Momo lie ulume wa tukuiwa hati, “Angandi” a popela okuti wa laikele oku ‘nyõla’ ocipiñalo caye muẽle nda wa kuelele Ruti? (Ruti 4:1, 6)

Kosimbu, nda ulumue umue ohueli wa fa okuti ka sile omãla, apulilo amue a sukilile oku tambuluiwa a-a: Nye ca laikele oku pita lovipiñalo viaye? Anga hẽ onduko yepata ya ponduile oku nyelela? Ocihandeleko ca eciwile ku Mose ca kuatisa oku tambulula apulilo aco.

Nye ca enda oku pita locipiñalo culume una wa fa, ale una wa linga ohukũi kuenje wa landisa ocipiñalo? Umue pokati ka vamanjeye, ale ukuepata, eye wa laikele oku yovola ocipiñalo caye ale ovisenge viaye. Kuenje epata lia ponduile oku amamako lovisenge viaco.—Ovis. 25:23-28; Ate. 27:8-11.

Nye ca enda oku lingiwa oco onduko yulume wa fa yamameko? Kua enda oku lingiwa olohuela viunawa kuenje oco ca pitavo la Ruti. Ulume umue wa laikele oku likuela lukãi wamanjaye wa fa, oco a cite omõla o ka lukiwa onduko yulume wa fa kuenda oku piñala ovipako viaye. Eliangiliyo liaco lia kuatisavo ovimbumba.—Esin. 25:5-7; Mat. 22:23-28.

Kũlĩhĩsa ulandu wa Naomi. Eye wa kuelele ulume umue o tukuiwa Elimeleke. Eci eye a fa kuenda omãla vaye vavali valume va fa, ka kuakaile vali ulume umue wa ponduile oku tata Naomi. (Ruti 1:1-5) Eci Naomi a tiukila ko Yuda la Ruti ndatembo yaye, wa sapuila Ruti oco a pinge ku Boasi okuti o landa onepa yocipiñalo cavo. Eye wa kala ukuepata lia Elimeleke. (Ruti 2:1, 19, 20; 3:1-4) Pole, Boasi wa limbuka okuti omunu ukuavo ukuepata una Embimbiliya li tukula okuti “Ngandi,” o kuetepo vali omoko yoku kala onjovoli okuti eye ci sule. Kuenje wa kuatele epuluvi lioku nõla tete nda o kala onjovoli ale sio.—Ruti 3:9, 12, 13.

Kefetikilo una wa tukuiwa hati, “Ngandi” wa liecele oku kuatisa. (Ruti 4:1-4) Ndaño okuti mua kongelele ondando yalua, eye wa limbukile okuti Naomi ka lavokaile vali oku kuata omõla una wa laikele oku piñala epia lia Elimeleke. Kuenje onepa yovapia a Elimeleke a laikele oku vokiyiwa kovapia ulume wa tukuiwa hati, Angandi, ci lekisa okuti eye nda wa kuata ovipako vialua.

Pole, una wa tukuiwa okuti Angandi wa pongolola ocisimĩlo caye eci a limbuka okuti wa sukilile oku likuela la Ruti. Eye hati: “Si pondola oku li yovola, oco si ka nyõle ocipiñalo cange.” (Ruti 4:5, 6) Momo lie eye a pongoluila ocisimĩlo caye?

Nda una wa tukuiwa hati Angandi ale omunu ukuavo wa kuelele Ruti, eye wa ponduile oku cita omõla umue kuenje omõlaco wa laikele oku piñala epia lia Elimeleke. Eci hẽ ca laikele oku ‘nyõla’ ndati ocipiñalo ca una wa tukuiwa hati, Angandi? Embimbiliya ka li ci lombolola, pole, olondaka vi kuãimo vi lekisa vimue pokati kolonjila.

• Tete, eye wa laikele oku pumba olombongo nda a landa lavio ovapia a Elimeleke, momo epia liaco ka lia ponduile oku kala liaye. Olio nda lia eciwa komõla a Ruti.

• Vali, eye wa ponduile oku kuata ocikele coku tekula loku tata Naomi kuenda Ruti.

• Tatu, nda Ruti wa kuatele omãla vakuavo lulume o tukuiwa hati Angandi, ovo va ponduile oku litepela ocipiñalo lomãla vakuavo eye a kuatele.

• Kuãla, nda ulume una wa tukuiwa hati Angandi ka kuatele omãla vaye muẽle, omõla a Ruti wa ponduile oku piñala epia lia Elimeleke kuenda lia una wa tukuiwa Ngandi. Kuenje nda eye wa fa, epia liaye lia ponduile oku piñaliwa lomõla umue wambatele onduko ya Elimeleke okuti, yaye muẽle sio. Una wa tukuiwa hati, Angandi ka yonguile oku pumba ocipiñalo caye oco a kuatise Naomi. Eye wa nõlapo oku ecelela okuti ukuavo okuti Boasi, o kuata ocikele caco. Boasi wa ci linga momo wa yonguile okuti “onduko yulume wa fa, ka yi ka take pokati komanu vo volupale.”—Ruti 4:10.

Ci lekisa okuti ulume wa tukuiwa okuti Angandi, wa velisilepo oku kemãlisa onduko yaye kuenda ocipiñalo caye. Eye wa kala omunu umue wa livelisilepo. Ndaño ulume waco wa likolisilako calua oco a teyuile onduko yaye, pole, toke cilo ka tua kũlĩhĩle ulandu waye. Eye wa pumbavo esumũlũho Boasi a tambula lioku kala umue pokati ka vakukululu va Mesiya, Yesu Kristu. Ulume wa tukuiwa okuti Angangi, omo lioku livelisapo wa wa yuvula oku kuatisa umue wa suka.—Mat. 1:5; Luka 3:23, 32.