NDA okuti o kuete onjongole yoku papatisiwa, wa litumbikila ocimãho cimue cikuete esilivilo lialua. Wa lipongiyila hẽ oku eca enanga liaco cilo? Nda okuti wa ci kolela kuenda akulu vekongelo va ci kolelavo, ku ka sume sume oku ci linga vapuluvi akuavo. Nda wa ci linga, o ka kuata ekalo liwa komuenyo ku pange wa Yehova.

1-2. Nda okuti kua lipongiyile oco o papatisiwe, momo lie ku sukilila oku sumua? (Tala ociluvialuvia.)

² Pole, umue wa ku sapuila hẽ okuti handi o sukila vali oku kula konepa yespiritu osimbu kua papatisiwile? Ale ove muẽle wa limbuka ocitangi caco? Nda oco, ku ka sumue. Ove o pondola oku tẽlisa ocimãho caco ci kuete esilivilo, ci kale okuti umalẽhe, ale ukulu.

3. Nye kalei u Etiopia a pula ku Filipu kuenda epulilo lipi lia votuiwa? (Ovilinga 8:36, 38)

³ Tanga Ovilinga 8:36, 38. Kalei umue wo ko Etiopia wa pula Filipu ukundi hati: “Nye ci nateka oku papatisiwa?” Ocili okuti, ulume u Etiopia wa yonguile oku papatisiwa, pole wa lipongiyilile hẽ oku eca enanga liaco?

4. Ulume u Etiopia wa lekisa ndati okuti wa yonguile oku vokiya ukũlĩhĩso waye?

⁴ Ulume u Etiopia “wa endele oku ka fendela ko Yerusalãi.” (Ovil. 8:27) Citava okuti wa kala omongoloke ya va Yudea, una watava ketavo liava Yudea. Kakuli atatahãi, eye wa lilongisa eci catiamẽla ku Yehova Vovisonehua vikola vio Heveru.  Handi vali, eye wa yonguile oku vokiya ukũlĩhĩso waye. Kuenje eci Filipu a mola ulume waco vonjila, nye a sanga okuti oco ulume waco a kala oku linga? Eye wa kala oku tanga ociña cuprofeto Isaya. (Ovil. 8:28) Eci ca kala ocili Cembimbiliya condongosi. Eye ka yonguile lika oku kũlĩha alongiso atete, wa yonguile oku amamako oku lilongisa.

5. Nye ulume u Etiopia a linga kueci eye a lilongisa?

⁵ Ulume waco wa kala kalei ka Nasoma Kandake wo ko Etiopia, “haeye wa kundikiwa ukuasi waye wosi.” (Ovil. 8:27) Kuenje citava okuti eye wa kala ulume umue wa kuatele ovikele vialua. Pole, wa enda oku sanda otembo yoku fendela Yehova. Eye ka sanjukilile lika ovina a lilongisa; wa ci lekisavo kovilinga. Omo liaco, wa linga ungende walua woku tunda ko Etiopia, oco a ka fendele Yehova vonembele ko Yelusalãi. Citava okuti vungende waco mua sukilile oku sanda otembo, oku pesela olombongo pole, ulume wa likolisilako omo okuti wa yonguile oku fendela Yehova.

6-7. Ocisola ulume u Etiopia a kuatela Yehova camamako ndati oku pama?

⁶ Ulume u Etiopia wa lilongisa ku Filipu ocili cimue cokaliye, muna mua kongelele oku situluiwa kua Mesiya. (Ovil. 8:34, 35) Kalei kaco wa vetiyiwa poku kũlĩha ovina Yesu o lingila. Nye eye a linga noke yoku lilongisa ovina viaco? Eye nda wamamako oku kala omongoloke yimue ya sumbiwa ya va Yudea. Pole, ocisola a kuatela Yehova kuenda Omõlaye ca livokiya. Eye wa vetiyiwa oku nõla onjila yimue yikuete esilivilo komuenyo okuti oku papatisiwa, loku kala ondonge ya Yesu Kristu. Kuenje eci Filipu a limbuka okuti ulume waco wa li pongiyile, wo papatisa.

⁷ Nda wa kuama ongangu yulume u Etiopia, o ka lipongiyila oku papatiswa. O ka tẽlavo oku popia lekolelo okuti, “nye ci nateka oku papatisiwa?” Tu konomuisa ndomo ove o pondola oku linga cimuamue ndeci ulume u Etiopia, okuti wa lilongisa, loku kapako ovina a lilongisa kuenda wa pamisa ocisola a kuatela Suku.

8. Olondaka vi sangiwa ku Yoano 17:3, vi ku vetiya oku linga nye?

⁸ Tanga Yoano 17:3. Olondaka evi via Yesu via ku kuatisa hẽ oku nõlapo oku lilongisa Embimbiliya? Ocili okuti, via kuatisa valua pokati ketu. Anga hẽ olondaka viaco, vi tu sapuilavo oco tu amameko oku lilongisa? Oco. Lalimue eteke tu ka liwekapo oku kuata ‘elomboloko lia Suku yocili.’ (Uku. 3:11) Tu kamamako oku lilongisa otembo ka yi pui. Osimbu tu amamako oku lilongisa, ukamba wetu la Yehova u ka pamisiwa.—Osa. 73:28.

9. Nye tu sukila oku linga noke lioku kuata ukũlĩhĩso wa longiso atete Embimbiliya?

 ⁹ Eci tu fetika oku lilongisa catiamẽla ku Yehova, tu fetika lalongiso atete Embimbiliya. Upostolo Paulu vukanda a sonehela va Heveru, wa sokisa alongiso aco atete “lovina viefetikilo.” Eye ka kaile oku popia okuti “alongiso atete”; ka a kuatele esilivilo, pole, wa lekisa okuti a kala ndasenjele a tekula oñaña. (Va Hev. 5:12; 6:1) Pole, wa vetiyavo Akristão vosi oku kapako alongiso aco atete kuenda oku lilongisa ondongosi ocili Condaka ya Suku. Anga hẽ wa siata oku lekisa onjongole yoku kapako alongiso ondongosi Embimbiliya? O yongola hẽ oku kula konepa yespiritu poku amamako oku lilongisa catiamẽla ku Yehova kuenda kocipango caye?

10. Momo lie komanu vamue ka ca lelukile oku lilongisa?

¹⁰ Ku valua pokati ketu, ka calelukile ou lilongisa. Nye ci popiwa kokuove? Kosikola wa siata hẽ oku lilongisa oku tanga kuenda oku loñoha koku tanga? Ove hẽ o sanjukila oku lilongisa kuenda o limbuka okuti o kasi oku kuata ukũlĩhĩso walua? Ale o sima okuti kua loñolohele poku lilongisa? Nda oco haveko lika. Yehova o pondola oku ku kuatisa. Eye wa lipua kuenda ulongisi wa velapo.

11. Ndamupi Yehova a lekisa okuti “Ulongisi wa Velapo”?

¹¹ Yehova wa li tukula hati, “Ulungisi wove wa Velapo.” (Isa. 30:20, 21) Eye ukuepandi, ukuahenda, haiye Ulongisi wa kapako omanu. Eye o luluvalela kovina vina viwa viomanu eye a longisa. (Osa. 130:3) Yehova ka tu kisika oku linga ovina ka vi kasi vepondolo lietu. Ivaluka okuti eye wa lulika owoño lonjila yimue yi komohĩsa. (Osa. 139:14) Etu tua panguiwa lonjongole yoku lilongisa. Ululiki wetu o yongola okuti, tu amamako oku lilongisa otembo ka yi pui kuenda oku ci sanjukila. Omo liaco, cilo ci kuete eselivilo oku ‘livela’ ocili Cembimbiliya. (1 Pet. 2:2) Litumbikila ocimãho o pondola oku tẽlisa kuenda kuama esokiyo lioku tanga loku lilongisa Embimbiliya eteke leteke. (Yeh. 1:8) Lesumũlũho lia Yehova o ka sanjukila oku tanga loku lilongisa vali calua catiamẽla kokuaye.

12. Momo lie tu sukilila oku lilongisa catiamẽla komuenyo wa Yesu kuenda kupange waye woku kunda?

¹² Sanda otembo yoku sokolola catiamẽla komuenyo wa Yesu kuenda kupange waye woku kunda. Ci kuete esilivilo oku setukula Yesu nda tu yongola oku vumba Yehova, capiãla enene kotembo yilo yovitangi. (1 Pet. 2:21) Yesu wa sapuila kolondonge viaye hati, via laikele oku liyaka lovitangi. (Luka 14:27, 28) Eye wa kolelele okuti olondonge viaye viocili vi kamamako lekolelo, ndeci eye a linga. (Yoa. 16:33) Lilongisa ovina viatiamẽla komuenyo wa Yesu kuenda kuata ovimãho vioku u setukula komuenyo wove weteke leteke.

13. Nye o sukila oku amamako oku pinga ku Yehova kuenda momo lie?

¹³ Oku lilongisa lika wove ka ci tẽla. Momo o sukila oku kuata ukũlĩhĩso, oco o lilongise vali catiamẽla ku Yehova loku kuata ovituwa ndeci, oku u sola kuenda oku lekisa ekolelo kokuaye. (1 Va Kor. 8:1-3) Osimbu wamamako oku lilongisa, pinga ku Yehova oco a ku kuatise oku kuata vali ekolelo. (Luka 17:5) Eye locisola calua o tambulula olohutililo viaco. Ekolelo liocili lina lia kunamẽla ku kũlĩhĩso wa Suku yetu, u ka kuatisa oku amamako oku kula konepa yespiritu.—Tia. 2:26.

14. Upostolo Petulu wa tukula ndati esilivilo lioku kapako ovina tu lilongisa? (Talavo ociluvialuvia.)

¹⁴ Upostolo Petulu wa lekisa okuti ci kuete esilivilo olondonge via Kristu oku amamako oku kapako ovina va lilongisa. Eye wa tukula  ulandu Wembimbiliya watiamẽla ku Noha. Yehova wa sapuilile Noha okuti pocakati cetande, wa laikele oku nena enyõleho komanu vakuesino vokoloneke viaye. Ocili, oku kũlĩha okuti kua laikele okuiya etande, haicoko lika nda ca yovola Noha kuenda epata liaye. Ivaluka okuti Petulu poku tukula olondaka viaco wa vi tiamisilile kotembo “osimbu ocimbaluku ca kala oku tungiwa.” (1 Pet. 3:20) Ocili okuti Noha kumue lepata liaye va kuama olonumbi va tambuile ku Suku poku tunga ocimbaluku cinene. (Va Hev. 11:7) Petulu wa sokisa ovina Noha a linga lepapatiso poku soneha ndoco: “Ulandu owu ondimbukiso yimue yepapatiso li kasivo oku vu popeli cilo.” (1 Pet. 3:21) Kuenje tu pondola oku sokisa upange o kasi oku linga cilo, poku lipongiyila epapatiso lupange Noha a linga kumue lepata liaye vokuenda kuanyamo alua poku tunga ocimbaluku. Upange upi ove o sukila oku linga oco o lipongiyile epapatiso?

15. Voku likekembela lutima wosi mua kongela nye?

¹⁵ Ocina catete tu sukila oku linga, oku likekembela akandu etu lutima wosi. (Ovil. 2:37, 38) Oku likekembela lutima wosi ci tu kuatisa oku linga apongoloko. Wa liwekapo hẽ oku linga ovina ka vi sanjuisa Yehova, ndeci evĩho liukahonga, oku sipa kuenda upopi ka wa sungulukile? (1 Va Kor. 6:9, 10; 2 Va Kor. 7:1; Va Efe. 4:29) Nda handi kua ci lingile likolisilako oku linga apongoloko. Sapela lomunu o ku longisa Embimbiliya, ale pinga kakulu vekongelo ekuatiso kuenda onumbi. Nda handi umalẽhe kuenda o kasi lolonjali viove, pinga ekuatiso kokuavo oco o siepo ovituwa ka via sungulukile vina vi pondola oku ku tateka oku papatisiwa.

16. Nye ca kongela voku kuata esokiyo liwa konepa yespiritu?

¹⁶ Ci kuetevo esilivilo oku kuata esokiyo liwa konepa yespiritu. Vesokiyo liaco, mua kongela oku endaenda kolohongele loku panga onepa kokuavio. (Va Hev. 10:24, 25) Eci o litumbika kupange woku kunda likapelako oku ci linga olonjanja viosi. Osimbu o litumbika kupange waco woku popela ovimuenyo viomanu o ka kuata esanju. (2 Tim. 4:5) Nda handi umalẽhe kuenda o kasi lolonjali viove lipula ndoco: ‘Olonjali viange vi sukila hẽ oku njivaluisa oco ngende kolohongele ale  kupange woku kunda? Ale ame muẽle ndi ci sokolola?’ Nda o ci linga, o lekisa ekolelo, ocisola kuenda olopandu ku Yehova Suku. ‘Ovilinga viaco vioku sumbila Suku,’ ovio ombanjaile ove eca ku Yehova. (2 Pet. 3:11; Va Hev. 13:15) Ombanjaile yosi tu eca lutima wosi okuti ka yi kisikiwa yi sanjuisa Suku yetu. (Sokisa 2 Va Korindo 9:7.) Etu tu ci linga momo tu yongola oku eca eci ca velapo ku Yehova.

17-18. Ocituwa cipi ci kuete esilivilo ci pondola oku kuatisa oku kula konepa yespiritu toke kepapatiso kuenda momo lie? (Olosapo 3:3-6)

¹⁷ Osimbu amamako oku kula konepa yespiritu toke kepapatiso, o ka liyaka lovitangi vialua. Omanu vamue va ka ku pembula omo liekolelo liove, oku ku suvuka, ale oku ku lambalala. (2 Tim. 3:12) Pamue o likolisilako oku siapo ovituwa wa kũlĩha okuti ka via sungulukile, pole, olonjanja vimue o linga vali ovina viaco. Ale pamue o pua epandi kuenda o sumua omo ocimãho cove ka ci kasi oku tẽlisiwa. Nye ci ku kuatisa oku pandikisa? Ocituwa ci pondola oku kuatisa, oku sola Yehova.

¹⁸ Ocisola o kuetele Yehova ocituwa cimue ca posoka, okuti oco ocina ca velapo o kuete. (Tanga Olosapo 3:3-6.) Ocisola capama o kuetele Suku ci ku kuatisa oku pandikisa kovitangi. Embimbiliya olonjanja viosi li tukula ocisola ka ci pongoloka Yehova a kuetele afendeli vaye. Ocisola ka ci pongoloka ci lomboloka okuti Yehova lalimue eteke a ka yanduluka afendeli vaye, ale oku liwekapo oku va sola. (Osa. 100:5) Ove wa lulikiwa lesatahãlo lia Suku. (Efet. 1:26) O setukula ndati ocisola caco?

19. O lekisa ndati olopandu kovina viosi Yehova a siata oku ku lingila? (Va Galatia 2:20)

¹⁹ Fetika loku lekisa olopandu. (1 Va Tes. 5:18) Eteke leteke lipula ndoco, Yehova wa siata oku lekisa ndati ocisola kokuange? Noke eca olopandu ku Yehova vohutililo yove, poku tukula ovina a siata oku ku lingila. Limbuka okuti Yehova wa siata oku linga ovina viwa kokuove omo eye oku sole, ndeci upostolo Paulu a limbuka catiamẽla ku Yehova. (Tanga Va Galatia 2:20.) Lipula ndoco, ‘Njongola hẽ oku lekisa kokuaye okuti ndu u sole?’ Ocisola o kuetele Yehova ci ka ku kuatisa oku tamalãla kayonjo kuenda oku pandikisa kovitangi. Eci ci ka ku kuatisa oku amamako oku vumba Yehova, loku lekisa ku Isiove okuti u sole eteke leteke.

20. Nye ca kongela voku tumbika omuenyo wove ku Yehova kuenda momo lie onjila yaco ya velelapo?

 ²⁰ Vokuenda kuotembo ocisola o kuetele Yehova ci ka ku vetiya oku linga ohutililo yimue yilikasi. Ove o ka litumbika ku Suku. Ivaluka okuti eci o litumbika ku Yehova, o kuata elavoko limue liwa okuti oku tiamẽla kokuaye otembo ka yi pui. Eci o tumbika omuenyo wove ku Yehova o likuminya kokuaye oku u vumba kotembo yiwa kuenda kotembo yovitangi. Lalimue eteke o ka sukila vali oku linga ohuminyo yaco. Ocili okuti, eci tu litumbika tua nõla onjila yimue yi kuete esilivilo lialua. Kũlĩhĩsa okuti o ka nõla olonjila vialua komuenyo, vimue pokati kavio viwa, pole, lalimue eteke o ka nõla onjila ya lisoka leyi yoku tumbika omuenyo wove ku Yehova. (Osa. 50:14) Satana o ka seteka oku honguisa ocisola o kuetele Isiove, loku lavoka okuti o liwekapo oku amamako oku lekisa ekolelo. Ku ka ecelele okuti Satana oku yula! (Yovi 27:5) Ocisola capama o kuetele Yehova ci ka ku kuatisa oku amamako lohuminyo yove yoku vumba Yehova otembo ka yi pui loku amela vali ku Isiove wokilu.

21. Momo lie tu popela hati, epapatiso esuliloko pole, efetikilo?

²¹ Noke lioku tumbika omuenyo wove ku Yehova, sapela lakulu vo vekongelo o kasi catiamẽla kenanga likuavo li kuete esilivilo. Olonjanja viosi ivaluka okuti epapatiso esuliloko, pole efetikilo. Efetikilo lioku tumbika omuenyo wove koku vumba Yehova. Omo liaco, cilo pamisa ocisola o kuetele Yehova. Litumbikila ocimãho coku pamisa ocisola cove eteke leteke. Kuenje ci ka ku vetiya oku papatisiwa. Eteke liaco li ka kala liesanju lialua. Pole, eci efetikilo ño. Ocisola o kuetele Yehova kuenda Omõlaye ci ka amamako oku kula otembo ka yi pui!