Ove hẽ wa tanga lutate ovipama Viutala Wondavululi via sandekiwa vunyamo ulo? Nda wa vi sola, tambulula apulilo a kuãimo:

Kukanda wa Tiago 5:11 tu kuatisiwa ndati poku popia hati, Yehova “ukuacisola calua” haeye “ukuahenda?”

Tua kũlĩha okuti Yehova omo liohenda ecela akulueya etu. Kukanda wa Tiago 5:11, ku tu sapuilavo okuti, Yehova locisola o tu kuatisa. Etu tu sukila oku u setukula.—w21.01, kem. 21.

Momo lie Yehova a ecela omoko yoku songola?

Eye wa ci lingila omo liocisola. Omoko yoku songola, yi kuatisa epata lia Yehova oku talavaya lombembua kuenda lesokiyo liwa. Omunu lomunu okuti vepata wa kapako esokiyo liaco, wa kũlĩha omunu o kuete omoko poku nõla onjila yi kuamiwa.—w21.02, kem. 3.

Momo lie Akristão va sukilila oku kuata Utate poku talavaya lovimalẽho vioku tuma kuenda oku tambula asapulo?

Nda umue wa nõlapo oku kuama ovimalẽho evi, o sukila oku kuata utate koku nõla ciwa akamba. Ca tĩla oku ci linga, ca piãla enene nda ocimunga caco cinene. (1 Tim. 5:13) Kulivo ohele yoku kongelamo asapulo havociliko kuenda asapulo oku vetiya vamanji oku panga onepa kolomĩlu.—w21.03, kem. 31.

Lipi asunga eci Suku a ecelela Yesu oku tala ohali kuenda oku fa?

Esunga limue lieci Yesu a sukilile oku valeliwa kuti, lieli okuti oco a yovole va Yudea kekandu limue. (Va Gal. 3:10, 13) Esunga liavali lieli okuti, Yehova wa kala oku pindisa Yesu kocikele cimue a laikele oku tambula Ndocitunda Cinene. Tatu ekolelo lia Yesu toke kolofa, lia lekisa okuti omanu va pondola oku pandikisa ndaño lohali. (Yovi 1:9-11)—w21.04, kam. 16-17.

Nye tu o sukila oku linga nda ca tĩla oku sanga omanu kupange woku kunda?

Seteka oku va sandiliya vepuluvi lina okuti va sangiwa kolonjo. Setekavo oku kundila kovitumãlo via litepa. Setekavo oku kuama ombangulo ya litepa, ndeci oku sonehela ukanda.—w21.05, kam. 15-16.

Nye upostolo Paulu a yonguile oku vangula eci a popia hati: “Pocakati cocihandeleko nda fa kocihandeleko”? (Va Gal. 2:19)

Ocihandeleko ca eciwile ku Mose, ca tẽlisa ocina cimue ci kuete esilivilo lialua komanu ka va lipuile kuenda oku songuila va Isareli ku Kristu. (Va Gal. 3:19, 24) Eci ca vetiya Paulu oku tava Kristu. Poku ci linga Paulu ‘wa fa kocihandeleko’; ocihandeleko ka ca kuatele vali unene kokuaye.—w21.06, kem. 31.

Ongangu yipi Yehova a eca kokuetu yoku lekisa epandi?

Yehova wa siata oku pandikisa koku sepuiwa kuonduko yaye, koku suvukiwa kuomoko yaye yoku viala, kesino lia vamue pokati komãla vaye, kovohembi a Satana, kohali afendeli vaye va tala, kolofa viakamba vaye, evĩho pokati kapata omanu kuenda koku nyõliwa kuoviluvo viaye.—w21.07, kam. 9-12.

Yosefe ongangu yipi yiwa a sia yepandi?

Eye wa pandikisa kekambo liesunga lia vahuvaye. Wa lundiliwa kuenda wa kapiwa vokayike Kegito vokuenda kuanyamo alua.—w21.08, kem. 12.

Oku lulumisua kupi kua tukuiwa ku Hagai 2:6-9, 20-22?

Olofeka ka vi tava kesapulo Liusoma, pole, omanu valua va siata oku tava kocili. Ndopo olofeka vi ka luluma eci ovio vi ka nyõliwa.—w21.09, kam. 15-19.

Momo lie ka tu sukilila oku liwekapo oku kunda?

Yehova o lete alikolisilo etu kuenda eye o a sanjukila. Nda ka tua liwekelepo, tu ka kuata omuenyo ko pui.—w21.10, kam. 25-26.

Ndamupi elivulu Liovisila ocipama 19, li tu kuatisa oku kapako elungulo liokuti “Koli kovituwa viene viosi”? (1 Pet. 1:15)

Ocinimbu eci, citava okuti ca tukula olondaka vi sangiwa Kovisila 19:2. Ocipama 19 ku tukula ovina vialua vi lekisa ndomo tu kapako 1 Petulu 1:15, vomuenyo wetu weteke leteke.—w21.12, kam. 3-4.