OCIPAMA CELILONGISO 35
OCISUNGO 123 Tu Pokoli ku Yehova Kuenda Kocisoko Caye
Ndomo Akulu Vekongelo va Pondola Oku Kuatisa Vana va Tundisiwa Vekongelo
“Kilu ku kala esanju lialua eci umue ukuakandu a likekembela okuti 99 ya vakuesunga vana ka va sukila oku likekembela, va sule.”—LUKA 15:7.
OCIMÃHO CELILONGISO
Oku kũlĩhĩsa esunga lieci omanu vamue va sukila oku tundisiwa vekongelo kuenda ndomo akulu vakongelo va pondola oku va kuatisa oku likekembela loku kuata vali ukamba la Yehova.
1-2. (a) Yehova o liyeva ndati catiamẽla komanu vana va linga ekandu pole, ka va likekembela?(b) Nye Yehova a lavoka ku vana va linga ekandu?
YEHOVA Suku ka sanjukila ovituwa viosi; eye wa suvuka ekandu. (Osa. 5:4-6) Eye o yongola okuti tu pokola kolonumbi viaye viesunga, vina vi sangiwa Vembimbiliya. Yehova wa kũlĩha okuti ka tua lipuile omo liaco, ka lavoka okuti tu u pokola lonjila yimue ya lipua. (Osa. 130:3, 4) Eye o likala vana ‘vakuakutomba Suku, haivo va pengisa ohenda ya piãla oco va kuate evelo lioku linga umbondo.’ (Yuda 4) Omo liaco, Embimbiliya li popia eci catiamẽla koku “nyõliwa kuomanu va tomba Suku,” vuyaki wo Harmagedo.—2 Pet. 3:7; Esit. 16:16.
2 Yehova ka yongola okuti omunu umue o nyõliwa. Ndomo tua lilongisa vorevista yilo, Embimbiliya li popia okuti eye “o yongola okuti vosi va likekembela.” (2 Pet. 3:9) Ndeci Yehova, akulu vekongelo va siata oku lekisa epandi eci va kuatisa vana va linga ekandu oku likekembela kuenda oku kuata vali ukamba la Yehova. Pole, olonjanja vimue, omanu vamue va linga ekandu ka va likekembela. (Isa. 6:9) Vamue va amamako oku linga ekandu ndaño okuti akulu vekongelo va likolisilako oku va kuatisa oco va likekembele. Nye akulu vekongelo va pondola oku linga?
“TUNDISI OMUNU WACO ONDINGAĨVI”
3. (a) Nye Embimbiliya li popia okuti oco ci sukila oku lingiwa lomunu una ka likekembela? (b) Momo lie tu popela okuti omunu una o likala oku likekembela wa nõlapo oku tundisiwa vekongelo?
3 Eci omunu wa linga ekandu ka likekembela, akulu vakongelo va sukila oku kuama onumbi yi sangiwa kukanda 1 Va Korindo 5:13 yokuti: “Tundisi omunu waco ondingaĩvi pokati kene.” Omunu waco wa linga ekandu wa kũlĩha okuti nda ka likekembelele o ka tundisiwa vekongelo; ci lomboloka okuti eye o kasi oku ungula eci a kũla. (Va Gal. 6:7) Momo lie tu popela ndoco? Momo omunu waco, wa likala oku linga apongoloko ndaño okuti akulu vekongelo va seteka olonjanja vialua oku u kuatisa. (2 Olos. 17:12-15) Ovituwa viaye vi lekisa okuti ka yongola oku pokola kolonumbi via Yehova.—Esin. 30:19, 20.
4. Momo lie ku ligiwila esapulo limue eci omunu umue wa linga ekandu kuenda ka likekembelele a tundisiwa vekongelo?
4 Eci omunu wa linga ekandu ka likekembela kuenda o tundisiwa vekongelo, ku lingiwa esapulo limue vekongelo liokuti eye Hambangiko vali ya Yehova. a Esapulo liaco ka li lingiwa oco omunu waco a kutisiwe osõi. Pole li lingiwa oco omanu vakuavo vekongelo va pokole konumbi Yembimbiliya yokuti: “Liwekipo oku kuata ukamba” lomunu waco “ndaño oku lia” laye. (1 Va Kor. 5:9-11) Kuli asunga awa lieci Yehova a ecela onumbi yaco. Upostolo Paulu wa soneha ndoco: “Etumbisa litito li tumbisa osema yosi.” (1 Va Kor. 5:6) Omunu una wa linga ekandu pole ka likekembela, o pondola oku honguisa onjongole yomanu vana va yongola oku ambata omuenyo ndomo ci li kuata lolonumbi via Yehova.—Olosap. 13:20; 1 Va Kor. 15:33.
5. Tu tenda ndati omunu una wa tundisiwa vekongelo kuenda momo lie?
5 Tu tenda ndati omunu una wa tundisiwa vekongelo? Ndaño okuti ka tu kuata ukamba lomunu waco, tu sukila oku u tenda ndomeme yimue ya nyelela okuti, handi o kuete elavoko. Omeme yimue yi liamũha locunda, yi pondola oku tiuka. Ivaluka okuti omunu waco wa tumbikile omuenyo waye ku Yehova. Ci sumuisa omo okuti, eye ka ambatele omuenyo waye lonjila yimue yi sanjuisa Yehova kuenje co kokela ovitangi. (Esek. 18:31) Osimbu kuli handi otembo kuenda Yehova wa li kapelako oku lekisa ohenda, tu lavoka okuti omunu waco o tiuka. Oco hẽ akulu vekongelo va pondola oku kuatisa ndati omunu una wa tundisiwa vekongelo?
NDOMO AKULU VAKONGELO VA KUATISA VANA VA TUNDISIWA VEKONGELO
6. Nye akulu vekongelo va ka linga oco va kuatise omunu una wa tundisiwa vekongelo?
6 Eci omunu umue a tundisiwa vekongelo, anga hẽ akulu vekongelo va liwekapo oku likolisilako oku u kuatisa oku tiuka ku Yehova? Sio! Eci akulu vekongelo va sapuila komunu umue wa linga ekandu pole ka likekembelele okuti o tundisiwa vekongelo, ovo va sapuilavo komunu waco ovina a sukila oku linga oco a tiuke vekongelo. Pole akulu vekongelo va linga vali ovina vikuavo. Ovo va sapuila komunu waco okuti va ka liongolola vali laye noke liolosãi vimue oco va tale nda ovituwa viaye via pongoloka. Nda okuti noke liolosãi vimue omunu wa linga ekandu wa tava oku liongolola lakulu vekongelo, ovo va ko vetiya oku likekembela kuenda oku tiuka vekongelo. Ndaño okuti toke kotembo yaco ka pongoluile ovituwa viaye, akulu vekongelo va ka seteka oku liongolola vali laye noke liotembo yimue kuenda oku u vetiya vali oku likekembela.
7. Eci omunu umue a tundisiwa vekongelo, akulu vekongelo va pondola oku setukula ndati ohenda ya Yehova? (Yeremiya 3:12)
7 Akulu vekongelo va setukula Yehova una o lekisa ohenda komanu vana va tundisiwa vekongelo. Ndeci, kosimbu Yehova ka endaile oku kevelela okuti afendeli vaye va Isareli va likekembela osimbu ka setekele oku va kuatisa. Pole wa enda oku tuma ovaprofeto vaye kokuavo osimbu ovo ka va likekembelele. Ndomo tua ci konomuisa vocipama cavali Cutala ulo Wondavululi, Yehova wa longisa okuti ukuahenda, poku sapuila uprofeto Hosea oco a ecele ukãi waye loku kala vali laye ndaño okuti handi wa kala oku linga akandu anene. (Hos. 3:1; Mal. 3:7) Omo lioku setukula Yehova, akulu vekongelo va yongola okuti omunu wa linga ekandu o tiuka kuenda ka va tateka omunu waco oku ci linga.—Tanga Yeremiya 3:12.
8. Olusapo lua Yesu luatiamẽla komõla ocisandui, lu tu kuatisa ndati oku kuata elomboloko liohenda ya Yehova? (Luka 15:7)
8 Sokolola eci isia wa tukuiwa volusapo lua Yesu luatiamẽla komõla ocisandui a linga. Eci omõla a kala oku pitĩla konjo, isia wo mola “wa lupukila kokuaye, wo pupola kapepe loku u sipula locisola.” (Luka 15:20) Limbuka okuti isia ka kevelile omõla oku lipilikila ongecelo yaye. Pole eye wa lupukila komõlaye, omo liocisola o kuatelele. Eci ci situlula ohenda Yehova a kuetele omanu vana va liwekapo oku u vumba kuenda akulu vekongelo va likolisilako oco va setukule Yehova. Ovo va yongola okuti vana va liwekapo oku vumba Yehova va tiukila kokuaye. (Luka 15:22-24, 32) Eci omunu umue wa lingile ekandu a tiuka ku Yehova, ci kale kilu kuenda palo posi ku kala esanju lialua!—Tanga Luka 15:7.
9. Nye Yehova a yonguila komanu vana va linga ekandu?
9 Toke cilo, tua lilongisa okuti Yehova ka ecelela okuti vana va linga ekandu pole ka va likekembela vamamako oku kala vekongelo. Pole eye o seteka oku va kuatisa. Eye o yongola okuti ovo va tiuka kokuaye. Ovisimĩlo via Yehova viatiamẽla komanu vana va linga ekandu pole va likekembela, via situluiwa kelivulu lia Hosea 14:4 ku popia hati: “Ame ndi va sakula kuenda ka va ka kala vali lekambo liekokelo. Ndi va sola lutima wange, momo sia temele vali lavo.” Eci ci vetiya akulu vekongelo oku limbuka apongoloko osi omanu vaco va linga, ndondimbukiso yokuti va kasi oku likekembela. Ci vetiyavo vana va linga ekandu oku tiuka lonjanga ku Yehova.
10-11. Akulu vekongelo va ka seteka ndati oku kuatisa vana okuti tunde eci va tundisiwa vekongelo pa pita ale anyamo alua?
10 Nye ci popiwa catiamẽla komanu vana okuti tunde eci va tundisiwa vekongelo pa pita ale anyamo alua? Citava okuti ovo va liwekapo oku linga ovina via va kokela oku tundisiwa vekongelo. Olonjanja vimue ovo ka va ivaluka vali ovina via va kokela oku tundisiwa vekongelo. Ndaño okuti pa pita ale anyamo yalua tunde eci va tundisiwa, akulu vekongelo va ka seteka oku va sandiliya kuenda oku sapela lomanu vaco. Vokuenda kuepasu liaco, akulu vekongelo va ka linga ohutililo yimue kuenda oku vetiya omunu waco oku tiuka vekongelo. Omunu una okuti tunde eci a tundisiwa vekongelo pa pita ale anyamo alua, wa hongua calua konepa yespiritu. Omo liaco, nda omunu waco o popia okuti o yongola oku tiuka vekongelo, citava okuti akulu vekongelo va linga esokiyo limue oco manji umue a songole elilongiso liaye Liembimbiliya ndaño okuti eye handi ka tiukile. Kuenje akulu vekongelo ovo lika va pondola oku songola elilongiso liaco Liembimbiliya.
11 Akulu vekongelo va setukula ohenda ya Yehova poku sandiliya kuenda oku kuatisa vosi vana siapo oku vumba Yehova loku va vetiya oku tiuka kokuaye. Eci omunu umue wa linga ekandu a likekembela kuenda o liwekapo oku linga ovina ka via sungulukile, citava okuti eye o tambuiwa lonjanga.—2 Va Kor. 2:6-8.
12. (a) Vakalo api akulu vekongelo va sukila oku lekisa utate walua? (b) Momo lie tu sukilila oku yuvula oku sima okuti kuli akandu amue okuti omanu va vi linga, lalimue eteke va ka tambula vali ongecelo ya Yehova? (Talavo etosi.)
12 Olonjanja vimue akulu vekongelo va sukila oku kuata utate osimbu ka va tambuile omunu umue. Ndeci, nda ocitangi caco ca kala cokuti omunu waco wa putuile omõla umue, unanguluke ale wa sokiyile oku nyõla olohuela vimue, akulu vekongelo va sukila oku kũlĩhĩsa nda omunu waco wa likekembela muẽle ocili. (Mal. 2:14; 2 Tim. 3:6) Ovo va sukila oku teyuila vamanji vekongelo. Pole tu sukila oku kuata elomboloko liokuti Yehova o ka tava vosi vana va likekembela haivo va liwepako oku linga ovina ka via sungulukile. Omo liaco, ndaño okuti akulu vekongelo va sukila oku kuata utate loku kũlĩhĩsa nda omunu waco wa likekembela muẽle ocili, ovo va sukila oku yuvula oku sima okuti omunu waco lalimue eteke a ka tambula vali ongecelo ya Yehova. b—1 Pet. 2:10.
CECI EKONGELO LI SUKILA OKU LINGA
13. Etepiso lipi li kasi konjila ndomo tu tata omunu una wa pisiwa lakulu vekongelo kuenda una wa tundisiwa vekongelo?
13 Ndomo tua lilongisa vocipama ca pita, olonjanja vimue ku lingiwa esapulo liokuti omunu umue wa pisiwa. Lonjila eyi tu pondola oku amamako oku kuata ukamba lomunu waco momo eye wa linga apongoloko kovisimĩlo kuenda kovituwa viaye vĩvi. (1 Tim. 5:20) Omunu waco handi o panga onepa vekongelo kuenda o sukila oku pamisiwa la vamanji oco eye amameko oku linga ovina via sunguluka. (Va Hev. 10:24, 25) Pole eci ca litepa lomunu umue wa tundisiwa vekongelo. Etu tu sukila oku ‘liwekapo oku kuata ukamba’ lomunu waco, “ndaño oku lia” laye.—1 Va Kor. 5:11.
14. Akristão va pondola oku talavaya ndati lowanji wavo wa pindisiwa Lembimbiliya, poku tata omunu wa tundisiwa vekongelo okuti endaenda kolohongele? (Talavo ociluvialuvia.)
14 Anga hẽ onumbi yi sangiwa kukanda 1 Va Korindo 5:11 yi lomboloka okuti, ka tu pondola oku laleka omunu umue wa tundisiwa vekongelo oku enda kohongele ale oku u lama nda eye weya kohongele? Sio. Ocili okuti ka tu kuata ukamba laye. Pole, Akristão va sukila oku talavaya lowanji wavo wa pindisiwa Lembimbiliya, poku nõla nda va laleka omunu wa tundisiwa vekongelo ale sio okuti pamue ukuepata lietu ale una okuti kosimbu wa kala ekamba lietu. Tu tata ndati omunu waco nda wa tava oku enda kohongele? Kosimbu ka tua endaile oku lama omunu umue wa tundisiwa vekongelo ndaño okuti weya kohongele. Pole, cilo Ukristão o sukila oku talavaya lowanji waye wovutima wa pindisiwa Lembimbiliya oco a nõle onjila a kuama. Vamanji vamue va nõlapo oku lama ale oku yolela omunu waco weya kohongele. Pole ka citava okuti tu sapela calua lomunu waco ale oku linga laye ukamba.
Akristão va pondola oku talavaya lowuanji wavo wovutima wa pindisiwa Lembimbiliya, poku nõla nda va laleka omunu umue wa tundisiwa vekongelo oco a ende kohongele yimue ale oku lama omunu waco kohongele (Tala ocinimbu 14)
15. Akandu api a tukuiwa kukanda 2 Yoano 9-11? (Talavo okakasia losapi hati: “ Anga hẽ Upostolo Yoano Kuenda Upostolo Paulu va Kala Oku Vangula Catiamẽla Kekandu Limuamue?”)
15 Omanu vamue va pondola oku lipula ndoco: ‘Embimbiliya ka li popi hẽ okuti Ukristão una o lama omunu wa tundisiwa o kasi oku panga onepa kovituwa viaye vĩvi?’ (Tanga 2 Yoano 9-11.) Pole, ocisonehua caco ci lekisa okuti onumbi yaco yi tiamisiwila komunu umue onanguluke ale una o vetiya vakuavo oku linga ovina ka via sungulukile. (Esit. 2:20) Omo liaco, nda omunu umue wa tundisiwa vekongelo o kasi oku vetiya alongiso olonanguluke ale ovituwa vikuavo ka via sungulukile, akulu vekongelo ka va ka linga esokiyo lioku nyula omunu waco. Ndaño ndoco, citava okuti omunu waco o likekembela. Pole, osimbu eye ka ci lingile, ka tu u lami ndaño oku u laleka oco a ende kohongele yimue yekongelo.
SETUKULA OHENDA YA YEHOVA
16-17. (a) Nye Yehova a yonguila komanu vana va linga ekandu? (Esekiele 18:32) (b) Akulu vekongelo va talavaya ndati la Yehova poku seteka oku kuatisa vana va linga ekandu?
16 Nye tua lilongisa vovipama evi vitãlo? Yehova ka yongola okuti omunu umue onyõliwa! (Tanga Esekiele 18:32.) Eye o yongola okuti vana va linga ekandu va linalisa laye. (2 Va Kor. 5:20) Eli olio esunga liokuti, Yehova olonjanja viosi wa siata oku vetiya afendeli vaye vana va liwekapo oku u vumba, oco va likekembele loku tiuka kokuaye. Akulu vekongelo va kuete esumũlũho lioku talavaya la Yehova poku kuatisa vana va linga ekandu oku likekembela.—Va Rom. 2:4; 1 Va Kor. 3:9.
17 Ocili okuti, kilu ku kala esanju lialua eci omunu wa linga ekandu a likekembela! Yehova Isietu wokilu, wa siata oku kuata esanju lialua olonjanja viosi eci omeme yaye yimue ya nyelile yi tiuka vekongelo. Ocisola tu kuetele Yehova ci amamako oku livokiya osimbu tu sokolola kocikembe kuenda kohenda yaye ya piãla.—Luka 1:78.
OCISUNGO 111 Esunga Liesanju Lietu
a Ka tu ka tukula vali omanu vaco okuti Halombangiko vali ya Yehova. Ndomo ci sangiwa kukanda 1 Va Korindo 5:13 kaliye tu ka va tukula okuti va tundisiwa vekongelo.
b Ndomo ci lekisiwa Vembimbiliya, ekandu lina okuti ka li eceliwa, lina okuti omunu waco wa nõlapo oku yanduluka Yehova. Yehova la Yesu, ovo lika va pondola oku nõla nda omunu waco eceliwa ale sio.—Marko 3:29; Va Hev. 10:26, 27.
