tala elitalatu kefetikilo liocipama cilo.)

YEHOVA eye Ono yocisola. (1 Yoano 4:7) Ocisola ca velapo ca kunamẽla kolonumbi via sunguluka. Vembimbiliya ocisola caco copiwa kondaka yo Helasi yi tukuiwa hati, a·gaʹpe. Vocisola caco, mua kongela ovina vialua okuti oku kuatela ocikembe lohenda komunu umue ci sule. Ocisola caco, tu sukila oku ci lekisa kovilinga oco tu kuatise vakuetu. Oco, ci tu vetiya oku lingila vakuetu ovina viwa. Nda tua kuata ocisola caco, tu ka kuata esanju kuenda ekalo liwa komuenyo.

2, 3. Yehova wa lekisa ndati ocisola komanu?

² Yehova wa lekisa ocisola komanu osimbu handi ka lulikile Adama la Heva. Eye wa lulika ongongo lovina viosi tu sukila oco tu kale lomuenyo. Handi vali, wa panga ongongo lonjila yimue okuti tu kuata esanju komuenjo. Yehova ka lulikile ovina viaco oco a li kuatise eye muẽle. Pole, wa vi lulika oco vi tu kuatise. Noke yoku lulika ongongo, wa panga  omanu kuenje wa va ĩha elavoko lioku kala vocumbo celau palo posi otembo ka yi pui.

³ Noke, Yehova wa lekisa ocisola caye komanu lonjila yimue yi komohĩsa. Ndaño okuti Adama la Heva va lekisa esino, Yehova wa kolelele okuti vamue pokati kocitumbulukila ca Adama va lailekele oku u sola, kuenje wa linga eliangiliyo liocilumba cocisembi comõlaye oco ci va yovole. (Efetikilo 3:15; 1 Yoano 4:10) Tunde eci Yehova a linga ohuminyo yoku eca omõlaye wongunga ndocilumba komanu, kua kambele 4.000 kanyamo. Pole, ohuminyo yaco ya kala ndu okuti ya tẽlisiwile ale. (Yoano 3:16) Omo liaco, tu pandula calua Yehova omo liocisola caye kokuetu!

4. Ovolandu api a lekisa okuti omanu ka va lipuile va pondola oku kuata ocisola cocili?

⁴ Anga hẽ tu pondola oku lekisa ocisola cocili, ndaño okuti ka tua lipuile? Oco, tu pondola. Momo Yehova wa tu lulika lesetãhalo liaye kuenda luloño woku u setukula. Ocili okuti, pamue ka ci leluka kokuetu oku lekisa ocisola caco, pole ci tẽliwa. Abele wa lekisa ocisola cocili ku Suku poku eca lutima wosi ocina ca velapo a kuatele. (Efetikilo 4:3, 4) Noha wa lekisa ocisola cocili eci a kunda esapulo lia Suku vokuenda kuanyamo alua ndaño okuti, omanu ka va yevele kesapulo liaco. (2 Petulu 2:5) Avirahama wa lekisavo okuti ocisola caye ku Suku ca pamele calua poku lekisa onjongole yoku lumba omõlaye Isake a solele calua. (Tiago 2:21) Ndeci alume vaco va kuekolelo va linga, tu pondolavo oku lekisa ocisola caco ndaño okuti pamue ka ci leluka oku ci linga.

5. Volonjila vipi tu lekisa ocisola cocili?

⁵ Embimbiliya li tu sapuila okuti, tu sukila oku lekisa ocisola cocili, pole, ‘ha lolondakako pamue lelimi, te lovilinga kuenda locili.’ (1 Yoano 3:18) Anga hẽ eci ci lomboloka okuti ka tu pondola oku lekisa ocisola kovina tu popia? Sio. (1 Va Tesalonike 4:18) Ci lomboloka okuti, olonjanja vimue oku popia lika okuti “ame ndu ku sole” ka ci tẽla. Tu sukila oku ci lekisa kovilinga. Nda manji umue ka kuete okulia ale uwalo, tu lekisa ocisola kokueye poku u wĩha ovina a sukila. (Tiago 2:15, 16) Cimuamue haico okuti, omo tu sole Yehova kuenda omanu, ka tu likutilila lika oco tu sange omanu valua kupange woku kunda, pole, tu likolisilako oku kunda.​—Mateo 9:38.

6, 7. (a) Ocisola okuti “hacombambeko” ci lomboloka nye? (b) Ovolandu api ocisola cesanda?

⁶ Upostolo Yoano wa popia hati, tu sukila oku sola “lovilinga kuenda locili.” Omo liaco, ocisola cetu “ka ci ka kale combambe.” (Va Roma 12:9; 2 Va Korindo 6:6) Pamue omunu umue, o likembisa oku lekisa ocisola. Anga hẽ ocisola caye cocili kuenda co vutima? Ovisimĩlo vipi a kuete?  Ocisola comunu ukuambambe ci sokisiwa lolombongo ka vikuete esilivilo.

⁷ Tu kũlĩhĩsi ovolandu amue ocisola cesanda. Eci Satana a vangula la Heva vocumbo Cedene, ovina a popia via kala ndu okuti, wa yonguile eci ciwa ku Heva. Pole, ovilinga viaye via lekisa okuti, haciliko. (Efetikilo 3:4, 5) Eci Daviti a kala osoma, wa kuata ekamba limue li tukuiwa hati, Ahitofele. Pole, eye wa lingila usuanji Daviti oco a likuatise eye muẽle. Ovilinga viaye, via lekisa okuti ka kaile ekamba liocili. (2 Samuele 15:31) Koloneke vilo, olonanguluke kumue lomanu vakuavo va siatavo oku nyõla omunga vekongelo “lolondaka viavo viusosẽle lombambe.” (Va Roma 16:17, 18) Ovo va lekisa okuti va kapako vakuavo poku likembisa, pole, va kuacipululu.

8. Epulilo lipi tu sukila oku linga etu muẽle?

⁸ Ocisola cesanda ci kutisa osõi momo ci kuamiwa poku yapuisa omanu. Citava okuti, tu kemba omanu, pole, ka tu pondola oku kemba Yehova. Yesu wa popia hati, omanu vana okuti va kuambambe ‘va kangisiwa calua.’ (Mateo 24:51) Omo okuti tua fendeli va Yehova, ka tu ka kali vakuambambe. Omo liaco, tu sukila oku lipula ndoco: ‘Ocisola cange cocili ale cesanda?’ Tu konomuisa olonjila ecea, vi tu kuatisa oku limbuka okuti ocisola cetu “hacombambeko.”

9. Ocisola cocili ci tu vetiya oku linga nye?

⁹ Sanjukila ekuatiso eca ndaño okuti ovina o linga ka vi limbukiwa lomanu. Tu sukila oku lingila vakuetu ovina viwa lonjila yimue okuti lomue o ci limbuka. (Tanga Mateo 6:1-4.) Ananiya la Safira va lekisa ocituwa ca litepa. Eci va eca ombanjaile yavo va yonguile okuti omanu va ci kũlĩha. Ovo va kemba ondando yolombongo va eca, kuenje va yambuiwa omo liuhembi wavo. (Ovilinga 5:1-10) Nda tu sole vamanjetu, tu ka sanjukila oku va lingila ovina viwa, pole, ha locimãhoko cokuti vakuetu va limbuka eci tua linga. Tu pondola oku lilongisila ku vamanji va siata oku kuatisa Osungu Yolombangi Via Yehova oku pongiya okulia ku pamisa ekolelo. Ovo ka va livelisapo kuenda ka va ecelela okuti, omanu vakuavo va kũlĩha ovopange va kasi oku linga.

10. Tu lekisa dati esumbilo ku vakuetu?

¹⁰ Lekisa esumbilo ku vakuẽne. (Tanga Va Roma 12:10.) Yesu wa lekisa esumbilo kovapostolo vaye eci a sukula kolomãi viavo. (Yoano 13:3-5, 12-15) Ovapastolo va kuata lika elomboloko liovina Yesu a linga noke lioku tambula espiritu sandu. Tu sukila oku likolisilako oku lekisa umbombe ndeci Yesu a linga kuenda oku kuatisa vakuetu. (Yoano 13:7) Tu lekisa esumbilo ku vakuetu poku yuvula  oku sima okuti tua velapo, omo okuti tua tanga calua, tu lowasi ale tu kuete ovikele vi likasi. (Va Roma 12:3) Tu yuvulavo oku kuatela onya vakuetu eci va pandiyiwa, pole, tu sanjuka lavo ndaño tu sima okuti tu sukilavo oku pandiyiwa.

11. Momo lie epandiyo lietu li sukilila oku kala liocili?

¹¹ Pandiya lutima wosi. Sanda apuluvi oku pandiya vakuene. Vosi yetu tua kũlĩha okuti, epandiyo “ondaka yiwa yi kolisa” vakuetu. (Va Efeso 4:29) Omo liaco, poku eca epandiyo ku vakuetu, tu sukila oku kolela okuti tua ci linga muẽle lutima wosi, ha lombambeko. Omanu vamue va siata oku eca epandiyo locimãho coku yuvula oku kuatisa omunu umue oku mioñoloha. (Olosapo 29:5) Pole, omunu wosi o pandiya ukuavo noke u popela konyima, ukuambambe. Ocisola ca Paulu ca kala cocili. Eci a sonehela Akristão vo ko Korindo, eye wa va pandiya omo liovina viwa va enda oku linga. (1 Va Korindo 11:2) Pole, eci va sukilile oku lunguiwa, eye wa enda oku va lomboluila locisola esunga liaco.—1 Va Korindo 11:20-22.

12. Tu lekisa ndati ocisola cocili eci tu yekisa akombe?

¹² Kuata ocituwa coku yekisa akombe. Yehova o tu handeleka oco tu kale vakuacali la vamanjetu. (Tanga 1 Yoano 3:17.) Pole, tu sukila oku kuata ocituwa ca sunguluka poku yekisa akombe. Tu sukila oku lipula ndoco: ‘Ndi laleka lika akamba vange ale vana va kuete ovikele vekongelo? Ndi laleka lika omanu ndi sima okuti va ka ndi lingilavo ovina vimuamue? Ale ndi lekisa ocali ku vamanji vosi ndaño vana okuti sia va kũlĩhĩle ciwa?’ (Luka 14:12-14) Kũlĩhĩsa apulilo akuãimo: Nye tu linga nda manji umue o sukila ekuatiso omo lioku nõla onjila yimue okuti ka sokoluile vali? Ale nye tu linga nda omunu umue tua siata oku laleka konjo yetu lalimue eteke a lekisa olopandu? Yehova o tu handeleka hati: “Lipoki pokati, halokuliyeyako.” (1 Petulu 4:9) Nda tu kuama elingulo eli tu kuata esanju lialua eci tu eca lutima wa sunguluka.—Ovilinga 20:35.

13. (a) Vapuluvi api tu sukila oku lekisa epandi? (b) Nye tu sukila oku linga oco tu kuatise vana va hongua?

¹³ Kuatisa vana va hongua. Embimbiliya li tu handeleka okuti, tu sukila “oku kuatisa vana va hongua.” (1 Va Tesalonike 5:14) Vamanji valua okuti va honguele, noke va pamisa vali ekolelo liavo. Pole, vakuavo va sukila okuti tu lekisa epandi kokuavo loku vakuatisa locisola. Tu va kuatisa ndati? Tu ci linga poku va lembeleka  Lembimbiliya, oku va laleka oco tu kundile kumosi, ale oku va yevelela lutate. Handi vali, tu yuvuli oku sima okuti vamanjetu “va pama” ale “va hongua.” Tu sukilavo oku ivaluka okuti, vosi yetu tua siata oku linga ovina vi lekisa okuti tua pama ale tua hongua. Ndaño muẽle upostolo Paulu wa kũlĩhĩle okuti wa honguele. (2 Va Korindo 12:9, 10) Omo liaco, vosi yetu tu sukila ekuatiso kuenda elembeleko lia vakuetu.

14. Nye tu sukila oku linga oco tu amameko oku kala lombembua la vamanji?

¹⁴ Kala ukuambembua. Oku kala lombembua la vamanji, ci kuete esilivilo. Ndaño va tu lingila ovina vimue ka via sungulukile, tu likolisiliko oku linga ovina vi koka ombembua. (Tanga Va Roma 12:17, 18.) Nda tua sumuisa omunu umue, tu sukila oku pinga ongecelo lutima wosi. Ka tu ka popi lika tuti: “Nda sumua calua omo o liyevite ndoco.” Tu limbuki eko lietu poku popia hati: “Sia yonguile oku ku sumũisa.” Pole, tu ci linga lutima wosi. Ombembua yi kuetevo esilivilo volohuela. Ka ca sungulukile nda ulume lukãi waye eci va kasi pokati ka vakuavo va lekisa okuti, va likuetele ocisola, pole, eci va kasi lika liavo ka va sapela, va lihoya, ale va litĩla.

15. Tu lekisa ndati okuti ongecelo yetu yocili?

¹⁵ Lieceli lutima wosi. Nda umue wa tu lingila cimue cĩvi, tu ecela omunu waco kuenda oku ivalako ovina a tu lingila. Tu ecela lutima wosi ndaño okuti omunu waco ka limbukile eko liaye. Momo Embimbiliya li tu vetiya oku, ‘pandikisa omunu lukuavo locisola, loku kuata ombembua omunu lukuavo, loku likolisila oku likuata omunga, yina tua tambula omo liespiritu sandu.’ (Va Efeso 4:2, 3) Oco tu ecele lutima wosi, tu sukila oku liwekapo oku sokolola ovina vĩvi va tu lingila, momo  ocisola “ka ci patekela onyeño.” (1 Va Korindo 13:4, 5) Nda tua kala va kuacikumbiti, tu nyõla ukamba wetu la vamanji kuenda la Yehova. (Mateo 6:14, 15) Tu lekisavo okuti ongecelo yetu yocili eci tu likutililako omunu wa tu lueyela.—Luka 6:27, 28.

16. Nda tua tambula ocikele cimue kupange wa Yehova ocituwa cipi tu sukila oku lekisa?

¹⁶ Likolisilako oku kuatisa vakuene. Eci tu tambula ocikele cimue kupange wa Yehova, tu lekisa okuti ocisola cetu cocili poku yuvula, oku “sanda eci [cetu] muẽle, te cukuavo.” (1 Va Korindo 10:24) Kolohongele vietu vimbo levi viofeka, vamanji olonjilike va handelekiwa oku pitĩla selo, pole, ka va nõlapo oku vala ocitumãlo ca velapo, kumue lepata liavo. Ovo, va nõlapo oku tumãla kovitumãlo va ilikiwila. Poku ci linga, va lekisa ocisola cocili. O setukula ndati ongangu yavo yiwa?

17. Nda manji umue wa linga ekandu linene, ocisola cocili ci u vetiya oku linga nye?

¹⁷ Ku ka Limbike akandu . Vamanji vamue eci va linga akandu anene, va seteka oku limbika akandu aco. Citava okuti, va kuata osõi ale va sima okuti ka va yongola oku sumuisa vakuavo. (Olosapo 28:13) Pole, oku limbika ekandu ka ca sungulukile momo ci kapa kohele ekalo liomunu waco kuenda lia vakuavo. Ndamupi? Yehova o liwekapo oku sumũluisa ekongelo lespiritu sandu liaye kuenje ekongelo ka li kuata ombembua. (Va Efeso 4:30) Omo liaco, nda manji umue wa linga ekandu linene, ocisola cocili ci ko vetiya oku sapuilako akulu vekongele oco a tambule ekuatiso li sukiliwa.—Tiago 5:14, 15.

18. Ocisola cocili ci kuete esilivilo lipi?

¹⁸ Ocisola oco ca velapo pokati kovituwa viosi. (1 Va Korindo 13:13) Ocisola ci kuatisa omanu oku limbuka olondonge viocili via Yesu kuenda oku limbuka vana va setukula Yehova, Ono yo cisola. (Va Efeso 5:1, 2) Paulu wa popia okuti nda eye ka kuatele ocisola, eye hacimueko. (1 Va Korindo 13:2) Omo liaco, vosi yetu tu amamiko oku lekisa ocisola, ‘halolondakako pamue lelimi, te lovilinga kuenda locili.’