1, 2. Kunyamo wo 2018 ohongele yipi yi ka kongela omanu valua kuenda momo lie epuluvi limue li likasi? (Tala elitalatu kefetikilo liocipama.)

KETEKE 31 Yelombo wo 2018, afendeli va Yehova lomanu vakuavo va lilongisa Embimbiliya voluali luosi, va ka liongolola oco va linge Ocipito Conjivaluko violofa via Kristu. Ka kuli ocipito cikuavo ci kongela omanu lonjila yimue yi likasi voluali. Momo lie? Momo keteke liaco poku iñila kuekumbi, Olombangi via Yehova voluali luosi vi ka ivaluka ocilumba cocisembi Yesu a eca komanu.

² Ocili okuti, Yehova la Yesu va sanjuka calua poku mola omanu valua va enda Kocipito Conjivaluko voluali luosi veteke limuamue. Embimbiliya li situlula eci catiamẽla “kowiñi wakahandangala, okuti lomue wa tẽla oku u tenda, wa tunda kolofeka viosi, kapata osi, komanu vosi kuenda kalimi osi.” Ovo va kaluka lolukandi vati: “Epopelo li tunda ku Suku yetu, una wa tumãla kocalo kuenda ku  Kameme.” (Esituluilo 7:9, 10) Unyamo lunyamo, ci sanjuisa calua poku mola ndomo Yehova la Yesu va sivayiwa keteke Liocipito Conjivaluko.

3. Nye tu lilongisa vocipama cilo?

³ Vocipama cilo, tu lilongisa atambululo apulilo ndeci: (1) Tu lipongiyila ndati Ocipito Conjivaluko kuenda momo lie ci kuetele esilivilo? (2) Ocipito Conjivaluko ci kuatisa ndati afendeli va Yehova oku likuata omunga? (3) Nye tu sukila oku linga oco pokati kafendeli va Yehova pa kale omunga? (4) Ocipito Conjivaluko ca sulako ci ka lingiwa otembo yipi?

4. Momo lie ci kuetele esilivilo oku kala Kocipito Conjivaluko?

⁴ Momo lie ci kuetele esilivilo oku kala Kocipito Conjivaluko? Momo olohongele vietu vi panga onepa kefendelo lietu ku Yehova kuenda Ocipito Conjivaluko oyo ohongele ya velapo yunyamo. Yehova la Yesu va kapako calua vana va enda Kocipito Conjivaluko. Yehova la Yesu va sanjuka calua eci tu likolisilako oku enda kohongele yaco. Nda ovilinga vietu vi lekisa okuti tua velisapo olohongele, Yehova o soneha olonduko vietu “velivulu liaye lionjivaluko.” Elivulu liaco, li tukuiwavo okuti “elivulu liomuenyo,” muna mu sangiwa olonduko viomanu va ka kuata omuenyo ko pui.—Malakiya 3:16; Esituluilo 20:15.

5. Tu ‘li kũlĩhĩsa ndati nda tu kasi vekolelo’?

⁵ Tu lipongiyila Ocipito Conjivaluko poku ‘li kũlĩhĩsa nda tu kasi vekolelo.’ (Tanga 2 Va Korindo 13:5.) Tu ci linga ndati? Onjila ya velapo yoku ci linga oku sanda otembo yoku sokolola loku likutilila ndomo ukamba wetu la Yehova ukasi. Tu sukila oku lipula ndoco: ‘Ndi tava hẽ okuti ocisoko ca Yehova oco lika ci linga ocipango caye? Ñasi hẽ oku likolisilako oku kunda olondaka viwa? Ovilinga viange vieca uvangi wokuti tu kasi koloneke via sulako kuenda oluali lua Satana ndopo lukunduiwa? Ñasi hẽ oku amamako oku kolela ku Yehova kuenda ku Yesu ndeci nda lingaile eci nda fetika oku vumba Yehova?’ (Mateo 24:14; 2 Timoteo 3:1; Va Heveru 3:14) Oku sokolola kapulilo aco ci tu kuatisa oku limbuka nda tu kasi oku amamako oku pamisa ekolelo lietu.

6. (a) Nye tu sukila oku linga oco tu kuate omuenyo ko pui? (b) Nye ukulu umue wekongelo a siata oku linga oco a lipongiyile Ocipito Conjivaluko? (c) O lipongiyila ndati Ocipito Conjivaluko?

⁶ Onjila yikuavo yoku lipongiyila Ocipito Conjivaluko, poku tanga loku sokolola kovipama vi lombolola esilivilo liaco. (Tanga Yoano 3:16; 17:3.) Oco tu kuate omuenyo ko pui, tu sukila oku kũlĩha Yehova loku “kolela” Yesu. Tu kũlĩhisi ulandu wamanji umue ukulu wekongelo okuti, vokuenda kuanyamo  alua wa siata oku lipongiyila Ocipito Conjivaluko. Pa pita ale otembo yalua tunde eci a fetika oku soleka ovipama Viutala Wondavululi vi lombolola Ocipito Conjivaluko kuenda kocisola Yehova la Yesu va tu kuetele. Eci pa kamba olosemana vimue, o tanga vali ovolandu aco loku sokolola kesilivilo Liocipito caco. Olonjanja vimue, o sandavo oku vokiya ovipama vimue kovipama a soleka. Eye o tangavo Vembimbiliya ulandu watiamẽla Konjivaluko. Wa amisako hati, poku ci linga o lilongisa ovina viokaliye anyamo osi. Eye wa limbukavo okuti ci pamisa ocisola a kuetele Yehova la Yesu. Momo lie ku lingila ovina vimuamue? Konomuisa ovipama vi pamisa ukamba wove la Yehova kuenda Yesu. Noke sandiliya otembo yoku tanga loku sokolola kovipama viaco. Nda wa ci linga, o ka lipongiyila ciwa Ocipito Conjivaluko.

7. (a) Nye Yesu a pinga vohutililo noke Yondalelo yatete ya Ñala? (b) Nye ci lekisa okuti Yehova wa tambulula ohutililo ya Yesu?

⁷ Kuteke Wondalelo yatete ya Ñala, Yesu wa linga ohutililo yimue yi likasi. Yesu wa pinga oco olondonge viaye vi kale vomunga yimuamue ndeci eye a kasi la Isiaye. (Tanga Yoano 17:20, 21.) Yehova wa tambulula ohutililo yaye kuenje Ocipito Conjivaluko ceca uvangi waco. Keteke liaco, voluali luosi omanu vokolofeka viosi va liongolola oco va fendele Yehova. Kovitumãlo vimue, ca tĩla calua oku mola omanu vakuapata añi añi oku liongoluila pamosi oco va fendele. Kovitumãlo vikuavo, omanu va pisa elinga liaco. Pole, Yehova la Yesu va tenda omunga yetu ndocina cimue ca posoka.

8. Esapulo lipi Yehova a ecele ku Esekiele?

⁸ Omunga yi sangiwa pokati ketu, hacinako cokaliye. Yehova wa popele okuti afendeli vaye va ka likuata omunga. Kũlĩhĩsa esapulo Yehova a ecele ku Esekiele liatiamẽla kombueti “ya Yuda” kuenda “ya Yosefe.” (Tanga Esekiele 37:15-17.) Esapulo liaco, li sangiwa Vutala Wondavululi Wevambi Linene wo 2016, liokuti: ‘Vocitumasuku ca Esekiele, Yehova wa likuminyile okuti, afendeli vaye va laikele oku tiukila Kofeka Yohuminyo okuti, va kongeliwa vali, oco va linge ofeka yimosi. Ocitumasuku eci ci tu longisavo okuti, koloneke via sulako, afendeli va Yehova va laikele oku likuata omunga.’

9. Oku tẽlisiwa kuocitumasuku ca Esekiele ca siata oku limbukiwa ndati anyamo osi?

⁹ “Ombueti ya Yuda” yi lomboloka Akristão olombuavekua kuenda “ombueti ya Yosefe” yi lomboloka olomeme vikuavo ale omanu va kuete elavoko lioku kala palo posi. Yehova wa popele okuti wa laikele oku kongela olombueti viaco vivali, oco ‘vi kale ombueti yimosi.’ (Esekiele 37:19) Oku upisa kunyamo wo 1919, Yehova wa fetika oku ongolola loku kongela olombuavekua. Noke, etendelo liolomeme vikuavo lia fetika oku livokiya. Kuenje ovimunga viaco vivali via linga “ocunda cimuamue.” (Yoano 10:16; Sakariya 8:23) Ovo, va kasi oku vumba Yesu Kristu una vocitumasuku ca Esekiele  Yehova a tukula hati, “ukuenje wange Daviti.” (Esekiele 37:24, 25) Unyamo lunyamo, vokuenda Kuocipito Conjivaluko tua siata oku mola oku tẽlisiwa kuocitumasuku ca Esekiele. Vepuluvi liaco, olombuavekua kuenda olomeme vikuavo, vi liongolola oco va ece olopandu ku Yehova omo liocilumba ca Yesu. Pole, omunu lomunu o kuatisa ndati komunga yi kasi pokati kafendeli va Yehova?

10. Tu kuatisa ndati komunga yi kasi pokati kafendeli va Yehova?

¹⁰ Onjila yimue yoku kuatisa komunga yafendeli va Yehova, oku lekisa umbombe. Eci Yesu a kala palo posi wa sapuila olondonge viaye oco vi lekise umbombe. (Mateo 23:12) Omanu valua voluali va litenda okuti va velapo vakuavo. Pole, nda tua kala ambombe ka tu litendi okuti tua velapo vakuetu. Handi vali, tu lekisa epokolo kuenda eliketiso ku vamanji va kuete ocikele coku songola vekongelo. Poku ci linga, ci kuatisa oku likuata omunga vekongelo kuenda ca velapo tu sanjuisa Yehova. Embimbiliya lipopia ndoco: “Yehova o tamalãla la vakuakulipanda, puãi o lekisa ohenda ya piãla kambombe.”—1 Petulu 5:5.

11. Momo lie oku sokolola kelomboloko liombolo kuenda liovinyu Viocipito Conjivaluko ci pamisila omunga yetu?

 ¹¹ Onjila yikuavo yoku kuatisa komunga yafendeli va Yehova, oku sokolola lutate kelomboloko liombolo kuenda liovinyu Viocipito Conjivaluko. Osimbu ka tua endele Kocipito Conjivaluko, capiãla enene kuteke waco, sanda otembo yoku sokolola lutate kelomboloko liombolo ka yi kuete etumbisa kuenda kovinyu. (1 Va Korindo 11:23-25) Ombolo yi lomboloka etimba lia lipua lia Yesu kuenda ovinyu yi lomboloka osonde yaye yina a pesela. Pole, oku kuata lika elomboloko liovina viaco ka ci tẽla. Tu sukila oku ivaluka okuti vocilumba cocisembi ca Yesu mua kongela alinga avali ocisola ca velapo. Ocilumba cocisembi, olio elinga lia velapo liocisola ca Yehova kokuetu poku tu ihã omuenyo Womõlaye. Handi vali, Yesu wa lekisavo elinga lia velapo liocisola poku lieca olumue oco a tu file. Eci tu sokolola kocisola ca Yehova leci ca Yesu, ocisola cetu kokuavo ci li vokiya. Ocisola caco ci pamisa omunga yetu.

12. Nye Yesu a tu handeleka okuti oco Yehova a tu yonguila?

¹² Tu kuatisavo komunga yafendeli va Yehova eci tu ecela vamanji. Poku ci linga, tu lekisa olopandu ku Yehova omo okuti wa siatavo oku tu ecela lekuatiso liocilumba ca Yesu. Oco o kuate elomboloko liesilivilo lioku ecela, tanga ulandu Yesu a tukula kelivulu lia Mateo 18:23-34. Noke li pula ndoco: ‘Ndi likolisilako hẽ oku kapako ovina Yesu a longisa?’ Ndi tata hẽ vamanji lepandi loku kapako ovisimĩlo viavo? Nda nõlapo hẽ oku ecela vana va ndi lueyela?’ Ocili okuti, akandu amue anene calua okuti etu ka tualipuile ka ci leluka oku ecela. Tu sukilavo oku ivaluka ovina Yehova a tu yonguila. (Tanga Mateo 18:35.) Yesu wa tu handeleka oku ecela vamanji eci va likekembela lutima wosi. Momo nda ka tu ecela vamanji, Yehova ka tu ecelavo. Eci ci tu vetiya oku sokolola lutate. Omo liaco, oco tu teyuile omunga yetu tu sukila oku linga eci Yesu a tu handeleka okuti: oku ecela vamanji.

13. Nye ci tu kuatisa oku kala vakuakuecela?

¹³ Ocina cimue ci tu kuatisa oku ecela, oku kuata ocituwa coku lisunguluisa. Upostolo Paulu wa popia hati, tu sukila oku ‘likolisilako oku likuata omunga, yina tua tambula omo liespiritu sandu.’ (Va Efeso 4:3) Omo liaco, kotembo Yonjivaluko sokolola ndomo wa siata oku tata omanu. Lipula ndoco: ‘Anga hẽ omanu va kũlĩha okuti si kuacikumbitiko? Omanu va kũlĩha okuti nda siata oku likolisilako oku kala ukuambembua loku likuata omunga?’ Otembo Yocipito Conjivaluko, epuluvi limue liwa lioku likũlĩhĩsa nda tu sukila oku vokiya kocituwa cetu coku ecela.

14. Tu setukula ndati Yehova?

¹⁴ Onjila yikuavo yoku kuatisa komunga yetu, oku setukula Yehova loku lekisa ocisola. (1 Yoano 4:8) Vamue va siata oku popia vati: “Kuli vamanji ndi sole, vakuavo oku pandikisa ño lavo. Anga hẽ ca sunguluka oku sima ndoco? Kelivulu lia va Efeso 4:2 upostolo Paulu wa tu lungula ndoco: ‘Pandikisi omunu lukuavo locisola.’ Pokati koku pandikisa ño la vamanji loku pandikisa lavo locisola pali etepiso. Vekongelo tu sangamo omanu vakuapata añi añi, pole vosi yavo Yehova wa va kokela kokuaye. (Yoano 6:44) Nda Yehova wa va kokela kokuaye ci lekisa okuti va sesamẽlavo ocisola caye. Nda va sesamẽla  ocisola ca Yehova, tu popia ndati okuti ka va sesamẽla ocisola cetu? Lalimue eteke ka tu ka sinĩli ocihandeleko ca Yehova coku sola vamanji vosi.—1 Yoano 4:20, 21.

15. Ocipito Conjivaluko ca sulako ci ka lingiwa otembo yipi?

¹⁵ Eteke limue ku ka lingiwa Ocipito Conjivaluko ca sulako. Tua ci kũlĩha ndati? Kelivulu 1 Va Korindo 11:26, upostolo Paulu wa sapuila Akristão olombuakua oco va lingainge Ocipito Conjivaluko colofa via Yesu, unyamo lunyamo. Ovo va “sapula oku fa kua Ñala, toke eci eya.” Yesu vocitumasuko caye ca tiamẽla kotembo yesulilo wa tukula “okuiya” kuaye. Poku popia catiamẽla kohali yapiãla eye hati: “Ondimbukiso ya Mõlomunu yi ka molẽha kilu kuenda apata osi o kilu lieve va ka lila loku litetela omo liesumuo, noke va ka mola Mõlomunu iyilila valende o kilu lunene kuenda ulamba walua. Eye o ka tuma ovangelo vaye locileñi cinene columbeta kuenda va kongolola kavindi akuãla oluali vana va nõliwa, tunde kesukiyo lilu toke kesukiyo likuavo lilu.” (Mateo 24:29-31) Otembo yipi ovangelo va kongolola ava va nõliwa? Ceci olombuavekua viosi vi kasi palo posi vi tambula onima yavo yoku enda kilu. Eci ci ka pita kefetikilo liohali yapiãla osimbu o Harmagedo ka ya fetikile. Yesu kumue lo 144.000, va ka kundula ovoviali osi omanu. (Esituluilo 17:12-14) Ocipito Conjivaluko ca sulako, ci ka lingiwa eci handi Yesu keyile oku ongolola olombuavekua via sulako.

16. Momo lie wa nõlelapo oku enda Kocipito Conjivaluko?

¹⁶ Ocili okuti, tu yongola oku enda Kocipito Conjivaluko keteke 31 Yelombo wo 2018. Tu likutililavo ku Yehova oco a tu kuatise oku amamako oku kala lomunga pokati kafendeli vaye. (Tanga Osamo 133:1.) Ivaluka okuti eteke limue, ku ka lingiwa Ocipito Conjivaluko ca sulako. Omo liaco, osimbu eteke liaco ka lieyile, tu likolisiliko oku kala Kocipito Conjivaluko anyamo osi loku sanjukila omunga yi sangiwa pokati kafendeli va Yehova.