Ove hẽ wa tanga lutate ovipama Viutala Wondavululi via sandekiwa vunyamo ulo? Nda wa vi sola, tambulula apulilo a kuãimo:

Nye ci lomboloka oku ‘pongolola ovisimĩlo vietu’? (Va Rom. 12:2)

Mua kongela ovina vialua okuti, oku lekisa lika ovilinga viwa hacoko. Mua kongela oku kũlĩhĩsa ndomo tua tuwa vokati ketu, loku linga apongoloko a sukiliwa oco tu lekise okuti, tu kasi oku pokola kolonumbi via Yehova.—w23.01, kam. 8-9.

Tu lekisa ndati esunguluko poku lavulula ovina vi pita voluali?

Tu kuete onjongole yoku kũlĩha ndomo ovina vi pita voluali vi kasi oku tẽlisa ocitumasuku Cembimbiliya. Ka tu yongola oku mamõha, loku popia ovina vi tepa omunga vekongelo, pole, tu sukila oku tiamisila ombangulo yetu kalivulu a sandekiwa locisoko ca Yehova. (1 Va Kor. 1:10)—w23.02, kem. 16.

Ndamupi epapatiso lia Yesu lia li tepa lepapatiso liolondonge viaye?

Omo okuti Yesu wa citiwila vepata limue lia li tumbikile ale ku Suku, ka sukilile oku litumbika vali ku Yehova ndeci etu. Eye wa kala omunu umue wa lipua, ka kuatele ekandu. Yesu ka sukilile oku likekembela kakandu.—w23.03, kem. 5.

Tu kuatisa ndati vamanji oku ecavo atambululo?

Cimue pokati kovina tu sukila oku linga, oku eca atambululo ateta onimbu, oco cecelele okuti vamanji vakuavo va ecavo atambululo. Tu sukilavo oku yuvula oku vangula atosi alua. Kuli atosi vakuẽne va pondola oku tukulavo.—w23.04, kem. 23.

Nye ci lomboloka “Onjila yi Kola” ya tukuiwa ku Isaya 35:8?

Onjila eyi yocindekaise, ya tukuiwa onjanja yatete eci va Yudea va tunda ko Bavulono oku enda kofeka va citiwila. Nye ci popiwa koloneke vilo? Vokuenda kuanyamo alua osimbu unyamo 1919 ka wa pitĩlile, kua fetikiwa oku pangiwa kuenda oku sandeka Ambimbiliya lalivulu akuavo. Afendeli va Suku va siata oku endela ‘Vonjila yi Kola,’ yocumbo celau konepa yespiritu yi tuala kasumũlũho Wusoma.—w23.05, kam. 15-19.

Elungulo lipi tu sanga kelivulu Liolosapo ocipama 9, kuna ku tukula akãi vavali vocindekaise?

Kelivulu Liolosapo ku tukula “ukãi eveke” okuti elaleko liaye lia loña “valondo Onjembo” kuenda elaleko liukãi ‘ukualondunge viocili,’ lia loña “vonjila yelomboloko” kuenda yomuenyo. (Olosap. 9:1, 6, 13, 18)—w23.06, kam. 22-24.

Umbombe kuenda ocikembe ca Yehova ca lekisiwa ndati kukamba waye la Lote?

Yehova wa sapuila Lote oku tunda vo Sodoma oco a tilile kovaimbo a kasi kolomunda. Eci Lote a pinga oco a tilile ko Cohara, Suku wa tava epingilo liaye.—w23.07, kem. 21.

Nye ukãi umue a sukila oku linga nda ohueli yaye yi tala ovina viumbondo?

Ukãi o sukila oku ivaluka okuti ka kuete eko. Eye o sukila oku sokolola kukamba a kuete la Suku loku sokolola kovolandu akãi va tukuiwa Vembimbiliya, okuti va kuatelevo esakalalo kuenje va sanga elembeleko ku Suku. Ukãi o pondola oku kuatisa ulume waye oku yuvula ovina viu kokela ohele.—w23.08, kam. 14-17.

Eci umue a sepula ovina tua kolela, olondunge vi tu kuatisa ndati oku lekisa umbombe?

Tu sukila oku tenda epulilo ale esepu, ndonjila yimue yi tu kuatisa oku limbuka eci omunu ukuavo a kasi oku sima, ale eci cu sakalaisa. Kuenje tu pondola oku lipongiyila oku tambulula omunu lonjila yimue yesumbilo.—w23.09, kem. 17.

Nye tu lilongisila ku Maria catiamẽla koku kuata ongusu?

Maria eci a yeva okuti o linga ina ya Mesiya, wa pamisiwa lomanu vakuavo. Gabriele kuenda Elisavete, va eca ku Maria olonumbi Viembimbiliya. Etu tu pondola oku kuata ongusu pocakati ca vamanji.—w23.10, kem. 15.

Yehova o tambulula ndati olohutililo vietu?

Yehova o likuminya oku tambulula olohutililo vietu kuenda o kũlĩhĩsa ndomo ovio vi likuata locipango caye. (Yer. 29:12) Eye o tambulula apingilo amuamue volonjila via litepa, pole, olonjanja viosi o tu kuatisa.—w23.11, kame. 21-22.

Ku Va Roma 5:2 ku tukula ‘elavoko,’ oco hẽ nye ya lomboluiwila vali kocinimbu ca 4?

Omunu umue poku yeva olondaka viwa, o pondola oku kuata elavoko lioku sanjukila oku kuata omuenyo palo posi vocumbo celau. Pole, osimbu eye a liyaka lovitangi o pandikisa lavo, o taviwa la Suku kuenda citava okuti elavoko liaye li pamisiwa loku kuata ocimãho.—w23.12, kam. 12-13.