Yehova wa sapuila va Isareli oco va kale omanu va kola. Oco a va kuatise oku kala omanu va kola, wa va sapuila hati: “Ku ka ende pokati ka vakuene oku sandeka olombonde. Ku ka linge cimue ci pondola oku kapa kohele omuenyo wukuene. Ame ndi Yehova.”—Ovis. 19:2, 16.

Oku “kapa kohele,” ondaka yimue ya pongoluiwa kelimi lio Heveru, pole, yi lomboloka nye? Elivulu limue lia va Yudea, catiamẽla kelivulu Liovisila lia popia hati: “Onepa eyi yocinimbu ya tĩla oku yi pongolola omo ka ya lelukile oku kuata elomboloko ndomo ondaka yaco ya sonehiwile kelimi lio Heveru, oyo hati, ‘ku ka talame ocipepi.’”

Olonoño vimue vi sokisa olondaka viaco levi vi sangiwa vocinimbu 15, vi popia hati: “Lekisi esunga poku tetulula. Ku ka lekise ocame kohukũi okuti o velisapo ohuasi. Lekisa esunga poku tetuluila ukuene.” (Ovis. 19:15) Eci ci lomboloka okuti, ocihandeleko ci sangiwa kocinimbu 16 cokuti ku ka kape kohele omuenyo womunu umue, ca lombolokele okuti afendeli va Suku ka va ponduile oku kangisa ekamba limue liupange, poku u sombisa, ale kovina violomĩlu, kovitangi viepata kuenda oku yuvula oku pengisa ovina oco o likuatise ove muẽle. Ocili okuti nda ka tua ponduile oku linga ovina viaco, pole, kuli onjila yikuavo yoku kuata elomboloko lionepa yi sangiwa kocinimbu 16.

Konomuisa efetikilo liocinimbu caco. Suku wa handelekele omanu vaye oku yuvula oku sandeka olombonde. Ivaluka okuti olombonde vi koka vali ohele loku lundila, momo ovio vi pondolavo oku nena ovitangi vialua. (Olosap. 10:19; Uku. 10:12-14; 1 Tim. 5:11-15; Tia. 3:6) Olombonde olondaka viuhembi kuenda vi kuete ocimãho coku vĩhisa ovituwa viomunu umue. Olombonde vi kuete uvangi wesanda, ndaño olondaka viaco vi kapa kohele omuenyo womunu. Ivaluka okuti alume va lundila Navote, va kuata olombangi viesanda kuenje ca koka oku u sosõla lovawe. (1 Olos. 21:8-13) Ocili okuti omunu ukualombonde wa ponduile oku kapa kohele omuenyo womunu ukuavo ndomo ca tukuiwa konepa yavali yelivulu Liovisila 19:16.

Handi vali, omunu umue o lundila ukuavo momo wo suvuka. Ku 1 Yoano 3:15 tu tangako hati: “Wosi o suvuka manjaye, omondi kuenda wa kũlĩhi okuti, layimue omondi yi kuata omuenyo ko pui.” Noke lia Suku oku popia olondaka vi sangiwa kocinimbu 16 eye wamisako hati: “Ku ka suvuke manjove vutima.”—Ovis. 19:17.

Kuenje ocihandeleko ci sangiwa kelivulu Liovisila 19:16, lieca elungulo linene Kakristão. Tu sukila oku yuvula ovisimĩlo vĩvi kuenda oku sandeka olombonde komunu ukuavo. Ocili okuti, nda tua “kapa kohele omuenyo” womunu umue omo okuti ka tu u sole loku sandeka olombonde viatiamẽla kokuaye, ci lekisa okuti omunu waco tuo suvuka. Akristão va sukila oku yuvula ocituwa caco.—Mat. 12:36, 37.