Ulandu u sangiwa kelivulu Liesinumuĩlo 22:​25-27 ka u tiamisila poku lekisa nda ulume o kuete eko, momo ulume wa tendiwile ale okuti o kuete muẽle eko. Ocihandeleko ca tukuiwa vocinimbu eci, ci tiamisiwa koku lekisa okuti ukãi ka kuete eko. Tu kũlĩhĩsi ciwa ulandu waco.

Ovinimbu via pita via lombolola ulume umue wa lipekela lufeko wa lombiwa ale, “vimbo.” Omo liaco, ulume wa kuatele eko liukahokolo, omo okuti ukãi wa lombiwa ale, wa tendiwile ndu okuti okuele. Nye ci popiwa kufeko? Ulandu u lekisa okuti ufeko ka litetelele. Nda wa litetelele vakuavo nda vo yeva kuenje nda vo teyuila. Pole, omo okuti ‘ufeko ka litetelele,’ wa kuatavo eko liukahokolo; ulume hayeko lika.​—Esin. 22:23, 24.

Pole ocihandeleko ca endavo oku kuama onjila yikuavo poku popiwa hati: “Puãi nda ulume o sanga vusenge ufeko wa lombiwa ale lulume ukuavo kuenje u kuata loku pekela laye, oco ulume wa pekela laye eye lika o fa. Puãi ufeko ku u lingi cimue. Ufeko ka kuete ekandu li sesamẽla okufa; momo eci ca lisoka londaka yomunu wa katukila ukuavo kuenje wo wipa. Momo wa sanga ño vusenge, kuenje ndaño mbi ufeko waco wa lombiwa ale wa vilikiya oku u kuatisa haimo ka kua kaile u u popela.”​—Deut. 22:25-27.

Lonjila eyi ca kuatisa ufeko. Ndamupi? Nda va limbuka okuti eye “wa vilikiya oku u kuatisa haimo ka kua kaile u u popela.” Kuenje eye ka kuata eko liukahokolo. Pole, ulume wa kuata eko liukahokolo, momo ‘wa kuata ufeko wa lombiwa ale kuenda wa lipekela laye.’

Omo okuti ocihandeleko ca lekisa okuti ufeko ka kuete eko, ulandu owu wa sunguluka poku popia okuti ulume eye wa kuatele eko liukahokolo omo lioku lipekela lufeko. Ocili okuti, olonganji via ‘kũlĩhĩsa lutate ocitangi caco’ kuenda via nõla onjila yimue yi litava lolonumbi via Suku, vina eye a pituluile ale olonjanja vialua.​—Deut. 13:14; 17:4; Ex. 20:14.