1. Momo lie Yesu a pingila ku Yehova oco a lave olondonge viaye?

VUTEKE wa sulako wa Yesu, eye wa kala oku sokolola catiamẽla kovitangi olondonge viaye via laikele oku pita lavio. Omo liocisola Yesu a kuatela olondonge viaye, wa pinga ku Isiaye hati, “va lava omo liondingaĩvi.” (Yoa. 17:14, 15) Yesu wa kũlĩhĩle okuti noke lioku tiukila kilu, Satana Eliapu wa ponduile oku amamako oku yaka lomunu wosi o yongola oku vumba Yehova. Kuenje afendeli va Yehova va sukilile eteyuilo.

2. Ekolelo lipi tu kuete liokuti Yehova o ka tambulula olohutilo vietu?

² Yehova wa tambulula ohutililo Yesu a linga omo okuti Eye wa solele calua Omõlaye. Nda tua likolisilako oku sivaya Yehova eye o ka tu solavo loku tambulula olohutililo vietu viekuatiso kuenda oku tu teyuila. Omo okuti Yehova o lisakalaisa loku Songuila epata liaye, eye amamako oku tata omãla vaye. Momo poku ci linga ceca esivayo konduko yaye, ale oku sepuisa onduko yaye nda ka ci lingile!

3. Momo lie tu sukilila eteyuilo lia Yehova koloneke vilo?

³ Koloneke vilo, tu sukila vali calua ekuatiso lia Yehova okuti kosimbu ci sule. Momo Satana wa tundisiwa kilu, “lonyeño yalua.” (Esit. 12:12) Eye o vetiya omanu oku tu lambalala loku sima okuti va kasi oku linga “upange u kola wa Suku.” (Yoa. 16:2) Vana ka va tava ku Suku, va tu lambalala momo tumanu vamue okuti tua li tepa loluali. Kuenje ndaño omanu va tu lambalala etu ka tu kuete usumba. Momo lie? Momo Ondaka ya Suku hati: “Ñala wa kolelua kuenda eye o ko pamisi loku  vu teyuila kondingaĩvi.” (2 Va Tes. 3:3) Ndamupi Yehova a tu teyuila? Tu konomuisa ovina vivali eye a siata oku tu ĩha.

4. Ndomo ca tangiwa ku Va Efeso 6:13-17, nye Yehova a siata oku linga oco a tu teyuile?

⁴ Yehova o tu ĩha ovimalẽho vi pondola oku tu teyuila kayonjo a Satana. (Tanga Va Efeso 6:13-17.) Ovimalẽho vi tunda ku Suku, via pama calua kuenda vi talavaya ciwa! Pole, tu sukila oku amamako oku talavaya lovimalẽho viaco oco tu teyuiwe. Ocimalẽho locimalẽho ci lomboloka nye? Tu konomuisa ovimalẽho viaco.

5. Uvia wocili u lomboloka nye kuenda momo lie tu sukilila oku witika?

⁵ Uvia wocili, ci lomboloka ocili ci sangiwa Vembimbiliya. Momo lie tu sukilila oku itika uvia waco? Momo Satana eye “isia yuhembi.” (Yoa. 8:44) Eye o kasi ale oku kemba vokuenda kuanyamo alua loku yapuisa “oluali luosi”! (Esit. 12:9) Pole, ocili ci sangiwa Vembimbiliya ci tu teyuila koku kembiwa. Tu itika ndati uvia owu wocindekaise? Tu ci linga poku lilongisa ocili catiamẽla ku Yehova, oku u vumba “lespiritu kuenda ocili” loku kala vakuacili kovina viosi.—Yoa. 4:24; Va Efe. 4:25; Va Hev. 13:18.

6. Ociteyuilo covonete ci lomboloka nye kuenda momo lie tu sukilila oku ci wala?

⁶ Esunga oku linga ociteyuilo covonete, ci lomboloka olonumbi viesunga via Yehova. Momo lie tu sukilila oku wala ociteyuilo covonete? Ndeci ociteyuilo covonete ci teyuila onete yesualali limue oco ka ka lemehiwe, esunga oku linga ociteyuilo covonete, ci tu kuatisavo koku teyuiwa kovina vĩvi violuali lulo. (Olosap. 4:23) Yehova o yongola okuti tu u sola kuenda tu u vumba lutima wetu wosi. (Mat. 22:36, 37) Kuenje Satana o seteka oku tepa utima wetu okuti tu sola ovina violuali vina Yehova a nyale. (Tia. 4:4; 1 Yoa. 2:15, 16) Nda eye ka litundile ciwa poku kuama onjila eyi, o ka sanda onjila yoku tu saluisa oco tu pembule olonumbi via Yehova.

7. Ociteyuilo covonete cesunga tu ci wala ndati?

⁷ Etu tua wala ociteyuilo covonete poku tava kolonumbi via Yehova vieci ciwa leci cĩvi kuenda oku vi kapako. (Osa. 97:10) Vamue va sima okuti olonumbi via Yehova via tĩla. Pole, nda tua liwekapo oku kapako olonumbi vi sangiwa Vembimbiliya tu kala desualali lina okuti li siapo oku wala ociteyuilo caye covonete osimbu a kasi kuyaki omo eye o sima okuti colema. Oku ci linga ci lekisa uveke! Nda tua sola Yehova tu limbuka okuti ovihandeleko viaye “ka vi lemi,” pole, vi popela.—1 Yoa. 5:3.

8. Nye ci lomboloka oku kuata olomãhi via lipongiyila olondaka viwa?

⁸ Paulu o tu sapuilavo oco tu wale kolomãhi vietu eliangiliyo lioku sapula olondaka viwa viombembua. Ci lomboloka okuti olonjanja viosi tu sukila oku lipongiyila oku kunda olondaka viwa Viusoma. Eci tu sapuilako vakuetu esapulo Liembimbiliya, ekolelo lietu li pamisiwa. Ci sanjuisa calua oku mola ndomo afendeli va Yehova voluali luosi va sanda apuluvi oku kunda kovitumãlo va sangiwa. Ndeci, ovo va kundila kupange woku sanda eteku, kolosikola, eci va enda konjo lanjo, kovitumãlo violomilu, eci va enda volovenda, oku nyula epata okuti Halombangiko Via Yehova kuenda vana va sangiwa kolonjo viepuyuko. Nda tua kuata usumba loku liwekapo oku kunda tu kala ndesualali lina okuti li lula olohaku viaye vokuenda kuyaki; eci ci leluka oku lemehiwa kolomahi. Kuenje nda ca tĩla eye oku li teyuila kuenda nda ca lekisa oku sinĩla kolonumbi viusongui waye.

9. Momo lie tu sukilila oku kuata ociyepelo cekolelo?

 ⁹ Ociyepelo cekolelo, ci lomboloka ekolelo tu kuetele Yehova. Tua kolela okuti eye o ka tẽlisa olohuminyo viaye viosi. Ekolelo, li ka tu kuatisa “oku ima isongo viosi viondalu viondingaĩvi.” Momo lie tu sukilila oku lava ociyepelo caco? Momo ci tu teyuila kalongiso olonanguluke ale oku saluisiwa la vana va tu pembula. Nda ka tua kuatele ekolelo, ka tu ka tẽla oku tamalãla la vana va tu sapuila oco tu sinĩle olonumbi via Yehova. Olonjanja vialua eci tu teyuila ekolelo lietu kupange, ale kosikola ci lekisa okuti tu kasi lociyepelo cetu. (1 Pet. 3:15) Olonjanja viosi tu likala upange umue va yongola oku tu ĩha olombongo vialua, pole ka u tu ecelela oku linga calua kupange wa Yehova, ekolelo lietu li teyuiwa. (Va Hev. 13:5, 6) Kuenje osimbu tu vumba Yehova ndaño lalambalalo, tu kasi oku teyuiwa lociyepelo cetu.—1 Va Tes. 2:2.

10. Nye ci lomboloka ocikoko cepopelo kuenda momo lie tu sukilila oku ci wala?

¹⁰ Ocikoko cepopelo, elavoko Yehova a tu ĩha liokuti eye o ka tu popela kolofa loku sumũlũisa vosi vana va linga ocipango caye. (1 Va Tes. 5:8; 1 Tim. 4:10; Tito 1:1, 2) Ndeci ocikoko ci teyuila utue wesualali, elavoko lietu  liepopelo li teyuila uloño wetu woku sokolola. Ndamupi? Elavoko li tu kuatisa oku tiamisila utima kolohuminyo via Suku kuenda li tu kuatisavo oku yuvula oku sakalala enene lovitangi vietu. Tu talavaya ndati locikoko caco? Tu ci linga poku ecelela okuti ovisimĩlo vietu vi likuata levi via Suku. Ndeci, etu ka tua tiamisilile elavoko lietu kukuasi u pua pua, pole, lia tiamisiwila ku Suku.—Osa. 26:2; 104:34; 1 Tim. 6:17.

11. Nye ci lomboloka osipata yespiritu kuenda momo lie tu sukilila oku talavaya layo?

¹¹ Osipata yespiritu, Ondaka ya Suku Embimbiliya. Osipata yaco yi kuete unene woku situlula ovohembi osi loku yovola omanu kalongiso esanda kuenda kovituwa ka via sungulukile. (2 Va Kor. 10:4, 5; 2 Tim. 3:16, 17; Va Hev. 4:12) Tu talavaya losipata yaco pocakati celilongiso liopokolika kuenda kepindiso tu tambula vocisoko ca Suku. (2 Tim. 2:15) Yehova ka tu ĩhile lika ovimalẽho evi, pole, wa tu ĩhavo ovina vikuavo vioku liteyuila. Vipi ovina viaco?

12. Nye vali tu sukila kuenda momo lie?

¹² Esualali limue lia loñoloha lia kũlĩha okuti ka kuata onima yiwa poku yaka lika waye lovanyali; eye o sukila ekuatiso liasualali vakuavo. Cimuamue haico okuti, ka tu kuata onima yiwa poku tamalala la Satana kuenda oloñame viaye lika wetu; tu sukila ekuatiso lia vamanjetu. Yehova wa tu ĩha ongongela ya “vamanji vosi” va sangiwa voluali oco va tu kuatise.—1 Pet. 2:17.

13. Ndomo ca tangiwa ku Va Heveru 10:24, 25, tu kuatisiwa ndati poku kala kolohongele?

¹³ Onjila yimue yoku tambula ekuatiso, poku endaenda kolohongele. (Tanga Va Heveru 10:24, 25.) Vosi yetu olonjanja vimue tua siata oku yeva esumuo, eci tu liyeva ndoco olohongele vi tu pamisa. Etu tu pamisiwa pocakati catambululo a vetiya a eciwa la vamanji. Olohundo kuenda ovindekaise va linga vi tu vetiya oku amamako oku vumba Yehova. Handi vali, tu pamisiwavo poku sapela lavo eci handi ohongele ka ya fetikile kuenda noke yohongole. (1 Va Tes. 5:14) Olohongele vietu vi tu ĩhavo epuluvi lioku kuata esanju li tunda koku kuatisa vakuetu. (Ovil. 20:35; Va Rom. 1:11, 12) Handi vali, olohongele vietu vi tu kuatisavo kolonjila vikuavo. Oyo yi tu kuatisa oku mioñolola upange woku kunda kuenda woku longisa. Ndeci, tu lilongisa ndomo tu talavaya Lovimãleho Vietu Vioku Longisa. Kuenje lipongiya ciwa kolohongele viekongelo. Vokuenda kuohongele yevelela lutate. Noke liohongele kapako ovina wa lilongisa. Poku linga ovina viaco o ka kala ‘esualali liwa lia Kristu Yesu.’—2 Tim. 2:3.

14. Ekuatiso lipi likuavo tu kuete?

¹⁴ Tu kuetevo ekuatiso liovangelo valua. Sokolola kueci ungelo umosi a pondola oku linga! (Isa. 37:36) Cilo, sokolola kueci olohoka viovangelo vi pondola oku linga. Kakuli omunu, ale ondele o kuete unene woku yaka la Yehova. (Olong. 6:16) Tua kũlĩha okuti eci ocili. Sokolola ku vosi vana va pondola oku ku kuatisa eci o sumuisiwa la vana vu talavayela kumosi, vu tangela kumosi, ale epata lina okuti Halombangiko via Yehova. Ivaluka okuti ku kasi lika wove kuyaki waco. Ove o kasi oku kuama olonumbi via Yehova.

15. Ndomo ca tangiwa ku Isaya 54:15, 17, momo lie afendeli va Suku lalimue eteke va ka liwekapo oku kunda?

¹⁵ Omo okuti oluali lu kasi oku vialiwa la Satana, kuli asunga alua oku tu suvuka. Etu lalimue eteke tu ka kuatisa ocitundo cimue copulitika kuenda ka tu pangi onepa kuyaki.  Etu tu sapula onduko ya Suku, tu sapula okuti Usoma waye owo lika u ka nena ombembua kuenda oku pokola kovihandeleko viaye viesunga. Etu tu lekisa komanu okuti ombiali yoluali lulo ongangala kuenda omondi. (Yoa. 8:44) Kuenje etu tu sapula oku nyõliwa kuoluali lua Satana. Satana kumue la vana va tiamẽla kokuaye lalimue eteke va ka tẽla oku imulako upange woku kunda. Pole, etu tu kamamako oku eca esivayo ku Yehova kovina viosi tu tẽla! Ndaño okuti Satana o kuete unene walua, eye ka pondola oku tateka esapulo Liusoma oku pitĩla komanu vosi va sangiwa voluali. Eci ci tẽliwa momo tu kasi oku teyuiwa la Yehova.—Tanga Isaya 54:15, 17.

16. Yehova o ka teyuila ndati afendeli vaye vokuenda kuohali ya piãla?

¹⁶ Nye tu lavoka kovaso? Vokuenda kuohali ya piãla, Yehova o ka tu teyuila volonjila vivali vi komõhisa. Tete, eye o ka teyuila afendeli vaye vakuekolelo eci a ka vetiya olosoma via palo posi oku kundula o Bavulono Yinene okuti ocisoko cetavo liesanda. (Esit. 17:16-18; 18:2, 4) Kuenje eye o ka teyuila afendeli vaye eci eye a ka kundula ovisupe violuali lua Satana ko Harmagedo.—Esit. 7:9, 10; 16:14, 16.

17. Tu kuatisiwa ndati nda tua pamisa ukamba wetu la Yehova?

¹⁷ Nda tu amamako oku pamisa ukamba wetu la Yehova, Satana ka ka tu kokela ovitangi vi kala otembo yosi. Pole, Satana eye o ka kunduiwa. (Va Rom. 16:20) Omo liaco, wala ovimalẽho kuenda amamako oku talavaya lavio! Ku ka seteke oku linga uyaki lika liove. Kuatisa vamanji. Kuama olonumbi via Yehova. Nda wa ci linga, kolela okuti Isiove ukuacisola wokilu o ka ku pamisa loku ku teyuila.—Isa. 41:10.