OCIPAMA CELILONGISO 14
“Poku ci Linga, Vosi va ka Limbuka Okuti Vulondonge Viange”
“Poku ci linga, vosi va ka limbuka okuti vulondonge viange, nda wa lisoli pokati.”—YOA. 13:35.
OCISUNGO 106 Kuati Ocisola
OVINA TU LILONISA a
Nye omanu valua vana okuti Halombangiko Via Yehova va sima, eci va mola ocisola ci kasi pokati kafendeli va Yehova? (Tala ocinimbu 1)
1. Nye omanu va siata oku limbuka eci va enda kolohongele vietu onjanja yatete? (Talavo ociluvialuvia.)
SOKOLOLA kohueli yimue yenda Vonjango Yusoma Yolombangi Via Yehova onjanja yatete. Ovo va komõha calua onjila ndomo va yoleliwa kuenda ocisola vamanji va li kuetele pokati. Noke lioku tiukila konjo ukãi o sapuila kulume waye hati, ‘omanu ava va litepa lomanu tua siata oku sanga, ame nda sola oku kala lavo.’
2. Nye ca siata oku kokela vamue ocilondokua?
2 Ocisola afendeli va Yehova va li kuetele cimue ci likasi. Pole, Olombangi Via Yehova ka via lipuile. (1 Yoa. 1:8) Osimbu tu kũlĩha vamanji vekongelo, tu ka limbukavo a kulueya avo. (Va Rom. 3:23) Ci sumuisa calua oku limbuka okuti, vamue va siata oku ecelela okuti akulueya a vakuavo ku va kokela ocilondokua.
3. Nye ci situlula olondonge viocili via Yesu? (Yoano. 13:34, 35)
3 Tala vali osapi yocipama cilo. (Tanga Yoano 13:34, 35.) Nye ci situlula olondonge viocili via Kristu? Ocisola, oku lipua hakoko. Limbuka okuti Yesu ka popele hoti, ‘Poku ci linga, vu ka limbuka okuti vulondonge viange.’ Eye hati: “Poku ci linga, vosi va ka limbuka okuti vulondonge viange.” Yesu wa lekisa okuti olondonge viaye havioko lika via lakeile oku limbuka olondonge viaye viocili, pole, la vana okuti Halombangiko Via Yehova va ponduilevo oku limbuka olondonge viocili poku lisola pokati.
4. Nye vamue va yongola oku kũlĩha catiamẽla Kakristão vocili?
4 Vamue okuti Halombangiko Via Yehova pamue va pula ndoco: “Ocisola ci tu kuatisa ndati oku limbuka olondonge viocili via Yesu? Yesu wa lekisa ndati ocisola kovapostolo vaye? Ci tẽliwa ndati oku setukula ongangu ya Yesu koloneke vilo?” Vana okuti Olombangi Via Yehova ciwavo oku sokolola katambululo apulilo a-a. Oku ci linga ci ka tu kuatisa oku lekisa ocisola cocili, ca piãla enene poku liyaka la kulueya a vakuetu.—Va Efe. 5:2.
MOMO LIE OCISOLA OYO LIKA ONJILA YOKU LIMBUKA OLONDONGE VIOCILI VIA YESU?
5. Lombolola olondaka via Yesu vi sangiwa ku Yoano 15:12, 13.
5 Yesu wa lombolola okuti olondonge viaye vi ka lisola pokati lonjila yimue yi likasi. (Tanga Yoano 15:12, 13.) Ivaluka okuti Yesu wa handeleka hati: ‘Lisoli pokati ndeci ame ndo soli.’ Eci ci lomboloka nye? Ndomo Yesu a ci popia, ocisola caco ci vetiya Ukristão oku fila manjaye nda ci sukiliwa. b
6. Ondaka ya Suku yi lekisa ndati esilivilo liocisola?
6 Ondaka ya Suku yi tu longisa okuti, ocisola ci kuete esilivilo lialua. Omanu valua, vimue pokati kovinimbu Viembimbiliya va sole vali vievi: “Suku eye ocisola.” (1 Yoa. 4:8) “Sola u o lisungue love ndeci o lisole ove muẽle.” (Mat. 22:39) “Ocisola ci tuvika akandu alua.” (1 Pet. 4:8) “Ocisola lalimue eteke ci tokoka.” (1 Va Kor. 13:8) Ovinimbu evi kuenda vikuavo, vi situlula okuti ci kuete esilivilo lialua oku lekisa ocisola okuti ocituwa cimue ca posoka calua.
7. Momo lie Satana ka tẽlela oku longisa omanu oku lisola pokati kuenda oku likuata omunga?
7 Omanu valua vapula vati: “Tu limbuka ndati etavo liocili? Atavo osi a popia okuti a longisa ocili, pole, etavo letavo li longisa ocina ca litepa catiamẽla ku Suku.” Satana wa siata oku luvikiya atavo alua esanda, kuenje ca siata oku tateka omanu oku limbuka etavo liocili. Pole, eye lalimue eteke a ka kongela omanu vomunga yimuamue loku lisola pokati. Yehova eye lika o pondola oku ci linga. Etu tua ci kũlĩha momo ocisola cocili ci tunda ku Yehova kuenje vana va kuete espiritu lia Suku kuenda asumũlũho aye, ovo lika va pondola oku lisola pokati. (1 Yoa. 4:7) Eli olio esunga lieci Yesu a popele hati, ocisola cocili oco ca laikele oku situlula olondonge viaye viocili.
8-9. Valua va siata oku vetiyiwa ndati locisola va mola pokati Kolombangi Via Yehova?
8 Ndomo Yesu a ci popele, valua va siata oku limbuka olondonge viocili via Yesu, omo lioku lekisa ocisola komunu lukuavo. Ndeci, manji umue o tukuiwa Ian, ivaluka onjanja yatete a endele kohongele yimue yofeka yina ya lingiwa kocila ca kala ocipepi lonjo yaye. Pole, kolosãi via pita wa endele kocila caco oku ka tala omapalo yimue. Ekalo liomanu a sanga kohongele yofeka, lia litepele leli liomanu va kala oku tala olomapalo kocila. Eye hati: “Olombangi Via Yehova via li yelisile via wala ciwa kuenda omãla vavo ka va kaile oku linga ombuanja.” Yu wamisako hati: “Omanu vaco va molẽhele okuti va sanjuka kuenda va kuete ombembua yina nda yonguile komuenyo wange. Si ivaluka ohundo la yimue ya lingiwa keteke liaco, pole, ekalo Liolombangi Via Yehova lia ndi komõhisa calua.” c Ocili okuti, ekalo liaco onima yi tunda kocisola cocili tu li kuetele pokati. Kuenje omo lioku sola vamanji tu va tata lohenda kuenda lesumbilo.
9 Manji umue o tukuiwa John wa liyevavo ndoco eci a endele kohongele yekongelo onjanja yatete, eye hati: “Nda komõhele calua ukamba wa kala pokati kavo kuenda nda simĩle okuti ovo va lipua. Ocisola cavo cocili ca mbetiya oku tava okuti nda sanga etavo liocili.” d Ulandu owu lovolandu alua akuavo, uvangi wokuti Olombangi Via Yehova ovo Akristão vocili.
10. Epuluvi lipi tu kuete lioku lekisa ocisola cocili ku vamanji? (Talavo etosi.)
10 Ndomo tua ci komuisa ale kefetikilo, lomue pokati ka vamanjetu wa lipua. Vapuluvi amue va ka popia ale oku tu linga ovina vi tu sumuisa. e (Tia. 3:2) Eci ovina viaco vi pita, tu kuete epuluvi lioku lekisa ocisola cocili kovina tu popia levi tu linga. Oco hẽ nye tu lilongisila kongangu Yesu a tu sila?—Yoa. 13:15.
YESU WA LEKISA NDATI OCISOLA KOLONDONGE VIAYE?
Yesu wa lekisa ocisola kovapostolo vaye ndaño muẽle ceci va linga ovina vialua ka via sungulukile (Tala ovinimbu 11-13)
11. Ocituwa cipi ka ca sungulukile Tiago la Yoano va lekisa? (Talavo ociluvialuvia.)
11 Yesu ka lavokaile oku lipua kolondonge viaye. Pole, locisola wa va kuatisa oku linga apongoloko kovituwa viavo ka via sungulukile, oco va taviwe la Yehova. Vepuluvi limue, ovapostolo vavali okuti Tiago la Yoano, va sapuila ku inavo oco a pinge ku Yesu oku eca kokuavo omangu ya velapo Vusoma. (Mat. 20:20, 21) Tiago la Yoano va lekisa okuti vakuepela kuenda va yonguile oku lekisa okuti va velapo vakuavo.—Olosap. 16:18.
12. Anga hẽ Tiago la Yoano ovo lika va lekisa ocituwa ka ca sungulukile? Ci lombolola.
12 Eci Tiago la Yoano va lekisa ocituwa ka ca sungulukile, havoko lika va ci linga. Kũlĩhĩsa ocituwa ovapostolo vakuavo va lekisa: “Eci olondonge vikuavo ekũi via ci yeva, via funguila vamanjaco vavali.” (Mat. 20:24) Tu sokololi ndomo Tiago la Yoano va kala oku lihoya lovapostolo vakuavo. Citava okuti ovapostolo vakuavo va popia ndoco: ‘Vusima hẽ okuti ene wa velipo okuti etu tu sule poku pinga omangu ya velapo Vusoma? Haneko lika wa siati oku talavaya la Yesu. Letuvo tu sesamẽlavo oku tambula omangu yaco yilikasi!’ Cosi va popia ale va linga vepuluvi liaco, ovapostolo va ecelela okuti ocitangi caco vepuluvi limue cinyola ombembua ya kala pokati kavo.
13. Ocituwa cipi Yesu a lekisa omo liahonguo ovapostolo vaye? (Mateo 20:25-28)
13 Nye Yesu a linga? Eye ka va tẽmelele. Ka popele okuti ndi sanda ovapostolo va velapo, alume vana okuti ambombe haivo va litata locisola. Pole, Yesu wa va tata lepandi momo wa kũlĩhĩle okuti ovo va yongola oku linga eci ca sanguluka. (Tanga Mateo 20:25-28.) Eye wamamako oku va tata locisola, ndaño okuti ka ya kaile onjanja yatete ale onjanja ya sulako ovapostolo oku lihoyisa u wa velelepo pokati kavo.—Mar. 9:34; Luka 22:24.
14. Vekalo lipi ovapostolo va Yesu va kulila?
14 Yesu wa ivaluka okuti ovituwa ovapostolo va kula lavio via ponduile oku va yapuisa. (Yoa. 2:24, 25) Ovo va kulila kovitumãlo vina okuti asongui vatavo va popaile vati, omunu o kuata lika esilivilo nda o kuete oluhimo kuenda ocikele cimue ca velapo. (Mat. 23:6; sokisa lovideo losapi hati, Primeiros Assentos na Sinagoga Vembimbiliya lielilongiso ketosi lia Mateo 23:6.) Asongui vetavo va li tendaile okuti va velapo vakuavo. f (Luka 18:9-12) Yesu wa kũlĩhĩle okuti ocituwa caco ca ponduile oku yapuisa ovisimĩlo viovapostolo konjila ndomo va lakiele oku tenda vakuavo. (Olosap. 19:11) Eye ka lavokaile okuti olondonge viaye lalimue eteke vi kalueya, pole, wa lekisa epandi ka kulueya avo. Yesu wa kũlĩhĩle okuti ovo va kuatele ovitima via sunguluka kuenje lepandi wa va kuatisa oku kala ambombe kuenda oku lekisa ocisola okuti ka va li velisapo.
TU SETUKULA NDATI ONGANGU YA YESU?
15. Nye tu lilongisila kulandu mua kongela Tiago kuenda Yoano?
15 Tu pondola oku lilongisila calua vulandu mua kongela Tiago kuenda Yoano. Ovo va lueya poku pinga ocikele cimue ca velapo Vusoma. Pole, ovapostolo vakuavo va lueyavo poku ecelela okuti, ocitangi caco ci nyõla omunga ya kala pokati kavo. Yesu watata ovapostolo 12 lohenda kuenda locisola. Ceci tu lilongisilako. Ocina ca velapo haceciko lika omanu vakuavo va linga, pole, ndomo tu tendavo akulueya avo kuenda ahonguo. Nye ci pondola oku tu kuatisa? Eci tu sumuisiwa lamanji umue, tu sukila oku lipula ndoco: Momo lie eci a ndinga ca ndi sumuisila calua? Eci hẽ ci situlula ocituwa cimue ka ca sungulukile ndi sukila oku linga apongoloko? Anga hẽ omunu wa ndi sumuisa o kasi oku liyaka locitangi cimue? Nda okuti ñuete esunga lioku temela omunu waco, mondola hẽ oku lekisa ocisola poku wecela? Eci tu lekisa okuti tu li sole pokati, tu lekisa okuti tu londonge viocili via Yesu.
16. Nye tu lilongisila kulandu wa Yesu?
16 Ulandu wa Yesu u tu longisa okuti tu sukila oku likolisilako oku kũlĩha vamanjetu. (Olosap. 20:5) Yesu wa ponduile oku kũlĩha eci ci kasi vutima womunu, pole, etu sio. Kuenje tu sukila oku lekisa epandi eci vamanji va tu lueyela. (Va Efe. 4:1, 2; 1 Pet. 3:8) Ci ka leluka oku ci linga nda tua sanda oku va kũlĩha ciwa. Kũlĩhĩsa ulandu umue.
17. Manji ukuakunyula akongelo wa kuatisiwa ndati poku kũlĩha ciwa manji umue?
17 Manji umue ukuakunyula akongelo kutakelo wo Afrika, ivaluka manji umue ukuacinyeñohusa. Manji ukuakunyula akongelo wo tendele ndati? Eye hati: “Ame sia yuvuile oku kala lamanji yaco, pole, nda nõlapo oku u kũlĩha ciwa.” Eci manji ukuakunyula akongelo a sanda otembo yoku kala lamanji yaco, co kuatisa oku kũlĩha ndomo manji a kula kuenda ndomo ocituwa caco co kokela oku tata vakuavo lonjila yaco. Manji ukuakunyula wamisako ndoco: “Eci nda kuata elomboloko ndomo manji alikolisilako oku yula ekalo liaye lio kosimbu kuenda apongoloko a sukila oku linga, ca ñomohisa calua. Kuenje tua linga akamba vawa.” Eci tu likolisilako oku kũlĩha ciwa vamanjetu ci ka leluka oku lekisa ocisola kokuavo.
18. Apulilo api tu sukila oku linga etu muẽle eci manji umue a tu lueyela? (Olosapo 26:20)
18 Pamue tu kuata onjonjongole yoku sapela lamanji wa tu sumuisa. Catete tu sukila ku lipula etu muẽle ndoco: Ñuete hẽ elomboloko lia suapo lieci ca pita? (Olosap. 18:13) ‘Eye hẽ wa yonguile muẽle oku ndi sumuisa?’ (Uku. 7:20) Nda siatavo hẽ oku lueyela vakuetu? (Uku. 7:21, 22) Nda nda ka sapela lomunu catiamẽla kocitangi caco, ci ka votola hẽ ovitangi vikuavo? (Tanga Olosapo 26:20.) Eci tu sanda otembo yoku konomuisa apulilo a-a, tu ka limbuka okuti ocisola ci tu vetiya oku liwekapo oku sokolola ovina va tu linga.
19. Nye wa nõlapo oku linga?
19 Olombangi Via Yehova vi lekisa okuti olondonge viocili via Yesu poku lisola pokati. Etu tu lekisa okuti tu londonge viocili via Yesu eci tu lekisa ocisola ku vamanjetu ndaño lakulueya avo. Eci tu lekisa ocisola, tu kuatisa omanu oku limbuka etavo liocili kuenda oku likongela kokuetu koku fendela Yehova, Suku yocisola. Omo liaco, tu nõlipo oku amamako oku lekisa ocisola, okuti oco ci situlula Akristão vocili.
OCISUNGO 17 “Nda Panga”
a Omanu valua va siata oku vetiyiwa oku lilongisa catiamẽla ku Yehova kuenda ondaka yaye, omo liocisola cocili va limbuka kokuetu. Omo okuti ka tua lipuile, pamue ci tĩla oku lisola pokati. Tu konomuisi esunga lieci ocisola ci kuetele esilivilo kuenda ndomo tu setukula ongangu ya Yesu eci vakuetu va tu lueyela.
b Tala elivulu losapi hati, ‘Linga Ondonge Yange’ ocipama 17, ocinimbu 10-11.
c Tala ocipama losapi hati, Finalmente, Minha Vida Tem Objetivo, Vutala Wondavululi 1 ya Kuvala yunyamo 2012, kam. 13-14
d Tala ocipama losapi hati, “Omuenyo wange wa molẽhele ndu okuti wa kala uwa,” Vutala Wondavululi 1 ya Kupemba yunyamo 2012, kam. 18-19.
e Ocipama cilo ka ci lombolola akandu anene a sukila oku tetuluiwa lakulu vekongelo, ndeci ana a tukuiwa 1 Va Korindo 6:9, 10.
f Ulandu u lekisa okuti: “Noke liotembo yimue ulongisi umue wa popele okuti valuali alume vana okuti vakuesunga nda Avirahama, ka va pitahãla eci cisoka akũi atatu. Nda pali cisoka akũi atatu, ame lomõlange tu vamue pokati kavo; nda pali ekũi, ame lomõlange tu vamue pokati kavo; nda pali vatãlo, ame lomõlange tu vamue pokati kavo; nda pali vavali, ame lomõlange, nda pali umosi, umosi waco ame.”
