Manji Jack lukãi waye Marie-Line va kasi kupange wakundi votembo yosi tunde kunyamo wo 1988. Va kũlĩhĩwa omo lioku tava oku enda kuosi va tumiwa kuenje ovo va tambula ovikele vialua ko Guadalupe kuenda ko Fransa Guiana. Olofeka viaco, cilo vi kasi oku songuiwa lo Betele yo ko Fransa. Omo liaco, tu linga apulilo amue ku manji Jack lukãi waye Marie-Line.

Nye ca ku vetiyi oku iñila kupange wakundi votembo yosi?

Marie-Line: Eci nda kala omõla ko Guadalupe, ndaenda oku kunda la inange eteke liosi, omo wa kala ukuambili kupange woku kunda. Omo okuti ndi sole omanu, eci nda mala oku tanga kosikola kunyamo 1985, nda fetika upange wakundi votembo yosi.

Jack: Eci nda kala umalẽhe nda linga ukamba lakundi votembo yosi vana va solaile upange woku kunda. Ndaenda oku talavaya ndukundi wasokamo kotembo yepuyuko kosikola. Kasulilo osemana, ame, la inange kuenda vamanji vakuavo vekongelo, tua endaenda lokalela oku kundila vocikanjo cavo. Tua enda oku kunda eteke liosi kuenje noke tu ka liteva vokalunga. Otembo yaco, ya kala yesanju lialua!

Noke lioku kuela la Marie-Line kunyamo wo 1988, nda lipula ndoco: ‘Ka tu kuete lacimue ci tu tateka, momo lie ka tu vokiyila upange wetu woku kunda?’ Noke nda litumbikavo kupange wakundi votembo yosi kumue la Marie-Line. Noke liunyamo umosi, tua pindisiwa kosikola yakundi votembo yosi kuenje tua tumiwa ndakundi valikasi. Tua kuata asumũlũho alua ko Guadalupe osimbu ka tua tumiwile ko Fransa Guiana.

Ene wa siati oku tava apongoloko alua kocikele cene unyamo lunyamo. Nye ca siata oku u kuatisi oku litunda ciwa kapongoloko aco?

Marie-Line: Vamanji ko Betele yo Fransa Guiana va kũlĩhĩle ocisonehua tu sole calua okuti, Isaya 6:8. Kuenje, eci tua pitĩlako va papala letu loku tu pulisa hati: “Ene vu ivaluki ocisonehua vu sole calua?” Etu tua kũlĩhĩle okuti, ovikele vi pondola oku pongoloka. Omo liaco, tua enda oku tambulula hati: “Etu valo! Va tu tume ño!”

 Etu ka tu sokisa ocikele tu kuete cilo leci cosimbu, omo sanga ka tu sanjukila ocikele cokaliye. Tu likolisilakovo oku kũlĩha ciwa vamanji kocikele cokaliye.

Jack: Kosimbu, vamanji vamue ka va yonguile okuti tuenda kocikele cokaliye, omo liaco va tu vetiya oco tu kale lavo. Eci tua tunda ko Guadalupe, manji umue wa tu ivaluisa olondaka via Yesu vi sangiwa ku Mateo 13:38 vi popia hati: “Epia, oluali.” Kuenje eci tua tumiwa kocitumãlo cikuavo, tua ivaluka okuti handi tu kasi kocikele cimuamue ndaño tu kasi kocitumãlo cikuavo. Pole, ca velapo, omanu kuenda ocikanjo!

Eci tua tumiwa kocitumãlo cikuavo, tua limbuka okuti omanu vaco va sanjuka. Kuenje tua sanjukila oku kala kocitumãlo caco, ndeci ci linga omanu tua sanga. Ocili okuti ovikulia via litepele, pole, tua lia ovina ovo va lialiavo, loku nyua ovinyua va nyuanyuavo, ndaño ndoco, tua enda oku li teyuila kuhayele. Tua tenda ovikele viosi lonjila yimue ya sunguluka.

Marie-Line: Tua lilongisa calua ku vamanji tua sanga. Ndi ivaluka eci tua pitĩla onjanja yatete ko Fransa Guiana. Ombela ya kala oku loka calua, kuenje tua simĩle okuti, tu talamẽla toke eci ombela yica, oco tu enda noke kupange woku kunda. Manji umue ukãi wa mũlisa hati, “Citava okuti tu enda?” Loku komõha, nda tambulula siti, “Ndati?” Manji wa ndi tambulula hati, “Ambata osapilinya yove kuenda tu endela kolosikaleta vietu.” Kuenje nda lilongisa oku kuata osapilinya osimbu ngendisa osikaleta vonjanja yimosi. Nda sia lilongisile, nda sia tẽlele oku kunda ndaño ombela yi kasi oku loka!

Ene wa pongoluiwi kocikele cene 15 kolonjanja. Nye ca ku kuatisi vokuenda kuapongoloko aco?

Marie-Line: Oku pongoluiwa kocikele ka ca lelukile. Pole, ci kuete esilivilo oku sanga onjo yimue okuti, o pondola oku kavuluisiwa eci o tuika kupange woku kunda.

Jack: Nda siata oku pindala vokati konjo tua ilukila. Eci vamanji ko Filiale va limbuka okuti ka tu kala otembo yalua vonjo yaco, olonjanja vimue va popia ndoco: “A Jack, onjanja eyi ku ka lisakalaise vali loku pindala!”

Marie-Line ukuakuongotiya ciwa ovina! Ovina viosi o vi kapa olondimbukiso. Kuenje ci leluka eci a ilukila kocitumãlo cikuavo, okuti ocikuata locikuata o cikapa pocitumãlo ci sesamẽla. Eye o  soneha ovina viosi a kuete okuti ci leluka oku sanga ovina a sukila.

Marie-Line: Omo okuti tua lilongisa oku ongotiya ciwa ovina, tu fetika oku linga upange wetu woku kunda lonjila yimue ya sunguluka.

Ndamupi wa siati oku sokiya otembo yene oco vu ‘tẽlisi upange wene u kola’?—2 Tim. 4:5.

Marie-Line: Volosegunda tu puyukapo loku pongiya olohongele. Vovali, tu enda kupange woku kunda.

Jack: Ndaño tu kuete etendelo liolowola tu sukila oku eca vosãi, pole, hakoko tu tiamisila utima. Upange woku kunda owo wa velapo. Poku tunda konjo lopokutiuka, tu sapela lomanu vosi tu ñualehela lavo.

Marie-Line: Eci tu enda komapalo yimue, ngambata ovicapa vioku eca uvangi. Omanu vamue va amẽla kokuetu loku pinga alivulu, ndaño okuti ka tua popele kokuavo okuti Tulombangi Via Yehova. Ovo va vetiyiwa lovituwa vietu viwa koku wala kuenda kekalo lietu. Eci oco omanu va limbuka kokuetu.

Jack: Tu ecavo uvangi ku vana tu lisungue lavo pocakati covilinga vietu viwa. Ndi komba ocumbo colonelẽho, ndongolola ovinene viaco loku vinãsi. Vana tu lisungue olonjanja vimue, va pula ndoco, “Ove o kuete hẽ Embimbiliya limue oco o li nyĩhe”?

Olonjanja vimue vu kundila kovikanjo vi kasi ocipãla. Anga hẽ wi ivaluki ocina cimue ci likasi ca lipita vokuenda kuovongende aco?

Jack: Ko Guiana, kovikanjo vimue ka ca lelukile oku kundilako. Olonjanja vimue tua enda oku linga ungende weci ci soka 600 kolokilometulu osemana yimosi, poku pita vonjila yimue yĩvi calua. Epasu tua linga vimbo lio St. Élie, vusenge wo Amazonia tua lisola calua. Oco tu pitile vimbo liaco, cambata olowola vialua poku endela vekãlu kuenda vowato umue u lupuka calua. Valua pokati komanu vaco, vakuakufẽla ulu. Oco ovo va lekise olopandu omo lialivulu etu, va enda oku eca ulu ndombanjaile! Kovoteke, ndaenda oku lekisa ovideo yimue yocisoko cetu. Valua va enda oku tala ovideo yaco.

Marie-Line: Otembo yimue, vamanji va pinga ku Jack oco a linge ohundo yonjivaluko vimbo lio Kamopi. Oco tu pitĩle vimbo liaco, tua enda olowola vikuãla lowato volui Oyapock. Wa kala ulandu umue u komõhisa calua.

Jack: Ponepa Yolui okuti pa longa calua, pa koka ohele yalua. Ndi popia siti oku mola ndomo ovava a tumohã ci komõhisa. Ukuakuendisa owato wa sukilile oku kũlĩha oku a loña. Ulandu owu u komõhisa calua. Ndaño okuti kua kala lika 6 Kolombangi Via Yehova, ci soka 50 komanu va kala Kocipito Conjivaluko, oku kongelamo omanu vana va tukuiwa hati, Ameríndios!

Marie-Line: Ulandu owu, u vetiya amalẽhe vana va yongola oku vokiya upange va lingila Yehova. Vepuluvi liaco, o sukila oku kolela Yehova kuenda ekolelo liove li pamisiwa. Olonjanja vialua tu limbuka ekuatiso lia Yehova.

Wa lilongisi oku vangula alimi alua. Anga hẽ ca lelukile kokuene?

Jack: Sio, ka ca lelukile. Nda lilongisa alimi a-a oco ndi kunde loku kuatisa ekongelo. Nda sukilile oku songola elilongiso Liutala Wondavululi kelimi lio Sranantongo * apa handi sia lingile etangiwo Liembimbiliya vekongelo! Nda pinga kumanji umue oco a ñuatiseko. Eye wa tambulula hati, “Olonjanja vimue ka tu kuata elomboloko lieci o popia, pole, o kasi oku likolisilako calua.” Omãla va ñuatisavo calua. Nda nda lueya ondaka yimue, ovo va ci ndi sapuila, pole, akulu sio. Nda lilongisa calua lomãla.

Marie-Line: Vocikanjo cimue nda kuata alilongiso amue Embimbiliya kelimi lio Fransesi, Lioputu kuenda lio Sranantongo. Manji umue ukãi wa ndi sapuila okuti, ciwa oku fetika lelimi limue lia tĩla kuenda oku malusula lelimi nda kũlĩha ciwa. Kuenje ame nda limbuka esilivilo lionumbi eyi.

 Eteke limue, ame nda kuata elilongiso limue Liembimbiliya kelimi lio Sranantongo kuenda elilongiso likuavo kelimi Lioputu. Eci nda fetika oku songola elilongiso lia vali, manji nda tunda laye wa ndi sapuila hati, “A Marie-Line, soketi kuli ocitangi cimue!” Nda limbuka okuti nda kala oku vangula elimi lio Sranantongo kukãi umue wo ko Brasil, sia kaile oku vangula Oputu.

Ene vu soliwe lavana wa kuatisi. Nye wa siati oku linga oco vu kuate ukamba wa pama la vamanji?

Jack: Olosapo 11:25 ku popia hati: “Ukuacali o sumũlũha.” Etu ka tu kuete ohele yoku kuatisa vakuetu. Catiamẽla koku semuluiwa Kuonjango Yusoma, vamue va siata oku ndi sapuila ndoco: “Akundi va linge upange waco.” Pole, ame ndi va tambulula ndoco: “Ame ndukundivo. Kuenje nda kuli upange umue woku linga, ame ndi yongola oku u linga.” Ndaño okuti vosi yetu olonjanja vimue tu sukila oku kala lika lietu, etu ka tua yonguile oku kala lika lietu okuti ka tu kuatisa vakuetu.

Marie-Line: Etu tua enda oku likolisilako oku lekisa ukamba ku vamanji vosi. Lonjila eyi tueya oku kũlĩha eci va sukila, okuti umue o siala lomãla vavo ale oku ka vopilila kosikola. Kuenje tua linga esokiyo lioku va kuatisa. Lonjila eyi tua linga ukamba uwa la vakuetu, omo lioku lieca olumue poku va kuatisa eci va sukila.

Asumũlũho api wa kuati omo lioku tava oku talavaya kocikanjo kuli esukila lialua liakundi?

Jack: Kupange wakundi votembo yosi tua kuata asumũlũho alua. Olonjanja vialua tua kala ocipepi lovina via lulikiwa, oku luluvalela kovina via litepa Yehova a lulika. Ndaño lovitangi tua liyaka lavio, tu kuete ombembua yovutima omo tua kũlĩha okuti tu kuete ekuatiso liafendeli va Yehova kovitumãlo viosi tu sangiwa.

Eci nda kala umalẽhe nda kapiwile vokayike ko Fransa Guiana omo lioku likala oku enda kuyaki. Sia simĩle okuti eteke limue ndi ka tiukila kofeka yaco ndomisionaliu. Ocili okuti Yehova ukuacali poku eca asumũlũho aye!

Marie-Line: Esanju liange lia velapo, li tunda koku kuatisa vakuetu. Tu kuete esanju omo lioku linga upange wa Yehova. Upange waco wa siatavo oku pamisa olohuela vietu. Olonjanja vimue sekulu yange Jack, o ndi pula nda tu laleka ohueli yimue yi sukila elembeleko oco tu lie kumosi letu. Ame pamue ndi tambulula ndoco, “Cimuamue haico nda kala oku sima!” Olonjanja vimue tua siata oku sokolola ovina vimuamue.

Jack: Cilo nda kuatiwa lokaser yoprostata. Ndaño Marie-Line ka solele oku yeva esapulo liuvei wange, ame ndo sapuila ndoco: “Ukuacisola cange, ame handi sia kukile. Pole, nda nda fa cilo, nda kũlĩha okuti vomuenyo wange wosi nda linga eci ca velapo okuti oku vumba Yehova kuenje ci ndi sanjuisa.”—Efet. 25:8.

Marie-Line: Yehova wa tu ĩha ovikele vialua ka tua lavokaile kuenda wa ecelela okuti tu linga ovina vimue ka tua la sima. Omuenyo wetu we yukile lovina viwa. Etu tu tava oku enda kuosi ocisoko ca Yehova ci tu tuma, momo tua kolela okuti Yehova olonjanja viosi o tu kuatisa!