Upostolo Paulu wa sonehela kekamba liaye Timoteo wa kalavo ukulu wekongelo hati: “Ndu ku handeleka kovaso a Suku, la Kristu Yesu kuenda kovangelo va nõliwa, oco o pokole kolonumbi evi okuti, ku kuata olonepele ale ocame.”—1 Tim. 5:21.

Catete, oco tu kũlĩhe velie ovangelo vaco, tu konomuisa ovangelo ka va ponduile oku kongeliwa kocimunga covangelo vaco. Ovo hetendeleko lieci ci soka 144.000. Eci Paulu a sonehela Timoteo, epinduko Liakristão olombuavekua lioku enda kilu, handi ka lia fetikile. Ovapostolo kuenda olombuavekua vikuavo handi ka va kaile oviluvo viespiritu, kuenje ovo ka va ponduile oku kala ‘ovangelo va nõliwa.’—1 Va Kor. 15:50-54; 1 Va Tes. 4:13-17; 1 Yoa. 3:2.

Handi vali, ‘ovangelo va nõliwa,’ ka va lombolokavo ovangelo vana va lekisa esino kotembo Yetande. Ovangelo vaco va likongela ku Satana loku linga olondele kuenda oku kala ovanyali va Yesu. (Efet. 6:2; Luka 8:30, 31; 2 Pet. 2:4) Kovaso yoloneke va ka imbiwa vekungu vokuenda 1.000 yanyamo kuenje noke va ka kunduiwa kumue la Satana.—Yuda 6; Esit. 20:1-3, 10.

Omo liaco, ‘ovangelo va nõliwa,’ Paulu a tukula, citava okuti ovangelo vana va talavayela kumosi la “Yehova kuenda Yesu Kristu” kilu, okuti va tukuiwavo vocinimbu eci.

Kuli olohuluwa vialua viovangelo vakuekolelo. (Va Hev. 12:22, 23) Eci ci lekisa okuti, Yehova ka eci ocikele cimuamue kovangelo vosi. (Esit. 14:17, 18) Ndeci, vepuluvi limue Yehova wa nõla ungelo umue oco a ponde eci cisoka 185.000 kasualali va va Asuria. (2 Olos. 19:35) Ovangelo vakuavo citava okuti, va tambula ocikele coku “kopa Kusoma wa [Yesu] ovina viosi vi koka ocilondokua lomanu va tomba ovihandeleko.” (Mat. 13:39-41) Handi vali, vakuavo va kuete ocikele coku “kongolola kavindi akuãla oluali vana va nõliwa” oku enda kilu. (Mat. 24:31) Ovangelo vakuavo va nõliwila oco va tu ‘teyuile kolonjila vietu viosi.’—Osa. 91:11; Mat. 18:10; Sokisa Mateo 4:11; Luka 22:43.

‘Ovangelo va nõliwa’ va tukuiwa kukanda 1 Timoteo 5:21, citava okuti, ovangelo vana va nõliwile oco va kuatise oku tata akongelo. Vulandu wocinimbu eci, Paulu wa eca alungulo ndomo akulu vekongelo va sukilile oku tata ekongelo kuenda ndomo ekongelo lia sukilile oku va tata lesumbilo. Akulu vekongelo va sukila oku tata ocikele cavo okuti ka va “kuata olonepele ale ocame” kuenda va sukila oku yuvula oku nõla onjila yimue lonjanga. Esunga lieci akulu vekongelo va sukilila oku kuama elungulo lia Paulu, lieli liokuti va kasi “kovaso a Suku, la Kristu Yesu kuenda kovangelo va nõliwa.” Kuenje eci ci lekisa okuti ovangelo vamue va kuete ocikele coku tata ekongelo. Kovina vikuavo ovo va teyuila afendeli va Yehova, va songuila upange woku kunda kuenda va lomboluila Yehova ovina va mola.—Mat. 18:10; Esit. 14:6.