1. Esumũlũho lipi tu kuete?

ETU tu kuete esumũlũho limue linene, lioku tiamẽla vekongelo lia Yehova! Etu tu kasi vocumbo celau konepa yespiritu, muna mu sangiwa omanu vakuambembua haivo va sanjuka. Ocitumãlo cipi o kuete vekongelo?

2. Ocindekaise cipi upostolo Paulu a tukula vovikanda vimue a soneha?

² Tu pondola oku lilongisila calua kocindekaise cimue ci sangiwa vovikanda vimue via sonehiwa lupostolo Paulu. Vovikanda viaco Suku a vetiya Paulu oku soneha, eye wa sokisa ekongelo letimba liomunu. Kuenda wa sokisavo omunu lomunu vekongelo locimatamata cimue cetimba.—Va Rom. 12:4-8; 1 Va Kor. 12:12-27; Va Efe. 4:16.

3. Ovina vipi vitatu vi kuete esilivilo tu konomuisa vocipama cilo?

³ Vocipama cilo, tu konomuisa ovina vitatu vi kuete esilivilo tu lilongisa kocindekaise Paulu a tukula. Catete, tu lilongisa okuti omunu lomunu pokati ketu o kuete ocitumãlo * cimue vocisoko ca Yehova. Cavali, tu lilongisa eci tu sukila oku linga, nda tu sima okuti ka tu kuete esilivilo vekongelo. Catatu, tu lilongisa esunga lieci tu sukilila oku likolisilako oku tẽlisa ocikele Suku a tu ĩha vekongelo.

4. Ukanda ku Va Roma 12:4, 5, u tu longisa nye?

⁴ Ocina catete, tu lilongisa kocindekaise ca Paulu, ceci okuti omunu lomunu pakati ketu o kuete ocitumãlo cimue ci kuete esilivilo vekongelo lia Yehova. Paulu o fetika ocindekaise caye poku popia hati: “Ndeci etu tu kuete etimba limosi lovimatamata vialua, pole, ovimatamata viaco ka vi lingi upange umuamue, haico, ndaño tualua haimo tutimba limuamue vu Kristu kuenda tuvimatamata vi likuatisa pokati.” (Va Rom. 12:4, 5) Nye Paulu a yonguile oku popia? Eye wa yonguile oku popia okuti, omunu lomunu pokati ketu o kuete ocikele cimue ca litepa vekongelo, pole, vosi yetu tu kuete esilivilo.

5. “Olongavelo” vipi Yehova a eca oco vi tate ekongelo?

⁵ Poku tukula vana va kuete ocitumãlo cimue vekongelo, citava okuti utima wove u tiamisiwila ku vana va kuete ocikele coku songola. (1 Va Tes. 5:12; Va Hev. 13:17) Ocili okuti, Yehova pocakati ca Yesu, wa eca “olongavelo komanu” oco va tate ekongelo liaye. (Va Efe. 4:8) Pokati ‘kolongavelo [viaco] viomanu,’ mua kongela vana va panga onepa Kosungu Yolombangi Via Yehova, oloñuatisi viavo, vamanji vatiamẽla Kocisoko Cakulu vo Filiale, vamanji vakuakunyula akongelo, alongisi volosikola viocisoko, akulu vekongelo kuenda oloñuatisi viekongelo. Vamanji vosi ava, va nõliwa lespiritu sandu oco va tate olomeme via Yehova kuenda oku pamisa ekongelo.—1 Pet. 5:2, 3.

6. Ndomo ca tangiwa ku 1 Va Tesalonike 2:6-8, vamanji vana va nõliwa lespiritu sandu, alikolisilo api va siata oku linga?

⁶ Vamanji alume, va nõliwa lespiritu sandu oco va tẽlise ovikele vialua vekongelo. Ndeci ovaka, olomahi kuenda olonepa vikuavo vietimba, vi talavayela kumosi oco vi kuatise etimba liosi, vamanji vaco va likolisilako calua oco va kuatise ekongelo. Ovo ka va ci lingila oco va komõhiwe, pole, va likolisilako oco va kuatise kuenda oku pamisa vamanjavo vekolelo. (Tanga 1 Va Tesalonike 2:6-8.) Tu pandula calua Yehova omo lioku tu ĩha vamanji vaco va loñoloha kespiritu haivo va likolisilako!

7. Asumũlũho api vamanji va kasi kupange wakundi votembo yosi va siata oku tambula?

⁷ Vekongelo mu sangiwavo vana okuti va nõliwa oku kala olomisionaliu, akundi valikasi, ale akundi vasokamo. Ocili okuti, vamanji valua alume lakãi koluali luosi, vomuenyo wavo wosi va nõlapo oku kunda loku longisa omanu ndakundi votembo yosi. Lonjila eyi, vamanji vaco va pondola oku kuatisa omanu valua, oco va linge olondonge via Kristu Yesu. Ndaño okuti vamanji vaco ka va kuete ovipako vialua, Yehova eca kokuavo asumũlũho alua. (Mar. 10:29, 30) Etu tua kapako calua vamanji vaco va soliwe kuenda tu pandula omo lioku tiamẽla vekongelo!

8. Momo lie akundi valua volondaka viwa va kuetele esilivilo ku Yehova?

⁸ Anga hẽ vamanji va kuete ovikele kuenda vana va kasi kupange wakundi votembo yosi, ovo lika va kuete ocitumãlo cimue vekongelo? Sio! Akundi vosi volondaka viwa, va kuete esilivilo ku Suku kuenda vekongelo. (Va Rom. 10:15; 1 Va Kor. 3:6-9) Tu sukila oku ivaluka okuti ocimãho ca velapo vekongelo, oku longisa omanu oco va linge olondonge via Ñala yetu, Yesu Kristu. (Mat. 28:19, 20; 1 Tim. 2:4) Vosi va kasi vekongelo, cikale akundi va papatisiwa kuenda vana ka va papatisiwile, vosi yavo va likolisilako oku pitisa kovaso upange woku kunda vomuenyo wavo.—Mat. 24:14.

9. Momo lie vamanjetu akãi va kuetele esilivilo lialua?

⁹ Yehova eca kakãi ocitumãlo cimue cesumbilo vekongelo. Eye wa kapako calua  vamanji vosi akãi, cikale vana vakuele, vaina, ovimbumba kuenda vana ka vakuelele okuti va likolisilako oku u vumba lekolelo. Ovisonehua vi tukula ovolandu alua akãi vana okuti va enda oku sanjuisa Suku. Ovo va ivalukiwa omo lioku lekisa ongangu yavo yiwa yolondunge, yekolelo, yombili, yutõi, yoku kala vakuacali kuenda yovilinga viwa. (Luka 8:2, 3; Ovil. 16:14, 15; Va Rom. 16:3, 6; Va Fil. 4:3; Va Hev. 11:11, 31, 35) Ocili okuti, tu pandula calua Yehova omo lia vamanji akãi va sangiwa vakongelo tu kasi okuti, va siatavo oku lekisa ovituwa viwa ndevi!

10. Momo lie vamanji vana va kuka va kuetele esilivilo kokuetu?

¹⁰ Tu kuetevo esumũlũho linene lioku kala la vamanji va kuka vakongelo tu kasi. Vamanji vamue va kuka alume lakãi, va tumbika omuenyo wavo wosi kupange wa Yehova. Pole, vamue ndopo va fetika oku lilongisa ocili. Citava okuti vamanjetu vana va kuka, va kasi oku liyaka locitangi cuhayele omo lioku kuka. Ovitangi viaco, vi pondola oku tepulula ovina va yongola oku linga vekongelo kuenda kupange woku kunda. Ndaño ndoco, ovo va likolisilako oku linga ovina vi kasi vepondolo liavo kupange woku kunda kuenda va linga cosi ci tava, oco va lembeleke loku pindisa vakuavo! Kuenje tu pondola oku lilongisa calua kulandu womuenyo wavo. Ocili okuti vamanji vana va kuka, va tendiwa okuti va posoka kovaso a Yehova kuenda kokuetu!—Olosap. 16:31.

11-12. Ndamupi wa siata oku liyeva omo liongangu yamalẽhe vekongelo o kasi?

¹¹ Sokololavo kamalẽhe vetu. Ka ca lelukile kokuavo oku kala voluali lumue lua vialiwa la Satana, Eliapu, haimo mue yuka alongiso omanu. (1 Yoa. 5:19) Ndaño ndoco, tu pamisiwa calua eci tu mola amalẽhe oku eca atambululo kolohongele, oku kunda loku teyuila lutõi ovina va tava. Omo liaco, ene amalẽhe limbuki okuti vu kuete ocitumãlo cimue cilikasi vekongelo lia Yehova!—Osa. 8:2.

¹² Pole, ku vamanji vamue alume lakãi, ca va tĩlila oku tava okuti va kuete esilivilo vekongelo. Nye ci pondola oku kuatisa omunu lomunu  pokati ketu oku limbuka okuti o kuete ocitumãlo cimue vekongelo? Tu ci kũlĩhĩsi.

13-14. Momo lie vamue va simila okuti ka va kuete esilivilo vekongelo?

¹³ Kũlĩhĩsa ocina cavali tu lilongisila kocindekaise ca Paulu. Eye o tukula ocitangi cimue ca siata pokati komanu valua koloneke vilo ndeci: ocitangi coku sima okuti ka va kuete esilivilo vekongelo. Paulu wa soneha hati: “Nda omahi yi popia yiti, ‘Omo okuti hameko eka, sia tiamẽlele ketimba,’ eci ka ci lekisa okuti oyo ka ya tiamẽlele ketimba. Nda etũi li popia liti, ‘Omo okuti hameko iso, sia tiamẽlele ketimba,’ eci ka ci lekisa okuti olio ka lia tiamẽlele ketimba.” (1 Va Kor. 12:15, 16) Nye Paulu a yonguile oku popia?

¹⁴ Oku sanda oku lisokisa la vakuene vekongelo, ci pondola oku ku tateka oku limbuka esilivilo ove o kuete. Vekongelo o kasi citava okuti muli vamanji vamue va siata oku litunda ciwa koku longisa, koku ongotiya ciwa ovina, ale koku pamisa vakuavo. Ove pamue o sima okuti, lalimue eteke o ka tẽla oku litunda ciwa ndeci ovo. Oku sima ndoco hacĩviko, ci lomboloka okuti ove o lekisa umbombe kuenda wa liketisa. (Va Fil. 2:3) Pole, lekisa utate. Nda olonjanja viosi o lisokisa la vana va loñoloha vekongelo, o ka likokela ove muẽle esumuo. Ndeci Paulu a lombolola ale, ove o pondola oku sima okuti ku kuete esilivilo vekongelo. O pondola oku yula ndati ovisimĩlo viaco?

15. Ndomo ca tangiwa ku 1 Va Korindo 12:4-11, nye tu sukila oku limbuka catiamẽla kolongavelo tu kuete?

¹⁵ Kũlĩhĩsa ño handi: Yehova wa eca Kakristão vamue vo kocita catete olongavelo vioku linga ovikomo lunene wespiritu sandu, pole, havosiko Akristão va tambula olongavelo viaco. (Tanga 1 Va Korindo 12:4-11.) Yehova wa eca kokuavo olongavelo kuenda ovoloño a litepa, pole, eye wa kapeleko ukristão lukristão. Koloneke vilo, ka tu tambula vali olongavelo vioku linga ovikomo lunene wespiritu sandu. Pole olonumbi viaco vi pondola oku tu kuatisavo. Ocili okuti ka tu kuete olongavelo  vimuamue, pole, ndaño ndoco vosi yetu tu kuete esilivilo kovaso a Yehova.

16. Elungulo lipi Paulu a tukula tu sukila oku kapako?

¹⁶ Tu sukila oku yuvula oku lisokisa la vakuetu kuenje tu kapako elungulo liupostolo Paulu liokuti: “Omunu lomunu a kũlĩhise ovilinga viaye muẽle kuenje o kuata esunga lioku sanjuka, haloku lisokisako lomunu ukuavo.”—Va Gal. 6:4.

17. Tu pondola oku kuatisiwa ndati, poku kapako elungulo lia Paulu?

¹⁷ Nda tua kapako onumbi yupostolo Paulu loku kũlĩhĩsa ovilinga vietu, tu ka limbuka okuti tu kuetevo olongavelo kuenda ovoloño a likasi. Ndeci, ukulu umue wekongelo citava okuti ka loñolohele calua koku linga olohundo, pole, pamue wa loñoloha calua koku longisa omanu oco va linge olondonge. Ale, pamue ka tẽla oku ongotiya ciwa ovina ndeci ci linga akulu vakuavo, pole, citava okuti eye wa kũlĩhiwa ndukulu umue wekongelo ukuacisola kuenda wa lianja okuti vamanji ka va kuata ohele yoku pinga kokuaye elungulo limue Liembimbiliya. Ale, citava okuti o kuete ocituwa ciwa coku yekisa akombe. (Va Hev. 13:2, 16) Eci tu likolisilako oku limbuka ovoloño etu lolongavelo tu kuete, tu ka tẽla oku liyeva ciwa. Tua limbuka okuti tu pondola oku kuatisa calua vekongelo. Kuenje eci ci ka tu kuatisa oku yuvula oku kuatela onya vamanji vana va kuete olongavelo via litepa levi vietu.

18. Nye ci tu kuatisa oku loñoloha kupange woku kunda?

¹⁸ Ocikele cosi tu kuete vekongelo, vosi pokati ketu tu sukila oku likolisilako oku mioñolola upange wetu kuenda uloño tu kuete. Kuenje Yehova o tu kuatisa oku ci tẽlisa. Pocakati cocisoko caye o tu ĩha epindiso limue liwa. Ndeci, kohongele yo vokati kosemana, etu tu tambula olonumbi ndomo tu pondola oku loñoloha kupange woku kunda. O kasi hẽ oku likolisilako oku kapako olonumbi viosi wa siata oku tambula?

19. Nye ci pondola oku ku kuatisa oku iñila Kosikola Yakundi Vusoma?

¹⁹ Epindiso likuavo liwa, lia siata oku eciwa Kosikola Yakundi Vusoma. Vamanji vosi alume lakãi, vana okuti va kasi kupange wakundi votembo yosi kuenda va kuete eci ci soka 23 toke 65 kanyamo, va pondola oku iñila kosikola yaco. Ove pamue o sima okuti lalimue eteke o ka tẽla oku iñila kosikola yaco. Yuvula oku soneha ulala wovina vi pondola oku ku tateka oku iñila kosikola yaco, pole, soneha ulala wovina vi pondola oku ku vetiya oku iñila kosikola yaco. Noke, likolisilako oku linga ovina vi ku kuatisa oku tẽlisa ocimãho cove. Kuenje lekuatiso lia Yehova kuenda alikolisilo ove, ocimãho cina wa simĩle okuti lalimue eteke o ka ci tẽla, o ka limbuka okuti ci tẽliwa.

20. Nye tu lilongisa kolondaka vi sangiwa ku Va Roma 12:6-8?

²⁰ Ocina catatu tu lilongisa kocindekaise ca Paulu, ci sangiwa ku Va Roma 12:6-8. (Tanga.) Yimue vali onjanja Paulu o lekisa okuti, vana va kasi vekongelo va kuete olongavelo via litepa. Pole, cilo o lombolola okuti tu sukila oku talavaya lolongavelo tu kuete oco tu kuatise loku pamisa ekongelo.

21-22. Nye tua lilongisa kulandu wa manji Robert kuenda wa manji Felice?

²¹ Kũlĩhĩsa ulandu wa manji umue tu tukula okuti, Robert. Noke lioku talavaya kofeka yikuavo, eye wa lalekiwa oku talavaya ko Betele vofeka a citiwila. Ndaño okuti eye wa kũlĩhĩle okuti epongoloko ka lia lingiwile omo liocina cimue cĩvi a linga, manji Robert wa popia hati: Ovisimĩlo ka via sungulukile nda kuata viokuti si kuete esilivilo, via amamako vokuenda  kuolosãi vialua. Olonjanja vimue nda simĩle oku siapo o Betele. Eye wa kuata vali ndati esanju? Ukulu umue wekongelo wa ivaluisa manji Robert okuti kocikele cosi Yehova a tu ĩha kosimbu, ca kala oku tu pongiyila ocikele tu kuete cilo. Manji Robert wa limbuka okuti wa sukilile oku liwekapo oku sokolola kocikele a kuatele kosimbu kuenda oku tiamisila utima kovina a ponduile oku linga cilo.

²² Manji Felice Episcopo, wa pitavo locitangi cimuamue. Eye kumue lukãi waye va pita kosikola yo Gileada kunyamo wo 1956 kuenda va kala kupange woku nyula akongelo ko Bolivia. Kunyamo wo 1964 va cita omõla umue wulume. Manji Felice wa popia hati: “Ka ca lelukile oku siapo ocikele tua solele calua. Ndi limbuka okuti nda pita unyamo umosi lesumuo. Pole lekuatiso lia Yehova nda pongolola ovisimĩlo viange kuenje nda tava ocikele cange cokaliye coku kala isia.” Anga hẽ, o sangiwa vekalo ndeli lia manji Robert, kuenda lia Felice? Anga hẽ wa sumua omo okuti cilo ku kuete ocikele ndeci wa kuatele kosimbu? Nda eci oco ocitangi cove, pongolola ovisimĩlo viove kuenda oku tiamisila utima kovina o pondola oku linga cilo, oco o vumbe Yehova loku kuatisa vamanji. Kala ukuambili, poku talavaya lolongavelo viove kuenda uloño oco o kuatise vakuene. Nda wa ci linga esanju liove li ka livokiya kuenda o pamisa ekongelo.

23. Tu sukila oku sanda otembo yoku linga nye kuenda apulilo api tu ka konomuisa vocipama cikuãimo?

²³ Omunu lomunu pokati ketu, o kuete esilivilo kovaso a Yehova. Eye o yongola okuti tu tiamẽla kocisoko caye. Nda tua sanda otembo yoku sokolola konjila ndomo tu pamisa vamanji loku likolisilako oku tẽlisa ciwa ocikele Yehova a tu ĩha, tu ka limbuka okuti tu kuete ocitumãlo cimue vekongelo! Pole nye ci popiwa catiamẽla ku vamanji vakuavo vekongelo? Tu lekisa ndati okuti tua kapako ocitumãlo Yehova a va ĩha? Ocipama cikuãimo ci ka konomuisa apulilo aco a kuete esilivilo.