1. Momo lie Yesu a sokisila olondonge viaye lolomeme?

YESU wa sokisa ukamba a kuatele lolondonge viaye, lukamba u kasi pokati kungombo lolomeme viaye. (Yoa. 10:14) Ocindekaise eci ca sunguluka. Olomeme via kũlĩha ungombo wavo kuenda vi pokola kokuaye. Ulume umue ongende wa limbuka okuti eci ocili. Eye wa popia hati: “Omanu tua endela kumosi va yonguile okupa alitalatu kolomeme vimue kuenda va seteka oku vi kovonga oco ovio viamẽle kokuavo. Pole, ovio ka via tavele momo ka via kũlĩhĩle olondaka viavo. Kuenje kakuenje umue ungombo weya ponele; noke wa vi kovonga yu ovio vio kuama.”

2-3. (a) Olondonge via Yesu via lekisa ndati okuti via yeva ondaka yaye? (b) Nye tu konomuisa vocipama cilo leci cikuãimo?

² Ulandu wulume ongende, u tu ivaluisa olondaka via Yesu viatiamẽla kolomeme viaye okuti olondonge viaye. Eye hati: “Vi yeva ondaka yange.” (Yoa. 10:16) Pole, Yesu o kasi kilu. Tu u yevelela ndati? Onjila yimue yoku lekisa okuti tu kasi oku yevelela ondaka ya Cime cetu, poku kapako alongiso aye komuenyo wetu.—Mat. 7:24, 25.

³ Vocipama cilo kuenda cikuavo, tu ka konomuisa alongiso amue a Yesu. Ndomo tu ka ci mola, Yesu wa tu longisa okuti tu sukila oku liwekapo oku linga ovina vimue kuenda oku linga ovina vikuavo. Tete tu konomuisa ovina vivali ungombo uwa a tu sapuila oku liwekapo oku linga.

4. Ndomo ca tangiwa ku Luka 12:29, nye ci koka ‘esakalalo lialua’?

⁴ Tanga Luka 12:29. Yesu wa sapuila olondonge viaye oku ‘liwekapo oku sakalala calua’ kueci catiamẽla koku sanda ovina vieteke leteke. Etu tua kũlĩha okuti alungulo a Yesu a sunguluka kuenda ocili. Etu tu yongola oku a kapako, pole, pamue tu sanga ovitangi poku ci linga. Momo lie?

5. Momo lie vamue pamue va sakalalela lovina va sukila?

 ⁵ Vamue pamue va sakalala lovina va sukila ndeci okulia, uwalo kuenda ocitumãlo coku kala. Ovo pamue va kasi kofeka yimue okuti omanu valua olohukũi kuenda ci tĩla calua oku sanga upange umue. Kuenje pamue ci tĩla ovo oku sanga olombongo oco va tekule epata. Ale una wa enda oku nganyala olombongo oco vi tekule epata, pamue wa fa kuenje epata ka li kuata vali olombongo vioku landa ovina va sukila. Vamue citava okuti va pumba upange wavo omo liefengi lio COVID-19. (Uku. 9:11) Nda etu tu kasi oku liyaka lovitangi viaco kuenda vikuavo, tu kuama ndati elungulo lia Yesu lioku liwekapo oku sakalala?

6. Lombolola eci ca pita lupostolo Petulu onjanja yimue.

⁶ Onjanja yimue, upostolo Petulu lovapostolo vakuavo va kala vowato Vokalunga ko Galilea vokuenda kuehunguhungu, eci va mola Yesu oku endela kilu liovava. Petulu wa popia hati: “A Ñala, nda ove muẽle, mañinye oku endela kilu liovava toke kokuove.” Noke Yesu wo laleka ‘oku iya’ kuenje Petulu wa loka vowato kuenda “wa fetika oku endela kilu liovava oku loña ku Yesu.” Kũlĩhĩsa eci ca pita noke. “Poku vanja kehunguhungu liofela, usumba wo kuata. Kuenje eci a fetika oku vomba,  wa kaluka hati: ‘A Ñala, mopele!’” Yesu wolõla eka liaye kuenje wo popela. Cikuete esilivilo oku ivaluka okuti, Petulu wa tẽla oku endela kilu liovava osimbu a kala oku amamako oku luluvalela ku Yesu. Pole, eci Petulu a vanja kehunguhungu, eye wa kuata usumba kuenda atatãhãi; kuenje wa fetika oku vomba.—Mat. 14:24-31.

7. Nye tu lilongisila kulandu wa Petulu?

⁷ Tu pondola oku lilongisa kulandu wa Petulu. Eci Petulu a tunda vowato oku enda vokalunga, eye ka lavokaile okuti o ka kuata usumba loku fetika oku vomba. Eye wa yonguile oku amamako oku endela kilu liovava toke eci a pitĩla ku Yesu. Pole, ka tẽlisile ocimãho caye. Ocili okuti, etu ka tu endela kilu liovava, pole, tu liyaka lovina vi seteka ekolelo lietu. Nda tua liwekapo oku kolela ku Yehova kuenda kolohuminyo viaye, tu fetika oku hongua konepa yespiritu. Ndaño okuti tu kasi oku liyaka lovitangi vialua, tu sukila oku amamako oku tiamisila utima ku Yehova kuenda kuloño a kuete woku tu kuatisa. Tu ci linga ndati?

8. Nye ci tu kuatisa oku yuvula oku sakalala calua lovina vioketimba?

⁸ Tu sukila oku yuvula oku sakalala calua lovitangi vietu, pole, tu sukila oku kolela ku Yehova. Ivaluka okuti, Isietu ukuacisola Yehova, wa likuminya oku tu ĩha ovina viosi tu sukila nda tua pitisa kovaso ovina viespiritu. (Mat. 6:32, 33) Ovolandu a lekisa okuti eye o tẽlisa muẽle olohuminyo viaye. (Esin. 8:4, 15, 16; Osa. 37:25) Nda Yehova o tata olonjila kuenda olonelẽho viovusenge, ka tu sukila oku sakalala calua leci tu lia kuenda eci tu wala. (Mat. 6:26-30; Va Fil. 4:6, 7) Ndeci ocisola ci vetiya olonjali oku sanda ovina viosi omãla vavo va sukila, ocisola ci vetiyavo Isietu wokilu oku eca ovina afendeli vaye va sukila. Omo liaco, tua kolela okuti Yehova o ka tu ĩha ovina tu sukila!

9. Nye o pondola oku lilongisila kulandu wohueli yimue?

⁹ Kũlĩhĩsa ulandu umue u lekisa okuti Yehova o tu ĩha ovina tu sukila. Ohueli yimue akundi votembo yosi va linga ungende u pitahãla owola yimosi lekãlu liavo liosimbu, oco va kopilile vamanji vamue akãi va kala kocilombo coku tilila uyaki loku va tuala kohongele. Manji ulume wa lombolola hati: “Noke liohongele tua laleka vamanji akãi oco tulile kumosi, pole, tua limbuka okuti ka tua kuateke lacimue coku va ĩha.” Nye ohueli ya linga? Manji ulume wamisako hati: “Eci tua pitĩla konjo tua sanga olonjeke vivali vinene viokulia pepito lietu. Ka tua kũlĩhĩle omunu wa sia olonjeke viaco. Yehova wa tu tata.” Noke liotembo yimue ekãlu liohueli yaco lia nyõleha. Ovo va sukilile ekãlu liaco kupange wavo woku kunda, pole, ka va kuatele olombongo oco va li semulule. Osimbu ekãlu lia kala pocitumãlo coku semulula akãlu, ulume umue weya, wa pula hati: “Ekãlu eli lielie?” Manji wa tambulula hati, liange kuenda li sukila oku li semulula. Ulume hati: “Ka ci lingi cimue. Ukãi wange o yongola ekãlu ndeli kuenda eli olio evala eye a sole. O yongola oku li landisa ciñami?” Manji wa landisa ekãlu kulume waco, okuti olombongo viaco via tẽlele oku landa ekãlu likuavo. Manji wa popia hati: “Kesulilo lieteke tua sanjukile calua. Tua limbukile okuti eci ka ca pitile ño. Ca kala eka lia Yehova.”

10. Olosamo 37:5, yi tu kuatisa ndati oku yuvula oku sakalala lovina vioketimba?

¹⁰ Eci tu yevelela ungombo uwa kuenda oku liwekapo oku sakalala calua lasukila oketimba, tu koleli okuti Yehova o tu ĩha ovina tu sukila. (Tanga Olosamo 37:5; 1 Pet. 5:7) Sokolola kovitangi via tukuiwa  kocinimbu 5.  Vokuenda kuotembo yaco, Yehova citava okuti o vetiya usongui umue wepata ale ulume umue ukualomĩlu oco a tu kuatise kovina tu sukila eteke leteke. Nda usongui umue wepata ka kuete epondolo lioku ci linga, ale tua pumba upange wetu, Yehova o tu kuatisa volonjila vikuavo. Tu koleli okuti eye o ka cilinga. Cilo, tu konomuisa ocina cikuavo ungombo uwa, a tu lungula oku liwekapo oku linga.

11. Ndomo ca tangiwa ku Mateo 7:1, 2, nye Yesu a tu sapuila oco tu liwekepo oku ci linga kuenda momo lie ca tĩlila oku ci linga?

¹¹ Tanga Mateo 7:1, 2. Yesu wa kũlĩhĩle okuti omanu ka va lipuile va tiamisila lika utima kakulueya a vakuavo. Limbuka okuti eye wa popia hati: “Liwekipo oku pisa.” Pamue tu likolisilako oco ka tu ka pise vamanjetu. Pole, omo okuti vosi ka tua lipuile, pamue tu pisa. Nda tua limbuka okuti tu kuete ocituwa caco, nye tu sukila oku linga? Yevelela Yesu kuenda likolisilako oco o liwekepo oku pisa.

12-13. Oku sokolola kongangu ya Yehova konjila ndomo a tendele Soma Daviti, yi tu kuatisa ndati oku liwekepo oku pisa vakuetu?

¹² Tu pondola oku kuatisiwa poku sokolola kongangu ya Yehova. Eye o luluvalela kovina viwa omanu va linga. Tua ci limbukila konjila ndomo Yehova a tendele Soma Daviti eci a linga ekandu limue linene. Ndeci, eye wa linga ukahokolo la Batisieva kuenda wa tuma oku ponda ulume wa Batisieva. (2 Sam. 11:2-4, 14, 15, 24) Omo lieci Daviti a linga, eye kumue lepata liaye va kuata ovitangi, oku kongelamo akãi vaye vakuavo. (2 Sam. 12:10, 11) Konjanja yikuavo, Daviti ka lekisile ekolelo liocili ku Yehova, eci a sonehisa etendelo liolohoka ya va Isareli lina okuti, Yehova ko li tumile. Citava okuti, wa vetiyiwa locituwa cepela loku kolela okuti etendelo liolohoka viaye vi ko teyuila. Nye ceyililako? Ci soka 70.000 ya va Isareli va fa lefengi.—2 Sam. 24:1-4, 10-15.

¹³ Nda kotembo yaco wa kaile ko Isareli, Daviti nda wo tenda ndati? Nda wa pisa Daviti, loku sima okuti ka sesamẽla ohenda ya Yehova? Yehova ko tendele ndoco. Eye wa luluvalela kekolelo Daviti a lekisa vokuenda kuomuenyo waye kuenda konjila ndomo eye a likekembela lutima wosi. Kuenje omo liovituwa evi, Yehova wa ecela akandu Daviti a linga. Yehova wa kũlĩhĩle okuti Daviti wo solele calua kuenda wa yonguile oku linga eci ca sunguluka. Ove hẽ ku sanjuka oku kũlĩha okuti, Suku yetu o sandiliya eci ciwa vokuetu?—1 Olos. 9:4; 1 Asa. 29:10, 17.

14. Nye ca siata oku kuatisa Akristão oku liwekapo oku pisa?

¹⁴ Omo okuti Yehova ka sandi oku lipua komanu, etu ka tu sukilavo oku sanda oku lipua ku vakuetu, pole, tu sukila oku sanda eci ciwa kokuavo. Olonjanja vialua ci leluka oku luluvala kakulueya a vakuetu loku va pisa. Pole, omunu una o setukula Yehova, o likolisilako oku kala la vakuavo, ndaño pamue wa limbuka akulueya avo. Ulu ka wa kanguiwile ka wa finile, pole, omunu umue wa lunguka wa kũlĩha okuti owo u ka posoka noke lioku kanguiwa. Ndeci ci linga Yehova la Yesu, tu sukila oku yuvula oku luluvalela kakulueya omanu, pole, tu sukila oku luluvalela kovituwa viavo viwa.

15. Oku sokolola kekalo liomanu ci tu kuatisa ndati oku yuvula oku va pisa?

¹⁵ Oku sokolola kovituwa viwa via vakuetu, ci tu kuatisa ndati oku yuvula oku va pisa? Seteka oku sokolola kekalo liomuenyo wavo. Kũlĩhĩsa ulandu owu. Eteke limue vonembele, Yesu wa mola ocimbumba cimue  osuke oku kapa ovingangu vivali vokasia okuti via kuata esilivilo litito. Eye ka pulile hati: “Momo lie eye ka ka pepelele olombongo vialua?” Yesu ka tiamisilile utima kovingangu vivali cimbumba a eca, eye wa sanjukilile onjongole yaye loku u pandiya poku linga cosi ca kala vepondolo liaye.—Luka 21:1-4.

16. Nye tu lilongisila kulandu wa manji Veronica?

¹⁶ Ulandu wa manji Veronica, u tu longisa esunga lieci ci kuetele esilivilo oku sokolola kekalo liomanu. Vekongelo manji Veronica a kasi mua kala ina umue o tata omõla lika waye. Manji Veronica hati: “Kokuange ca molẽhele ndu okuti ovo ka va litumbikile calua kovopange o vekongelo. Omo liocituwa caco, ndaenda oku va tenda lonjila yimue ka ya sungulukile. Eteke limue, ame nda kundila kumosi la ina yaco. Eye wa ndi lomboluila ovitangi a kala oku liyaka lavio lomõlaye o kuete ocitangi cuhayele. Eye wa kala oku likolisilako oku sanda eteku loku amamako oku pamisa ukamba waye la Yehova. Noke omo liuhayele womõlaye, eye wa sukilile oku endaenda vekongelo likuavo.” Manji Veronica o malusula loku popia hati: “Ame sia kũlĩhĩle okuti o kasi oku liyaka lovitangi vialua. Cilo, ndi sole kuenda nda sumbila manji omo lialikolisilo alua a siata oku linga oco a vumbe Yehova.”

17. Ukanda Tiago 2:8, u tu sapuila oku linga nye kuenda tu ci linga ndati?

¹⁷ Nye tu sukila oku linga, nda tua limbuka okuti tu kuete ocituwa coku pisa vamanji? Tu  ivaluki okuti tu sukila oku sola vamanji. (Tanga Tiago 2:8.) Kuenje lumbombe tu sukilavo oku likutilila ku Yehova, oku pinga kokuaye oco tu liwekepo oku pisa. Noke tu likolisilako oku kapako eci tua pinga vohutililo poku pita otembo lomunu una tua siata oku pisa. Citava okuti, eci ci tu ecelela oku u kũlĩha vali ciwa. Pamue tu u pinga oco tu kundile kumosi, ale oku u laleka oco tu lile kumosi. Osimbu tu kũlĩha ciwa manji yaco, tu likolisilako oku kuama ongangu ya Yehova kuenda ya Yesu yoku sanda eci ciwa kokuaye. Lonjila eyi, tu lekisa okuti tu kasi oku yevelela ocihandeleko cungombo uwa, coku liwekapo oku pisa.

18. Tu lekisa ndati okuti tu kasi oku yevelela ondaka yungombo uwa?

¹⁸ Ndeci olomeme vi yeva ondaka yungombo wavo, olondonge via Yesu vi yeva ondaka yaye. Nda tua likolisilako oku liwekapo oku sakalala lasukila oketimba kuenda oku liwekapo oku pisa, Yehova la Yesu va ka sumũlũisa alikolisilo etu. Omo liaco, nda tu tiamẽla ‘Kokacunda,’ ale ‘kolomeme vikuavo,’ tu sukila oku amamako oku yevelela kuenda oku pokola ondaka yungombo uwa. (Luka 12:32; Yoa. 10:11, 14, 16) Vocipama cikuãimo, tu ka konomuisa ovina vivali Yesu a sapuila olondonge viaye okuti va sukilile oku vi linga.