1. Ndomo ca tangiwa ku Mateo 24:9, momo lie ka tu komohela eci oluali lu tu suvuka?

YEHOVA wa tu lulika lonjongole yoku sola kuenda yoku soliwa. Omo liaco, eci umue a tu suvuka, tu sumua calua kuenda tu kala lusumba. Ndeci, manji umue ukãi o tukuiwa Georgina, o kasi ko Europa wa popia hati: “Eci nda kuata 14 kanyamo, ina yange wa ndi suvukile omo lioku vumba Yehova. Nda sumuile calua loku liyeva okuti ñasi ulika kuenje nda fetika oku sima okuti mbi si kuete esilivilo.” * Manji umue o tukuiwa Danylo wa soneha hati: “Eci akuenje velombe va mbeta loku ndi sepula omo okuti Ndimbangi ya Yehova, nda kala lusumba walua kuenda osõi yalua.” Eci tu suvukiwa tu sumua calua, pole, eci ka ci tu komõhisa. Yesu wa popele ale hati, tu ka suvukiwa.—Tanga Mateo 24:9.

2-3. Momo lie olondonge via Yesu via suvukiwila?

² Oluali lua suvuka olondonge via Yesu. Momo lie? Momo ndeci ca linga Yesu, etu ka tu pangi onepa ‘koluali.’ (Yoa. 15:17-19) Kuenje ndaño tua sumbila olombiali viomanu, tu yuvula oku va fendela kuenda oku panga onepa kovipito viavo. Etu tu fendela lika Yehova. Tu tava komoko ya Suku yoku viala, pole, Satana la vana va tiamẽla kokuaye ka va tava komoko yaco. (Efet. 3:1-5, 15) Etu tu kunda okuti Usoma wa Suku owo lika u ka viala omanu kuenda owo u ka kundula vosi vana va u suvuka. (Dan. 2:44; Esit. 19:19-21) Eli esapulo liwa ku vana  okuti ambombe, pole, esapulo lĩvi kolondingaĩvi.—Osa. 37:10, 11.

³ Handi vali, tua suvukiwa omo okuti tua kapako olonumbi viesunga via Suku. Olonumbi viaco via litepa leci omanu voluali va tenda okuti ciwa. Ndeci, omanu valua koloneke vilo va lekisa ovituwa vĩvi ndevi via enda oku lekisiwa lomanu vana Suku a kundula volupale luo Sodoma la Gomora! (Yuda 7) Omo okuti tu pokola kolonumbi Viembimbiliya okuti kovituwa violuali havioko, omanu valua va tu sepula loku tu tenda okuti tuaveke.—1 Pet. 4:3, 4.

4. Ovituwa vipi vi pondola oku tu pamisa eci omanu va tu suvuka?

⁴ Nye ci tu kuatisa oku pandikisa eci omanu va tu suvuka loku tu sepula? Tu sukila oku kuata ekolelo liapama liokuti Yehova o tu kuatisa. Ndociyepelo cimue, ekolelo lietu li ka “ima isongo viosi viondalu viondingaĩvi.” (Va Efe. 6:16) Pole, tu sukila vali ocina cikuavo okuti ekolelo ci sule. Tu sukilavo oku lekisa ocisola. Momo lie? Momo ocisola “ka ci temisua.” Oco cecaila kuenda ci pandakaisa kovina viosi. (1 Va Kor. 13:4-7, 13) Cilo, tu konomuisa ndomo ocisola tu kuetele Yehova, vamanjetu kuenda ovanyali vetu, ci tu kuatisa oku pandikisa ndaño lesuvu.

5. Ocisola Yesu a kuatela Isiaye co kuatisa ndati?

⁵ Kuteke eci handi Yesu ka pondiwile lovanyali vaye, wa sapuila olondonge viaye hati: “Ame ndi sole Isia, [kuenje] ndi linga ovina Isia a ndi tuma oku linga.” (Yoa. 14:31) Omo okuti Yesu wa solele Yehova eci co kuatisa oku pandikisa kovitangi a liyaka lavio. Ocisola tu kuetele Yehova ci pondolavo oku tu kuatisa.

6. Ndoma ca tangiwa ku Va Roma 5:3-5, afendeli va Yehova va liyeva ndati eci oluali lu va suvuka?

⁶ Oku sola Suku ca siata oku kuatisa afendeli va Yehova oku pandikisa kalambalalo. Ndeci, eci ovapostolo va handelekiwa lombonge yo ko Yudea oku liwekapo oku kunda, ocisola va kuatela Suku ca va vetiya “oku pokola ku Suku ndombiali, komanu hakoko.” (Ovil. 5:29; 1 Yoa. 5:3) Ocisola eci ca siatavo oku kuatisa vamanjetu koloneke vilo okuti, valua pokati kavo va kasi oku lambalaliwa lolombiali. Eci oluali lu tu suvuka ka tu sumua, pole, tu sanjuka.—Ovil. 5:41; tanga Va Roma 5:3-5.

7. Nye tu sukila oku linga eci epata lietu li tu lambalala?

⁷ Pamue ci tĩla vali calua oku pandikisa nda elambalalo li tunda kepata lietu. Eci tu fetika oku lilongisa ocili, vamue pokati kepata lietu va fetika oku sima okuti tu kasi oku kembiwa. Vakuavo va sima okuti ka tu kuete olondunge. (Sokisa la Marko 3:21.) Ovo pamue va tu tata lãvi. Elambalalo liaco ka li tu komõhisa. Yesu wa popele hati: “Ovanyali vomunu vakuepata liaye.” (Mat. 10:36) Pole, ndaño epata lietu li tu tata lãvi, ka tu va tendi ndovanyali vetu. Kuenje osimbu ocisola tu kuetele Yehova ci li vokiya, ocisola tu kuetele omanu ci livokiyavo. (Mat. 22:37-39) Pole, lalimue eteke ka tu kaliwekipo oku pokola kolonumbi Viembimbiliya okuti tu sanjuisa omanu.

8-9. Nye ca kuatisa manji umue oku pandikisa kelambalalo?

⁸ Manji Georgina wa tukuiwa ale, wamamako oku pandikisa ndaño loku lambalaliwa la ina yaye. Georgina wa lombolola hati: “Ame la ina yange tua fetika oku lilongisa Embimbiliya Lolombangi Via Yehova. Pole, noke liolosãi epandu nda yonguile oku endaenda kolohongele, ina yange weya oku ñualapo. Nda limbuka okuti eye wa kuatele ukamba lolonanguluke kuenda poku sapela lame wa enda  oku tukula olondaka viavo vie sanda. Wa ndi sepula, wa ndinala vesinga, wa ndi sipata vosingo kuenda wa inasi alivulu ange. Eci nda tẽlisa 15 kanyamo nda papatisiwa. Ina yange wa seteka oku linga cosi oco ndi liwekepo oku vumba Yehova poku ndi kongela vonjo yimue mua kala amalẽhe vana okuti va sipa olodroga kuenda va linga ungangala. Ci tĩla calua oku pandikisa kelambalalo nda li kasi oku lingiwa lomunu una oku sole haiye oku tata.”

⁹ Nye ca kuatisa Georgina oku pandikisa? Eye hati: “Eci ina yange a kala oku ndi lambalala, nda tẽla oku tanga Embimbiliya liosi. Cilo, nda kolela okuti nda sanga ocili kuenda ukamba wange la Yehova wa pama. Eci ndaenda oku likutilila kokuaye, eye wa enda oku njeva. Eci nda kala konjo ya ina yange, manji umue ukãi wa ndi laleka konjo yaye kuenje tua enda oku lilongisila kumosi Embimbiliya. Vokuenda kuotembo yaco, nda pamisiwa calua la vamanji poku kala Vonjango Yusoma. Ovo va panga onepa kepata liange. Nda limbuka okuti Yehova wa pama vali okuti ovanyali vetu vosi va sule.”

10. Ekolelo lipi tu kuete ku Yehova Suku yetu?

¹⁰ Upostolo Paulu wa soneha okuti lacimue ci tẽla oku tu “tepa kocisola ca Suku ci kasi vu Kristu Yesu Ñala yetu.” (Va Rom. 8:38, 39) Ndaño okuti tu tala ohali vokuenda kuotembo yimue, Yehova olonjanja viosi o kala konele yetu oku tu lembeleka loku tu pamisa. Ndomo ulandu wa manji Georgina wa lekisa, Yehova o tu kuatisavo pocakati ca vamanji vekongelo.

11. Ndamupi ocisola Yesu a tukula ku Yoano 15:12, 13 ca kuatisa olondonge viaye? Tukula ulandu umue.

¹¹ Vuteke osimbu Yesu ka file, wa ivaluisa olondonge viaye oku lisola pokati. (Tanga Yoano 15:12, 13.) Eye wa kũlĩhĩle okuti ocisola ca ponduile oku va kuatisa oku likuata omunga loku pandikisa kesuvu lioluali. Kũlĩhĩsa ulandu wekongelo lio ko Tesalonike. Eci lia tumbikiwa, vamanji va kala oku lambalaliwa. Vamanji vaco, va sia ongangu yiwa yekolelo kuenda yocisola. (1 Va Tes. 1:3, 6, 7) Paulu wa enda oku va vetiya oku amamako oku lekisa ocisola, loku likolisilako oku “ci lingainga.” (1 Va Tes. 4:9, 10) Ocisola ca va vetiya oku lembeleka vana va sumua loku kuatisa vana va hongua. (1 Va Tes. 5:14) Ovo va kuama olonumbi via Paulu kukanda waye wavali a soneha noke, muna Paulu a va sapuila hati:  “Ocisola vu likueteli pokati ci kasi oku livokiya calua.” (2 Va Tes. 1:3) Ocisola caco ca va kuatisa oku pandikisa kovitangi vielambalalo.

12. Vokuenda kuotembo yuyaki, vamanji vofeka yimue va lekisa ndati ocisola ku vakuavo?

¹² Tu konomuisa ulandu wa manji Danylo wa tukuiwa ale kuenda ukãi waye. Eci kofeka yavo kua kala uyaki, ovo vamamako oku endaenda kolohongele, oku lekisa ombili koku kunda kuenda oku li tepela okulia la vamanji vakuavo. Eteke limue asualali veya konjo ya manji Danylo. Manji Danylo wa popia hati: “Asualali va ndi sapuila oco ndi liwekepo oku kala Ombangi ya Yehova. Eci nda likala, ovo vambeta kuenda va ndi sapuila okuti va laikele oku ndi loya vutue. Osimbu ka va tundile konjo, va likuminya oku tiuka locimaho coku putula ukãi wange. Pole, lonjanga yalua vamanji va tu kapa vokalela kamue oco tu ende volupale lukuavo. Lalimue eteke ndi ivalako ocisola vamanji va tu kuatela. Eci tua pitĩla volupale luaco, vamanji tua sangako va tu ĩha okulia, va tu kuatisa oku sanga upange kuenda onjo! Noke tua tẽlavo oku yekisa Olombangi vikuavo via Yehova via tila omo liuyaki.” Ovolandu aco, a lekisa okuti ocisola tu likuetele, ci pondola oku tu kuatisa oku pandikisa kesuvu.

13. Ndamupi espiritu sandu li tu kuatisa kupange wa Yehova ndaño omanu va tu suvuka?

¹³ Yesu wa sapuilile olondonge viaye oco va sole ovanyãli vavo. (Mat. 5:44, 45) Anga hẽ ca leluka oku ci linga? Sio, ka ca lelukile! Pole, lekuatiso liespiritu sandu lia Suku, ci tẽliwa oku ci linga! Vepako liespiritu lia Suku mua kongela ocisola, epandi, ohenda, umbombe kuenda oku likandangiya. (Va Gal. 5:22, 23) Ovituwa evi vi tu kuatisa oku pandikisa kesuvu. Omanu valua va siata oku liwekapo oku tu lambalala omo okuti ulume, ukãi, omãla, ale vana va lisungue va lekisa ovitunda vi tunda ku Suku. Valua pokati kavo, va kasi oku linga vamanjetu. Nda okuti kokuove ca tĩla calua oku sola vana va ku suvuka omo lioku vumba Yehova, pinga espiritu sandu poku likutilila. (Luka 11:13) Kolela okuti oku pokola olonjanja viosi ku Suku, oco ocina ca velapo.—Olosap. 3:5-7.

14-15. Ukanda ku Va Roma 12:17-21, wa kuatisa ndati manji Yasmeen oku lekisa ocisola kulume waye ndaño lelambalalo a liyaka lalio?

 ¹⁴ Kũlĩhĩsa ulandu wa manji Yasmeen, o kasi ko Oriente Médio. Eci eye a linga Ombangi ya Yehova, ulume waye wa simile okuti wa kala oku kembiwa kuenda wo sapuila oco a liwekepo oku vumba Suku. Eye wo sepula, wa vetiya epata, asongui vetavo kuenda vakuakutãha oco vo saluise loku u sapuila okuti o kasi oku tepa epata. Ulume waye wa enda oku sepula vamanji vokuenda kuohongele! Manji Yasmeen olonjanja vialua wa enda oku lila omo lioku tatiwa lãvi.

¹⁵ Vonjango Yusoma, vamanji vekongelo va enda oku u lembeleka kuenda oku u pamisa. Akulu vekongelo vo vetiya oku kapako olondaka vi sangiwa ku Va Roma 12:17-21. (Tanga.) Manji Yasmeen wa popia hati, “ka ca lelukile. Pole, nda pinga ku Yehova oco a ndi kuatise kuenda nda likolisilako oku kapako eci Embimbiliya li popia. Eci ulume wange lonyeño a silĩsa okusinya, ame nda puenyamo. Eci a enda oku mopia lãvi, nda enda oku tambulula lumbombe. Eci a vela, ndu tata ciwa.”

16-17. Nye tua lilongisa kulandu wa manji Yasmeen?

¹⁶ Manji Yasmeen wa kuata esumũlũho omo lioku lekisa ocisola kulume waye. Eye wa lombolola hati: “Ulume wange wa fetika oku ndi kolela omo okuti, nda enda oku vangula ocili. Eye wa fetika oku njevelela lesumbilo eci tu vangula catiamẽla ketavo kuenje wa tava okuti tu lisunguluisa. Cilo, eye o ndi vetiya oku endaenda kolohongele. Ame lulume wange tu kuete ukamba uwa kuenda tu kuete ombembua vonjo. Elavoko liange lieli okuti ulume wange o lekisa utima wa sunguluka oku tava ocili kuenda oku likongela kokuange koku vumba Yehova.”

¹⁷ Ongangu ya manji Yasmeen yi lekisa okuti ocisola ‘cecaila ovina viosi, ci lavoka ovina viosi, ci pandakaisa kovina viosi.’ (1 Va Kor. 13:4, 7) Oku suvukiwa kuvala calua, pole, ocisola oco cavelapo. Nda tu lekisa ocisola komanu ovo va pongolola ovisimilo viavo viatiamẽla kokuetu. Kuenje eci ci sanjuisa Yehova. Pole, nda ovanyãli vamamako oku tu suvuka, lopo tu amamako lesanju. Ndamupi?

18. Momo lie tu sanjukila eci tu suvukiwa?

¹⁸ Yesu wa popele hati: “Wa sumũlũhi ndaño omanu vo suvuki.” (Luka 6:22) Etu ka tua nõlele oku suvukiwa. Etu ka tu sanjuka eci tu lambalaliwa omo liekolelo lietu. Momo lie tu sanjukila eci tu suvukiwa? Kũlĩhĩsa asunga atatu. Tete, eci tu pandikisa tu sanjuisa Suku. (1 Pet. 4:13, 14) Vali, ekolelo lietu li kanguiwa kuenda li pamisiwa. (1 Pet. 1:7) Kuenda tatu, tu ka tambula onima yomuenyo ko pui.—Va Rom. 2:6, 7.

19. Momo lie ovapostolo va sanjukilile noke lioku tipuiwa?

¹⁹ Noke liepinduko lia Yesu, ovapostolo va mola onima yesanju eye a popele. Eci va tipuiwa loku handelekiwa oku liwekapo oku kunda, ovo va kuata esanju. Momo lie? “Momo va tendiwile okuti va sesamẽla oku sepuiwa omo lionduko ya [Yesu].” (Ovil. 5:40-42) Ovo va solele vali calua Cime cavo okuti usumba woku suvukiwa lovanyãli vavo, u sule. Ovo va lekisa ocisola cavo poku kunda olondaka viwa okuti ka va ‘liwekelepo.’ Valua pokati ka vamanjetu koloneke vilo, va kasi oku amamako oku vumba Yehova lekolelo ndaño lovitangi. Ovo va kũlĩha okuti Yehova ka ivalako upange wavo, locisola va lekisa konduko yaye.—Va Hev. 6:10.

20. Nye tu ka lilongisa vocipama ci kuãimo?

²⁰ Osimbu oluali lulo luamamako, oluo lu ka tu suvuka. (Yoa. 15:19) Pole, ka tu sukila oku kuata usumba. Ndomo tu ka lilongisa vocipama ci kuãimo, Yehova o ka ‘pamisa loku teyuila’ afendeli vaye vakuekolelo. (2 Va Tes. 3:3) Omo liaco, tuamamiko oku sola Yehova, vamanjetu kuenda ovanyãli vetu. Nda tua kapako olonumbi evi, tu kamamako oku li kuata omunga, tu ka pamisa ekolelo lietu, tu ka nena esivayo ku Yehova kuenda tu ka lekisa okuti ocisola ca velapo okuti oku suvukiwa ku sule.