Ove hẽ wa tanga lutate ovipama Viutala Wondavululi wunyamo ulo? Nda oco, kũlĩhĩsa nda o tẽla oku tambulula apulilo a kuaimo:

Tu ka sumuluisiwa ndati nda tu pita otembo yalua loku sapela, oku yevelela kuenda oku sokolola catiamẽla ku Yehova?

Tu ka nõla olonjila viwa, tu ka kala alongisi vawa, tu ka kuata ekolelo lia pama kuenda tu ka vokiya ocisola cetu ku Yehova.—w22.01, kam. 30-31.

Tu ka kuatisiwa ndati nda tua lilongisa oku kolela ku Yehova kuenda kolonumiwa viaye?

Yilo oyo otembo yoku lilongisa oku kolela konjila ya Suku yoku linga ovina loku yuvula oku tãtãla olonumbi kuenda olonjila vi nõliwa lakulu vekongelo. Kuenje eci ohali ya piãla yi ka fetika, tu ka tẽla oku pokola kolonumbi viosi tu ka tambula vina ka tu kuete elomboloko liaco.—w22.02, kam. 4-6.

Nye ungelo a yonguile oku popia ku Sakariya catiamẽla kopulumu peka lia [Nguluvulu] Seruvavele”? (Sak. 4:8-10)

Ocinjonde eci ca vetiya afendeli va Suku oku kolela okuti onembele yina ya kala oku tungiwa ya laikele oku malusuiwa ndomo Suku a yonguile okuti oco yi kala.—w22.03, kam. 16-17.

Tu Pondola Oku Kala Ndati Vakuangangu Yiwa Koku Vangula? (1 Tim. 4:12)

Tu vangula locisola kuenda lesumbilo kupange woku kunda, oku imba ovisungo lutima wosi, oku eca atambululo kolohongele, oku vangula ocili kuenda oku pamisa vakuetu poku yuvula olondaka vioku pembula.—w22.04, kam. 6-9.

Momo lie Ovinyama vikuãla viatema (ovoviali) via tukuiwa kelivulu lia Daniele ocipama 7 via lisetahala levi via tukuiwa kelivulu Liesituluilo 13:1, 2?

Ocinyama ca tema ca tukuiwa kelivulu Liesituluilo 13 ka ci lomboloka lika uviali umosi ndeci o Roma. Pole u lomboloka ovonene osi o pulitika a viala omanu.—w22.05, kam. 9.

Onjila yipi ya velapo yoku lekisa ekolelo kesunga lia Suku?

Nda omunu umue wa tu popia lãvi loku tu sepula ale wa tu lueyela tu sukila oku yuvula onyeño, ocikumbiti loku eca ocitangi caco peka lia Yehova. Eye o ka malako ovilinga viosi via kokiwa lekandu.—w22.06, kam. 10-11.

Manji umue nda o likutilila kohongele yimue nye a sukila oku kapako?

Ohutililo ka citava okuti yi kala epuluvi lioku eca elungulu kekongelo ale lioku eca esapulo limue. Ca piãla enene poku fetika ohongele, ka ci sukila oku tukula “olondaka vialua.” (Mat. 6:7)—w22.07, kam. 24-25.

Lonjila yipi “vana va linga ovina vĩvi,” va lavoka “epinduko liesombiso?” (Yoano 5:29)

Ovo ka va ka tambula esombiso lia kunamela komuenyo vambatele kosimbu. Ovo va ka sombisiwa ndomo ci likuata lovituwa kuenda ovilinga va ka lekisa noke liepinduko.—w22.09, kam. 18.

Evetiyo lipi li komohĩsa manji J. F. Rutherford a eca kohongele yofeka ya lingiwa kosãi Yenyenye Linene kunyamo 1922?

Kohongele yofeka ko Cedar Point, Ohio, ko Estadus Unidus, eye wa popia hati: “Soma o kasi ale oku viala! Ene vu loñuatisi viaye. Omo liaco, sapuli, sapuli, sapuli, Soma Lusoma waye!”—w22.10, kam. 3-5.

Ku Isaya ocipama 30 kulombolola olonjila vipi vitatu Suku a tu kuatisa lavio oku pandikisa?

Ocipama eci ci lekisa okuti eye (1) o yevelela kuenda o tambulula olohutililo vietu, (2) o tu songuila, kuenda (3) cilo o tu sumũlũisa kuenje o ka ci lingavo kovaso yoloneke.—w22.11, kem. 9.

Momo lie tu popela okuti olondaka Violosamo 37:10, 11, 29, via tẽlisiwa ale kosimbu kuenda vi ka tẽlisiwavo kovaso yoloneke?

Olondaka via Daviti vi lombolola asumũlũho a kala ko Isareli, vokuenda kuviali wa Salomone. Yesu wa vangula eci catiamẽla kocumbo celau kovaso yoloneke kuenda wa tukula ocinimbu 11. (Mat. 5:5; Luka 23:43)—w22.12, kam. 8-10, 14.