UPANGE wetu woku kunda u kuete esilivilo lia velapo. Pole, omanu vamue tua siata oku kundila, ka va kuete elomboloko liaco. Ndaño omanu vamue va siata oku lekisa onjongole yeci Embimbiliya li popia, pole, ka va simi okuti va sukila oku lilongisa letu Ondaka ya Suku.

Kũlĩhĩsa ulandu wulume umue o tukuiwa hati Gavin. Ndaño okuti wa kuatele ocituwa coku endaenda kolohongele Vonjango Yusoma, pole, ka yonguile oku lilongisa Embimbiliya. Eye wa lombolola hati, ka kũlĩhĩle ovina vialua viatiamẽla Kembimbiliya. Omo liaco, ka yongola okuti, omanu vakuavo va kũlĩha ocitangi caco. Eye wa kuatele usumba wokuti, pamue o lalekiwa oco a pange onepa ketavo. Nye o sima catiamẽla kondaka eyi? Anga hẽ Gavin weya oku kuatisiwa? Sokolola ndomo ovina vi sangiwa Vembimbiliya vi pondola oku kuatisa omunu umue. Yehova wa sapuilile va Isareli hati: “Ovilongua viange vi loke ndatosi ombela. Londaka yange yi loke ndowume.” (Esinumuĩlo 31:19, 30; 32:2) Omo liaco, tu konomuisi ovina vimue viatiamẽla kowume, kuenda tu vi sokisi lupange woku kunda oco tu kuatise “omanu vosi.”—1 Timoteo 2:3, 4.

Owume uwa. Kilu kua siata oku tunda otuatosi tumue tutito okuti, noke tu linga owume komẽle. Olondaka via Yehova vi sokisiwa ndati ‘lowume’? Yehova wa sapela lafendeli vaye lonjila yimue ya sunguluka, kuenda wa lekisa esumbilo kokuavo. Tu pondola oku kuama ongangu ya Yehova nda tu sumbila ovina omanu va tava. Pole, tu va vetiya oku konomuisa lutate ovina viaco, oco va nõle onjila va yongola oku kuama. Nda tua lekisa onjongole komanu, ci va kuatisa oku tava kovina tu va sapuila, kuenje, ci va vetiya oku tava kovina tu va kundila.

Owume u kuatisa. Upange woku kunda u vetiya lika omanu, nda tua kuama olonjila via litepa vioku va kuatisa oku lilongisa ovina vialua viatiamẽla kocili Cembimbiliya. Manji umue o tukuiwa hati Chris, okuti wa sapela la Gavin oco o longise Embimbiliya, ka setekele oku u kisika oco a tave oku lilongisa Embimbiliya. Pole, wa seteka oku kuama olonjila via litepa vioku kuatisa Gavin, oco a lianje poku sapela laye ovina viatiamẽla Kembimbiliya. Noke, manji Chris wa sapuila Gavin hati, Vembimbiliya mu sangiwa esapulo li kuete esilivilo lia velapo okuti, nda wa li konomuisa, liu kuatisa oku kuata elomboloko kolohongele. Noke, manji Chris wo lomboluila hati, ocitumasuku Cembimbiliya co kuatisa oku limbuka okuti, ovina viosi vi sangiwa Vembimbiliya viocili. Omo liaco, va sapela ovina vialua vi lekisa ndomo ovitumasuku vimue Viembimbiliya via tẽlisiwa. Ovina va sapela via kuatisa Gavin, kuenje wa tava oku lilongisa Embimbiliya.

Owume u kuete esilivilo komuenyo. Kofeka yo Isareli, kotembo yowuya ombela ka yi loki vokuenda kuolosãi vialua. Nda ka kuli owume u yulisa osi, ovikũla viosi vi kukuta, kuenje vi fa. Yehova wa popele hati, koloneke vietu kua laikele oku kala utanya okuti ombela ka yi loki. Kuenje, omanu va laikele oku kala “onjala yoku yeva olondaka via Yehova.” (Amosi 8:11) Eye wa likuminyile hati, Akristão olombuavekua va laikele oku kala “ndowume wa Yehova,” osimbu va kasi oku kunda olondaka viwa Viusoma wa Suku, loku kuatisa “olomeme vikuavo.” (Mika 5:7; Yoano 10:16) Esapulo tua siata oku kunda, li panga onepa keliangiliyo lia Yehova lioku eca omuenyo ko pui komanu vana va kuete enyona lioku kũlĩha ocili. Anga hẽ tua kapako esapulo liaco?

Owume esumũlũho limue li tunda ku Yehova. (Esinumuĩlo 33:13) Upange woku kunda u nena asumũlũho komanu vana va tava kesapulo tu va kundila. Elilongiso Liembimbiliya Gavin a tava oku linga, lia kala esumũlũho kokuaye. Momo, lio kuatisa oku sanga atambululo kapulilo aye osi. Kuenje, wa kuata lonjanga ukũlĩhĩso, kuenda wa papatisiwa. Cilo, wa sanjukila oku kunda olondaka viwa Viusoma kumue lukãi waye Joyce.

Oku sokisa upange woku kunda lowume, ci tu kuatisa oku kuata elomboloko liokuti, elikolisilo omunu lomunu a linga kupange woku kunda, li kuete esilivilo lia velapo. Tu ci linga ndati? Etosi letosi liovava, lieca ekuatiso litito. Pole, nda kuli atosi alua, osi yi yula. Cimuamue haico ci pita letu okuti, upange woku kunda omunu lomunu a kasi oku linga, kokuetu u kala ndu okuti ka wa luile. Omo liaco, alikolisilo afendeli valua va Yehova, a kasi oku kuatisa kupange woku kundila omanu vo “kolofeka viosi.” (Mateo 24:14) Anga hẽ upange woku kunda esumũlũho li tunda ku Yehova oco u kuatise omanu? Esumũlũho. Momo, esapulo Liusoma tua siata oku kundila omanu, li kasi ndowume okuti, uwa, u kuatisa, kuenda u kuete esilivilo komuenyo!