1, 2. (a) Ovisimĩlo vipi Olombangi Via Yehova via siata oku kuata catiamẽla Kembimbiliya? (b) Olonepa vipi Viembimbiliya o sole calua?

OMO okuti Tulombangi Via Yehova, tu sole Embimbiliya. Momo, li tu lembeleka, li tu ĩha elavoko, kuenda li tu longisa ovina tu pondola oku kolela. (Va Roma 15:4) Vembimbiliya ka mu sangiwa ovisimĩlo viomanu, pole, mu sangiwa “ondaka ya Suku.”—1 Va Tesalonike 2:13.

² Vosi yetu tu kuete alivulu tu sole calua Vembimbiliya. Vamue pokati ketu, va sole oku tanga Avanjeliu, momo a lekisa ovituwa vi komõhisa via Yehova, vonduko ya Yesu. (Yoano 14:9) Omanu vakuavo va siata oku nõlapo oku tanga alivulu a lombolola ovitumasuku ndeci, elivulu Liesituluilo okuti li lekisa ‘ovina vi laika oku pita ndopo.’ (Esituluilo 1:1) Kulivo omanu vamue va siata oku kuata elembeleko poku tanga elivulu Liolosamo. Vakuavo va siata oku sanjukila oku tanga alungulo a sangiwa velivulu Liolosapo. Omo liaco, Embimbiliya li kuete esilivilo komanu vosi.

3, 4. (a) Nye tua siata oku yeva vutima omo lialivulu etu? (b) Alivulu api tua siata oku tambula oco a eciwe komanu vamue?

³ Omo okuti tu sole Embimbiliya, tu solevo alivulu etu, momo a lombolola ovina vi sangiwa Vembimbiliya. Ovina viosi tua siata  oku tambula ndeci: Alivulu, olombrochura, Utala Wondavululi lo Despertai!, kuenda ovina vikuavo, vi tunda ku Yehova. Ovina viaco vi pondola oku tu kuatisa oku kuata ukamba laye, kuenda vi pamisa ekolelo lietu.—Tito 2:2.

⁴ Pokati kalivulu etu pali alua okuti a siata oku eciwa lika Kolombangi Via Yehova. Pole, kuli alivulu amue okuti, a siata oku eciwa kamalẽhe kuenda kolonjali. Ovipama vialua kumue lolovideo vi kasi vo Internet, via siata oku eciwa komanu vana okuti, Halombangiko Via Yehova. Ovina viaco via siata oku sandekiwa vi eca uvangi wokuti, Yehova o kasi oku tẽlisa ohuminyo yaye yoku longisa omanu vosi.—Isaya 25:6.

5. Ovina vipi tu pondola oku kolela okuti ovio Yehova a sole?

⁵ Valua pokati ketu, tu yongola oku sokiya otembo yalua yoku tanga Embimbiliya, kuenda alivulu etu. Pole, olonjanja vimue ka tua siatele oku pesila otembo yimuamue koku tanga alivulu osi tu kuete. Tua kolela okuti, Yehova o sanjuka calua nda tu sokiya ciwa otembo oco tu tange Embimbiliya, kumue lalivulu etu, kuenda tu konomuisa ovina tua tanga. (Va Efeso 5:15, 16) Pole, kuli ocina cimue tu sukila oku lavulula oco tu ci yuvule. Ocina caco nye?

6. Nye ci pondola oku tu tateka oku kuatisiwa lovina Yehova a siata oku eca kokuetu?

⁶ Nda ka tua lavuluile, tu kuata ocisimĩlo cokuti, olonepa vimue Viembimbiliya, ale alivulu akuavo a siata oku sandekiwa, ka a tiamisiwila kokuetu. Nye tu sukila oku linga, nda tua limbuka okuti, onepa yimue Yembimbiliya ka yi tiamisiwila kokuetu? Nye tu sukila oku linga nda tua limbuka okuti, elivulu limue ka li tiamisiwila kokuetu? Anga hẽ tu tanga lika ulandu waco lonjanga, ale tu yuvula oku u tanga? Nda tu yuvula oku tanga ulandu waco, ka tu kuata elomboloko liovina vi pondola oku tu kuatisa. Tu yuvula ndati ocisimĩlo caco? Tu sukila oku ivaluka okuti, ovina viosi tua siata oku tambula vi tunda ku Yehova. Vembimbiliya tu tangamo ndoco: “Ame ndi Yehova Suku yove, hu longisa eci cu ku kuatisa.” (Isaya 48:17) Vocipama cilo, tu konomuisa olonumbi vitatu vi pondola oku tu kuatisa oco tu kapeko ovina viosi Yehova a siata oku eca kokuetu.

7. Momo lie tu sukilila oku tanga Embimbiliya lutima wa sunguluka?

⁷ Tanga Embimbiliya lutima wa sunguluka. Kuli olonepa vimue Viembimbiliya okuti, via loñisiwa komanu vamue. Pole, Embimbiliya li popia hati: “Ovina viosi via sonehiwa Vovisonehua vi Kola, vi tunda ku Suku kuenje . . . vi silivila.” (2 Timoteo 3:16) Eli olio esunga lieci tu sukilila oku tanga Embimbiliya lutima wa sunguluka. Manji umue wa popia hati, o pondola oku lilongisa ovina vilua vulandu umosi. Oku ci linga, ca siata oku u kuatisa oku limbuka ovipama vina okuti, ka ca lelukile oku kuata elomboloko liaco. Omo liaco, osimbu ka tua tangele Embimbiliya, tu sukila oku pinga ku Yehova okuti, o tu ĩha utima wa sunguluka kuenda olondunge, oco tu kuate elomboloko liovina a yongola okuti, ovio tu lilongisa.—Esera 7:10; tanga Tiago 1:5.

8, 9. (a) Apulilo api tu sukila oku linga eci tu tanga Embimbiliya? (b) Ovituwa akulu vekongelo va sukila oku lekisa vi tu longisa nye catiamẽla ku Yehova?

⁸ Linga apulilo. Nda o kasi oku tanga Embimbiliya, o sukila oku talama, kuenda oku linga apulilo a kuãimo ndoco: ‘Ovina nda tanga vi ndi longisa nye catiamẽla ku Yehova? Ndi kapako ndati ovina nda tanga? Ndi kuatisa  ndati omanu vakuavo lovina viaco?’ Nda tua sokolola apulilo tua linga ndeti, tu kuatisiwa poku tanga Embimbiliya. Tu konomuisi ulandu umue. Embimbiliya li tukula ovituwa vimue akulu vekongelo va sukila oku lekisa. (Tanga 1 Timoteo 3:2-7.) Omo okuti valua pokati ketu ka tu kuete ocikele coku kala akulu vekongelo, pamue tu sima okuti, ovituwa viaco ka vi tu kuatisa. Omo liaco, tu konomuisi apulilo atatu a lingiwa pocinimbu cilo, oco tu limbuke ndomo ovituwa viaco vi pondola oku tu kuatisa.

⁹ “Ovina nda tanga vi ndi longisa nye catiamẽla ku Yehova?” Yehova wa tu ĩha ulala wovituwa akulu vekongelo va sukila oku lekisa. Eye wa eca olonumbi kalume va kuete ocikele coku songuila ekongelo. Ovina viaco vi eca uvangi wokuti, Yehova wa kapako ekongelo. Embimbiliya li popia hati, Yehova wa landa ekongelo “losonde Yomõlaye.” (Ovilinga 20:28) Yehova o yongola okuti, akulu vekongelo va lekisa ongangu yiwa. Momo, va ka lombolola ku Yehova ndomo va tata ekongelo. Yehova o yongola okuti, tu tatiwa ciwa lakulu vekongelo. (Isaya 32:1, 2) Omo liaco, eci tu tanga ovina viatiamẽla kovituwa viaco, tu limbuka ndomo Yehova a siata oku tu tata.

10, 11. (a) Eci tu konomuisa ovituwa akulu vekongelo va sukila oku lekisa, ci tu kuatisa ndati oku vi kapako? (b) Tu pondola oku kuatisa ndati omanu lovituwa viaco?

 ¹⁰ “Ndi kapako ndati ovina nda tanga?” Nda ove ukulu wekongelo o sukila oku pitolola olonjanja vialua ovituwa akulu vekongelo va sukila oku lekisa, oco o linge apongoloko. Nda o kasi oku “sanda ocikele coku kala mitavaso,” o sukila oku kapako ovituwa viaco oco o tẽlise ocikele caco. (1 Timoteo 3:1) Pole, Akristão vosi va pondola oku kapako ovituwa viaco. Yehova o yongola okuti, vosi yetu tu lekisa esunguluko, kuenda olondunge. (Va Filipoi 4:5; 1 Petulu 4:7) Nda akulu vekongelo va ‘lekisa ongangu yiwa kocunda,’ tu pondola oku lilongisa ovina vialua kokuavo, kuenje, tu “setukula ekolelo liavo.”—1 Petulu 5:3; Va Heveru 13:7.

¹¹ “Ndi kuatisa ndati omanu vakuavo lovina viaco?” Tu pondola oku kuata ulala wovituwa akulu vekongelo va sukila oku lekisa oco tu kuatise lavio omanu tu longisa Embimbiliya, kuenda vana va yongola oku kuata elomboloko liokuti, akulu vekongelo va litepa lasongui vatavo esanda. Ulala wovituwa viaco, u pondolavo oku tu kuatisa oku limbuka upange walua akulu vekongelo va siata oku linga. Nda tua ci linga, ci tu kuatisa oku lekisa esumbilo kakulu vekongelo. (1 Va Tesalonike 5:12) Omo liaco, nda tua lekisa esumbilo kakulu vekongelo, ci va vetiya oku kuata esanju poku tẽlisa ovikele viavo.—Va Heveru 13:17.

12, 13. (a) Akonomuiso api tu pondola oku linga lekuatiso lialivulu etu? (b) Tukula ulandu umue u lekisa ndomo oku konomuisa ovipama vikuavo ci tu kuatisa oku kũlĩha ciwa ovolandu ana okuti, ka ca lelukile oku kuata elomboloko liaco.

¹² Linga akonomuiso amue. Nda tu kasi oku lilongisa Embimbiliya, tu sukila oku kũlĩhĩsa atambululo kapulilo a kuãimo ndeci:

• Helie wa soneha onepa eyi Yembimbiliya?

• Kocitumãlo cipi lia sonehiwila, kuenda otembo yipi?

• Ovolandu api a pita kosimbu, eci Embimbiliya lia sonehiwa?

Olonumbi viaco vi pondola oku tu kuatisa oku limbuka ovipama vina okuti ka ca lelukile oku kuata elomboloko liaco.

¹³ Elivulu lia Esekiele 14:13, 14, li popia hati: “Eci ofeka yi ndueyela loku mbuenguila usuanji, lame ngõluĩla eka liange kokuayo, loku nyõla ombolo yeteku liayo, loku tuma kokuayo elambu, loku nyõla omanu lovinyama, ‘ndaño ovalume vana vatatu, okuti Noha la Daniele la Yovi, nda va kaile vokati kavo nda va popela lika ovimuenyo viavo muẽle mekonda liesunga liavo.’ Oco ca popia Yehova Suku.” Nda tua linga akonomuiso amue, tu limbuka okuti, Esekiele wa soneha olondaka evi kunyamo wo 612, osimbu Kristu keyile palo posi. Ndaño okuti pa pita anyamo alua tunde eci Noha la Yovi va fa, pole, Yehova ivaluka handi ekolelo liavo. Kotembo yaco Daniele wa kala komuenyo. Eye wa kuatele lika 20 kanyamo eci Yehova o sapuila hati, wa kala omunu umue ukuesunga, ndeci Noha la Yovi va linga. Ulandu owu u tu longisa nye? Yehova o lete afendeli vaye vosi vakuekolelo oku kongelamo amalẽhe, kuenda wa va kapako.—Osamo 148:12-14.

14. Alivulu a siata oku sandekiwa a pondola oku kuatisa ndati amalẽhe, kuenda a pondolavo oku kuatisa ndati omanu vakuavo? (Tala elitalatu kefetikilo liocipama cilo.)

¹⁴ Alivulu a siata oku sandekiwa oco a eciwe kamalẽhe. Tua lilongisa okuti, tu pondola oku kuatisiwa lolonepa viosi Viembimbiliya. Handi vali, tu pondolavo oku kuatisiwa lalivulu etu osi a siata oku sandekiwa. Tu konomuisi ovolandu amue. Vokuenda kuanyamo a pita, Yehova wa eca olonumbi vialua viatiamẽla kamalẽhe. ^[1] (Tala etosi kesulilo liocipama.) Olonumbi viaco vi pondola oku va kuatisa poku liyaka lovitangi kosikola va kasi oku tangela, kuenda oku yula ovitangi vikuavo osimbu va kasi oku kula. Tu pondola oku kuatisiwa ndati, nda vosi yetu tua tanga ovipama viaco kuenda alivulu akuavo? Nda tua tanga ovipama viaco, tu kuata elomboloko liovitangi amalẽhe va siata oku liyaka lavio. Kuenje, tu sanga onjila yoku va kuatisa, kuenda oku va vetiya oco va pamise ekolelo liavo.

15. Momo lie vamanji vana okuti akulu va sukilila oku lekisa onjongole yoku tanga alivulu a sandekiwa oco a kuatise amalẽhe?

¹⁵ Vamanji vana okuti akulu, va yuvule ovisimĩlo viokuti, ka va sukila oku tanga alivulu a sandekiwa oco a eciwe kamalẽhe. Momo, ovitangi via lomboluiwa valivulu aco, ka vi tiamisiwila lika kamalẽhe, pole, vi tiamisiwilavo kakulu. Ovolandu a lekisa okuti, vosi yetu tu sukila oku teyuila ovina viatiamẽla kefendelo lietu, oku likandangiya kovina vimue, oku yuvula oku vetiyiwa lakamba oco tu linge ovina ka via sungulukile, oku yuvula akamba vãvi, kuenda ovitalukilo ka via sungulukile. Ndaño okuti alivulu aco a sandekiwa oco a kuatise amalẽhe, pole, olonumbi vi sangiwamo via tunda Vembimbiliya, kuenda vi pondola oku kuatisa Akristão vosi.

16. Alivulu etu a siata oku vetiya amalẽhe oku linga ovina vipi oco va kuatisiwe?

¹⁶ Alivulu a loña kamalẽhe, a pondolavo oku va kuatisa oco va pamise ukamba wavo la Yehova. (Tanga Ukundi 12:1, 13.) Pole, akulu va pondolavo oku kuatisiwa lalivulu aco. Vo Despertai! yosãi ya Kupupu yunyamo wo 2009, mu sangiwa ocipama cimue catiamẽla “Kamalẽhe va Pula vati: . . . Ndi Tanga Ndati Embimbiliya Lonjila Yimue Okuti Ndi Kuata Esanju?” Vocipama caco mu sangiwa olonumbi vialua oku kongelamo okakasia kamue okuti, o pondola oku ka seleka oco ka ku kuatise kelilongiso liove lio pokolika. Anga hẽ akulu va kuatisiwavo locipama caco? Ukãi umue o kuete omõla wa popia hati, ka ca lelukile kokuaye oku tanga Embimbiliya. Pole, omo okuti wa kuama olonumbi vi sangiwa vocipama caco, cilo wa siata oku lavoka lesanju oku tangiwa Kuembimbiliya. Eye wa popia hati, wa siata oku kuata esanju poku limbuka ndomo alivulu Embimbiliya a kuete elitokeko, kuenda a eca elomboloko liwa. Noke wamisako hati: “Onjongole yange yoku tanga Embimbiliya ya livokiya calua okuti kosimbu ci sule.”

17, 18. Tu pondola oku kuatisiwa ndati lovipama vina via siata oku sandekiwa oco vi eciwe komanu vana okuti Halombangiko Via Yehova? Tukula ulandu umue.

¹⁷ Alivulu a siata oku eciwa komanu vana okuti, Halombangiko Via Yehova. Tunde kunyamo wo 2008, tua siata oku sanjukila Utala Wondavululi welilongiso. Owo, wa pongiyiwa oco weciwe lika Kolombangi Via Yehova.  Pole, tu kuetevo Utala Wondavululi wa siata oku eciwa komanu vana okuti, Halombangiko Via Yehova. Tu pondola oku kuatisiwa ndati lolorevista viaco? Tu konomuisi ulandu umue. Nda wa laleka omunu umue oco a ende kohongele Vonjango Yusoma, o sanjuka calua. Osimbu manji a kasi oku linga ohundo, ove o sokolola omunu wa laleka. Noke, o sokololavo ndomo a tenda ovina a kasi oku yeva, kuenda ndomo vi pondola oku pongolola omuenyo waye. Kuenje, o kuata esanju lialua, kuenda eca olopandu omo liovina via lomboluiwa vohundo ya lingiwa.

¹⁸ Cimuamue haico ci pondola oku pita letu eci tu tanga alivulu a siata oku eciwa komanu vana okuti, Halombangiko Via Yehova. Utala Wondavululi wowiñi, kuenda ovipama vi sangiwa vonumbi yetu yo jw.org, vi lombolola ovina vi sangiwa Vembimbiliya vupopi umue okuti, ca leluka oku kuata elomboloko liaco. Nda tu tanga ovolandu aco, tu vokiya elomboloko lietu, kuenda ocisola kovina tua kũlĩha vi sangiwa Vembimbiliya. Tu pondolavo oku lilongisa olonjila viokaliye, oco okuti eci tu sanga omanu kupange woku kunda, tu va lomboluila ovina viatiamẽla kefendelo lietu. O Despertai! yi tu kuatisa oku kolela okuti, kuli Ululiki. Yi tu kuatisavo oku limbuka ndomo tu teyuila ovina viatiamẽla kefendelo lietu.—Tanga 1 Petulu 3:15.

19. Tu pondola oku eca ndati olopandu ku Yehova omo liovina a siata oku eca kokuetu?

¹⁹ Yehova wa siata oku tuĩha alungulo alua, kuenda olonumbi vi pondola oku tu kuatisa. (Mateo 5:3) Omo liaco, tu sukila oku amamako oku tanga ovina Yehova a siata oku tuĩha kuenda oku vi kapako. Nda tua ci linga, tu kuatisiwa, kuenda tu lekisa ku Yehova okuti, tua sanjukila ovina viosi a siata oku tu ĩha.—Isaya 48:17.