Citava okuti sio. Eliapu ka lia popele okuti, nda Eva wa lia kepako liuti, o kala ño ndu okuti wa fa. Eliapu ka lia popele okuti vetimba lia Eva muli cimue ka ci letiwe (cina omanu va tukula hati ocilelembia ka ci fi) okuti camamako oku kala lomuenyo kocitumãlo cikuavo. Satana pocakati conyõha wa sapuila Eva hati: “Sio, oku fa ka vu fi.” Satana lolondaka evi wa yonguile oku popia okuti, nda Eva wa lia kepako liuti waco, nda wa kuata omuenyo umue wa velapo okuti o linõlela eye muẽle eci a yongola oku linga, okuti Suku sio.​​—Efet. 2:17; 3:3-5.

Pole, nda elongiso liocilelembiya ka ci fi, ndomo ca siata oku longisiwa koloneke vilo, ka lia fetikile vocumbo Cedene, oco hẽ lia fetika otembo yipi? Ka tu kuete elomboloko lia suapo. Eci tua kũlĩha ceci okuti, efendelo liosi lisanda lia kunduiwa Ketande koloneke via Noha. Ka kuli ocisimĩlo lacimue cefendelo liesanda ca supuluka Ketande. Afendeli vocili va Suku, ovo lika va supuluka okuti, Noha kumue lepata liaye.

Omo liaco, elongiso liocilelembiya ka ci fi citava okuti lia fetika noke Lietande. Ocili okuti, eci Yehova a tatamisa alimi ko Bavele, omanu va lisaduila ‘kolonepa viosi vio kilu lieve’ kuenje citava okuti kovitumãlo va enda, vambata ocisimĩlo cokuti omunu o kuete ocilelembiya ka ci fi. (Efet. 11:​8, 9) Ndaño okuti ka kuli elomboloko lia suapo liotembo elongiso liesanda lia fetika, pole, tua kũlĩha okuti Satana, Eliapu, “isia yuhembi,” eye o kasi oku vetiya uhembi waco kuenda eye o sanjuka poku mola okuti uhembi waco u kasi oku lisanduila kolonepa viosi violuali.​—Yoa. 8:44.