1, 2. (a) Lombolola esunga lieci okuti epapatiso ocikele cimue cinene. (b) Nye omunu a sukila oku kũlĩhĩsa osimbu handi ka papatisiwile, kuenda momo lie?

OVE hẽ, umãlehe umue okuti o yongola oku papatisiwa? Nda oco, eli esumũlũho linene o pondola oku kuata. Ndomo ca lomboluiwa vocipama catete, epapatiso ocikele cimue cinene. O lekisa komanu okuti wa litumbika ku Yehova kuenda wa likuminya oku u vumba otembo ka yi pui. O lekisavo okuti oku linga ocipango caye oco ci kala ocina ca velapo komuenyo wove. Omo okuti oku linga ohuminyo yaco ku Suku ocikele cinene, o sukila lika oku papatisiwa eci o lekisa okuti wa linga ukulu, kuenda nda onjongole yaco yi tunda muẽle vutima wove, loku kũlĩha eci ci lomboloka oku litumbika ku Suku.

² Pole, pamue o sima okuti kua lipongiyile oco o papatisiwe. Ale, o sima okuti wa lipongiya pole, olonjali viove vi sima okuti o sukila oku kula vali kutunga kuenda oku loñoloha kukũlĩhĩso.  Nye o sukila oku linga? Ku ka sumue. Pole, vokuenda kuotembo yaco, likolisilako oku vokiya ukũlĩhĩso wove, oco ci ku kuatise oku lipongiyila oku papatisiwa. Poku kũlĩhĩsa ovina viaco, o pondola oku litumbikila ovimãho vitatu, ndeci: (1) ovina wa kolela, ale ovina o tava (2) ovilinga viove, kuenda (3) olopandu viove.

3, 4. Nye amalẽhe va sukila oku lilongisa kongangu ya Timoteo?

³ Sokolola ndomo o pondola oku tambulula apulilo akuãimo: Momo lie ndi kolelela okuti kuli Suku? Momo lie ndi tavela okuti Embimbiliya lia tunda ku Suku? Momo lie ndi pokuila kolonumbi via Suku okuti si setukula ovituwa violuali? Apulilo a-a, a pondola oku ku kuatisa oku pokola kelungulo lia Paulu liokuti: “Vu limbuka ndeci ci kasi ocipango ca Suku okuti ciwa, ca sunguluka kuenda ca pua eko.” (Va Roma 12:2) Momo lie o sukilila oku ci linga?

⁴ Ulandu wa Timoteo u pondola oku ku kuatisa. Eye wa kũlĩhĩle ciwa Ovisonehua, momo ina yaye kumue la inakulu yaye vo longisa Ovisonehua. Mekonda liaco, Paulu wa sapuila Timoteo hati: “Amamako lovina wa lilongisa havio wa vetiyiwa oku tava.” (2 Timoteo 3:14, 15) Ondaka oku “vetiyiwa,” yi lomboloka oku “tava kuenda oku kolela okuti ocina cimue cocili.” Timoteo wa kolelele okuti wa ponduile oku sanga ocili Vovisonehua. Eye wa tava ocili caco, hamomoko inaye la inakulu yaye vo kisika oku ci linga, pole wa vetiyiwa oku tava omo a sokolola ovina a lilongisa.​—Tanga Va Roma 12:1.

5, 6. Momo lie ci kuetele esilivilo oku talavaya ciwa ‘luloño woku sokolola’ osimbu handi umalẽhe?’

⁵ Nye ci popiwa catiamẽla kokuove? Citava okuti wa kũlĩha ocili Cembimbiliya tunde osimbu. Nda oco, litumbikila ocimãho coku sokolola esunga lieci o tavela. Oku ci linga ci ka ku kuatisa oku pamisa ekolelo liove kuenda oku yuvula oku nõla onjila ka ya sungulukile omo okuti amalẽhe vakuavo va kasivo oku ci linga. O yuvulavo oku vetiyiwa lovisimĩlo violuali ale ovisimĩlo viove muẽle.

⁶ Nda wa lilongisa oku talavaya ciwa ‘luloño wove woku sokolola’ osimbu umãlehe, o ka tẽla oku tambulula apulilo akamba vove va ku linga, ndeci: ‘Wa kolela ndati okuti kuli Suku? Nda Suku o tu sole, momo lie a ecelelela ovina vĩvi? Citava ndati okuti Suku ka kuete efetikilo?’ Nda wa lipongiya ciwa, apulilo aco ka a ka ku kokela atatahãi pole, a ka ku vetiya oku konomuisa Embimbiliya.

7-9. Lombolola ndomo ovipama vielilongiso losapi hati, “Embimbiliya li Longisa Nye?,” vi sangiwa vonumbi yetu yo Internet, vi ku kuatisa oku pamisa ekolelo liove.

⁷ Oku linga elilongiso liwa liopokolika, ci ka ku kuatisa oku tambulula apulilo, oku yuvula atatahãi, kuenda o ka kakatela kovina wa tava. (Ovilinga 17:11) Tu kuete alivulu alua a pondola oku ku kuatisa oku ci linga. Amalẽhe valua, va sanga ekuatiso  liaco poku lilongisa ombrochura losapi hati: “A Origem da Vida—Cinco Perguntas Que Merecem Resposta” kuenda elivulu losapi hati: Existe um Criador Que Se Importa com Você? Handi vali, amalẽhe valua va siata oku kuatisiwa poku lilongisa ovipama losapi hati: “Embimbiliya li Longisa Nye?” vi sangiwa vonumbi yetu yo Internet jw.org. O pondola oku sanga ovipama viaco vemẽhi liosapi hati, ALONGISO EMBIMBILIYA. Ocipama locipama, ca pongiyiwa oco ci ku kuatise oku pamisa ekolelo liove lioku tava kalongiso Embimbiliya.

⁸ Nda o kasi oku lilongisa Embimbiliya, citava okuti wa kũlĩha ale atambululo amue a sangiwa vovipama viaco. Pole, wa kolela hẽ katambululo wa sanga? Ovipama viaco, vi ka ku kuatisa oku sokolola kovinimbu vialua Viembimbiliya kuenda vi ku vetiya oku soneha esunga lieci o tavela kovina viaco. Ci ka ku kuatisa oku kũlĩha ndomo o lomboluila vakuene ovina o tava. Nda wa iñila vonumbi yetu yo Internet, vovipama losapi hati, “Embimbiliya li Longisa Nye?,” o pondola oku kuama olosapi viaco kelilongiso liove liopokolika oco vi ku kuatise oku kakatela kovina o tava.

⁹ O sukila oku limbuka ove muẽle okuti eci o kasi oku lilongisa ocili. Ovina viaco vi ka ku kuatisa oku lipongiya oco o papatisiwe. Umãlehe umue ufeko wa popia hati: “Osimbu sia papatisiwile, nda lilongisa Embimbiliya kuenda nda limbuka okuti eli olio etavo liocili. Kuenje eteke leteke, ekolelo liange kovina ndi tava li pamisiwa.”

10. Momo lie ca sungulukila oku lavoka okuti ovilinga Viukristão wa papatisiwa vi likuata lekolelo liaye?

¹⁰ Embimbiliya li popia hati: “Ekolelo nda ka li kuete ovilinga lia fa.” (Tiago 2:17) Nda o kolela kovina o tava, o ci lekisila kovilinga viove. O ka lekisa ovituwa Embimbiliya li tukula hati, oku ‘kola kekalo lo kovilinga vioku sumbila Suku.’—Tanga 2 Petulu 3:11.

11. Lombolola eci ci lomboloka oku kala omunu o ‘kola kekalo.’

 ¹¹ Nye ci lomboloka oku kala omunu o ‘kola kekalo’? Nda ovilinga viove vi kola, ovituwa viove via yela. Sokolola eci wa linga volosãi epandu via pita. Eci wa setekiwile oku linga cimue cĩvi, anga hẽ, wa sokolola lutate catiamẽla kueci ciwa leci cĩvi? (Va Heveru 5:14) Ivaluka hẽ, epuluvi limue okuti kua tavele oku yapuisiwa lalambalalo a tunda kakamba vokosikola? Kosikola wa siata hẽ oku lekisa ongangu yiwa ku vakuẽle? Wa siata hẽ oku kolela Yehova, ale wa siata oku kuama ovituwa viakamba vove kosikola oco ka va ka ku popie lavĩ? (1 Petulu 4:3, 4) Ocili okuti lomue wa lipua. Olonjanja vimue, vana va kasi oku vumba Yehova vokuenda kuanyamo alua va kuete osõi kuenda ohele yoku kundila vakuavo. Pole, omunu wa litumbika ku Suku o kuete esanju lioku tukuiwa okuti Ombangi ya Yehova kuenda o ci lekisa kovituwa viaye viwa.

12. Vipi vimue pokati “kovilinga vioku sumbila Suku,” kuenda o vi tenda ndati?

¹² Nye ca kongela ‘vovilinga vioku sumbila Suku?’ Mua kongela ovopange ove vekongelo ndeci, oku endaenda kolohongele kuenda kupange woku kunda. Pole, mua kongelavo ovina vimue okuti vakuetu ka va pondola oku vi mõla, ndeci, olohutililo tu linga ku Yehova pokolika kuenda elilongiso liopokolika. Omunu una okuti wa litumbika ku Yehova, ka simi okuti ovina viaco ka via lelukile oku vi tẽlisa. Eye o kala ndeci Soma Daviti, wa popia hati: “Oku linga ocipango cove, a Suku yange, oco sanjukila. Ovihandeleko viove vi kasi vutima wange.”​—Osamo 40:8.

13, 14. Eliangiliyo lipi li pondola oku ku kuatisa oku tẽlisa ‘ovilinga vioku sumbila Suku,’ kuenda amalẽhe vamue va kuatisiwa ndati leliangiliyo liaco?

¹³ Oco o tẽlise ciwa ovimãho viove, velivulu Os Jovens Perguntam—Respostas Práticas, Volume 2, kemẽla 308 kuenda 309 ku sangiwa onepa losapi hati, plano de ação, oyo yi pondola oku ku kuatisa. Vonepa yaco, o pondola oku soneha atambululo kapulilo ndeci: “Nye wa siata oku tukula volohutililo viove, kuenda ovio vi situlula nye catiamẽla kocisola o kuetele Yehova?” “Nye o kongela velilongiso liove liopokolika?” “Wa siata hẽ oku lekisa ombili kupange woku kunda ndaño okuti olonjali viove ka vi ci lingi?” Vonepa yaco, o pondolavo oku soneha ovimãho o yongola oku tẽlisa viatiamẽla kolohutililo viove, kelilongiso liopokolika kuenda kupange woku kunda.

¹⁴ Amalẽhe valua va sima oku papatisiwa, va limbuka okuti onepa plano de ação, yi kuatisa calua. Manji umue umãlehe o tukuiwa hati, Tilda wa popia ndoco: “Nda soneha ovimãho viange vonepa yaco. Nda fetika oku vi tẽlisa cimosi, cimosi, noke liunyamo nda papatisiwa.” Manji umue umalẽhe o tukuiwa hati Patrick wa kuatavo onima yimuamue. Eye wa popia hati: “Nda  kũlĩhĩle ciwa ovimãho viaco, pole oku vi soneha ca ñuatisa oku vi tẽlisa.”

15. Lombolola esunga lieci okuti omunu lomunu eye muẽle o sukila oku litumbika.

¹⁵ Limue pokati kapulilo a sangiwa vonepa plano de ação lieli: “O ka amamako hẽ oku vumba Yehova, ndaño okuti olonjali viove kuenda akamba va liwekapo oku ci linga?” Eci o litumbika ku Yehova kuenda oku papatisiwa, ove muẽle o kuata ukamba uwa laye. Kuenje, poku vumba Yehova ku ka sukila oku kuama olonjali viove ale omunu ukuavo. Oku kola kekalo liove lo kovilinga vioku sumbila Suku ci lekisa okuti wa limbuka ocili kuenda o yongola oku kuama olonumbi via Suku. Eci ci ka lekisa okuti wa li pongiyila oku papatisiwa.

16, 17. (a) Nye ci vetiya omunu oku kala Ukristão? (b) Olopandu vi eciwa omo liocisembi, vi sokisiwa ndati?

¹⁶ Eteke limue, ulume umue wa kũlĩhĩle ciwa Ocihandeleko ca Mose, wa pula Yesu hati: “Ocihandeleko cipi ca velapo?” Yesu wo kumbulula hati: “Sola Yehova Suku yove lutima wove wosi, lomuenyo wove wosi kuenda lolondunge viove viosi.” (Mateo 22:35-37) Yesu wa lombolola okuti, oku sola Yehova oco ci pondola oku vetiya  omunu oku papatisiwa kuenda oku linga Ukristão. Onjila yimue yiwa yoku pamisa ocisola cove ku Yehova, oku sokolola lutate kocisembi okuti, oyo ombanjaile ya velapo Suku a eca komanu. (Tanga 2 Va Korindo 5:14, 15; 1 Yoano 4:9, 19.) Poku ci linga, o lekisa okuti o yongola oku eca olopandu viove omo liombanjaile yaco yi komohĩsa.

¹⁷ Olopandu o lekisa omo liocisembi vi pondola oku sokisiwa locindekaise ndeci: Sokolola okuti, o kasi oku vomba kosi yovava kuenje umue oku yovola. Ove hẽ o tiukila konjo kuenje, pana okuti wa kukuta ivalako una wa ku yovola? Sio! Olonjanja viosi o vetiyiwa oku eca olopandu komunu wa ku popela! Cimuamue haico okuti, tu sukila oku lekisa olopandu ku Yehova kuenda ku Yesu omo liocisembi. Tu kasi lomuenyo omo liavo! Ovo va tu yovola kekandu kuenda kolofa. Omo liocisola va lekisa kokuetu, tu kuete elavoko lioku kala lomuenyo otembo ka yi pui Voluali Luokaliye palo posi!

18, 19. (a) Momo lie ku sukilila oku kuata usumba woku tiamẽla ku Yehova? (b) Momo lie oku vumba Yehova ca velelapo kokuove?

¹⁸ Anga hẽ wa sanjukila eci Yehova a ku lingila? Nda oco, oku litumbika kuenda oku papatisiwa enanga limue lia velapo o sukila oku linga. Oku litumbika kuove ohuminyo o linga ku Suku okuti, o ka linga ocipango caye otembo ka yi pui. O sukila hẽ oku kuata usumba omo liohuminyo yaco? Sio! Yehova oku yonguila eci ciwa kuenda o ka sumũlũisa vana va linga ocipango caye. (Va Heveru 11:6) Eci o litumbika ku Suku loku papatisiwa, ku ka kuata esumuo pole, o ka kuata ekalo liwa komuenyo! Manji umue ulume o kuete 24 kanyamo, okuti eci a papatisiwa wa kala handi umalẽhe, wa popia hati: “Nda nda kaile ukulu, nda nda kuata elomboloko lia suapo, pole onjila ame muẽle nda nõla yoku litumbika ku Yehova, ya ndi teyuila kovina violuali.”

¹⁹ Yehova oku yonguila eci ciwa. Pole, Satana ukuacipululu kuenda ka ku kapeleko. Eye ka pondola oku ku ĩha lacimue ciwa nda wo kuama. Eye o ku ĩha ndati cimue okuti ka ci kuete? Eye ka kuete esapulo lalimue liwa kuenda ka kuete elavoko. Eye o pondola lika oku ku ĩha elavoko limue lĩvi, momo olio elavoko eye a kuete!—Esituluilo 20:10.

20. Nye umalẽhe umue a sukila oku linga oco a loñolohe okuti o litumbika loku papatisiwa? (Tala okakasia losapi hati: “Ceci ci ku Kuatisa Oku Loñoloha Kukũlĩhĩso.”)

²⁰ Oku litumbika ku Yehova oyo onjila ya velapo o pondola oku nõla. Wa lipongiyila hẽ oku ci linga? Nda wa lipongiya, ku ka kuate usumba woku linga ohuminyo yaco. Pole, nda o sima okuti kua li pongiyile handi, kuama olonumbi via tukuiwa vocipama cilo, oco amameko oku loñoloha kukũlĩhĩso. Paulu wa vetiya vamanji va Filipoi oco va amameko oku loñoloha. (Va Filipoi 3:16) Nda wa tava kevetiyo liaco, o ka lekisa onjongole yoku litumbika ku Yehova kuenda oku papatisiwa.