1. Ovitangi vipi afendeli va Yehova va siata oku liyaka lavio?

OVE hẽ o kasi oku liyaka lovitangi vialua? Pamue manji umue vekongelo wa ku sumuisa. (Tia. 3:2) Ale, vana vu talavayela kumosi, la vana vu tangela kumosi, va ku sepula omo lioku fendela Yehova. (1 Pet. 4:3, 4) Pamue epata liove li ku sapuila oco o liwekepo oku endaenda kolohongele, ale koku kunda. (Mat. 10:35, 36) Nda okuti ocitangi caco calua enene, pamue o sima okuti hĩse oku liwekapo oku vumba Yehova. Pole, kolela okuti, ocitangi cosi o liyaka laco Yehova o ku ĩha olondunge oco o nõle onjila ya sunguluka kuenda ongusu yoku pandikisa kocitangi caco.

2. Ndomo ca tangiwa ku Va Roma 15:4, oku tanga Ondaka ya Suku ci tu kuatisa ndati?

² Yehova Vondaka yaye, wa tuma oku soneha ovolandu omanu vamue ka va lipuile okuti va yula ovitangi. Momo lie? Momo tu pondola oku lilongisila kokuavo? Eci oco Yehova a vetiya upostolo Paulu oku soneha. (Tanga Va Roma 15:4.) Eci tu tanga ovolandu aco, ci tu pamisa kuenda ci tu ĩha elavoko. Pole, oco tu kuatisiwe, ka tu sukila lika oku tanga. Tu sukila oku ecelela okuti Ovisonehua vi pongolola ovisimĩlo vietu kuenda oku vetiya utima wetu. Nye tu linga nda tu yongola onumbi yimue oco tu pandikise kovitangi? Tu sukila oku kuama olonjila vikuãla ndeci: (1) Oku likutilila, (2) Oku likapa vulandu wa tukuiwa, (3) Oku sokolola kuenda (4) Oku kapako eci  tua tanga. Tu konomuisi eci ca kongela volonjila viaco. * Noke tu kuama olonjila viaco poku lilongisa ovolandu atiamẽla Kusoma Daviti kuenda kupostolo Paulu.

3. Osimbu kua fetikile oku tanga Embimbiliya, nye o sukila oku linga kuenda momo lie?

³ (1) Likutilila. Osimbu kua fetikile oku tanga Embimbiliya, pinga ku Yehova oco a ku kuatise okupa esilivilo kovina o tanga. Ndeci, nda o kasi oku sanda olonumbi ndomo o pondola oku yula ovitangi, pinga ku Yehova oco a ku kuatise oku sanga olonumbi Vembimbiliya vi ku kuatisa oku nõla onjila o kuama.—Va Fil. 4:6, 7; Tia. 1:5.

4. Nye ci ku kuatisa oku kuata elomboloko liulandu umue Wembimbiliya o kasi oku tanga?

⁴ (2) Likapa vulandu wa tukuiwa. Yehova wa tu ĩha uloño woku sokolola kovina. Oco o kuate elomboloko kulandu umue Wembimbiliya o kasi oku tanga, seteka oku likapa pomangu yomunu waco o kasi oku tukuiwa vulandu. Seteka oku sokolola kovina omunu waco a mola kuenda ndomo a liyeva.

5. Oku sokolola ku lomboloka nye kuenda o ci linga ndati?

⁵ (3) Sokolola. Oku sokolola ci lomboloka oku sima lutate ovina wa tanga kuenda ndomo ovina wa tanga vi kapiwako vomuenyo wove. Eci ci ku kuatisa okuti ovina wa tanga vi kala vutima kuenda o kuata elomboloko liavio. Oku tanga Embimbiliya okuti ka tu sokolola vali, ci kasi ndoku teleka okulia kumue okuti ka tua kapelemo ovina vi pepisa. Pole, nda tu sokolola kovina tua tanga ci kala ndoku simbula okulia kuaco. Oco o kuatisiwe oku sokolola, o sukila oku lipula loku tambulula apulilo ndeci: ‘Omunu wa tukuiwa vulandu owu nye a linga oco a kuatisiwe? Yehova wo kuatisa ndati? Ndi kuama ndati ovina nda lilongisa kulandu owu oco vi ñuatise oku yula ovitangi?’

6. Momo lie tu sukilila oku kapako ovina tua lilongisa?

⁶ (4) Kapako eci wa tanga. Yesu wa popia hati, nda ka tu kapiko ovina tua tanga, tu sokisiwa ndomunu wa tungila onjo yaye kilu lieseke. Eye wa talavaya calua, pole, upange waco welivova. Momo lie? Momo eci ombela lofela vi veta onjo yaco, oyo yi kupuka. (Mat. 7:24-27) Cimuamue haico okuti, nda tu likutilila, tu likapa vulandu wa tukuiwa kuenda tu sokolola, pole, ka tu kapiko ovina tua lilongisa, elikolisilo liaco ka li kala elivova. Eci tu liyaka lovitangi ale elambalalo ekolelo lietu li hongua. Pole, nda eci tu lilongisa tu ci kapako, tu ka nõla ciwa onjila tu kuama, tu kuata ombembua kuenda ekolelo lietu li pama. (Isa. 48:17, 18) Poku kuama olonjila evi vikuãla via tukuiwa, cilo tu kũlĩhĩsi eci tu pondola oku lilongisila kueci ca pita la Soma Daviti.

7. Ulandu upi Wembimbiliya tu konomuisa cilo?

⁷ Anga hẽ o kuete ekamba limue, ale epata okuti lia ku linga cimue cĩvi? Nda o kuete, o ka kuatisiwa poku lilongisa eci ca pita la Soma Daviti eci omõlaye Avisalome o pakula loku seteka oku u tambula usoma.—2 Sam. 15:5-14, 31; 18:6-14.

8. Nye o sukila oku linga oco o kuate ekuatiso lia Yehova?

⁸ (1) Likutilila. Osimbu o sokolola ulandu umue, sapuila Yehova ndomo o kasi oku tatiwa. (Osa. 6:6-9) U sapuila loku lombolola ndomo o liyevite. Pinga ku Yehova oco a ku kuatise oku sanga olonumbi vi pondola oku ku songuila oco o yule ovitangi viaco.

9. Ovina vipi via pita pokati ka Daviti kuenda Avisalome?

 ⁹ (2) Likapa vulandu wa tukuiwa. Sokolola kueci ca pita vulandu owu kuenda sokolola ndomo ca sumuisa Soma Daviti. Avisalome omõla a Daviti wa linga ovina vialua oco a vetiye omanu oku u sola. (2 Sam. 15:7) Avisalome eci a limbuka okuti o yongola oku kala osoma, wa tuma olondavululi vo Isareli yosi oco va pongiye omanu oku tava kokuaye ndosoma. Handi vali, Avisalome wa vetiya umue pokati kakamba va Daviti haiye ondunguli yaye okuti Ahitofele, oco a likongele kesino liaye. Kuenje Avisalome wa likapa kusoma, noke wa seteka oku kuata loku ponda Daviti okuti otembo yaco Daviti wa kala oku vela calua. (Osa. 41:1-9) Daviti wa limbuka uvĩ Avisalome a yonguile oku u linga kuenje wa tilila ko Yerusalãi. Kuenje olohoka via Daviti via liyaka lolohoka via Avisalome. Olohoka vakuesino ka va yulile kuenda omõla a Daviti Avisalome, wa fa.

10. Soma Daviti nye nda a linga?

¹⁰ Cilo, sokolola ndomo Daviti a liyeva osimbu ovina evi viosi via kala oku pita. Eye wa solele Avisalome kuenda wa kolelele Ahitofele. Pole, kavali kavo, vo pakula. Ovo va sumuisa calua Daviti kuenda va yonguile oku u ponda. Citava okuti Daviti nda wa sima okuti akamba vaye vakuavo, va likongelavo ku Avisalome kuenje nda ka tẽlele vali oku va kolela. Eye nda wa lisokolola lika eye muẽle kuenda oku tila volupale lika waye. Ale, pamue nda co kokela esumuo lialua. Pole, lacimue pokati kovina evi eye a linga. Eye wa yula ovitangi viaco. Wa vi yula ndati?

11. Nye Daviti a linga vekalo lĩvi a sangiwile?

¹¹ (3) Sokolola. Ovina vipi o lilongisila kulandu owu? Etambulula kepulilo eli lieli, “Nye ca kuatisa Daviti?” Eci ca kuatisa Daviti, oku yuvula oku nõla lonjanga onjila yimue ka ya sungulukile. Kuenda eye ka kuatelevo usumba lieci a sukilile oku linga. Pole, wa likutilila ku Yehova oco o kuatise. Eye wa pingavo ekuatiso kakamba vaye. Kuenje lonjanga yalua wa tẽlisa eci a yonguile oku linga. Ndaño okuti Daviti wa sumuile calua, ka liwekelepo oku kolela ku vakuavo kuenda ka kale locikumbiti. Eye wamamako oku kolela ku Yehova kuenda kakamba vaye.

12. Nye Yehova a linga oco a kuatise Daviti?

¹² Yehova wa kuatisa ndati Daviti? Poku linga akonomuiso, o ka limbuka okuti Yehova wa eca ku Daviti ongusu a sukilile oco a pandikise kovitangi. (Osa. 3:1-8) Yehova wa sumũlũisa onjila Daviti a nõla. Kuenda wa kuatisa akamba vocili va Daviti vana va kala konele yaye.

13. O setukula ndati Daviti nda omunu umue wa ku sumuisa? (Mateo 18:15-17)

¹³ (4) Kapako eci wa tanga. Lipula ndoco, ‘Ndi setukula ndati ongangu ya Daviti?’ Ove o pondola oku sokolola lonjanga ndomo ocitangi cimue ci potoluiwa. Ocitangi locitangi o kuata o sukila oku kapako elungulo lia Yesu li sangiwa ku Mateo ocipama 18. (Tanga Mateo 18:15-17.) Pole, ku ka nõle onjila yimue vepuluvi lina okuti wa tema. O sukila oku likutilila ku Yehova oco a ku ĩhe utima wa tula lolondunge vi ku kuatisa oku tulumũha kuenda oku kũlĩha eci o sukila oku linga. Ku ka liwekepo oku kolela kakamba vove. Kuenje tava kekuatiso ovo va ku ĩha. (Olosap. 17:17) Cavelapo vali, kuama olonumbi Yehova a ku ĩha pocakati Condaka yaye.—Olosap. 3:5, 6.

14. Vepuluvi lipi o pondola oku lembelekiwa lolondaka vi sangiwa 2 Timoteo 1:12-16; 4:6-11, 17-22?

¹⁴ Anga hẽ o kasi oku lambalaliwa lepata liove omo lioku vumba Yehova? Ale o kasi vofeka muna okuti upange Wolombangi Via  Yehova u kasi oku tatekiwa? Nda o kasi oku liyaka lovitangi viaco o ka pamisiwa poku tanga 2 Timoteo 1:12-16 kuenda 4:6-11, 17-22. * Paulu eci a soneha ovinimbu evi, wa kala vokayike.

15. Ovina vipi o sukila oku pinga ku Yehova?

¹⁵ (1) Likutilila. Osimbu kua tangele ovinimbu viaco sapela la Yehova catiamẽla kocitangi cove kuenda ndomo o liyevite. Situlula ovisimĩlo viove. Pinga ku Yehova oco a ku kuatise oku sokolola kulandu wovitangi Paulu a liayaka lavio, okuti vi ku kuatisa oku kũlĩha ndomo o yula ovitangi o kasi oku liyaka lavio.

16. Nye ca pita la Paulu?

¹⁶ (2) Likapa vulandu wa tukuiwa. Likapa pocitumãlo ca Paulu. Eye wa kala vokayike ko Roma. Eye wa kapiwile ale vokayike, pole, onjanja eyi eye wa kũlĩha okuti o pondiwa. Vamue pokati kakamba vaye vo yanduluka kuenda eci co kokela esumuo lialua.—2 Tim. 1:15.

17. Paulu nye nda a linga?

¹⁷ Citava okuti Paulu nda wa sokolola kosimbu, loku sima okuti, nda wa nõlele onjila yikuavo eye nda ka kaile vokayike. Eye nda wa sumuila alume vo kofeka yo Asia vana vo yanduluka kuenda nda wa liwekapo oku kolela kakamba vakuavo. Pole, Paulu ka ci lingile. Momo wa kolelele okuti akamba vamue handi va ponduile oku u kuatisa kuenda Yehova wa laike oku u sumũlũisa.

18. Nye Paulu a linga eci a liyaka lovitangi?

¹⁸ (3) Sokolola. Tambulula epulilo eli: “Nye ca kuatisa Paulu?” Ndaño okuti Paulu wa kũlĩhĩle okuti ndopo o ka pondiwa, eye ka ivaleleko ocina ci kuete esilivilo okuti oku eca ulamba ku Yehova. Eye wamamako oku sokolola ndomo a ponduile oku kuatisa vakuavo. Eye wa kolelele Yehova poku likutilila olonjanja viosi. (2 Tim. 1:3) Paulu ka tiamisilile utima ku vamanji vana vo yanduluka, pole, eye wa eca olopandu vialua ndomo akamba vaye locisola calua vo tata loku u kuatisa. Handi vali, Paulu wamamako oku lilongisa Ondaka ya Suku. (2 Tim. 3:16, 17; 4:13) Ca velapo ceci okuti eye wa kolelele okuti Yehova la Yesu vo sole. Ovo ka va yandulukile Paulu kuenda vo sumũlũisa omo liupange a linga.

19. Yehova wa kuatisa ndati Paulu?

¹⁹ Yehova wa sapuilile Paulu okuti wa laikele oku lambalaliwa omo lioku kala Ukristão. (Ovil. 21:11-13) Yehova wa kuatisa ndati Paulu? Eye wa tambulula olohutililo via Paulu kuenda votembo ya sokiyiwa wo wĩha ongusu. (2 Tim. 4:17) Paulu wa popele okuti wa laikele oku tambula onima omo lioku likolisilako kupange waye. Yehova wa vetiyavo akamba vocili va Paulu oco vo kuatise kovina a sukilile.

20. Tu setukula ndati ekolelo lia Paulu ndomo ca tangiwa ku Va Roma 8:38, 39?

²⁰ (4) Kapako eci wa tanga. Lipula ndoco, ‘Ndi setukula ndati Paulu?’ Ndeci ca pita la Paulu, tu lambalaliwa omo lioku vumba Yehova. (Mar. 10:29, 30) Oco tu pandikise kelambalalo, tu sukila oku amamako oku likutilila ku Yehova kuenda tu sukila oku lilongisa Ondaka yaye olonjanja viosi. Olonjanja viosi tu ivaluki okuti ocina ca velapo tu sukila oku linga oku eca esivayo ku Yehova. Tu koleli okuti Yehova lalimue eteke a ka tu yanduluka kuenda ka kuli cimue ci pondola oku tateka ocisola a tu kuetele.—Tanga Va Rom. 8:38, 39; Va Hev. 13:5, 6.

21. Nye ca kuatisa Aya kuenda Hector oku yula ovitangi va liyaka lavio?

²¹ Ovolandu Embimbiliya a tu pamisa, oco tu pandikise kocitangi cimue. Ndeci, manji umue o tukuiwa Aya kofeka yo Japao wa popia okuti, ulandu wa Yona wo kuatisa oku yula usumba woku eca uvangi pocitumãlo pa pita omanu valua. Manji umue ukuenje o tukuiwa Hector kofeka yo Indonesia okuti olonjali viaye ka vi vumbi Yehova, wa popia okuti ulandu wa Ruti wo kuatisa oku vumba Yehova.

22. O pondola oku kuatisiwa ndati lolondalama Viembimbiliya, ovipama losapi hati, “Setukuli Ekolelo Liavo”?

²² Pi o sanga ovolandu Embimbiliya a pondola oku ku pamisa? Olovideo vietu, olondalama vioku yevelela kuenda ovipama viokuti “Setukuli Ekolelo Liavo,” vi ku kuatisa oku kuata elomboloko liovolandu a sangiwa Vembimbiliya. * Osimbu handi kua fetikile oku tala, oku yevelela, ale oku tanga ovolandu aco, pinga ku Yehova oco a ku kuatise oku sanga etosi lia velapo o pondola oku kapako. Likapa pomangu yomunu waco o kasi oku tukuiwa. Sokolola eci afendeli ava va Yehova vakuekolelo va linga kuenda ndomo eye a va kuatisa oco va yule ovitangi. Kuenje kapako ovolandu aco vomuenyo wove. Pandula Yehova omo lioku ku kuatisa olonjanja viosi. Lekisa okuti wa sanjukila ekuatiso liaco poku sanda apuluvi oku pamisa loku kuatisa omanu vakuavo.

23. Ndomo ca tangiwa ku Isaya 41:10, 13, nye Yehova a likuminya kokuetu?

²³ Oku kala voluali lulo lua vialiwa la Satana ka ca lelukile, pamue ka tu kũlĩha eci tu sukila oku linga. (2 Tim. 3:1) Pole, ka tu sukila oku sakalala, ale oku kuata usumba. Yehova wa kũlĩha ovitangi viosi tu kasi oku liyaka lavio. Eci tu sukila ekuatiso eye o tu kuata leka liange liondio. (Tanga Isaya 41:10, 13.) Tu koleli okuti Yehova o tu kuatisa kuenda pocakati Cembimbiliya, tu pondola oku kuata ongusu tu sukila oco tu pandikise kovitangi viosi.