Sio. Eci Daviti a soneha ocili.

Kũlĩhĩsa eci eye a soneha kocinimbu eci kuenda kovinimbu vi kuete elitokeko, eye hati: “Ndi ka imba Ovisungo viesivayo vonduko yove otembo ka yi pui osimbu ndi feta olohuminyo viange eteke leteke” handi vali wamisako hati, “A Yehova Suku yange, ndu ku sivaya lutima wange wosi, kuenda ndi ka sivaya onduko yove otembo ka yi pui.” “Ndi ka sivaya onduko yove otembo ka yi pui.”—Osa. 61:8; 86:12; 145:1, 2.

Eci Daviti a soneha olondaka evi, ka kuatele ocisimĩlo cokuti eteke limue ka ka fa. Eye wa kũlĩhĩle okuti Yehova wa popele hati, omanu va laikele oku fa omo liekandu kuenje Daviti wa kũlĩhĩlevo okuti eye wa piñalavo ekandu. (Efet. 3:3, 17-19; Osa. 51:4, 5) Eye wa kũlũlĩhĩle okuti ndaño muẽle alume vana va taviwile la Suku ndeci Avirahama, Isake kuenda Yakoba va favo. Kuenje Daviti wa kũlĩhĩle okuti wa laikelevo oku fa. (Osa. 37:25; 39:4) Pole, olondaka viaye vi sangiwa Kosamo 61:8, via situlula onjongole yaye kuenda onjila a nõlelepo yoku sivaya Suku otembo ka yi pui, osimbu a kala lomuenyo.—Osa. 61:8; 2 Sam. 7:12.

Ovina vimue Daviti a soneha vi situlula ekalo liomuenyo waye kotembo yaco, ndomo tu ci konomuisa Kosamo 18, 51, kuenda 52. Kosamo 23, Daviti wa sokisa Yehova ndungombo umue eca olonumbi, ekavuluko kuenda eteyuilo. Daviti wa kala ungombo umue. Kuenje wa yonguile oku vumba Suku ‘oloneke viosi viomuenyo waye.’—Osa. 23:6.

Ivaluka okuti Yehova eye wa vetiya Daviti oku soneha olondaka viaco. Ovina eye a soneha mua kongela ovitumasuku via tiamẽla kovina via laikele oku pita. Ndeci, Kosamo 110 Daviti wa tukula otembo yimue okuti Ñala yaye wa laikele oku “tumãla kondio ya [Suku]” kilu kuenda oku tambula unene walua. Oco a linge nye? Oco a sombise ovanyãli va Suku kuenda oku linga “esombiso pokati kolofeka” palo posi. Daviti wa kala umue pokati ka vakukululu va Mesiya, una wa laikele oku viala kilu kuenda oku kala “ocitunda otembo ka yi pui.” (Osa. 110:1-6) Yesu wa popele hati, ocitumasuku ci sangiwa Kosamo 110 catiamẽla kokuaye kuenda ca laikele oku tẽlisiwa kovaso yoloneke.—Osa. 110; Mat. 22:41-45.

Ocili okuti, Daviti wa vetiyiwa oku soneha catiamẽla kotembo yaye kuenda kotembo yokovaso yoloneke eci eye a ka pinduiwa kuenda oku sivaya Yehova otembo ka yi pui. Eci ci tu kuatisa oku limbuka okuti olondaka vi sangiwa Kosamo 37:10, 11, 29 vi tiamisiwila kotembo via sonehiwa oku kongelamo kovaso yoloneke. Ovinimbu evi via tẽlisiwa kotembo ya va Isareli kuenda vi ka tẽlisiwavo kovaso eci Suku a ka tẽlisa olohuminyo viaye.—Tala ocinimbu 8 kocipama hati “Ove o ka Kala Kumue Lame Vocumbo Celau.”

Osamo 61:8 kuenda ovinimbu vi kuete elitokeko, vi lekisa okuti Daviti wa yonguile oku sivaya Yehova ko Isareli yosimbu toke eci a eye a fa. Ovinimbu viaco vi lekisa eci Daviti a laikele oku linga kovaso yoloneke eci Yehova o ko nena vali komuenyo.