1. Ovihandeleko vipi Viembimbiliya okuti nda tua vi pokola vi tu kuatisa?

LEKUATISO Liembimbiliya, Yehova wa siata oku tu ĩha ovihandeleko vi tu kuatisa oku linga eci a yongola. Eye wa siata oku tu lungula oco tu yuvule oku fendela oviñumañuma, oku nyana, oku sipa eliamba, ale oku linga ukahonga. (1 Va Korindo 6:9, 10) Yesu omõla a Yehova wa ecavo ocikundi eci kolondonge viaye poku vi sapuila hati: “Ka longisi omanu vo kolofeka viosi oco va linge olondonge, va papatisili vonduko ya Tate la Mõla kuenda espiritu sandu, va longisi oku linga ovina viosi ndo kundiki. Kuenje ñasi kumue lene oloneke viosi, toke kesulilo liovina vi kasi voluali.” (Mateo 28:19, 20) Yehova kumue la Yesu va yongola okuti, tu linga ovina vi tu kuatisa. Ovihandeleko via Yehova, vi tu longisa ndomo tu pondola oku kapako ekalo lietu, kuenda liepata lietu. Vi tu kuatisavo oku limbuka ndomo tu kuata uhayele, kuenda esanju. Nda tu pokola kovihandeleko via Yehova, oku kongelamo ocikundi coku kunda,  eye o kuata esanju, kuenda o tu sumũlũisa.

2, 3. (a) Momo lie Embimbiliya ka li tu ĩhila olonumbi viatiamẽla kovina viosi tu yongola oku linga? (b) Apulilo api tu konomuisa vocipama cilo? (Tala elitalatu kefetikilo liocipama cilo.)

² Embimbiliya ka li tu ĩha olonumbi viatiamẽla kovina viosi tu yongola oku linga komuenyo wetu. Vembimbiliya ka mu sangiwavo olonumbi vi lekisa ndomo tu sukila oku wala. Ovina viaco vi eca uvangi wokuti, Yehova eye ukualondunge via velapo. Omanu voluali va siata oku pongolola ocituwa cavo coku wala ovowalo amue. Momo vokuenda kuotembo va sima okuti, uwalo waco ka u kuete vali esilivilo. Pole, ovina vi sangiwa Vembimbiliya vi kuete esilivilo toke koloneke vilo. Vembimbiliya ka mu sangiwavo olonumbi vi lekisa upange tu sukila oku linga, olomapalo, kuenda ovina tu linga oco tu kuate uhayele. Yehova wa siata oku ecelela okuti, omunu lomunu pokati ketu kumue lasongui vepata, va nõla onjila va yongola oku kuama catiamẽla kovina via tukuiwa ndeti.

³ Nda tu nõla onjila yimue tu yongola oku kuama, kuenje tu limbuka okuti Vembimbiliya ka mu sangiwa onumbi yatiamẽla kondaka yaco, tu sukila oku lipula ndoco: ‘Anga hẽ, Yehova wa kapako onjila ndi yongola oku kuama? Yehova o sanjukila hẽ onjila ndi yongola oku nõla, nda oku yi kuama si lueya ocihandeleko cimue Cembimbiliya? Ndi limbuka ndati okuti Yehova o sanjukila onjila ndi yongola oku nõla?’

4, 5. Onjila tu nõla yi pondola ndati oku tu sanjuisa ale oku tu sumuisa oku kongelamo omanu vakuavo?

⁴ Omanu vamue va siata oku sima okuti, va pondola oku linga ovina viosi va yongola. Pole, tu yongola oku linga ovina vi sanjuisa Yehova. Omo liaco, osimbu ka tua nõlele onjila yimue, tu sukila oku sokolola eci Embimbiliya li popia catiamẽla kondaka yaco, kuenje tu lekisa epokolo. Omo okuti Embimbiliya li tu sapuila hati, Yehova o sumua nda tu sakuiwa losonde, tu sukila oku kapako olonumbi viaco. (Efetikilo 9:4; Ovilinga 15:28, 29) Tu pondola oku likutilila ku Yehova oco a tu kuatisa oku nõla onjila yu sanjuisa.

⁵ Onjila tu nõla yi pondola oku tu sumuisa ale oku tu sanjuisa. Nda tu nõla onjila yiwa, ci tu kuatisa oku kuata ukamba la Yehova. Pole, nda tua nõla onjila ka ya sungulukile, tu nyõla ukamba wetu laye. Onjila tu nõla yi pondolavo oku sumuisa omanu vakuavo ale oku va sanjuisa. Tu sukila oku yuvula oku linga ovina vi sumuisa vamanji, ale vi honguisa ekolelo liavo. Ka tu yongola oku nena ovitangi pokati ka vamanji vekongelo. Omo liaco, oku nõla onjila tu yongola oku kuama ci kuete esilivilo lia velapo.—Tanga Va Roma 14:19; Va Galatia 6:7.

6. Nye ci pondola oku tu songuila poku nõla onjila tu yongola oku kuama?

⁶ Tu pondola ndati oku nõla onjila ya sunguluka, nda Embimbiliya ka li tu sapuila ovina tu sukila oku linga? Tu sukila oku yuvula oku linga ovina tu yongola: Pole, tu sokolola lutate ekalo lietu, kuenda oku nõla onjila yi sanjuisa Yehova. Nda tua ci linga, tu limbuka okuti, Yehova o pondola oku tu kuatisa oco tu kuate onima yiwa.—Tanga Osamo 37:5.

7. Nda ka kuli onumbi yimue Yembimbiliya, tu pondola oku limbuka ndati ovina Yehova a yongola okuti ovio tu linga poku liyaka locitangi cimue?

⁷ Tu pondola oku limbuka ndati ovina vi sanjuisa  Yehova? Elivulu lia Va Efeso 5:17 li tu sapuila hati: “Limbuki cipi ocipango ca Yehova.” Nda tua limbuka okuti Embimbiliya ka li tukula ocihandeleko cimue tu sukila oku kuama, tu sukila oku kuata elomboloko lieci Yehova a yongola okuti, oco tu linga poku liyaka locitangi cimue. Tu ci linga ndati? Tu sukila oku likutilila ku Yehova loku ecelela okuti, espiritu liaye li tu songuila.

8. Yesu wa limbukile ndati okuti Yehova wa yonguile okuti u lingila ovina vimue? Tukula ulandu umue.

⁸ Yesu wa enda oku limbuka ovina Yehova a yonguile okuti ovio a linga. Eci omanu va kuata onjala, Yesu wa likutilila, kuenje wa eca okulia kokuavo lekuatiso liocikomo. (Mateo 14:17-20; 15:34-37) Eci Yesu a kuatele onjala vekalasoko Eliapu lia yonguile okuti o pongolola ovawe oco a linge olombolo, pole, Yesu ka tavele oku ci linga. (Tanga Mateo 4:2-4.) Omo okuti Yesu wa kũlĩhĩle ciwa Isiaye Yehova, ka yonguile okuti espiritu sandu liu kuatisa oco a tẽlise olonjongole viaye. Momo, Yesu wa kũlĩhĩle okuti, Isiaye o pondola oku u songuila, kuenda oku eca kokuaye ovina a sukilile.

9, 10. Nye ci pondola oku tu kuatisa oco tu nõle onjila yiwa? Tukula ulandu umue.

⁹ Nda tua kolela ku Yehova oco a tu songuile ndeci Yesu a linga, ci tu kuatisa oku nõla onjila tu kuama. Embimbiliya li popia hati: “Kolela Yehova lutima wove wosi ku ka tiamẽle kolondunge viove muẽle, u sumbila kolongenda viove viosi, kuenje eye o suñamisa olonjila viove, ku ka kolele olondunge viove. Sumbila Yehova, [kuenda] tinduka kũvi.” (Olosapo 3:5-7) Nda poku lilongisa Embimbiliya tua limbuka ovisimĩlo via Yehova, tu kuata elomboloko liovina a yongola okuti ovio tu linga, poku liyaka locitangi cimue. Nda tuamamako oku lilongisa catiamẽla kovisimĩlo via Yehova, ci leluka kokuetu oku nõla onjila yu sanjuisa. Nda tua ci linga, ‘ci leluka oku pokola kolonumbi viaye.’—Esekiele 11:19.

¹⁰ Sokolola ndeci okuti, ukãi umue o kuele, osimbu a kasi vovenda oku landa ovina a yongola, wa mola olosapato vimue a sola calua. Pole, ondando yaco ya tĩla calua. Ndaño okuti ka kalele lulume waye vovenda, pole, wa kũlĩha ovisimĩlo ulume waye a pondola oku kuata nda wa landa olosapato viaco londando ya tĩla. Eye wa ci kũlĩha ndati? Wa ci kũlĩha, momo tunde eci va kuela pa pita otembo yalua. Eye wa kũlĩhavo okuti, ulume waye o yongola okuti, olombongo viavo va vi pesila kovina va sukila. Cimuamue haico ci pita letu okuti, nda tua lilongisa ndomo Yehova a tenda ovina, kuenda tua limbuka ovina a linga kosimbu, ci tu kuatisa oku kũlĩha eci a yongola okuti, oco tu linga poku liyaka lovitangi.

11. Apulilo api tu sukila oku linga poku tanga Embimbiliya, ale poku lilongisa ovina tua tanga? (Tala pokakasia losapi hati: “Eci o Tanga Embimbiliya Lipula Ndoco.”)

¹¹ Tu pondola oku limbuka ndati ovisimĩlo  via Yehova? Tu ci linga poku tanga Embimbiliya olonjanja viosi. Osimbu tu kasi oku tanga, tu sukila oku lipula ndoco: ‘Ovina nda tanga ndeti vi ndi longisa nye catiamẽla ku Yehova? Momo lie a lingila ovina lonjila eyi?’ Ndeci Daviti a linga, tu sukilavo oku pinga ku Yehova oco a tu kuatise oku u kũlĩha ciwa. Daviti wa soneha ndoco: “A Yehova, ndekise olonjila viove. Njimbe onumbi yalila ove. Ngendise vocili cove loku ndongisa, momo ove Suku yeyovo liange. Nda ku imbila ovaso eteke liosi.” (Osamo 25:4, 5) Nda tua lilongisa ovina viatiamẽla ku Yehova, ci tu kuatisa oku sokolola ndomo tu vi kapako poku liyaka lovitangi. Anga hẽ tu pondola oku kapako ovina viaco vepata, kupange woku sanda eteku, kosikola, ale kupange woku kunda? Nda tua sokolola ocitangi cimue, ci leluka oku kũlĩha ndomo Yehova a yongola okuti, tu kapako ovina viaco.

12. Alivulu etu kuenda olohongele vi tu kuatisa ndati oku kuata elomboloko liovisimĩlo via Yehova viatiamẽla kovina vimue?

¹² Onjila yikuavo yi tu kuatisa oku kũlĩha ovisimĩlo via Yehova, oku kapako ovina tua siata oku lilongisa Vembimbiliya lekuatiso liocisoko caye. Poku nõla onjila tu yongola oku kuama, tu pondola oku kuatisiwa lo Índice  das Publicações da Torre de Vigia kuenda Elivulu Lioku Konomuisa Liolombangi Via Yehova, oco li tu kuatise oku kuata elomboloko liovisimĩlo via Yehova. Tu pondolavo oku kuatisiwa lolohongele, nda tu yevelela lutate, tu eca atambululo, kuenda tu sokolola ovina tu kasi oku longisiwa. Nda tua ci linga, ci tu kuatisa oku kuata ovisimĩlo ndevi via Yehova. Kuenje, tu nõla onjila yu sanjuisa, kuenda tu tambula asumũlũho aye.

13. Tukula ulandu umue u lekisa ndomo oku kũlĩha ovisimĩlo via Yehova ci tu kuatisa oku nõla onjila ya sunguluka.

¹³ Tu konomuisi ulandu u lekisa ndomo tu pondola oku nõla onjila ya sunguluka, poku kũlĩhĩsa ovisimĩlo via Yehova viatiamẽla kondaka yaco. Citava okuti, o yongola oku kala ukundi wotembo yosi. Kuenje, wa linga apongoloko amue komuenyo wove, oco o vokiye otembo yalua kupange woku kunda. Pole, o kuete atatahãi nda o ka sanjukila olombongo vitito o ka nganyala, kuenda ovina vitito o ka kuata. Embimbiliya ka li popi okuti, tu sukila oku kala akundi votembo yosi oco tu vumbe Yehova. Omo okuti tuakundi, tu pondola oku amamako oku u fendela lekolelo. Momo, Yesu wa popia hati, Yehova o sumũlũisa omanu vana va likolisilako oku pitisa kovaso Usoma waye. (Tanga Luka 18:29, 30.) Embimbiliya li popiavo hati, Yehova o sanjuka calua nda tu linga ovina viu sanjuisa. Momo, o yongola okuti, tu kuata esanju poku u fendela. (Osamo 119:108; 2 Va Korindo 9:7) Nda tua kongela volohutililo vietu ovina viaco, ci tu kuatisa oku nõla onjila ya sunguluka. Kuenje, Yehova o tu sumũlũisa.

14. O pondola oku limbuka ndati ndati nda uwalo umue u sanjuisa Yehova ale sio?

¹⁴ Kũlĩhĩsa ulandu ukuavo ndoco: Sokolola ndeci okuti o sole calua oku wala uwalo umue. Pole, wa kũlĩha okuti, nda wa wala uwalo waco vamanji vamue vekongelo va pondola oku sumua. Embimbiliya ka li tukula ovina viatiamẽla kuwalo omunu a sukila oku wala. O pondola oku limbuka ndati ovisimĩlo via Yehova viatiamẽla kuwalo waco? Embimbiliya li tu sapuila hati: “Ndi yongola okuti akãi va wala loku liposuisa ciwa, lesunguluko kuenda olondunge, haloku vindiwako esinga lonjila yimue ka ya sungulukile, pamue ulu, ale olomota viondongo, pamue uwalo wa tĩla calua, ndeci ca sesamẽla akãi va popia okuti va vumba Suku, omo liovilinga viwa.” (1 Timoteo 2:9, 10) Afendeli vosi va Yehova oku kongelamo alume, va sukila oku pokola kolondaka via tukuiwa ndeti. Nda tu lekisa esunguluko, ci tu kuatisa oku sokolola ovisimĩlo omanu va pondola oku kuata catiamẽla kuwalo wetu. Omo okuti tu sole vamanji, ka tu yongola oku linga ovina vi va sumuisa. (1 Va Korindo 10:23, 24; Va Filipoi 3:17) Nda tua kapako ovina Embimbiliya li popia, kuenda tu sokolola ovisimĩlo via Yehova, tu pondola oku nõla onjila yu sanjuisa.

15, 16. (a) Ovisimĩlo vipi Yehova a pondola oku kuata, nda tua tiamisila lika utima kukahonga? (b) Nda tu yongola oku nõla ovitalukilo, tu limbuka ndati ovina vi sanjuisa Yehova? (c) Tu pondola oku kũlĩhĩsa ndati onjila tu yongola oku kuama?

¹⁵ Lekuatiso Liembimbiliya, tua lilongisa okuti, Yehova wa siata oku sumua, nda omanu va linga ovina ka via sungulukile, kuenda va tiamisila lika ovisimĩlo viavo kovina via vĩha. (Tanga Efetikilo 6:5, 6.) Yehova ka yongola okuti, tu tiamisila utima wetu kovisimĩlo vioku linga ukahonga. Nda tua  tiamisila utima wetu kovina viaco, citava okuti eteke limue tu linga ukahonga. Eli olio esunga lieci Yehova a yonguila okuti, tu kuata ovisimĩlo via sunguluka, kuenda tu linga ovina viwa. Ndonge Tiago wa lombolola hati, olondunge via Yehova “tete via pua evĩho, noke viombembua, via sunguluka, vionjuka, viohenda, vi eca apako awa, ka vi kuete ocame, ndaño elimbi.” (Tiago 3:17) Embimbiliya li tu longisa okuti, tu sukila oku yuvula ovitalukilo vina vi tu vetiya oku kuata oloñeyi vĩvi, kuenda oku sokolola ovina ka via sungulukile. Nda tua kuata elomboloko liovina Yehova a sole, kuenda evi a nyãle, ci tu kuatisa oku nõla lutate alivulu tu yongola oku tanga, olofilme tu tala, kuenda ovitalukilo vikuavo. Ka tu sukila oku pulisa komanu catiamẽla kovina tu sukila oku linga.

¹⁶ Poku nõla onjila tu yongola oku kuama, kuli ovina vialua vi pondola oku tu kuatisa oku ci linga, oco tu sanjuise Yehova. Pole, nda tu yongola oku nõla onjila yimue yi kuete esilivilo lia velapo, tu sukila oku pinga ekuatiso kukulu umue wekongelo, ale kumanji ukuavo wa loñoloha oco a tu kuatise. (Tito 2:3-5; Tiago 5:13-15) Pole, ka tu sukila oku pinga ku manji yaco oco a tu nõleleko onjila tu yongola oku kuama. Omo liaco, osimbu ka tua nõlele onjila tu kuama, tu sukila oku konomuisa eci Embimbiliya li popia catiamẽla kondaka yaco. (Va Heveru 5:14) Upostolo Paulu wa popia hati: “Omunu lomunu ambata ocitele caye.”—Va Galatia 6:5.

17. Tu kuatisiwa ndati nda tua nõla onjila yi sanjuisa Yehova?

¹⁷ Nda tu nõla onjila yi sanjuisa Yehova, tu kuata ukamba laye, tu taviwa laye, kuenda o tu sumũlũisa. (Tiago 4:8) Nda tua ci linga, tu pamisa ekolelo tu kuetele Yehova. Omo liaco, tu sukila oku sokolola ovina tua siata oku tanga Vembimbiliya, oco tu kuate elomboloko liovisimĩlo viaye. Momo, kuli ovina vialua viokaliye tu pondola oku lilongisa catiamẽla ku Yehova. (Yovi 26:14) Pole, nda cilo tua likolisilako oku lilongisa ovina viaco, tu kuata olondunge vi tu kuatisa oku nõla onjila ya sunguluka. (Olosapo 2:1-5) Ovisimĩlo viomanu kuenda ovina va yongola oku linga citava okuti vi pongoloka. Pole, Yehova ka pongoloka. Ukualosamo wa popia hati: “Elungulo lia Yehova li tumala oloneke ka vi pui, lovisimĩlo viutima waye tunde kocitumbulukila toke kocitumbulukila.” (Osamo 33:11) Tu pondola lika oku nõla onjila ya sunguluka, nda tu kuata ovisimĩlo ndevi via Yehova, kuenda tu linga ovina viu sanjuisa.