1-2. Ndomo ulandu wa manji Angelito u lekisa, nye omunu lomunu pokati ketu a sukila oku linga?

OLONJALI viove hẽ Olombangi Via Yehova? Nda oco, ivaluka okuti ukamba wove la Suku hacina cimueko tua piñala kolonjali vietu. Cikale okuti olonjali vietu vi vumba Suku ale sio, omunu lomunu pokati ketu o sukila oku pamisa ukamba waye la Yehova.

² Kũlĩhĩsa ulandu wa manji Angelito. Vosi vepata liaye Olombangi Via Yehova. Pole, eci Angelito a kala utito, wa limbuka okuti ka kuatele ukamba wa pama la Suku. Eye hati: “Ame ndaenda lika oku fendela Yehova omo lioku setukula epata liange.” Pole, eye wa nõlapo oku sanda otembo yoku tanga Embimbiliya loku sokolola kovina a tanga kuenda oku likutilila calua. Nye ceyililako? Manji Angelito wamisako hati: “Nda lilongisa okuti onjila yimue yoku amẽla ku Yehova, ame muẽle oku u kũlĩha.” Ulandu wa manji Angelito, u votola apulilo amue a kuete esilivilo ndeci: Etepiso lipi li kasi pokati koku kũlĩha ovina vimue viatiamẽla ku Yehova kuenda oku u kũlĩha ciwa? Kuenda nye tu sukila oku linga oco tu kũlĩhe Yehova?

3. Etepiso lipi li kasi pokati koku kũlĩha ovina vimue viatiamẽla ku Yehova loku u kũlĩha ciwa?

³ Omunu umue pamue o sima okuti wa kũlĩha Yehova, omo wa kũlĩha onduko yaye kuenda ovina eye a popia levi a linga. Pole, kuli ananga amue omunu a sukila oku eca, oco a kũlĩhe ciwa Yehova. Tu sukila oku sanda otembo yoku lilongisa catiamẽla kokuaye kuenda ovituwa viaye vi komõhisa. Nda tua ci linga, tu fetika oku kuata elomboloko lieci Yehova a popela cimue kuenda oku linga ovina vimue. Eci ci ka tu kuatisa oku kũlĩha nda Yehova o tava ale sio ovisimĩlo vietu, onjila tu nõla kuenda ovilinga vietu. Noke lioku limbuka eci Yehova a yongola okuti tu ci linga, tu sukila oku kapako ovina tua lilongisa.

4. Momo lie oku konomuisa ovolandu amue Embimbiliya ci ponduila oku tu kuatisa?

⁴ Omanu vamue citava okuti pamue va tu yola epembe omo tu yongola oku vumba Yehova. Pamue ci piãla vali enene eci tu fetika oku endaenda kolohongele. Pole, nda tua kolela Yehova, eye lalimue eteke a ka tu yanduluka. Ekolelo tu lekisa kokuaye li kala ociseveto cimue ca pama cukamba umue u ka kala otembo yosi. Anga hẽ tu pondola muẽle oku kũlĩha ciwa Yehova loku kala akamba vaye? Oco, tu pondola! Ndomo tu ka ci kũlĩhĩsa vocipama cilo, ulandu walume ka va lipuile ndeci, Mose la Soma Daviti, u lekisa uvangi waco. Tu tambulula apulilo avali ndeci: Ndamupi alume ava vakuekolelo va fetika oku kũlĩha Yehova? Kuenda ulandu wavo u tu longisa nye?

5. Onjila yipi Mose a nõla?

⁵ Mose wa nõla oku vumba Suku. Eci Mose a tẽlisa 40 kanyamo wa nõlelepo oku kala lomanu va Suku, va Heveru kuenje ka yonguile oku kũlĩhiwa okuti “omõla womõla a Fareo ukãi.” (Va Hev. 11:24) Eye wa likala oku kala omunu wa velapo. Omo okuti wa kuatisa va Heveru va kala apika Kegito, omuenyo waye wa kala kohele peka lia Fareo ombiali yinene okuti, va Egito vo tendele ndosuku. Mose wa kuata ekolelo lia pama! Eye wa kolelele Yehova. Ekolelo liaco, lia pamisa ukamba waye la Yehova, okuti ukamba umue wa kala otembo yalua.​—Olosap. 3:5.

6. Nye tu lilongisila kulandu wa Mose?

⁶ Ulandu owu, u tu longisa nye? Ndeci Mose a linga, vosi yetu tu sukila oku nõla nda tu vumba Suku ale sio kuenda nda tu tiamẽla konele yafendeli vaye. Oku vumba Suku ci sukila alikolisilo alua. Citava okuti omanu vana ka va kũlĩhĩle Suku va tu lambalala. Pole, nda tua kolela ku Isietu wokilu, tu pondola oku lavoka ekuatiso liaye!

7-8. Mose wamamako oku lilongisa nye?

⁷ Mose wamamako oku lilongisa catiamẽla kovituwa via Yehova loku linga ocipange caye. Ndeci, eci Yehova a sapuila Mose okuti wa laikele oku u tuma oco a yovole va Isareli kumandekua Kegito, Mose wa kuata ohele kuenda wa sapuila Yehova olonjanja vialua okuti ka loñolohele oco a tẽlise ocikele caco. Yehova wa lekisa ohenda kokuaye, ale wa limbuka ndomo Mose a liyeva kuenje wo kuatisa. (Etu. 4:​10-16) Onima yipi yeyililako? Mose wa tẽla oku tẽlisa ocipango ca Suku kuenda wa tuma asapulo esombiso ku Fareo, ulume una wa tendiwile ndosuku. Noke Mose wa mola Yehova oku talavaya lunene Waye, oco a yovole va Isareli, loku nyõla Fareo kumue lolohoka viaye Vokalunga Kakusuka.​—Etu. 14:26-31; Osa. 136:15.

⁸ Va Isareli noke yoku yovuiwa Kegito, va fetika oku lisiõsiõla. Ndaño ndoco, Yehova wa lekisa epandi lialua kokuavo kuenda Mose wa ci mola. (Osa. 78:40-43) Mose wa molavo Yehova oku lekisa umbombe u komõhisa eci a livondela kokuaye oco a pongolole ovisimĩlo viaye, kuenje Yehova wa tava epingilo liaco.​—Etu. 32:9-14.

9. Ndomo ca lekisiwa ku Va Heveru 11:​27, ukamba upi wa kala pokati ka Mose la Yehova?

⁹ Noke liovina evi, ukamba wa Mose la Yehova weya oku pama calua kuenje ca kala ndu okuti Mose o lete Isiaye wokilu. (Tanga Va Heveru 11:27.) Embimbiliya poku tukula ukamba wa pama wa kala pokati kavo lia popia hati: “Oco Yehova a vangola la Mose, omẽla lomẽla, ndeci omunu a vangula lekamba liaye.”​—Etu. 33:11.

10. Nye tu sukila oku linga oco tu kũlĩhe ciwa Yehova?

¹⁰ Ulandu owu, u tu longisa nye? Oco tu kũlĩhe ciwa Yehova, ka tu sukila lika oku lilongisa catiamẽla kovituwa viaye. Tu sukilavo oku linga ocipango caye. Yehova koloneke vilo, “o yongola okuti omanu vosi va kuata ukũlĩhĩso wa suapo wocili oco va popeliwe.” (1 Tim. 2:​3, 4) Onjila yimue yoku linga ocipango ca Yehova, oku longisa omanu catiamẽla kokuaye.

11. Momo lie tu popela okuti eci tu longisa omanu catiamẽla ku Yehova, etu tu pondolavo oku u kũlĩha ciwa?

¹¹ Olonjanja vimue, eci tu longisa umue catiamẽla ku Yehova, etu tu u kũlĩha vali ciwa. Ndeci, tu limbuka ohenda Yehova a kuetele omanu eci eye a tu kuatisa oku sanga omanu vana va yongola oku kala akamba vaye. (Yoa. 6:44; Ovil. 13:48) Tu limbuka unene Wondaka ya Suku, eci tu mola omanu tu lilongisa lavo Embimbiliya oku siapo ovituwa vĩvi, loku wala omunu wokaliye. (Va Kol. 3:​9, 10) Etu tu lete epandi lia Suku poku mola ndomo eye a kasi oku eca komanu vovikanjo vietu epuluvi lioku lilongisa catiamẽla kokuaye, oco va popeliwe.​—Va Rom. 10:13-15.

12. Nye Mose a pinga ndomo ca lekisiwa Ketundilo 33:13 kuenda momo lie a lingila epingilo eli?

¹² Mose ka la sima okuti ukamba waye la Yehova wa pama ale. Ndaño okuti Mose wa linga ovopange a komõhisa vonduko ya Suku, eye lesumbilo lialua wa pinga ku Yehova oco o kuatise oku u kulĩha ciwa. (Tanga Etundilo 33:13.) Eci Mose a linga epingilo eli wa kuata 80 kanyamo. Eye wa kũlĩhĩle okuti kuli ovina vialua a sukilile oku lilongisa catiamẽla ku Isiaye wokilu ukuacisola.

13. Yipi onjila yimue yoku lekisa okuti tua kapako calua ukamba wetu la Suku?

¹³ Ulandu owu, u tu longisa nye? Ndaño okuti tu kasi ale oku vumba Yehova vokuenda kuanyamo alua, lalimue eteke ka tu ka simi okuti ukamba wetu la Yehova wa pama ale. Tu sukila oku kapako ukamba waco kuenda oku u lava ciwa. Onjila yimue yoku ci linga, oku sapela la Suku pocakati cohutililo.

14. Momo lie ohutililo oyo osapi yoku kũlĩha ciwa Suku?

¹⁴ Oco ukamba umue wamameko oku pama ci sukila oku kuata ocituwa coku sapela. Omo liaco, likutilila ku Yehova olonjanja viosi kuenda ku ka kuate usumba woku u situluila eci ci kasi vutima wove. (Va Efe. 6:18) Manji umue ukãi o tukuiwa hati, Krista, o kasi kofeka yo Turkiya wa popia hati: “Olonjanja viosi eci ndi sapela la Yehova catiamẽla kovisimĩlo viange kuenje ndi limbuka okuti o kasi oku ñuatisa, ocisola lekolelo ndu u kuetele ci li vokiya. Kuenje Yehova wa tambulula olohutililo viange. Cilo ndi tenda Yehova nda Isiange kuenda ekamba liange.”

15. Nye Yehova a popia catiamẽla ku Daviti?

¹⁵ Soma Daviti wa citiwa vepata limue li fendela Yehova Suku. Pole, eye ka kaile oku vumba Yehova omo okuti wa yongile oku setukula epata liaye, ale omanu vakuavo. Daviti eye muẽle wa pamisa ukamba waye la Yehova kuenje Yehova wo sola calua. Yehova wa tukula Daviti hati, ‘omunu umue wa sanjuisa utima Waye.’ (Ovil. 13:22) Daviti wa pamisa ndati ukamba waye la Yehova?

16. Nye Daviti a lilongisa catiamẽla ku Yehova poku luluvalela kovina via lulikiwa?

 ¹⁶ Daviti wa lilongisa eci catiamẽla ku Yehova poku tala oviluvo. Eci Daviti a kala umalẽhe, wa enda oku kala vusenge otembo yalua, oku tata ovinyama via isiaye. Citava okuti votembo yaco wa enda oku sokolola kovina Yehova a lulika. Ndeci, poku luluvalela kilu kuteke, Daviti ka endaile lika oku mola olohuluwa violombungululu, pole, wa endavo oku sokola ovituwa via Una wa vi lulika. Kuenje Daviti wa vetiyiwa oku soneha hati: “Ilu li sapula ulamba wa Suku. Oluali lu situlula ovilinga viovaka aye.” (Osa. 19:​1, 2) Eci Daviti a vetiyiwa oku sokolola konjila yi komohĩsa ndomo omanu va lulikiwa, eye wa tẽla oku limbuka olondunge via Yehova kovina viosi. (Osa. 139:14) Eci Daviti a sokolola kovina Yehova a lulika, eye wa liyevele okuti utito oku lisokisa la Suku ukuonene wosi.​—Osa. 139:6.

17. Nye tu lilongisa poku sokolola kovina via lulikiwa?

¹⁷ Ulandu owu u tu longisa nye? Sanda oku lilongisila kovina Suku a lulika. Ku ka sanjukile lika oku kala voluali lumue lua posoka lua lulikiwa la Yehova. Sanda otembo yoku luluvalela koviluvo kuenda kuata esanju poku vi tala. Keteke leteke, sokolola kueci o pondola oku lilongisila catiamẽla ku Yehova poku luluvalela koviluvo via ku ñuala ndeci, olonelẽho, ovinyama kuenda omanu. Poku ci linga eteke leteke komuenyo wove, o ka kuata ovolandu awa atiamela ku Isiove ukuacisola. (Va Rom. 1:20) Kuenje o ka limbuka okuti vokuenda kuotembo, ocisola o kuetele Yehova ci livokiya.

18. Ndomo ca lekisiwa Kosamo 18, nye Daviti a limbukile?

¹⁸ Daviti wa limbukile okuti Yehova wa enda oku u kuatisa. Ndeci, eci a teyuila olomeme via isiaye kohosi kuenda kokanyani, Daviti wa limbuka okuti wa tẽla lika oku ponda ovinyama viaco via tema, omo liekuatiso lia Yehova. Eci a yula ocindululu ukuavita Koliata, Daviti wa limbukavo okuti eka lia Yehova olio lia kala oku u songuila. (1 Sam. 17:37) Eci a tila soma Saulu ukuanya, Daviti wa kũlĩhĩle okuti Yehova eye wo yovola. (Osa. 18, olondaka vioku fetika) Nda Daviti wa kalele ukuepela, eye nda wa litunũla omo liayulo aco. Pole, eye wa kala embombe kuenda wa limbukile okuti ekuatiso liosi lia tunda ku Yehova.​—Osa.. 138:6.

19. Nye tu lilongisa kulandu wa Daviti?

¹⁹ Ulandu owu u tu longisa nye? Oku pinga lika oco Yehova a tu kuatise, ka ci tẽla. Tu sukila oku limbuka olonjila a tu kuatisa ale kuenda ndomo a ci linga. Nda tua lekisa umbombe loku limbuka okuti ka tu tẽla oku linga ovina viosi, tu ka tẽla oku limbuka eka lia Yehova o ku tu kuatisa kovitangi vina okuti, likalietu ka tu tẽla oku vi potolola. Kuenje olonjanja viosi eci tu limbuka ekuatiso lia Yehova, ukamba tu u kuetele u pama. Manji umue o tukuiwa hati Isaac o kasi kofeka yo Fiji, okuti o kasi oku vumba Yehova vokuenda kuanyamo alua, eye wa ci limbukavo. Eye hati: “Poku vanja konyima ndi tẽla oku limbuka ndomo Yehova a ñuatisa tunde eci ndafetika oku lilongisa Embimbiliya toke etali. Kuenje cilo nda limbuka okuti eye o kasi ocipepi lame.”

20. Nye tua lilongisa kukamba Daviti a kuata la Yehova?

²⁰ Daviti wa setukula ovituwa via Yehova. Yehova wa tu lulika lepondolo lioku setukula ovituwa viaye. (Efet. 1:26) Osimbu tuamamako oku lilongisa catiamẽla kovituwa via Yehova, ci leluka vali oku setukula ovituwa viaye. Daviti omo okuti wa kũlĩhĩle ciwa Isiaye wokilu, wa tẽla oku setukula Suku konjila ndomo a enda oku tata vakuavo. Kũlĩhĩsa ulandu owu. Daviti wa lingila ekandu Yehova, eci a linga ukahokolo la Batisieva loku tuma oco ulume waye a pondiwe. (2 Sam. 11:​1-4, 15) Pole, Yehova wa tata Daviti lohenda. Momo lie? Momo Daviti wa enda oku tatavo vakuavo lohenda. Daviti omo lioku kuata ukamba wa pama la Yehova, wa linga osoma yimue ya soliwa calua la va Isareli kuenda Yehova wo nõla oco a kaile ndongangu yiwa kolosoma vikuavo vio ko Isareli.​—1 Olos. 15:11; 2 Olos. 14:1-3.

21. Ndomo tu vetiyiwa ku Va Efeso 4:24 kuenda 5:​1, onima yipi tu kuata omo lioku kala “olosetukuli via Suku”?

²¹ Nye tu lilongisilako? Tu sukila oku kala “olosetukuli via Suku.” Hamekondako lika okuti ci kuete esilivilo kokuetu, pole, eyi onjila yimue yi tu kuatisa oku u kũlĩha ciwa. Eci tu setukula ovituwa via Yehova, tu lekisa okuti tumãla vaye.​—Tanga Va Efeso 4:24; 5:1.

22-23. Nye ci ka pita letu nda tua kapako ovina tua lilongisa viatiamẽla ku Yehova?

²² Ndomo tua ci mola vocipama cilo, Yehova o lekisa ovituwa viaye pocakati covina a lulika kuenda pocakati Cembimbiliya. Velivulu liaco, mu sangiwa ovolandu afendeli vakuekolelo va Suku tu pondola oku setukula ndeci, Mose kuenda Daviti. Yehova wa linga ale onepa yaye. Etu tu sukilavo oku linga onepa yetu poku amamako oku lilongisa ovina vialua viatiamẽla ku Yehova.

²³ Oku lilongisa eci catiamẽla ku Yehova lalimue eteke ku sulila. (Uku. 3:11) Ca velapo ovinako lika tu lilongisa viatiamẽla kokuaye. Pole, ca velapo vali oku kapako ovina tu lilongisa. Nda tua ci linga loku setukula Isietu Yehova ukuacisola, eye o kamamako oku amẽla kokuetu. (Tia. 4:⁠8) Yehova Vondaka yaye wa tu likuminya okuti, lalimue eteke a ka yanduluka vana va likolisilako oku u kũlĩha ciwa.