1-2. (a) Ekandu li lomboloka nye kuenda tu pondola oku li yula ndati? (Talavo “Olondaka via lomboluiwa.”) (b) Nye tu konomuisa vocipama cilo kuenda vovipama vikuavo vi sangiwa Vutala ulo Wondavululi? (“Okuakutanga wa Soliwa.”)

 OVE hẽ o yongola oku kũlĩha okuti Yehova oku sole calua? Onjila yiwa yoku ci kũlĩha yeyi: Lilongisa eci eye a linga oco a ku yovole kekandu kuenda kolofa. Ekandu a unyali umue ũvi ku pondola oku yula lika wove. Vosi yetu eteke leteke tu lueya kuenda tu fa omo liekandu. (Va Rom. 5:12) Pole, tu kuete esapulo liwa. Lekuatiso lia Yehova tu pondola oku yula ekandu. Eye wa tu likuminya oku tu yovola kekandu kuenda kolofa!

² Vokuenda kueci ci pitahãla 6.000 kanyamo, Yehova wa siata oku kuatisa omanu oku u vumba ndaño ka va lipuile. Momo lie? Momo eye o tu sole. Yehova wa sola omanu tunde eci a va lulika. Omo okuti eye o tu sole, wa siata oku linga ovina vialua oco a tu kuatise eci tu lueya. Yehova wa kũlĩha okuti, ekandu li koka oku fa kuenje ka yongola okuti tu fa. Eye o yongola okuti tu kala otembo ka yi pui. (Va Rom. 6:23) Eci oco Yehova a ku yonguila. Vocipama cilo, tu konomuisa apulilo atatu ndeci: (1) Elavoko lipi Yehova a eca komanu? (2) Nye omanu vo kosimbo ka va lipuile va linga oco va sanjuise Yehova?  (3) Nye Yesu a linga oco a yovole omanu kekandu kuenda kolofa?

ELAVOKO LIPI YEHOVA A ECA KAMANU KA VA LIPUILE?

3. Nye ca kokela Adama la Eva oku linga ekandu?

³ Eci Yehova a lulika ulume watete lukãi watete, wa yonguile okuti ovo va kuata esanju. Eye wa va ĩha ocitumãlo cimue ca posoka, olohuela viwa kuenda ocikele cimue ci komõhisa. Ovo va ponduile oku yukisa ongongo lovitumbulukila viavo, loku lingisa ongongo yosi ocitumãlo cimue ca posoka ndocumbo Cedene. Yehova wa ecele kokuavo ocihandeleko cimue ca leluka. Eye wa va lungula okuti, nda va lueya ocihandeleko caco poku u sinila, ekandu liaco lia laikele oku va kokela olofa. Etu tua kũlĩha eci ca lipita lavo. Ungelo umue ondingaĩvi okuti ka solele omanu kuenda Suku, wa vetiya Adama la Eva oku sinila Suku. Ovo va ecelela oku yapuisiwa lungelo waco ondingaĩvi Satana. Kuenje va siapo oku kolela ku isiavo ukuacisola, noke va linga ekandu. Ndomo tua ci kũlĩha, olondaka via Yehova via tẽlisiwa muẽle ocili. Oku upisa opo, ovo va sukilile oku liyaka lovitangi vieyilila kesino liavo ndeci: Ovo va fetika oku kuka, oku sulako va fa.—Efet. 1:28, 29; 2:8, 9, 16-18; 3:1-6, 17-19, 24; 5:5.

4. Momo lie Yehova a suvukila ekandu kuenda a tu kuatisila oku amela kokuaye? (Va Roma 8:20, 21)

⁴ Yehova wa ecelela okuti ulandu waco u sonehiwa Vembimbiliya oco tu kuatisiwe lawo. Owo u tu kuatisa oku kuata elomboloko liesunga lieci Yehova a suvukila calua ekandu. Ekandu li nyõla ukamba tu kuete la Yehova kuenda li koka olofa. (Isa. 59:2) Satana ka sole Yehova. Eli olio esunga lieci a vetiyila Adama la Eva oku linga ekandu kuenda o kasi oku amamako oku yapuisa omanu koloneke vilo. Kuenje eci Adama la Eva va lueya, citava okuti Satana wa sima okuti wa nyõla ocipango Yehova a kuatelele omanu. Pole, eye ka kuatele elomboloko liokuti Yehova ukuacisola. Yehova lalimue eteke a pongoluile ocipango caye catiamẽla kocitumbulukila ca Adama la Eva. Eye o sole epata liomanu kuenje lonjanga yalua wa eca elavoko komanu vosi. (Tanga Va Roma 8:20, 21.) Yehova wa kũlĩhĩle okuti, vamue pokati kovitumbulukila viaco, va ka nõlapo oku u sola kuenda oku pokola kokuaye. Yehova wa ecelela okuti, ovo va amela kokuaye loku yovuiwa kekandu kuenda kolofa. Nye Yehova a ponduile oku linga oco ovina viaco vi tẽlisiwe?

5. Vepuluvi lipi Yehova a eca elavoko komanu vakuakandu? Ci lombolola. (Efetikilo 3:15)

⁵ Tanga Efetikilo 3:15. Lonjanga yalua, Yehova wa eca elavoko komanu vakuakandu, eci a popia ovina via laikele oku pita la Satana. Suku wa popele okuti kua laikele oku kala ‘ocitumbulukila’ ca ponduile oku yovola omanu. Ocitumbulukila caco, ca laikele oku sasõla utue wa Satana, loku malako ũvi wosi eye a koka vocumbo Cedene. (1 Yoa. 3:8) Pole, catete Satana wa laikele oku ñualilapo ocitumbulukila caco poku ci kokela olofa. Eci ca laikele oku kokela evalo lialua ku Yehova. Pole, Yehova wa nõlelepo oku yeva evalo liaco, loku ecelela okuti ocitumbulukila caco ci tala ohali, oco ci yovole omanu!

CECI OMANU KOSIMBU VA SUKILILE OKU LINGA OCO VA SANJUISE YEHOVA

6. Nye Abele la Noha kuenda alume vakuavo vakuekolelo, va linga oco va taviwe la Yehova?

⁶ Yehova kamue kamue, wa situlula ndomo omanu ka va lipuile va ponduile oku amela kokuaye. Abele okuti omõla wavali wa Adama la Eva, eye wa kala omunu watate oku lekisa ekolelo ku Yehova noke liesino lia  lekisiwa vocumbo Cedene. Omo okuti Abele wa solele Yehova kuenda wa sanda oku u sanjuisa loku amela kokuaye, wa eca ocilumba cimue ku Yehova. Abele wa kala ungombo kuenje wa tikula olomeme vimue via kala amalẽhe, wa vieca ku Yehova ndocilumba. Yehova wa liyeva ndati? Eye “wa sanjukila Abele kuenda ocilumba caye.” (Efet. 4:4) Yehova wa sanjukilavo ovilumba vimuamue via eciwa lomanu vakuavo vo solele kuenda va kolelele kokuaye, ndeci Noha. (Efet. 8:20, 21) Poku tava ovilumba viaco Yehova wa lekisa okuti, omanu ka va lipuile va ponduile oku taviwa laye kuenda oku amela kokuaye. b

7. Nye tu lilongisila kepokolo lia Avirahama lioku tava oku lumba omõlaye?

⁷ Avirahama wa kuatele ekolelo lia pama ku Yehova kuenje Yehova wo pinga oco a linge ocina cimue ka ca lelukile okuti, oku eca omõlaye Isake ndocilumba. Citava okuti ca kokela esumuo lialua ku Avirahama. Pole, eye wa pokola ku Yehova. Eci Avirahama a lipongiya oco a ponde omõlaye, Yehova wo tateka. Momo Yehova wa kũlĩhĩle okuti, Avirahama wa laikele oku yeva esumuo lialua, nda wa pondele omõlaye. Ulandu owu u tu longisa eci Yehova a ponduile oku linga kovaso yoloneke. Eye wa nõlelepo oku eca omõlaye wa soliwa ndocilumba. Yehova o sole calua omanu.—Efet. 22:1-18.

8. Ovilumba viovinyama vemeyi liocihandeleko via situluile nye? (Ovisila 4:27-29; 17:11)

⁸ Eci Yehova a eca Ocihandeleko ku va Isareli, wa va sapuila oku eca ovinyama ndovilumba, oco akandu avo a eceliwe. (Tanga Ovisila 4:27-29; 17:11.) Ovilumba viaco via situlula okuti, Yehova wa laikele oku eca ocilumba ca velapo, cina ca ponduile oku yovola omanu kekandu. Yehova wa sapuila kovaprofeto oco va sonehe eci catiamẽla kocitumbulukila ca likuminyiwile. Ovo va situlula okuti, omõla a Suku wa laikele oku tala ohali kuenda oku pondiwa. Eye wa laikele oku pondiwa ndomeme yi lumbiwa. (Isa. 53:1-12) Sokolola Yehova oku eca omõlaye o soliwe ndocilumba, oco a yovole omanu kekandu kuenda kolofa, oku kongelamo ove!

CECI YESU A LINGA OCO A YOVOLE OMANU KEKANDU

9. Nye Yoano Upapatisi a popia catiamẽla ku Yesu? (Va Heveru 9:22; 10:1-4, 12)

⁹ Kocita catete K.K. Yoano Upapatisi poku tukula Yesu u Nasara wa popia hati: “Kameme ka Suku, una upa akandu oluali, yo!” (Yoa. 1:29) Olondaka evi vi lekisa okuti, Yesu wa kala ocitumbulukila ci likasi Yehova a likuminyile. Yesu wa laikele oku eca omuenyo waye ndocilumba. Omo liaco, kua kala elavoko limue li komõhisa komanu ka va lipuile lioku yoyuiwa kekandu.—Tanga Va Heveru 9:22; 10:1-4, 12.

10. Yesu wa lekisa ndati okuti ‘weyilila oku kovonga’ vakuakandu?

¹⁰ Yesu wa tiamisilile utima koku kuatisa omanu va sumuile, omo lioku kala vakuakandu kuenje wa va laleka oco va kale olondonge viaye. Eye wa kũlĩhĩle okuti, omanu va kala oku tala ohali omo liekandu. Kuenje eye wa kuatisa alume lakãi va kala oku tala ohali omo liakandu va lingile. Yesu poku tukula olusapo lumue, wa popia hati: “Omanu va kuete uhayele ka va sukila ondotolo, te vana va vela.” Eye wamisako hati: “Sieyilile oku kovonga vakuesunga, te vakuakandu.” (Mat. 9:12, 13) Eci oco Yesu a linga. Eye lohenda wa ecela akandu wukãi una wa sukula olomãi viaye lasuẽlela. (Luka 7:37-50) Yesu wa longisa  ocili cimue ci kuete esilivilo kukãi u Samaria weyile pocisimo, ndaño wa kũlĩhĩle okuti eye wambatele omuenyo umue ka wa sungulukile. (Yoa. 4:7, 17-19, 25, 26) Toke muẽle Suku wa eca unene ku Yesu, woku pindula alume lakãi kuenda omãla va file omo liekandu.—Mat. 11:5.

11. Momo lie vakuakandu va solaile oku kala la Yesu?

¹¹ Tu pondola oku kuata elomboko lieci omanu vakuakandu va solaile oku kala la Yesu. Eye wa lekisa kokuavo ocikembe kuenda ohenda. Ovo va lianjele poku sapela la Yesu. (Luka 15:1, 2) Kuenje Yesu wa va pandiya kuenda wa va sumũlũisa omo lioku lekisa ekolelo kokuaye. (Luka 19:1-10) Yesu wa lekisa komanu okuti Yehova ukuahenda. (Yoa. 14:9) Kolondaka kuenda kovilinga, eye wa lekisa okuti Isiaye ukuacikembe haiye ukuahenda, o sole omanu kuenda o yongola oku va kuatisa oku yula uyaki wekandu. Yesu wa kuatisa omanu vakuakandu oku lekisa onjongole yoku linga apongoloko komuenyo wavo kuenda oku u kuama.—Luka 5:27, 28.

12. Nye Yesu a popia catiamẽla kokufa kuaye?

¹² Yesu wa kũlĩhĩle okuti wa laikele oku eca omuenyo waye ndocilumba. Yimue vali onjanja wa sapuila kolondonge viaye okuti, wa laikele oku pakuiwa kuenda oku pondiwa kuti wekangiso. (Mat. 17:22; 20:18, 19) Eye wa kũlĩhĩle okuti, ocilumba caye ca ponduile okupa ekandu voluali ndomo Yoano a ci popele kuenda ovaprofeto. Yesu wa popiavo okuti noke  lioku eca omuenyo waye, eye wa ponduile oku “kokela omanu vosi” kokuaye. (Yoa. 12:32) Kuenje vana va kolelele ku Yesu kuenda oku pokola kovihandeleko viaye, va ponduile oku sanjuisa Yehova. Poku ci linga va laikele oku ‘yovuiwa kekandu.’ (Va Rom. 6:14, 18, 22; Yoa. 8:32) Omo liaco, Yesu wa lekisa utõi kuenda wa li kapeleleko okufa lonjila yimue yi sumuisa, oco a tu yovole kekandu kuenda kolofa.—Yoa. 10:17, 18.

13. Lonjila yipi Yesu a fa kuenda olofa viaye vi tu longisa nye catiamẽla ku Yehova? (Talavo ociluvialuvia.)

¹³ Yesu wa pakuiwa, wa kapiwa vokayike wa tipuiwa, wa lundiliwa kuenda wa pisiwila oku fa. Kuenje asualali va valela Yesu kuti wekangiso, oco a pondiwe. Osimbu eye a kala oku pandikisa kevalo liaco, Yehova wa kala oku yeva evalo lialua poku mola omõlaye oku tala ohali yaco. Ocili okuti, Yehova wa kuatele unene kuenda epondolo lioku imulako ohali yomõlaye, pole, ka ci lingile. Nda okuti Yehova wa solele calua omõlaye, momo lie a ecelela okuti Yesu o tala ohali kuenda oku fa? Momo Yehova o tu sole calua. Yesu hati: “Omo Suku a sola calua oluali, wa eca Omõlaye wongunga okuti, wosi o kolela kokuaye ka nyõliwa, pole, o kuata omuenyo ko pui.”—Yoa. 3:16.

14. Ocilumba ca Yesu ci tu longisa nye?

¹⁴ Ocilumba ca Yesu uvangi wocisola calua Yehova a kuetele ocitumbulukila ca Adama la Eva. Eci ci lekisavo okuti, Yehova oku sole calua. Eye wa eca omõlaye o soliwe ndocilumba kuenda wa pandikisa kevalo lialua oco a ku popele. (1 Yoa. 4:9, 10) Ocili okuti, Yehova o yongola oku kuatisa omunu lomunu pokati ketu, oco o vumbe, ndaño tu londingakandu kuenda eye o ka malako ekandu liosi kovaso yoloneke!

15. Nye tu sukila oku linga oco tu kuatisiwe lombanjaile ya Suku yocilumba cocisembi ca Yesu?

¹⁵ Ombanjaile ya Suku okuti ocilumba cocisembi Comõlaye wongunga, ca ecelela okuti akandu etu a ecelua. Pole, oco tu tambule ongecelo ya Yehova, tu sukila oku linga cimue. Nye tu sukila oku linga? Yoano Upapatisi kuenda Yesu Kristu, va eca etambululo ndoco: “Likekembeli, momo Usoma wo kovailu u kasi ocipepi.” (Mat. 3:1, 2; 4:17) Omo liaco, oku likekembela akandu etu ci kuete esilivilo nda tu yongola oku amamako oku vumba Yehova, lakandu etu oku eceliwa. Pole, nye ca kongela voku likekembela kuenda eci ci tu kuatisa ndati oku sanjuisa Yehova ndaño tu londingakandu? Ocipama ci kuãimo, ci ka tambulula epulilo liaco.