1. Nye omunu umue o likekembela a pondola oku linga?

 ECI tu linga ocina cimue cĩvi, ci kuete esilivilo oku likekembela. Embimbiliya li lekisa okuti omunu umue o likekembela, o fetika oku suvuka ovina eye a linga, o liwekapo oku kuama onjila yaco kuenda o yuvula oku ci pitulula.—Tala Elomboluilo Liolondaka Viembimbiliya petosi hati: “Oku Likekembela.”

2. Momo lie vosi yetu tu sukila oku lilongisa catiamẽla koku likekembela? (Nehemiya 8:9-11)

² Omanu vosi va sukila oku lilongisa catiamẽla koku likekembela. Momo lie? Momo vosi yetu tua siata oku lueya eteke leteke. Omo okuti tu vitumbulukila via Adama la Eva, tua piñala ekandu kuenda olofa. (Va Rom. 3:23; 5:12) Vosi yetu tuakuakandu kuenda tu sukila oku likekembela. Ndaño muẽle alume va kuatele ekolelo lia pama ndeci upostolo Paulu, va sukililevo oku likolisilako oco ka va ka yuliwe lekandu. (Va Rom. 7:21-24) Anga hẽ eci ci lomboloka okuti olonjanja viosi tu ka yeva esumuo omo liekandu lietu? Sio, Yehova ukuahenda kuenda o yongola okuti tu kuata esanju. Kũlĩhĩsa ulandu wa va Yudea vo koloneke via Nehemiya. (Tanga Nehemiya 8:9-11.) Yehova ka yonguile okuti ovo va yeva esumuo omo liakandu va linga kosimbu, pole, wa yonguile okuti ovo vo fendela lesanju. Yehova wa kũlĩha okuti, eci tu likekembela tu kuata esanju. Omo liaco, eye wa siatavo oku tu longisa catiamẽla kondaka yaco. Nda tua likekembela akandu etu, tu pondola oku kolela okuti Isietu ukuahenda o ka tu ecela.

3. Nye tu ka lilongisa vocipama cilo?

³ Tu ka lilongisa vali eci catiamẽla koku likekembela. Vocipama cilo, tu ka konomuisa ovina vitatu. Catete, tu ka konomuisa ovina Yehova a longisa ku va Isareli catiamẽla koku likekembela. Cavali tu ka tiamisila utima konjila ndomo Yehova a kuatisa afendeli vaye vana va likekembela. Catatu, tu ka konomuisa  eci olondonge via Yesu via lilongisa catiamẽla koku likekembela.

OVINA YEHOVA A LONGISA KU VA ISARELI VIATIAMẼLA KOKU LIKEKEMBELA

4. Nye Yehova a longisa ku va Isareli catiamẽla koku likekembela?

⁴ Eci Yehova a sokiya va Isareli oco va kale ofeka yimue, eye wa linga ocisila cimue lavo. Nda va Isareli va pokuile kovihandeleko viaye, eye wa ponduile oku va teyuila kuenda oku va sumũlũisa. Catiamẽla kovihandeleko viaco, eye wa popia hati: “Ocihandeleko eci ñasi oku ku handeleka etaili, ka ca tĩlile kokuove kuenda ca leluka oku ci tẽlisa.” (Esin. 30:11, 16) Pole nda okuti va Isareli va sinĩlile Yehova poku fendela olosuku vikuavo, eye ka ponduile vali oku va teyuila kuenda nda va tala ohali. Pole, eci ka ci lekisa okuti Yehova wa laikele oku va yanduluka. Ovo va ponduile oku “tiuka ku Yehova Suku [yavo] loku yevelela ondaka yaye.” (Esin. 30:1-3, 17-20) Volondaka vikuavo, ovo va ponduile oku likekembela. Nda va ci lingile, Yehova wa laikele oku amela kokuavo kuenda oku va sumũlũisa.

5. Yehova wa lekisa ndati okuti ka yandulukile afendeli vaye? (2 Olosoma 17:13, 14)

⁵ Afendeli va Yehova olonjanja vialua, va enda oku u sinĩla. Ovo va enda oku fendela oviteka kuenda oku linga ovina vikuavo vĩvi. Omo liaco, ovo va tala ohali yalua. Pole, Yehova ka liwekelepo oku kuatisa afendeli vaye oco va tiuke kokuaye loku u vumba. Eye olonjanja vialua wa enda oku tuma ovaprofeto oco a va lungule okuti, va likekembela kuenda oku u vumba lutima wosi.—Tanga 2 Olosoma 17:13, 14.

6. Yehova wa talavaya ndati lovaprofeto vaye oco a longise afendeli vaye esilivilo lioku likekembela? (Talavo ociluvialuvia.)

⁶ Eci afendeli va Yehova va enda oku u sinĩla, eye olonjanja vialua wa enda oku tuma ovaprofeto vaye oco a va sapuile ovina via laikele oku pita lavo nda ka va lingile apongoloko. Ndeci, pocakati cuprofeto Yeremiya Suku wa va sapuila hati: “Tiuka a Isareli  ukuesino . . . Si ka vanja lonyeño kokuene, momo ame ndukuacili, . . . Si kamamako locikumbiti otembo ka yi pui. Limbuka ño eko liove, momo ove wa sinĩla Yehova Suku yove.” (Yer 3:12, 13) Yehova wa sapuila uprofeto Yoeli oco a sapuile kafendeli vaye hati: “Tiuki kokuange lutima wene wosi.” (Yoe. 2:12, 13) Uprofeto Isaya wa vetiyiwa oku popia hati: “Lisukuli ene muẽle kuenda liyelisi ene muẽle; tundisi kovaso ange ovilinga viene ka via sungulukile; liwekipo oku linga eci cĩvi.” (Isa. 1:16-19) Kuenje Yehova pocakati ca Esekiele wa popia hati: “Anga hẽ ndi sanjukila oku fa kuomunu umue ondingaĩvi? . . . Siti ndi yongola okuti eye o tinduka kolonjila viaye kuenje amamako lomuenyo? Ame si sanjukila olofa viomunu umue, . . . tiuki kokuange kuenje vu kala lomuenyo.” (Esek. 18:23, 32) Yehova o sanjuka eci afendeli vaye va likekembela akandu avo momo, eye o yongola okuti va kala lomuenyo otembo ka yi pui! Pole, Yehova ka kuatisa lika omanu eci ovo va likekembela. Tu kũlĩhĩsa ovolandu akuavo atiamẽla kondaka yaco.

7. Nye Yehova a longisa kafendeli vaye poku tukula ulandu wuprofeto Hosea kuenda ukãi waye?

⁷ Tala ndomo Yehova a longisa afendeli vaye pocakati cuprofeto Hosea kuenda ukãi waye Gomere. Noke yoku linga ukahokolo olonjanja vialua, eye wa siapo Hosea oco a ka kale lalume vakuavo. Anga hẽ Gomere ka ponduile oku pongoloka? Yehova una o kũlĩhĩsa ovitima, wa sapuila Hosea hati: “Kuende vali, sola ukãi wove una o soliwe lalume vakuavo haeye o linga ukahokolo, u sola ndeci Yehova a sole omanu vaye va Isareli osimbu ovo va kasi oku enda kolosuku vikuavo.” (Hos. 3:1; Olosap. 16:2) Limbuka okuti ukãi wa Hosea wa kala oku linga ekandu limue linene. Pole Yehova wa sapuila Hosea oco o wecele kuenda oku kala vali laye ndukãi waye. a Pocakati congangu yaco, Yehova wa yonguile oku longisa afendeli vaye ndomo eye a liyeva catiamẽla kokuavo. Ndaño okuti ovo va enda oku linga ovina vialua vĩvi, Yehova wa lekisa ocisola kokuavo poku tuma ovaprofeto oco a va kuatise oku likekembela kuenda oku linga apongoloko komuenyo wavo. Anga hẽ ulandu owu u tu longisa okuti Yehova una o “kũlĩhĩsa ovitima” o ka sandiliya omunu wosi wa linga ekandu oco o kuatise oku li kekembela? (Olosap. 17:3) Tu ci konomuisi.

NDOMO YEHOVA A SIATA OKU KUATISA AFENDELI VAYE VANA VA LIKEKEMBELA

8. Nye Yehova a linga oco a kuatise Kaini oku likekembela? (Efetikilo 4:3-7) (Talavo ociluvialuvia.)

⁸ Kaini wa kala omõla watete wa Adama la Eva. Ndeci omãla vakuavo va Adama, Kaini wa piñalavo ekandu. Catiamẽla kokuaye Embimbiliya li popia hati: “Ovilinga viaye vĩvi.” (1 Yoa. 3:12) Citava okuti eci ci lekisa esunga lieci Yehova “ka sanjukilile Kaini locilumba caye.” Kaini ka pongoluile ovituwa viaye pole, “wa kuata onyeño yalua kuenda ocipala caye ca nyumãla.” Nye Yehova a linga noke? Eye wa lungula Kaini. (Tanga Efetikilo 4:3-7.) Limbuka okuti Yehova wa lekisa ohenda poku vangula la Kaini kuenda wo sapuila okuti eye wa laikele oku u sumũlũisa nda wa linga eci ciwa. Yehova wa lungulavo Kaini catiamẽla kohele yoku linga eci cĩvi. Pole, Kaini ka tavele oku yevelela. Eye ka ecelele okuti Yehova u kuatisa oku likekembela. Omo okuti Kaini wa likala oku yevelela Yehova Suku, anga hẽ Yehova wa nõlapo oku liwekapo oku kuatisa omanu vana va likekembela? Ocili okuti ka liwekelepo!

9. Yehova wa kuatisa ndati Daviti oku likekembela?

 ⁹ Yehova wa solele calua Soma Daviti. Eye toke muẽle wo tukula hati: “Ulume umue o sanjuisa utima wange.” (Ovil. 13:22) Pole Daviti wa linga ovina vialua vĩvi oku kongelamo ukahokolo kuenda oku ponda. Ndomo ca lekisiwile Kocihandeleko ca eciwile ku Mose, Daviti wa sesamẽlele oku fa. (Ovis. 20:10; Ate. 35:31) Pole, Yehova wa yonguile oku kuatisa Daviti oco a likekembele. b Eye wa tuma uprofeto waye Natana oco a ende ku soma Daviti ndaño okuti ka li tavelele akandu aye kuenda oku likekembela. Natana wa tukula ocindekaise cimue oco a kuatise Daviti oku kuata elomboloko liokuti wa linga ekandu limue linene. Daviti wa limbuka okuti wa sumuisa calua Yehova kuenje wa likekembela. (2 Sam. 12:1-14) Eye wa soneha Osamo yimue yi lekisa esumuo a kuatele omo liovina a linga. (Osa. 51, osapi) Omanu valua va linga ekandu, va lembelekiwa eci va tanga Osamo yaco kuenda oku likekembela. Ka tu sanjuka hẽ omo Yehova a kuatisa ufendeli waye Daviti oku likekembela?

10. Tu liyeva ndati poku kũlĩha okuti Yehova ukuepandi kuenda ukuakuecela?

¹⁰ Yehova wa suvuka akandu osi. (Osa. 5:4, 5) Pole, eye wa kũlĩha okuti etu tuakuakandu kuenje omo okuti o tu sole, eci tu linga ekandu limue eye o nõlapo oku tu kuatisa. Eye olonjanja viosi o seteka oku kuatisa vana va linga akandu anene oku amela kokuaye. Ocili okuti ci lembeleka calua oku kũlĩha okuti Yehova o yongola oku tu ecela! Eci tu sokolola catiamẽla kepandi kuenda kongecelo ya Yehova, tu vetiyiwa oku amamako oku kolela kokuaye kuenda oku likekembela lonjanga eci tu linga ekandu limue. Kaliye tu kũlĩhĩsi eci Yesu a longisa kolondonge viaye catiamẽla koku likekembela.

CECI OLONDONGE VIA YESU VIA LILONGISA CATIAMẼLA KOKU LIKEKEMBELA

11-12. Olusapo lupi Yesu a ta oco a tu longise okuti Yehova wa likapelako oku tu ecela? (Tala ociluvialuvia )

¹¹ Mesiya wa molẽha kocita catete K.K. Ndomo tua lilongisa kocipama ca pita, Yehova  wa talavaya la Yoano upapatisi kuenda Yesu Kristu oco va longise omanu esilivilo lioku likekembela.—Mat. 3:1, 2; 4:17.

¹² Yesu vokuenda kupange waye woku kunda, wa longisa omanu okuti Isiaye o tu ecela eci tu linga ekandu limue. Yesu wa longisa esilivilo liaco eci a ta olusapo luomõla ocisandui. Umalẽhe waco wa nõlapo oku tunda konjo kuenda wa linga ovina vialua ka via sungulukile. Pole, noke yotembo yimue “olondunge viaye vieyamo” kuenje wa tiukila konjo. Nye isiaye a linga? Yesu wa popia okuti osimbu omõla “a kala ocipãla, isiaye wo mola, wo kuatela ohenda kuenje wa lupukila kokuaye, wo pupola kapepe loku u sipula locisola.” Omõla wa pula nda wa ponduile oku kala yimue pokati kolonalavayi vio konjo ya isiaye, pole, isiaye wo tukula hati “omõlange” kuenda wa tumbulula omangu a kuatele vepata. Isia wa popia hati: Eye “wa nyelile, yu wa sangiwa.” (Luka 15:11-32) Osimbu Yesu keyile palo posi, wa enda oku mola Isiaye oku lekisa ohenda yalua komanu valua va linga ekandu pole va likekembela. Olusapo Yesu a ta lu tu lembeleka kuenda lu lekisa okuti Isietu Yehova ukuahenda!

13-14. Nye upostolo Petulu a lilongisa catiamẽla koku likekembela kuenda nye eye a linga oco a longise vakuavo catiamẽla kondaka yaco? (Talavo ociluvialuvia.)

¹³ Yesu wa longisa upostolo Petulu ocina cimue ci kuete esilivilo catiamẽla konjila ndomo Yehova a ecela omanu vana va likekembela. Petulu wa lueya olonjanja vialua kuenda Yesu wo wecela. Ndeci, Petulu noke lioku likala Ñala yaye olonjanja vitatu okuti ko kũlĩhĩle, eye wa yeva esumuo lialua omo liovina a linga. (Mat. 26:34, 35, 69-75) Pole, eci Yesu a pinduiwa wa molẽha ku Petulu eci a kala lika liaye oco a sapele laye. (Luka 24:33, 34; 1 Va Kor. 15:3-5) Yesu wa kũlĩhĩle okuti Petulu wa likekembela kuenje wa yonguile okuti Petulu o kũlĩha okuti wo wecela.—Tala Marko 16:7.

¹⁴ Petulu wa kũlĩha esilivilo lioku likekembela  kuenda oku eceliwa kuenje wa ponduile oku longisa omanu vakuavo catiamẽla kovina viaco. Noke liocipito Copendekoste Petulu wa lingila ohundo yimue va Yudea loku va lomboluila okuti Mesiya wa sukilile oku fa. Pole eye wa va pamisa poku va sapuila hati: “Likekembeli, pongoloki oco akandu ene a ecelue okuti, oloneke viekavuluko vi tunda ku Yehova.” (Ovil. 3:14, 15, 17, 19) Petulu wa lekisa okuti oku likekembela ku vetiya omunu wa lueya oku pongolola ovituwa viaye, oku liwekapo oku linga ovina ka via sungulukile kuenda o ku kuama onjila yimue yi sanjuisa Suku. Upostolo wa lekisavo okuti Yehova wa ponduile oku ecela akandu avo osi okuti ka a sokolola vali. Noke lianyamo alua Petulu wa sapuila Akristão hati: “Yehova . . . o pandikisa lene, momo ka yongola okuti umue o nyõliwa, puãi, o yongola okuti vosi va likekembela.” (2 Pet. 3:9) Ocili okuti tu yeva ekavuluko poku kũlĩha okuti Yehova o tu ecela eci tu linga ekandu limue, ndaño muẽle ekandu linene!

15-16. (a) Upostolo Paulu wa lilongisa ndati catiamẽla koku ecela? (1 Timoteo 1:12-15) (b) Nye tu ka lilongisa vocipama ci kuãimo?

¹⁵ Saulu wo ko Tarso, wa lingile ovina vialua ka via sungulukile. Eye wa enda oku lambalala lungangala olondonge via Kristu. Citava okuti Akristão valua va simile okuti Saulu lalimue eteke a ponduile oku linga apongoloko. Pole, Yesu wa kũlĩhĩle okuti Saulu wa ponduile oku linga apongoloko kuenda oku likekembela. Eye kumue la Isiaye va limbuka ovituwa viwa Saulu a kuatele. Yesu wa popia hati: “Nda nõla ulume u oco ambate onduko yange ku vakualofeka.” (Ovil. 9:15) Yesu toke muẽle wa linga ocikomo cimue oco a kuatise Saulu oku likekembela. (Ovil. 7:58–8:3; 9:1-9, 17-20) Saulu okuti noke yoku linga Ukristão weya oku kũlĩhĩwa upostolo Paulu, olonjanja vialua wa lekisa olopandu omo liohenda Yehova la Yesu va lekisa kokuaye. (Tanga 1 Timoteo 1:12-15.) Paulu wa popia hati: “Suku vohenda yaye o kasi oku seteka oku ku tuala koku likekembela.”—Va Rom. 2:4.

¹⁶ Eci Paulu a yeva ocitangi cimue catiamẽla kevĩho liukahonga kekongelo Liakristão ko Korindo, wa va sapuila oku linga nye? Ovina eye a popia, vi tu longisa ndomo Yehova a lekisa ocisola eci a pindisa afendeli vaye kuenda ohenda a lekisa eci va likekembela. Vocipama ci kuãimo tu ka lilongisa ovina via lipita vekongelo lio ko Korindo.