1. Ekalo liove lia kala ndati, osimbu kua fetikile oku lilongisa Embimbiliya?

 EKALO liove lia kala ndati, osimbu kua fetikile oku lilongisa Embimbiliya Lolombangi Via Yehova? Valua pokati ketu, ka tu sole oku ivaluka ndomo ekalo lietu lia kala. Ovituwa vietu kuenda ovilinga, via enda oku yapuisiwa lovina ndomo oluali lu tenda eci ciwa leci cĩvi. Kuenje ka tua ‘kuatele elavoko kuenda ka tua kuatele Suku voluali.’ (Va Efe. 2:12) Noke lioku fetika oku lilongisa Embimbiliya, ekalo liomuenyo wetu lia pongoloka!

2. Nye ca pita eci wa fetika oku lilongisa Embimbiliya?

² Noke lioku fetika oku lilongisa Embimbiliya, ove wa limbuka okuti o kuete Isia umue wokilu oku sole calua. Wa limbukavo okuti, oco o sanjuise Yehova loku panga onepa kepata liafendeli vaye, wa sukilile oku linga epongoloko linene vomuenyo wove, kekalo kuenda kovisimĩlo. Ove wa sukilile oku lilongisa loku pokola kolonumbi viaye.—Va Efe. 5:3-5.

3. Ndomo ca tangiwa ku Va Kolosai 3:9, 10, nye Yehova a yongola okuti oco tu linga kuenda nye tu konomuisa vocipama cilo?

³ Omo okuti Yehova Ululiki wetu kuenda Isietu wokilu, o kuete omoko yoku nõla ekalo afendeli vaye va sukila oku lekisa. Eye o yongola okuti osimbu handi ka tua papatisiwile, tu likolisilako oku ‘lula omunu wosimbu lovilinga vialio.’ * (Tanga Va Kolosai 3:9, 10.) Ocipama cilo, ci ka kuatisa vana va yongola oku papatisiwa oku tambulula apulilo atatu ndeci: (1) Nye ci lomboloka “omunu wosimbu”? (2) Momo lie Yehova a yonguila okuti tu lula omunu waco? (3) Tu ci linga ndati?  Ku vana okuti va papatisiwa ale, ocipama eci ci ka va kuatisa oku yuvula ovituwa va enda oku lekisa eci handi ka va lulile omunu wosimbu.

4. Omunu una o kasi oku songuiwa ‘lomunu wosimbu,’ o lekisa ovilinga vipi?

⁴ Omunu una o kasi oku songuiwa ‘lomunu wosimbu’ olonjanja vialua ovisimĩlo viaye kuenda ovilinga, vievĩho. Omunu waco o lisokolola lika eye muẽle, ukuacinyeño husa, ka kuete olopandu kuenda ukuepela. Eye o sanjukila oku tala ovina viumbondo, vina vi lekisa evĩho liukahonga kuenda ungangala. Pole, eye o kuete ovituwa vimue viwa viokuti, o pondola oku livetela evelo omo liovina vĩvi eye a popia, ale a linga. Pole, ka kuete utõi woku linga apongoloko kovisimĩlo kuenda kovituwa.—Va Gal. 5:19-21; 2 Tim. 3:2-5.

5. Ovisimĩlo vipi via sunguluka tu sukila oku kuata catiamẽla koku lula omunu wosimbu? (Ovil. 3:19)

⁵ Etu ka tua lipuile, lomue pokati ketu o pondola oku imũla lonjila ya suapo ovisimĩlo kuenda oloñeyi vĩvi vi kasi vutima wetu. Olonjanja vimue tu linga, ale tu vangula ovina vimue okuti noke tu livela. (Yer. 17:9; Tia. 3:2) Pole, eci tu lula omunu wosimbu, ovituwa kuenda ovilinga ka via sungulukile, ka vi ka tu viala vali. Etu tu ka kala omanu vamue va litepa.—Isa. 55:7; tanga Ovilinga 3:19.

6. Momo lie Yehova a tu lunguila oku siapo ovisimĩlo ka via sungulukile kuenda ovituwa viatiamẽla komunu wosimbu?

⁶ Yehova o tu lungula oco tu siepo ovisimĩlo lovituwa ka via sungulukile, momo eye o tu sole calua kuenda o tu yonguila esanju komuenyo. (Isa. 48:17, 18) Eye wa kũlĩha vana va likolisilako oku yula oloñeyi vĩvi, lavana va likokela ovo muẽle ovitangi kuenda vakuavo. Eye o sumua calua eci a mola ovitangi etu muẽle tu likokela kuenda viomanu vakuavo.

7. Ndomo ca tangiwa ku Va Roma 12:1, 2, ku tu vetiya oku yuvula nye?

⁷ Vamue pokati kakamba vetu kuenda epata pamue kefetikilo va tu tomba omo lioku linga apongoloko kekalo lietu liomuenyo. (1 Pet. 4:3, 4) Ovo pamue va tu sapuila okuti tu kuete elianjo lioku linga eci tu yongola kuenda ka tu ecelela okuti omanu vakuavo va tu sapuila eci tu sukila oku linga. Pole, vana va sinĩla olonumbi via Yehova ka va kuete elianjo. Ovo va  ecelela okuti oluali lua vialiwa la Satana lu pongolola ovisimĩlo viavo. (Tanga Va Roma 12:1, 2.) Vosi yetu tu sukila oku nõla onjila yimue: Nda tu yongola oku amamako lomunu wosimbu, okuti oku pongoluiwa lekandu kuenda oluali lua Satana, ale tu ecelela okuti tu pongoluiwa la Yehova oco tu kale omanu vawa.—Isa. 64:8.

8. Nye ci tu kuatisa oku yuvula ovisimĩlo vĩvi kuenda ovituwa ka via sungulukile?

⁸ Yehova wa kũlĩha okuti cambata otembo lalikolisilo oco tu yuvule ovisimĩlo vĩvi kuenda ovituwa ka via sungulukile. (Osa. 103:13, 14) Pole, Yehova pocakati Condaka yaye, espiritu liaye, ocisoko caye, o tu ĩha olondunge, ongusu kuenda ekuatiso tu sukila oco tu linge apongoloko. Ka kuli atatãhai okuti eye o yongola oku ku kuatisa. Cilo, tu konomuisa ovina vimue o sukila oku linga, oco o lule omunu wosimbu kuenda oku litumbika kepapatiso.

9. Ondaka ya Suku yi ku kuatisa oku linga nye?

⁹ Talavaya Lembimbiliya oco o li konomuise ove muẽle. Ondaka ya Suku yi sokisiwa ndolumuilo; oyo yi ku kuatisa oku limbuka ovisimĩlo viove, upopi wove kuenda ovilinga viove. (Tia. 1:22-25) Manji una wa siata oku ku longisa Embimbiliya kuenda vamanji vakuavo va pama kespiritu, va pondola oku ku ĩha elungulo. Ndeci, ovo va pondola oku kuama Ovisonehua oco va ku kuatise oku limbuka ovituwa viove viwa lovina o sukila oku mioñolola. Ovo va ku kuatisa oku sanga olonumbi Viembimbiliya vieca elungulo ndomo oyuvula ovituwa ka via sungulukile. Kuenje Yehova olonjanja viosi o kuete onjongole yoku ku kuatisa. Eye wa kũlĩha ciwa ekuatiso ove o sukila; wa kũlĩhavo eci ci kasi vutima wove. (Olosap. 14:10; 15:11) Omo liaco, kuata ocituwa coku likutilila kokuaye kuenda oku lilongisa Ondaka yaye eteke leteke.

10. Nye wa lilongisa kulandu wa manji Elie?

¹⁰ Kolela okuti olonumbi via Yehova via velapo. Tu pondola oku kuatisiwa lovina viosi Yehova a tu pinga oku linga. Vana va pokola kolonumbi via Yehova va sumbiwa, va kuete ocimãho komuenyo kuenda esanju liocili. (Osa. 19:7-11) Vana va pembula olonumbi via Yehova, va pondola oku kuata ovitangi vi yilila koku kuama ovilinga vietimba. Kũlĩhĩsa eci ulume umue o tukuiwa Elie a lombolola catiamẽla ku vana va pembula olonumbi via Suku. Eye wa kulila vepata li sole Yehova. Pole, osimbu Elie a kala umalẽhe wa sanda akamba ka va kuete ovituwa viwa. Eye wa fetika oku ambata omuenyo umue ka wa sungulukile okuti mua kongela olodroga, evĩho liukahonga kuenda oku nyana. Elie wa limbuka okuti wa fetika oku kala ukuacinyeñohusa kuenda ongangala. Eye wa popia hati: “Ovina viosi nda longisiwa okuti ka citava Ukristão oku vi linga, ovio nda enda oku linga.” Pole, Elie ka ivaleleko ovina a lilongisa osimbu a kala umalẽhe. Noke, eye wa fetika vali oku lilongisa Embimbiliya. Eye wa sukilile oku likolisilako calua oco a siepo ovituwa ka via sungulukile kuenje kunyamo 2000 wa papatisiwa. Oku pokola kolonumbi via Yehova co kuatisa ndati? Elie wa lombolola hati: “Cilo ñuete ombembua yovutima kuenda owanji wange wovutima u kasi ciwa.” * Ndomo ca lomboluiwa vulandu owu, vana va likala olonumbi via Yehova, va likokela ovo muẽle ohali. Pole, ndaño ndoco Yehova o yongola oku va kuatisa oco va linge apongoloko.

11. Ovina vipi Yehova a suvuka?

 ¹¹ Lilongisa oku suvuka ovina Yehova a suvuka. (Osa. 97:10) Embimbiliya li lombolola okuti, Yehova wa suvuka “ovaso epela, elimi li vangula uhembi kuenda ovaka a pesela osonde yomunu ka kuete eko.” (Olosap. 6:16, 17) Handi vali, eye “o nyãle omanu olongangala kuenda olohembi.” (Osa. 5:6) Yehova wa suvuka ovituwa kuenda ovilinga viaco kuenje eli olio esunga lieci a kunduila olondingaĩvi viosi koloneke via Noha, omo va yukisile ongongo lungangala. (Efet. 6:13) Kũlĩhĩsa ulandu ukuavo. Pocakati cuprofeto Malakiya, Yehova wa popele okuti Eye wa suvuka una o pakula ohueli yaye yina ka yi kuete eko, poku linyãla laye. Suku wa pisa efendelo liavo kuenda wa va sombisa omo liovilinga viavo.—Mal. 2:13-16; Va Hev. 13:4.

12. Nye ci lomboloka oku ‘suvuka eci cĩvi’?

¹² Yehova o yongola okuti tu ‘suvuka eci cĩvi.’ (Va Rom. 12:9) Ondaka oku ‘suvuka,’ yi tiamisiwila kesuvu lia piãla; esuvu lina okuti li kala ndoku yuvula cimue ci koka onyanya. Sokolola ndomo nda wa liyeva nda va kupingile oco olie okulia kumue kuavola. Oku ci sokolola ci pondola oku ku kokela oku vela. Cimuamue haico okuti, oku linga ovina Yehova a suvuka, ci sokisiwa ndocina cimue ci koka onyanya kokuetu.

13. Momo lie tu sukilila oku lava ovisimĩlo vietu?

¹³ Lava ovisimĩlo viove. Ovisimĩlo vietu vi vetiya ovilinga vietu. Eli olio esunga lieci Yesu a tu longisila oku yuvula ovisimĩlo vi tuala koku linga ekandu linene. (Mat. 5:21, 22, 28, 29) Etu tu yongola oku sanjuisa Isietu wokilu. Omo liaco, ci kuete esilivilo lonjanga yalua oku likala ovisimĩlo ka via sungulukile viya vutima wetu!

14. Upopi wetu u situlula nye kuenda apulilo api tu sukila oku tambulula?

¹⁴ Lava upopi wove. Yesu hati: “Ovina vi popiwa lomẽla vi tunda vutima.” (Mat. 15:18) Ovina tu vangula vi situlula calua ovina tua tuwa vutima. Omo liaco, lipula ndoco: ‘Anga hẽ ndi yuvula uhembi, ndaño okuti oku popia ocili ci ñokela ovitangi? Nda ndi hueli anga hẽ ndi yuvula oku linga ocitiokoso lomanu vakuavo? Anga hẽ ndi yuvula olombangulo viuveke? Ndi tambulula hẽ lumbombe eci umue a ndi sapuila ovina vi ndi sumuisa?’ Ove o ka kuatisiwa poku sokolola kapulilo a-a. Upopi wove u pondola oku sokisiwa ndutongelo wuwalo  umue. Nda wa likolisilako oku yuvula akutisasõi, uhembi, olombangulo viuveke, ci ka leluka oku lula omunu wosimbu.

15. Nye ci lomboloka ovituwa vietu viosimbu oku valeliwa kuti?

¹⁵ Nõlapo oku linga cosi citava. Upostolo Paulu wa tukula ocindekaise cimue oco a tu longise okuti ci kuete esilivilo lialua etu oku linga apongoloko komuenyo wetu. Eye wa soneha okuti tu sukila oku valela “ovituwa vietu viosimbu” “kuti.” (Va Rom. 6:6) Volondaka vikuavo, tu yongola oku kuama ongangu ya Kristu. Tu sukila oku yuvula ovituwa kuenda ovilinga vina Yehova a nyãle. Nda tua likolisilako oku kuama ananga a-a, tu ka kuata utima wayela kuenda elavoko liomuenyo ko pui. (Yoa. 17:3; 1 Pet. 3:21) Ivaluka okuti Yehova ka ka pongolola olonumbi viaye oco vi tu sanjuise. Pole, tu sukila oku pongolola eci tua tuwa ndomo ci likuata lolonumbi viaye.—Isa. 1:16-18; 55:9.

16. Momo lie o sukilila oku likolisilako oku yula ahonguo o ketimba?

¹⁶ Likolisilako oku yula ahonguo o ketimba. Noke lioku papatisiwa, ove o ka sukila oku likolisilako oku yuvula oloñeyi vietimba. Kũlĩhĩsa ulandu wulume umue o tukuiwa Maurício. Tunde vumalẽhe, eye wambatele omuenyo woku lipekela la vakuavimatamata vimuamue. Kuenje wa li sanga Lolombangi Via Yehova yu wa fetika oku lilongisa Embimbiliya. Noke lioku linga apongoloko komuenyo waye, wa papatisiwa kunyamo 2002. Ndaño okuti o kasi ale oku vumba Yehova vokuenda kuanyamo alua, Maurício hati: “Oku popia ocili, olonjanja vimue nda siata handi oku liyaka lovilinga evi ka via sungulukile.” Eye ka ecelela okuti elinga liaco liusumuisa. Pole, eye hati: “Ndi lembelekiwa calua oku kũlĩha okuti eci ndi nõlapo oku yuvula ovilinga viaco, ndi sanjuisa Yehova.” *

17. Nye ca ku vetiya vali kulandu wa Nabiha?

¹⁷ Likutilila oku pinga ekuatiso lia Yehova kuenda oku kolela kespiritu liaye, okuti kongusu yove muẽle hakoko. (Va Gal. 5:22; Va Fil. 4:6) Tu sukila oku likolisilako oku lula omunu wosimbu loku yuvula oku sokolola kovituwa viaco. Kũlĩhĩsa ulandu ukãi umue o tukuiwa Nabiha. Isiaye wo yanduluka eci a kuata anyamo epandu. Eye hati, “Eci ca ñokela ohali levalo  lialua.” Osimbu a kala oku kula, wa kala omunu umue ukuakufetuluinya kuenda ukuanyeño yalua. Noke wa fetika oku landisa olodroga kuenje wa kuatiwa kuenda wa kala vokayike anyamo amue. Olombangi Via Yehova via enda oku kunda vokayike via fetika oku lilongisa laye Embimbiliya. Nabiha wa fetika oku linga apongoloko anene. Eye wa popia hati, “ca lelukile oku siapo ovituwa vimue vĩvi nda kuamele. Pole, oku liwekapo oku sipa ka ca lelukile.” Nabiha wa liyaka locitangi caco ci pitahãla unyamo noke wa ci yula. Wa ci linga ndati? Eye wa popia hati, “ca sukilile okuti ndi likutilila ku Yehova oco a ñuatise oku siapo ovituwa viaco.” Cilo, eye o sapuila vakuavo hati: “Nda kolela okuti, nda ame nda linga apongoloko oco ndi sanjuise Yehova, vosi va ci tẽlavo!” *

18. Ndomo ca tangiwa 1 Va Korindo 6:9-11, nye afendeli valua va Suku va tẽla oku yula?

¹⁸ Kocita catete, omanu vana va nõliwile la Yehova oco va ka viale la Kristu, kosimbu va enda oku linga ovina vĩvi. Ndeci, ovo va kala vakuakahokolo, vakuakulipekela la vakuavimatamata vimuamue kuenda ovimunu. Lekuatiso liespiritu sandu lia Suku, ovo va tẽla oku linga epongoloko kovituwa viavo. (Tanga 1 Va Korindo 6:9-11.) Cimuamue haico koloneke vilo, Embimbiliya lia siata oku kuatisa omanu valua oku linga apongoloko kekalo liomuenyo wavo. * Ovo va liwekapo oku linga ovina vĩvi. Ulandu wavo u lekisa okuti, ove o pondolavo oku linga apongoloko kovituwa viove loku papatisiwa.

19. Nye tu ka konomuisa vocipama cikuãimo?

¹⁹ Ndeci ci sukila elikolisilo oku lula omunu wosimbu, vana va yongola oku papatisiwa va sukilavo oku likolisilako oku wala omunu wokaliye. Ocipama ci ka kuamamo, tu ka konomuisa ndomo tu ci linga kuenda ndomo vakuetu va pondola oku tu kuatisa.