1. Momo lie Avirahama a lavokaile okuti wa laikele oku ka kuata omõla?

 YEHOVA wa likuminyile kekamba liaye Avirahama okuti, olofeka viosi vio kilu lieve vi ka sumũlũhila kocitumbulukila caye. (Efet. 15:5; 22:18) Omo okuti Avirahama wa kuatele ekolelo lia pama ku Suku, eye wa kolelele okuti ohuminyo ya Suku ya laikele oku tẽlisiwa muẽle ocili. Ndaño okuti Avirahama wa kuatele ale ci panda 100 canyamo kuenda ukãi waye 90 kanyamo, pole, handi ka va kuatele omõla. (Efet. 21:1-7) Embimbiliya li popia hati: “Ndaño ka kuatele elavoko, [Avirahama], omo liekolelo, wa lavokaile oku kala isia yolofeka vialua ndeci ca popiwile.” (Va Rom. 4:18) Ove wa kũlĩha okuti eci Avirahama a lavokaile ca tẽlisiwa. Eye weya oku kala isia yomõla umue a lavokaile vokuenda kuotembo yalua okuti, Isake. Momo lie Avirahama a kuatela ekolelo?

2. Momo lie Avirahama a kolelela okuti ohuminyo ya Yehova ya laikele oku tẽlisiwa?

² Omo liukamba wa pama Avirahama a kuatela Yehova, eye wa “kolela okuti, eci [Suku] a likuminyile wa ponduilevo oku ci tẽlisa.” (Va Rom. 4:21) Yehova wa tukula Avirahama okuti ekamba liaye kuenda wo tenda ndukuesunga omo liekolelo liaye. (Tia. 2:23) Ndomo ca lekisiwa ku Va Roma 4:18 Avirahama wa kuata ekolelo kuenda elavoko. Cilo, tu konomuisi eci upostolo Paulu a yonguile oku popia catiamẽla kelavoko ndomo ci sangiwa ku Va Roma ocipama 5.

3. Nye Paulu a lombolola catiamẽla kelavoko?

 ³ Paulu wa lombolola esunga lieci tu kolelela okuti ‘elavoko lietu ka li tu sumuisa.’ (Va Rom. 5:5) Eye o tu kuatisavo oku kũlĩha ndomo elavoko lietu li pondola oku pamisiwa. Poku konomuisa ovina Paulu a lombolola ku Va Roma 5:1-5, kũlĩhĩsa ulandu waye. Poku ci linga, o ka limbuka okuti elavoko liove lio kovaso yoloneke li pamisiwa. Ulandu wetu u sitululavo ndomo o pondola oku pamisa elavoko liove okuti kosimbu ci sule. Tete tu kũlĩhĩsa elavoko limue li komõhisa Paulu a tukula okuti ka li tu sumuisa.

4. Nye tu konomuisa ku Va Roma 5:1, 2?

⁴ Tanga Va Roma 5:1, 2. Paulu wa sonehela olondaka evi ekongelo lia va Roma. Vamanji vo kocitumãlo caco va lilongisa eci catiamẽla ku Yehova la Yesu kuenda va lekisa ekolelo kuenje va linga Akristão. Suku [wa va] ‘tenda ndavakuesunga mekonda liekolelo’ kuenje wa va waveka lespiritu sandu. Ocili okuti ovo va kuata elavoko limue liwa halio li komõhisa.

5. Elavoko lipi li kuete olombuavekua?

⁵ Noke Paulu wa sonehela Akristão olombuavekua vo ko Efeso elavoko Suku a ecele kokuavo. Velavoko liaco, mua kongelele oku “eca kolosandu ndonima.” (Va Efe. 1:18) Paulu wa sapuilavo ku va Kolosai, ocitumãlo va laikele oku tambula onima. Eye wa tukula onima yaco hati, ‘elavoko lioku tambula eci co selekiwili kovailu.’ (Va Kol. 1:4, 5) Elavoko Liakristão olombuavekua lieli okuti, ovo va pinduiwa oco va tambule omuenyo ko pui kilu kuna va ka viala la Kristu.—1 Va Tes. 4:13-17; Esit. 20:6.

6. Nye manji umue ombuavekua a popia catiamẽla kelavoko liaye?

⁶ Akristão olombuavekua va sanjukila calua elavoko liaco. Umue pokati kavo Manji Frederick Franz wa popia lutima wosi hati: “Elavoko lietu liocili kuenda li ka tẽlisiwa muẽle komunu lomunu wa tiamẽla 144.000 okuti okacunda katito kuenda onima yaco ya  velapo okuti ovina tu sima ci sule.” Manji Franz noke lioku vumba Suku vokuenda kuanyamo alua kunyamo wo 1991 wa popia hati: “Toke cilo, tua velisapo calua elavoko lietu. . . . Osimbu tu talamẽla, olopandu vietu vi li vokiya calua. Tua nõlapo oku talamẽla ndaño ci pita anyamo alua. Nda velisapo calua elavoko lietu.”

7-8. Elavoko lipi afendeli valua va Yehova va kuete? (Va Roma 8:20, 21)

⁷ Onepa yalua yafendeli va Yehova koloneke vilo va kuete elavoko lia litepa. Elavoko liaco olio Avirahama a kuatele okuti, omuenyo ka u pui palo posi vemẽhi Liusoma wa Suku. (Va Hev. 11:8-10, 13) Paulu wa soneha eci catiamẽla konima yi komõhisa ya vana va kuete elavoko liaco. (Tanga Va Roma 8:20, 21.) Eci wa fetika oku lilongisa catiamẽla kohuminyo Yembimbiliya yo kovaso yoloneke, nye ove wa solapo vali? Anga hẽ ceci wa lilongisa okuti ndopo o ka lipua kuenda lalimue eteke o ka kuata vali ekandu? Ale wa sanjukila oku kũlĩha okuti vangandiove va fa va ka kala vali lomuenyo palo posi vocumbo celau? “Omo lielavoko” Suku a ku ĩha o kuete ovina vialua viwa o pondola oku lavoka.

⁸ Ci kaile okuti tu ka kuata omuenyo ka u pui kilu, ale palo posi tu kuete elavoko limue li komõhisa okuti, li tu ĩha esunga lioku sanjuka. Eci ci pondola oku pamisa calua elavoko lietu. Olondaka via kuamamo Paulu a soneha vi lekisa ndomo ci lingiwa. Tu konomuisi eci eye a soneha catiamẽla kelavoko lietu. Olondaka viaco vi tu kuatisa oku pamisa ekolelo lietu liokuti, elavoko tu kuete li ka tẽlisiwa muẽle ocili.

9-10. Ndomo ca lomboluiwa la Paulu nye Akristão va pondola oku lavoka? (Va Roma 5:3) (Talavo ociluvialuvia.)

⁹ Tanga Va Roma 5:3. Paulu wa lombolola okuti, eci omunu umue a lipita lovitangi elavoko liaye li pamisiwa vali calua. Eci ci molẽha ndu okuti catatama. Ocili okuti, olondonge viosi via Kristu vi lavoka oku liyaka lovitangi. Kũlĩhĩsa eci Paulu a popia. Eye wa  sapuila ku vana va kala ko Tesalonike hati: “Eci tua kala lene, tua enda oku vu sapuili okuti, tu laika oku tala ohali kuenda eci oco ca siata oku pita ndomo wa ci kũlĩhi.” (1 Va Tes. 3:4) Ku va Korindo wa soneha hati: “Ka tu yongola okuti vu kala vonumbi yohali tua tala . . . Tua kala lohele yalua ndaño muẽle lovimuenyo vietu.”—2 Va Kor. 1:8; 11:23-27.

¹⁰ Akristão koloneke vilo va lavokavo oku lipita lovitangi vimue. (2 Tim. 3:12) Ove hẽ wa lambalaliwa omo lioku kolela ku Yesu kuenda oku u kuama? Akamba kuenda epata va pondola oku ku pembula. Citava okuti va ku tata lungangala. Ocituwa cove coku kala ukuacili kovina viosi ca koka hẽ ovitangi komanu vana o talavayela kumosi lavo? (Va Hev. 13:18) Anga hẽ wa kuata ale ovitangi vimue kombiali omo lioku sapuilako omanu vakuavo catiamẽla kelavoko liove? Ovitangi viosi o pita lavio, Paulu o tu sapuila okuti tu sukila oku sanjuka. Momo lie?

11. Momo lie tu sukilila oku likapelako oku pandikisa kovitangi viosi?

¹¹ Tu pondola oku sanjuka eci tu liyaka lovitangi, momo tua kũlĩha okuti ci tu kuatisa oku kuata ovituwa viwa. Ku va Roma 5:3 ku popia hati: “Ohali yi koka epandi.” Akristão vosi va ka liyaka lovitangi, omo liaco vosi yetu tu sukila oku lekisa epandi. Kuenje tu sukila oku likapelako oku pandikisa lovitangi viosi tu pita lavio. Nda tua ci linga, oco lika tu ka tẽla oku mola oku tẽlisiwa kuelavoko lietu. Ka tu yongola oku kala nda vana Yesu a kũlĩhĩle okuti va sokisiwa lombuto ya kupukila pocikakala. Ovo kefetikilo va tava ondaka lesanju, pole, “eci ku iya ohali ale elambalalo” va konyõha. (Mat. 13:5, 6, 20, 21) Ocili okuti oku liyaka lovitangi ale oloseteko ka ca lelukile, pole, oku pandikisa lavio ci tu kuatisa oku amamako oku vumba Yehova. Ndamupi?

12. Tu kuatisiwa ndati eci tu pandikisa kovitangi?

¹² Ndonge Tiago wa lombolola esilivilo lioku pandikisa koloseteko. Eye wa soneha hati: “Eceleli okuti epandi li tẽlisa ocimãho calio okuti, vu kanguka kuenda vu kala ciwa kovina viosi vu linga kuenje lacimue cu kambeli.” (Tia. 1:2-4) Tiago o tukula epandi ndocimãho cimue okuti upange umue u sukila oku lingiwa. Epandi li pondola oku linga upange upi? Olio li tu kuatisa okuti ocituwa caco ci li vokiya vali calua kuenda oku kuata ekolelo lialua ku Suku. Kuenje eci tu pandikisa tu kuatisiwa vali konepa yikuavo ya velapo.

13-14. Epandi li pondola oku tu kokela nye kuenda nye ci pita lelavoko lietu? (Va Roma 5:4)

¹³ Tanga Va Roma 5:4. Paulu wa popia okuti epandi li koka “oku taviwa la Suku.” Omo liaco, epandi liove li koka “oku taviwa la Yehova. Eci ka ci lomboloka okuti Yehova wa sanjukila oloseteko ale ovitangi o kasi oku liyaka lavio. Ocina ci taviwa la Suku, ove. Epandi liove li koka oku taviwa la Suku. Ci lembeleka calua oku kũlĩha okuti epandi liove li sanjuisa Yehova!—Osamo 5:12.

¹⁴ Ivaluka okuti Avirahama wa pandikisa kovitangi kuenje ca sanjuisa calua Yehova. Yehova wo tendele okuti ekamba liaye kuenda ukuesunga. (Efet. 15:6; Va Rom. 4:13, 22) Cimuamue haico ci pondola oku lipita letu. Yehova ka tu sanjukila lika omo liupange walua tu u lingila, ale omo liovikele tu kuete. Eye o tu sanjukila eci tu amamako lekolelo ndaño lovitangi. Cikale okuti tua kuka, tu kuete ekalo lia litepa, ale uloño wa litepa, vosi yetu tu pondola oku pandikisa. Anga hẽ o kasi oku liyaka locitangi cimue okuti ci sukila oku pandikisa lekolelo? Nda  oco, o ka lembelekiwa poku kũlĩha okuti o kasi oku sanjuisa Yehova. Oku limbuka okuti tu kasi oku taviwa la Suku ci tu sanjuisa calua. Eci ci pondola oku pamisa elavoko lietu.

15. Etosi lipi likuavo Paulu a tukula kuenda nye vamue va pondola oku lipula?

¹⁵ Ndomo Paulu a ci lombolola, tu ka sanjuisa lika Yehova nda tuamamako lekolelo kuenda oku pandikisa kovitangi. Paulu wamisako lolondaka viokuti: “Oku taviwa la Suku ku koka elavoko kuenda elavoko ka li tu sumuisa.” (Va Rom. 5:4, 5) Komanu vamue eci ca tatama. Momo lie? Momo ku Va Roma 5:2, Paulu wa tukula okuti Akristão vo ko Roma va kuatele ale elavoko limue okuti, ‘elavoko lioku tambula ulamba wa Suku.’ Omo liaco, omunu umue pamue o pula ndoco: ‘Nda Akristão vaco va kuatele ale elavoko limue, momo lie Paulu a tukuila vali elavoko kelomboluilo liaye?’

16. Elavoko liomunu umue li pondola oku pamisiwa ndati? (Talavo ociluvialuvia.)

¹⁶ Tu pondola oku kuata elomboloko lieci Paulu a yonguile oku popia okuti, elavoko ocina cimue ci pamisiwa. Ndocindekaise: Ove hẽ ivaluka eci wa yeva onjanja yatete elavoko li komõhisa li sangiwa vondaka ya Suku? Citava okuti ovisimĩlo wa kuata vioku kala otembo ka yi pui voluali luokaliye palo posi, kokuove via kala ndu okuti ka vi ka tẽlisiwa. Pole, osimbu wa kala oku kũlĩha ovina vialua viatiamẽla ku Yehova kuenda kolohuminyo Viembimbiliya, elavoko liove liokuti ovina viaco vi ka tẽlisiwa, lia pamisiwa.

17. Elavoko liamamako ndati oku pama noke lielitumbiko kuenda epapatiso?

¹⁷ Noke lielitumbiko liove kuenda epapatiso, osimbu o lilongisa loku kula konepa yespiritu, elavoko liove liamamako oku kula. (Va Hev. 5:13–6:1) Citava okuti wa vetiyiwa calua lolondaka vi sangiwa ku Va Roma 5:2-4. Pamue wa liyaka lovitangi vialua, pole, wa pandikisa kokuavio kuenje wa limbuka  okuti Yehova wa ku sanjukila. Omo lioku kũlĩha okuti eye oku sole kuenda wa ku sanjukila, kaliye o kuete asunga alua oku lavoka oku tambula ovina Yehova a likuminya. Elavoko liove lia pamisiwa vali calua okuti, kefetikilo ci sule. O li tenda okuti liocili muẽle kokuove. Elavoko liaco li ku vetiya vali calua. Konepa yikuavo, li ku kuatisa kekalo liomuenyo wove wosi kuenda oku pongolola onjila ndomo o tata epata liove, ndomo o nõla onjila yimue kuenda ndomo o talavaya ciwa lotembo yove.

18. Ohuminyo yipi Yehova a eca?

¹⁸ Upostolo Paulu wa vokiyako etosi limue li kuete esilivilo lialua liatiamẽla kelavoko, o pondola oku kuata noke lioku taviwa la Suku. Eye wa likuminya okuti elavoko liove li ka tẽlisiwa muẽle. Momo lie wa ci kolelela? Paulu wa lomboluila ohuminyo yaco ya Suku Kakristão hati: “Elavoko ka li tu sumuisa; momo ocisola ca Suku ca sukumũhila vovitima vietu omo liespiritu sandu lina lia eciwa kokuetu.” (Va Rom. 5:5) Ove o kuete asunga alua oku kolela kelavoko Yehova oku ĩha.

19. Nye o pondola oku kolela catiamẽla kelavoko liove?

¹⁹ Sokolola eci catiamẽla kohuminyo Yehova a lingile ku Avirahama kuenda ndomo a taviwa la Yehova loku u tenda ndekamba Liaye. Ovina Avirahama a kala oku lavoka via tẽlisiwa muẽle. Embimbiliya hati: “Avirahama noke yoku lekisa epandi, wa tambula ohuminyo yaco.” (Va Hev. 6:15; 11:9, 18; Va Rom. 4:20-22) Ocili okuti, ka kua kaile lacimue co kokela esumuo. Kũlĩha okuti nda wa amamako lekolelo limuamue, o ka tambula asumũlũho o lavoka. Elavoko liove liocili; li ku kokela esanju kuenda ka li ku sumuisa! (Va Rom. 12:12) Paulu wa soneha hati: “Suku una eca eca elavoko, a ku yukisi lesanju lialua kuenda ombembua omo wa koleli kokuaye oco okuti, vu supoka lelavoko lunene wespiritu sandu.”—Va Rom. 15:13.