1. Momo lie Yehova a lulikila oviendalomuenyo?

KUA kala otembo yimue Yehova a kala lika liaye. Pole, eye ka li yevele okuti wa kambela cimue, momo Yehova wa sokapo kolonepa viosi. Pole, eye wa yonguile okuti ku kala oviendalomuenyo vikuavo kuenda vi kuata esanju. Omo liocisola, Yehova wa fetika oku lulika oviendalomuenyo.—Osa. 36:9; 1 Yoa. 4:19.

2. Yesu kuenda ovangelo va liyeva ndati eci Yehova a lulika ovina vikuavo?

² Tete, Yehova wa lulika omõlaye Yesu, oco a talavaye laye. Pocakati ca Yesu, “ovina viosi via lulikiwa,” oku kongelamo olohuluwa viovangelo. (Va Kol. 1:16) Yesu wa sanjukilile oku talavaya la Isiaye. (Olosap. 8:30) Ovangelo va sanjukilevo. Ovo va mola eci Yehova kumue lomesele yaye Yesu, va lulika ilu longongo. Ovangelo va liyeva ndati? Citava okuti, ovangelo “voluila onjolela” osimbu Yehova a kala oku lulika ongongo kuenda ovo vamamako oku ci linga olonjanja viosi Yehova a mala oku lulika ociluvo lociluvo. Ovangelo va sanjukile vali calua eci va mola oku lulikiwa kuomunu okuti oco ociluvo ca sulako haico ci kuete esilivilo pokati koviluvo vikuavo. (Yovi 38:7; Olosap. 8:31) Ociluvo lociluvo ci situlula ocisola ca Yehova kuenda olondunge.—Osa. 104:24; Va Rom. 1:20.

3. Ndomo ca tangiwa kukanda 1 Va Korindo 15:21, 22, ocilumba cocisembi ca Yesu ca ecelela oku linga nye?

³ Yehova wa yonguile okuti omanu va kala lomuenyo otembo ka yi pui vocitumãlo cimue ca posoka eye a lulika. Pole, eci Adama la Eva va sinĩla Isiavo ukuacisola, ekandu kuenda olofa  via lisanduila komanu vosi. (Va Rom. 5:12) Yehova wa tetulula ndati ocitangi caco? Vepuluvi liaco, Yehova wa linga eliangiliyo lioku yovola omanu. (Efet. 3:15) Eye wa ponduile oku eca Omõlaye Yesu, ndocilumba cocisembi kuenje ca ecelela okuti omãla vosi va Adama la Eva va yovuiwa kekandu kuenda kolofa. Kuenje lonjila eyi, omunu lomunu wa ponduile oku nõla nda o vumba Yehova oco a tambule omuenyo ko pui.—Yoa. 3:16; Va Rom. 6:23; tanga 1 Va Korindo 15:21, 22.

4. Apulilo api a ka tambuluiwa vocipama cilo?

⁴ Ohuminyo yepinduko yi votola apulilo amue. Ndeci, ndamupi epinduko pamue li ka lingiwa? Tu ka tẽla hẽ oku limbuka vangandietu kuenda akamba, eci va ka pinduiwa? Esanju lipi tu ka kuata omo liepinduko? Kuenda epinduko li tu longisa nye catiamẽla kocisola, kolondunge kuenda kepandi lia Yehova? Tu konomuisa apulilo aco.

5. Momo lie tu popela okuti omanu ka va ka pinduiwa vepuluvi limuamue?

⁵ Yehova voluali luokaliye pocakati Comõlaye Yesu, o ka pindula olohuluwa viomanu. Pole, tu pondola oku tava okuti vana va fa, ka va ka pinduiwa vepuluvi limuamue. Momo lie? Momo nda ca lingiwa vepuluvi limuamue voluali luokaliye mu kala ombuanja. Yehova lalimue eteke a linga cimue lonjila yimue ka ya sokiyiwile ciwa. Eye wa kũlĩha okuti oco ku kale ombembua, ovina vi sukila oku sokiyiwa ciwa. (1 Va Kor. 14:33) Osimbu Yehova a kala oku talavaya la Yesu oku lulika ilu longongo, wa lekisa olondunge kuenda epandi; Yehova wa pongiya ongongo kamue kamue osimbu ka lulikile omanu. Yesu o ka lekisavo ovituwa ndevi via Isiaye, eci eye a ka songuila omanu vana va ka puluka ko Harmagedo, osimbu va posuisa ongongo oco va yolele vana va ka pinduiwa.

6. Ndomo ca tangiwa Kovilinga 24:15, omanu vapi vakuavo va ka pinduiwavo la Yehova?

 ⁶ Vana va ka puluka ko Harmagedo, va ka sukila oku linga ocina cimue ci kuete esilivilo okuti, oku longisa vana va ka pinduiwa, catiamẽla Kusoma wa Suku kuenda eci ca tiamẽla kolonumbi viaye. Momo lie ci ka sukilila oku ci linga? Momo onepa yalua yomanu va ka pinduiwa vana okuti “havakuesungako.” (Tanga Ovilinga 24:15.) Ovo va ka sukila oku linga apongoloko alua, oco va kuatisiwe locilumba cocisembi ca Kristu. Sokolola upange wa kongelamo woku longisa ocili catiamẽla ku Suku kolohuluwa viomanu ka va kuete ukũlĩhĩso wa Yehova. Anga hẽ omunu lomunu o ka kuata ulongisi umue ndeci ci lingiwa kalilongiso Embimbiliya koloneke vilo? Anga hẽ vana va ka pinduiwa va ka tiamẽla kakongelo amue kuenda va ka pindisiwa oco va longise vana va ka pinduiwa noke? Tu sukila oku talamẽla. Eci tua kũlĩha ceci okuti, kesulilo Liohulukãi Yanyamo Yuviali wa Kristu, ‘kilu lieve ku ka yuka ukũlĩhĩso wa Yehova.’ (Isa. 11:9) Tu ka kuata upange walua woku linga vokuenda kuohulukãi yanyamo, pole, upange waco u ka tu sanjuisa!

7. Momo lie afendeli va Suku va ka lekisila epandi poku longisa vana va ka pinduiwa?

⁷ Vokuenda Kuohulukãi Yanyamo Yuviali wa Kristu, afendeli vosi va Yehova va kamamako oku linga apongoloko oco va linge ovina viu sanjuisa. Lonjila eyi, vosi yavo va ka lekisa epandi poku longisa vana va ka pinduiwa, omo va kũlĩha okuti ci sukila alikolisilo alua oku pongolola ovisimĩlo ka via sungulukile kuenda oku kapako olonumbi via Yehova. (1 Pet. 3:8) Ocili okuti, vosi vana va ka pinduiwa va ka sanjukila oku panga onepa kafendeli ambombe va Yehova okuti, va ka likolisilako ‘oku linga eci ci koka epopelo liavo.’—Va Fil. 2:12.

8. Asunga api tu kuete oku tava okuti tu ka tẽla oku limbuka vangandietu kuenda akamba vana va ka pinduiwa?

⁸ Kuli asunga alua oku tava okuti, tu ka tẽla oku limbuka vangandietu kuenda akamba vana va ka pinduiwa. Ndomo ca pita lapinduko a lingiwa kosimbu, citava okuti Yehova o ka pindula omanu ndomo va tuwile osimbu va kala komuenyo okuti, va ka kuata etimba, upopi kuenda ovisimĩlo vimuamue. Ivaluka okuti, Yesu wa sokisa olofa lotulo kuenda wa sokisa epinduko loku pasuka kotulo. (Mat. 9:18, 24; Yoa. 11:11-13) Eci omunu umue a pasuka kotulo, omunu waco ka pongoloka, eye o pasuka letimba limuamue. Kũlĩhĩsa ulandu wa Lasaru. Eci a fa wa kala oloneke vikuãla veyambo, etimba liaye lia futile ale. Pole, ndaño ndoco, eci Yesu o pindula, vamukãi vaye haico vo limbuka kuenda Lasaru wa va limbukavo.—Yoa. 11:38-44; 12:1, 2.

9. Momo lie vana va ka pinduiwa ka va tiuka lovisimĩlo kuenda etimba lia lipua?

⁹ Yehova wa likuminya okuti voluali luokaliye, lomue o ka popia hati: “Ndi vela.” (Isa. 33:24; Va Rom. 6:7) Vosi vana va ka pinduiwa va ka tambula etimba limue li kuete uhayele. Pole, ovo handi ka va ka lipua vepuluvi liaco. Nda oco ca kaile, apata lakamba vavo, nda ka va tẽlele oku va limbuka. Citava okuti, vokuenda Kuohulukãi Yanyamo Yuviali wa Kristu, oku lipua kuomanu ku ka lingiwa kamue kamue. Kuenje kesulilo liohulukãi yanyamo Yesu o ka eca Usoma ku Isiaye. Eci ci ka lekisa okuti Usoma wa Suku wa tẽlisa ale ocimãho calio, oku kongelamo oku lipua kuomanu.—1 Va Kor. 15:24-28; Esit. 20:1-3.

10. Ove o liyeva ndati omo liepinduko?

¹⁰ Seteka oku sokolola ndomo ci ka kala oku  yolela ngandiove ale ekamba lina wa solele calua. Anga hẽ o ka lila, ale o ka yolela omo liesanju? O ka imba hẽ ovisungo oco o pandule Yehova? Kolela okuti, epinduko li ka vokiya ocisola o kuetele Yehova la Yesu. Nda ka ca kaile ocisola kuenda ohenda ovo va tu kuetele, lalimue eteke nda tua tambula ombanjaile eyi yi komõhisa.

11. Ndomo ca tangiwa ku Yoano 5:28, 29, vana va ka pokola kolonumbi viesunga via Suku nye ci ka pita lavo?

¹¹ Sokolola esanju vana va ka pinduiwa va ka kuata, osimbu va ka siapo kamue kamue ovituwa viosimbu loku fetika oku kuama olonumbi via lipua via Suku! Vana va ka tava oku linga apongoloko aco, va ka pindukila omuenyo. Kuenje vana va ka sinila Suku, ka va ka tẽla oku nyõla ombembua yi ka kala Voluali Luokaliye.—Isa. 65:20; tanga Yoano 5:28, 29.

12. Yehova o ka sumũlũisa ndati omanu va ka kala palo posi?

¹² Eci Usoma wa Suku u fetika oku viala oluali luosi, afendeli vosi va Suku va ka mola oku tẽlisiwa kuolondaka Violosapo 10:22, kuna ku popia hati: “Esumũluho lia Yehova li muisa ukuasi, hailio ka li vokiya vali ohali.” Lekuatiso liespiritu lia Suku, afendeli vaye va ka kuata ekalo liwa kespiritu kuenda va ka amamako oku kuata esetahãlo ndeli lia Kristu kuenje va ka lipua. (Yoa. 13:15-17; Va Efe. 4:23, 24) Eteke leteke, omanu va ka kuata uhayele ketimba kuenda ongusu. Ekalo li ka kala ciwa! (Yovi 33:25) Anga hẽ oku sokolola kepinduko, ci pondola oku tu kuatisa cilo?

13. Ndomo ca lekisiwa Kosamo 139:1-4, ndamupi epinduko li lekisa okuti Yehova wa kũlĩha ciwa omunu lomunu pokati ketu?

¹³ Ndomo tua ci konomuisa ale, eci Yehova a ka pindula omanu, eye o ka eca ovisimĩlo kuenda etimba limuamue ovo va kuata osimbu ka va file. Sokolola kueci eci ci lomboloka. Omo okuti Yehova oku sole, eye wa kapako ovisimĩlo viove viosi, ndomo o liyevite, ovina o popia, levi o linga kuenda eye ivaluka ovina viaco. Handi vali, nda Yehova wa ku pindula, ci leluka kokuaye oku tumbulula ovisimĩlo, ekalo kuenda etimba liove. Soma Daviti wa limbukile okuti Yehova wa kũlĩha ciwa oku tuwa kuomunu lomunu pokati ketu. (Tanga Osamo 139:1-4.) Nye tu pondola oku lilongisa poku limbuka okuti Yehova wa tu kũlĩha ciwa?

14. Momo lie ci kuetele esilivilo oku sokolola okuti Yehova wa tu kũlĩha ciwa?

¹⁴ Oku sokolola okuti Yehova wa tu kũlĩha ciwa, ci tu kuatisa oku yuvula oku sakalala. Momo lie? Ivaluka okuti Yehova wa ku kapako calua. Eye o tu tenda okuti tu kuete esilivilo lialua. Yehova wa kũlĩha ovina viosi o lipita lavio komuenyo, havio vi situlula ekalo liove. Ku tava hẽ okuti oku ci kũlĩha ci lembeleka? Lalimue eteke ka tu ka simi okuti tu kasi ulika. Eteke olio eteke, Yehova o kasi letu kuenda o yongola oku tu kuatisa.—2 Asa. 16:9.

15. Ndamupi elavoko liepinduko li situlula olondunge via Yehova?

¹⁵ Usumba wolofa, u pondola oku kala onjanjo yimue yinene. Omanu vana va kasi oku songuiwa la Satana, va kuama onjanjo yaco oco va saluise akamba vavo, ale oku va vetiya oku siapo alongiso avo. Pole, onjanjo yaco ka yi tu saluisa. Etu tua kũlĩha okuti, nda ovanyãli vetu va tu ponda, Yehova o pondola oku tu pindula. (Esit. 2:10) Tua kolela okuti omanu vaco lalimue eteke va ka tẽla oku tu tepa ku Yehova. (Va Rom. 8:35-39) Yehova wa lekisa olondunge poku tu ĩha elavoko liepinduko! Yehova wa nyõla yimue pokati kolonjanjo  via Satana pocakati cepinduko kuenje wa tu ĩha ekuatiso limue lia koka oco li tu teyuile, ekuatiso liaco: utõi wapama.

16. Apulilo api tu sukila oku linga etu muẽle kuenda atambululo aco a pondola oku tu kuatisa ndati oku vokiya ekolelo lietu ku Yehova?

¹⁶ Nda ovanyãli va Yehova va ku lipañela oku ku ponda, o liyeva ndati? O ka kolela hẽ ku Yehova kuenda kohuminyo yaye yoku ku pindula? Onjila yimue yoku kũlĩha ndomo ekolelo liove li kasi, poku lipula ndoco: ‘Anga hẽ ndaño kovina vitito ndi lekisa okuti nda kolela ku Yehova?’ (Luka 16:10) Epulilo likuavo lieli: ‘Ekalo liomuenyo wange lieca hẽ uvangi wokuti, nda nda sanda tete Usoma, Yehova o ka nyĩha ovina ndi sukila?’ (Mat. 6:31-33) Nda etambululo liove kepulilo eli oco, eci ci lekisa okuti ove wa kolela ku Yehova kuenda o ka tẽla oku pandikisa koloseteko viosi o ka liyaka lavio.—Olosap. 3:5, 6.

17. (a) Ndamupi epinduko li lekisa okuti Yehova ukuepandi? (b) Tu lekisa ndati olopandu kepandi lia Yehova?

¹⁷ Yehova wa sokiya ale eteke lowola a ka nena enyõleho lioluali lulo lũvi. (Mat. 24:36) Eye ka ka lekisa ekambo liepandi, okuti o nena enyõleho osimbu eteke liaco ka lia pitĩlile. Ndaño okuti Yehova o kuete onjongole yalua yoku pindula vana va fa, eye amamako oku lekisa epandi. (Yovi 14:14, 15) Eye o kasi oku talamẽla otembo ya sunguluka yoku ci linga. (Yoa. 5:28) Ocili okuti epandi lia Yehova li tu longisa ovina vialua. Sokolola ño handi: Omo liepandi lia Yehova, omanu valua oku kongelamo etu, tu kuete otembo yoku “likekembela.” (2 Pet. 3:9) Yehova o yongola okuti omanu valua va kuata epuluvi lioku tambula omuenyo ko pui. Omo liaco, tu sukila oku lekisa okuti tua sanjukila epandi liaye. Ndamupi tu ci linga? Poku likolisilako oku sandiliya “vakuotima wa sungulukila omuenyo ko pui” kuenda oku va kuatisa oku sola Yehova loku u vumba. (Ovil. 13:48) Lonjila eyi, ovo va ka kuatisiwa lepandi lia Yehova, ndeci etu.

18. Momo lie tu sukilila oku lekisa epandi ku vakuetu?

¹⁸ Yehova wa kũlĩha okuti tu ka lipua lika kesulilo liohulukãi yanyamo. Omo liaco, toke otembo yaco yi pitĩla, eye o ka lekisa epandi kuenda o ka sanjukila oku ecela akandu etu. Omo liaco, tu sukila oku sanda eci ciwa ku vakuetu kuenda oku lekisa epandi kokuavo. Kũlĩhĩsa ulandu wa manji umue ukãi. Ulume waye wa fetika oku kuata esumuo lialua kuenje wa liwekapo oku endaenda kolohongele.  Manji wa popia hati: “Ocitangi eci ca tĩlile calua kokuange. Omuenyo wetu wa pongoloka vocipikipiki kuenda ka tua ponduile vali oku linga ovina viosi tua yonguile.” Ndaño lovitangi viaco, manji wamamako oku lekisa epandi kulume waye. Eye wa kolelele ku Yehova kuenda ka liwekelepo oku u vumba. Ndeci ci linga Yehova, eye ka luluvalele kovitangi, pole, wa tiamisila utima kovina viwa ulume waye a enda oku linga. Manji wamisako hati: “Ulume wange o kuete ovituwa vi komõhisa kuenda o kasi oku likolisilako kamue kamue oco a yule ocitangi caye.” Ulandu owu u lekisa okuti, ci kuete esilivilo oku lekisa epandi ku vangandietu, ale ku vamanji vekongelo vana va kasi oku likolisilako oku yula ovitangi viavo!

19. Nye tua nõlapo oku linga?

¹⁹ Yesu kuenda ovangelo va yolela calua eci ongongo ya lulikiwa. Kaliye, sokolola esanju ovo va ka kuata eci ongongo yi keyuka lomanu va sole Yehova loku u vumba. Sokololavo esanju va ka kuata vana vopiwa palo posi oco va ka viale la Yesu kilu poku mola okuti upange wavo u kasi oku kuatisa omanu palo posi. (Esit. 4:4, 9-11; 5:9, 10) Handi vali, sokolola oku kala voluali muna okuti asuelẽla a tunda kevalo, kuvei, kesumuo kuenda kolofa ka vi kasiko vali. (Esit. 21:4) Omo liaco, osimbu eteke liaco ka lia pitĩlile, tu nõlipo oku setukula ocisola, olondunge kuenda epandi lia Yehova. Nda tua ci linga, esanju lietu li kamamako oku livokiya, ndaño okuti tu liyaka lovitangi. (Tia. 1:2-4) Ocili okuti, tu sanjukila calua oku eca olopandu ku Yehova omo a tu likuminya okuti, “ku laika oku kala epinduko”!—Ovil. 24:15.