1-2. Nye ci pita eci omunu umue a papatisiwa kuenda nye ove o sukila oku konomuisa?

 WA SIATA hẽ oku mola ocimunga cimue comanu ci loña kepapatiso? Ove o yeva olondaka viavo violukandi eci va tambulula apulilo avali, osimbu handi ka va papatisiwile. O mola okuti epata kuenda akamba va kala lesanju lialua. Eci vana vapapatisiwa va tunda vovava, ove o yeva olopandu kuenda o mola esanju kovipala viavo. Olosemana viosi valua va eca enanga liaco, loku tumbika omuenyo wavo ku Yehova kuenda papatisiwa oco va linge Olombangi Via Yehova.

² Nye ci popiwa catiamẽla kokuove? Nda o kasi oku sokolola oku papatisiwa, wumunu umue o likasi voluali lulo lua vĩha momo, o kasi oku “sanda Yehova.” (Osa. 14:1, 2) Ocipama cilo, ca pongiyiwila amalẽhe kuenda akulu. Pole, valua pokati ketu tua papatisiwa ale, tu yongola oku pamisa ohuminyo tua linga yoku vumba Yehova otembo ka yi pui. Cilo, tu konomuisa asunga atatu pokati kovina vialua, vieci tu yonguila oku vumba Yehova.

3. Momo lie afendeli va Yehova va solile ocili kuenda esunga? (Osamo 119:128, 163)

³ Yehova wa handeleka afendeli vaye oku sola ocili. (Sak. 8:19) Yesu wa vetiya olondonge viaye oku sanda esunga. (Mat. 5:6) Eci ci lomboloka okuti, tu sukila oku pamisa onjongole yetu yoku linga eci ca sunguluka, eci ciwa kuenda oku pua atondelo kovaso a Suku. O sole hẽ ocili kuenda esunga? Tua kolela okuti oco. Ove wa suvuka uhembi kuenda ovina viosi vĩvi haivio ka via sungulukile. (Tanga Olosamo 119:128,  163.) Omunu wosi o kemba o setukula Satana ombiali yoluali lulo. (Yoa. 8:44; 12:31) Cimue pokati kovimãho via Satana, oku sepula onduko yi kola ya Yehova Suku. Satana wa siata oku sandeka ovohembi atiamẽla ku Suku yetu tunde kesino a lekisa Kedene. Eye wa siata oku vetiya omanu oku sima okuti Yehova Ombiali yimue ukuepela haiye ohembi okuti o tateka omanu kovina viwa. (Efet. 3:1, 4, 5) Ovohembi a Satana atiamẽla ku Yehova a kasi oku amamako oku vetiya omanu oku kuatela Yehova ovisimĩlo vĩvi. Eci omanu va nõlapo oku likala oku “sola ocili” Satana o pondola oku va yapuisila koku linga ovina viosi ka via sungulukile kuenda oku lekisa ovituwa via vĩha.—Va Rom. 1:25-31.

4. Yehova wa siata oku lekisa ndati okuti eye “Suku yocili”? (Talavo ociluvialuvia.)

⁴ Yehova eye “Suku yocili” kuenda locisola calua o longisa ocili ku vana vo sole. (Osa. 31:5) Poku ci linga, eye o va yovola kovohembi a Satana. Yehova o longisavo afendeli vaye oku kala vakuacili kuenda vakuesunga. Eci ci va kuatisa oku liyeva okuti va kuete esilivilo kuenda oku kuata ombembua yo vutima. (Olosap. 13:5, 6) Anga hẽ wa ku ci lingilavo eci wa fetika oku lilongisa Embimbiliya? Ove wa lilongisa okuti olonjila via Yehova via velapo viomanu vosi oku kongelamo viove. (Osa. 77:13) Kuenje ove o yongola oku linga eci Suku a popia okuti, ca sunguluka. (Mat. 6:33) Ove o yongola oku teyuila ocili kuenda oku situlula okuti eci Satana a popia catiamẽla ku Suku yetu Yehova, uhembi. O pondola oku ci linga ndati?

5. O teyuila ndati ocili kuenda esunga?

⁵ Ove o pondola oku nõla ekalo liomuenyo li situlula oku popia okuti: “Ame ndi yuvula ovohembi a Satana loku teyuila ocili. Ndi yongola okuti Yehova o kala Ombiali yange kuenda ndi yongola oku linga eci eye a popia okuti ca sunguluka.” O ci linga hẽ ndati? Sapuila Yehova vohutililo okuti, o likuminya oku u vumba otembo ka yi pui poku papatisiwa. Oku sola ocili kuenda esunga, ci pondola oku ku vetiya oku nõla oku papatisiwa.

6. Osamo 45:4, yi ku ĩha asunga api oku sola Yesu Kristu?

⁶ Momo lie o solile Yesu Kristu? Tala asunga amue awa a sangiwa Kolosamo 45:4. (Tanga.) Yesu wa situlula ocili, umbombe kuenda  esunga. Nda ove o sole ocili kuenda esunga, ci lomboloka okuti o solevo Yesu Kristu. Sokolola ndomo Yesu lutõi walua a teyuila ocili kuenda esunga. (Yoa. 18:37) Yesu wa situlula ndati umbombe?

7. Nye ci tu komõhisa catiamẽla kumbombe wa Yesu?

⁷ Yesu wa lekisa umbombe pocakati covilinga. Ndeci, eye wa eca esivayo liosi ku Isiaye, okuti kokuaye muẽle hakoko. (Mar. 10:17, 18; Yoa. 5:19) O liyeva ndati omo liumbombe wa lekisiwa la Yesu? Ka ci ku vetiya hẽ oku sola Omõla a Suku loku u kuama? Ocili okuti oco. Momo lie Yesu a lekisila umbombe? Momo eye o sole kuenda o setukula Isiaye okuti, embombe. (Osa. 18:35; Va Hev. 1:3) Ka ci ku vetiya hẽ oku amẽla ku Yesu, una o setukula lonjila yimue ya lipua ovituwa via Yehova?

8. Momo lie tu sanjukila Yesu oku kala Osoma yetu?

⁸ Etu tu sole Yesu Ndosoma yetu, momo eye Ombiali ya velapo. Yehova eye muẽle wa pindisa Omõlaye kuenda wo nõla oco a viale. (Isa. 50:4, 5) Sokolola ño ocisola Yesu a lekisa poku lieca olumue. (Yoa. 13:1) Omo okuti Yesu Osoma, o sesamẽla oku u sola. Eye wa lombolola okuti vana vo sole lutima wosi, okuti o va tukula hati akamba vaye, va lekisa ocisola kokuaye poku pokola kovihandeleko viaye. (Yoa. 14:15; 15:14, 15) Kuenje esumũlũho linene oku kala ekamba liocili Liomõla a Yehova!

9. Konepa yipi epapatiso Liakristão limuamue leli lia Kristu?

⁹ Cimue pokati kocihandeleko ca Yesu ceci okuti, olondonge viaye vi papatisiwa. (Mat. 28:19, 20) Kuenje wa sia ongangu. Kolonepa vimue, epapatiso liaye lia litepa leli liolondonge viaye. (Tala okakasia losapi hati, “ Ndomo Epapatiso Lia Yesu Lia li Tepa Lepapatiso Liolondonge Viaye.”) Pole, konepa yimue yi kuete elitokeko. Eci Yesu a papatisiwa wa lieca olumue, oco a linge ocipango ca Isiaye. (Va Hev. 10:7) Cimuamue haico okuti, eci olondonge via Kristu vi papatisiwa, vi lilekisa kowiñi okuti, va tumbika omuenyo wavo ku Yehova Suku. Oku upisa opo, va tiamisila omuenyo wavo koku linga ocipango ca Suku, okuti cavo muẽle hacoko. Poku ci linga, va lekisa okuti va kuãi ongangu ya Cime cavo.

10. Momo lie oku sola Yesu ci tu vetiyila oku papatisiwa?

¹⁰ Ove o tava okuti Yesu eye Omõla wongunga wa Yehova kuenda Osoma Suku a nõla oco a tu viale. Ove wa kũlĩha okuti, Yesu embombe kuenda o setukula Isiaye lonjila yimue ya lipua. Tua siata oku lilongisa okuti eye wa tekula omanu, wa lembeleka vana va sumua kuenda wa sakula vana va vela. (Mat. 14:14-21) Tu letevo ndomo Yesu a songuila ekongelo koloneke vilo. (Mat. 23:10) Handi vali, tua kũlĩhavo okuti o ka linga ovina via velapo kovaso yoloneke, Ndosoma Yusoma wa Suku. O lekisa ndati okuti u sole? Poku kuama ongangu yaye. (Yoa. 14:21) Ocina catete o sukila oku linga oco o kuame ongangu yaye, oku tumbika omuenyo wove ku Yehova kuenda oku papatisiwa.

11. Nye ove nda wa popia okuti olio esunga lia velapo oco omunu a papatisiwe kuenda momo lie?

¹¹ Lipi esunga lia velapo lioku papatisiwa? Yesu wa situlula ocihandeleko ca velapo ca Suku poku popia hati: “Sola Yehova Suku yove lutima wove wosi, lomuenyo wove wosi, lolondunge viove viosi kuenda longusu yove yosi.” (Mar. 12:30) Olondaka evi, vi situlula hẽ ocisola o kuetele Suku?

12. Momo lie o solile Yehova? (Talavo ociluvialuvia.)

¹² Kuli asunga alua oku sola Yehova. Ndeci, ove o kuete elomboloko liokuti, eye ‘ono yomuenyo’ kuenda “ongavelo yosi yiwa lombanjaile  yosi ya lipua,” yi Tunda kokuaye. (Osa. 36:9; Tia. 1:17) Ovina viosi viwa ove wa sanjukila, vi tunda ku Suku yetu ukuacali haiye ukuacisola.

13. Momo lie ocisembi ombanjaile yimue ya velapo?

¹³ Ocisembi ombanjaile yimue ya velapo, Yehova a tu ĩha. Momo lie tu ci popela? Sokolola kukamba uwa Yehova Lomõlaye va likuetele. Yesu hati: ‘Isia o ndi sole’ kuenda “ame ndi sole Isia.” (Yoa. 10:17; 14:31) Ukamba wavo wa pamisiwa calua, vokuenda kuolohuluwa vialua vianyamo. (Olosap. 8:22, 23, 30) Sokolola esumuo Suku a yeva, eci Omõlaye a talisiwa ohali kuenda oku fa. Yehova wa sola calua omanu oku kongelamo ove poku eca Omõlaye o soliwe ndocilumba oco cecelele okuti ove kumue lomanu va kuavo vu kuata omuenyo ko pui. (Yoa. 3:16; Va Gal. 2:20) Eli olio esunga lia velapo tu kuete, lioku sola Suku.

14. Cipi ocimãho ca velapo komuenyo o pondola oku nõla?

¹⁴ Ocisola cove ku Yehova, ca siata oku kula omo okuti wa lilongisa eci catiamẽla kokuaye. Ocili okuti, ove o yongola oku kuata ukamba laye cilo kuenda otembo ka yi pui. Kuenje o pondola oku ci linga. Eye locisola oku vetiya oco o sanjuise utima waye. (Olosap. 23:15, 16) Ove ku pondola lika oku ci linga kolondaka pole, o ci lekisavo kovilinga.  Kekalo liomuenyo wove o ka lekisa okuti o sole Yehova lutima wove wosi. (1 Yoa. 5:3) Eci ocimãho ca velapo komuenyo o pondola oku nõla.

15. O lekisa ndati ocisola cove ku Yehova?

¹⁵ O lekisa ndati ocisola cove ku Yehova? Catete, ove o linga ohutililo yimue yilikasi muna ove o ka tumbika omuenyo wove ku Suku yocili. (Osa. 40:8) Noke elitumbiko lina wa lingila pokolika, o ka lilekisa kowiñi poku papatisiwa. Ndomo tua ci konomuisa kefetikilo liocipama cilo, epapatiso epuluvi limue liesanju, hailio li kuete esilivilo komuenyo wove. Ove o fetika omuenyo wokaliye okuti, ka u tiamẽla vali kokuove, pole, ku Yehova. (Va Rom. 14:8; 1 Pet. 4:1, 2) Eci ci pondola oku molẽha ndu okuti onjila yimue ka ya lelukile oku yi nõla. Pole, eyi onjila yimue ya velapo komuenyo. Ndamupi?

16. Olosamo 41:12, yi tu sapuila nye kueci Yehova a ka lingila vana va eca omuenyo wavo oco vo vumbe?

¹⁶ Yehova eye wa velapo koku lekisa ocali. Eci tu eca ku Yehova ci kale okuti citito, ale calua, pole, eye olonjanja viosi o tu ĩha eci ca velapo. (Mar. 10:29, 30) Eye o ka tu ĩha ekalo liomuenyo uwa, u sanjuisa kuenda hawo wa velapo cilo muẽle voluali lulo luvĩ. Eci efetikilo ño. Ekalo liomuenyo wove li fetikila kepapatiso, ka citava okuti lisulila. Ove o sukila oku vumba Isiove ukuacisola otembo ka yi pui. Ocisola ci kasi pokati kove la Isiove wokilu, ci ka livokiya kuenda ci ka amamako otembo ka yi pui osimbu o kasi lomuenyo.—Tanga Olosamo 41:12.

17. Nye o pondola oku eca ku Yehova okuti eye handi ka ci tambuile kokuove?

¹⁷ Eci o tumbika omuenyo wove ku Suku loku papatisiwa, o kuete esumũlũho lioku eca ocina cimue ca velapo ku Isiove. Eye wa siata oku ku ĩha ovina vialua viwa, apuluvi esanju kuenda ovina vikuavo vi sanjuisa. Kuenje o pondola oku eca kusovoli wilu losi ocina cimue ka tambuile handi kokuove okuti, onjongole yove yoku u vumba kuenda ekolelo liove. (Yovi 1:8; 41:11; Olosap. 27:11) Eyi hẽ hanjilako ya velapo yoku ambata omuenyo wove?  Ocili okuti, ocisola o kuetele Yehova, olio esunga lia velapo lioku papatisiwa.

18. Apulilo api o sukila oku linga?

¹⁸ O tambulula ndati epulilo liokuti, o pondola hẽ oku papatisiwa? Ove lika o sukila oku eca etambululo liaco. Pole, ci pondola oku ku kuatisa oku lipula ove muẽle ndoco, ‘Nye ci nateka oku papatisiwa?’ (Ovil. 8:36) Ivaluka asunga atatu tu kuete tu sukila oku konomuisa. Catete, ove o sole ocili kuenda esunga. Lipula ndoco, ‘Ndi yongola hẽ oku ka mola eteke okuti vosi va ka vangula ocili kuenda oku linga eci ca sunguluka?’ Cavali, ove o sole Yesu Kristu. Lipula ndoco, ‘Njongola hẽ okuti Omõla a Suku o linga Soma yange loku kuama ongangu yaye?’ Catatu okuti oco ca velapo vali, ove o sole Yehova. Lipulavo ndoco, ‘Njongola hẽ oku sanjuisa utima wa Yehova poku u vumba?’ Nda wa tambulula apulilo a-a okuti oco, momo lie ku papatisiwila? Nye ci kasi oku ku tateka?—Ovil. 16:33.

19. Momo lie ku sukilila oku suma suma oco o papatisiwe? Tukula ocindekaise cimue. (Yoano 4:34)

¹⁹ Nda o kasi oku suma suma oco o papatisiwe, kũlĩhĩsa ocindekaise Yesu a tukula. (Tanga Yoano 4:34.) Kũlĩhĩsa okuti Yesu wa sokisa oku linga ocipango ca Isiaye lokulia. Momo lie? Okulia ku tu panga ciwa. Yesu wa kũlĩha okuti ovina viosi Yehova a tu pinga oco tu vi linge, vi tu panga ciwa. Yehova ka yongola okuti ovina tu linga vi tu kokela ovitangi. Anga hẽ Yehova o yongola okuti ove o papatisiwa? Oco. (Ovil. 2:38) Omo liaco, kolela okuti nda wa pokola kocihandeleko coku papatisiwa, o ka kuatisiwa calua. Nda okuti ku suma suma oku lia okulia kumue kuwa, momo lie o sumaila oku papatisiwa?

20. Nye tu ka konomuisa vocipama cikuãimo?

²⁰ Nye ci ku tateka oku papatisiwa? Valua va siata oku tambulula okuti, “Ame handi sia li pongiyile.” Ocili okuti oku litumbika ku Yehova kuenda oku papatisiwa onjila yimue ya velapo o pondola oku nõla. Omo liaco, o sukila oku sokolola lutate catiamẽla konjila yaco kuenda cambata otembo lalikolisilo oco o ci linge. Pole, nda o kuete onjongele yoku papatisiwa, nye o sukila oku linga cilo oco o lipongiye? Tu ka konomuisa etambululo liepulilo eli, vocipama cikuãimo.