1. Osimbu Petulu ka file Yehova wo vetiya oku linga nye?

 UPOSTOLO Petulu wa kũlĩhĩle okuti ndopo wa laikele oku fa. Vokuenda kuomuenyo waye wosi wekolelo, wa enda oku kuama Yesu kupange woku kunda kuenje wa fetika upange woku kunda kovitumãlo vialua kuenda wa tiamẽlele kocimunga cakulu ko Yerusalãi. Pole, upange wa Petulu handi ka wa puile. Vokuenda kuanyamo 62-64 K.K., eye wa vetiyiwa oku soneha ovikanda vivali Viembimbiliya okuti, ukanda 1 lowu wa 2 Petulu. Petulu wa lavokaile okuti ovikanda viaco vi ka kuatisa Akristão noke liolofa viaye.—2 Pet. 1:12-15.

2. Momo lie ovikanda via Petulu via sonehiwila vepuluvi lia sesamẽla?

² Petulu wa soneha ovikanda viaco vepuluvi lina okuti vamanji va sakalalele calua omo lioku “talisiwa ohali yiñi yiñi.” (1 Pet. 1:6) Omanu vana va kuatele ovisimĩlo vĩvi va seteka oku vĩhisa ekongelo Liakristão lalongiso esanda kuenda lovilinga via vĩha. (2 Pet. 2:1, 2, 14) Akristão ko Yerusalãi va laikele oku liyaka ‘lesulilo liovina viosi,’ ale va Roma va laikele oku nyõla olupale luo Yerusalãi kuenda o Yuda yosi kotembo yaco. (1 Pet. 4:7) Ocili okuti, ovikanda via Petulu via kuatisa Akristão oku kũlĩha eci va sukilile oku linga oco va tẽle oku liyaka lovitangi viaco, loku lipongiyila ovitangi vikuavo via laikele oku iya kovaso. b

3. Momo lie tu sukilila oku kapako ovikanda via Petulu?

 ³ Ocili okuti Petulu wa sonehela ovikanda evi Kakristão vo kocita catete, pole, Yehova wa panga okuti ovikanda viaco vi sonehiwa Vondaka Yaye. Pole, tu pondolavo oku lilongisila calua kovikanda viaco. (Va Rom. 15:4) Etu tu sangiwa voluali lumue lua vĩha calua kuenda pokati komanu ka va vumbi Yehova. Eli olio esunga lieci tua siatela oku liyzaka lovitangi vialua kuenje pamue ci tĩla kokuetu oku vumba Yehova. Handi vali, ndopo tu ka liyaka lohali ya piãla okuti yina va Yudea va pita layo yi sule. Kuenje olonumbi vi sangiwa vovikanda vivali via Petulu, vikuete esilivilo lialua kokuetu. Ovio vi tu kuatisa oku lavoka eteke lia Yehova loku yuvula oku kuatela usumba omunu kuenda oku kuatela ocisola cocili vakuetu. Olonumbi viaco, vi pondolavo oku kuatisa akulu vekongelo oku kũlĩha ndomo va pamisa vamanji vekongelo.

4. Ndomo ca lekisiwa ku Petulu 3:3, 4, nye ci pondola oku honguisa ekolelo lietu?

⁴ Tua ñualiwa lomanu valua ka va tava kovitumasuku Viembimbiliya. Vamue va tu pembula momo tua siata oku popia catiamẽla kesulilo lioluali lulo vokuenda kuanyamo alua. Omanu vamue va tu sepula poku popia okuti esulilo lalimue eteke li keya. (Tanga 2 Petulu 3:3, 4.) Eci tu yeva olondaka viaco komanu tu kundila, komanu tu talavayela lavo, ale ku umue ukuepata, pamue ekolelo lietu li tepuluka. Petulu o tu sapuila eci ci pondola oku tu kuatisa.

5. Nye ci ka tu kuatisa oku talamẽla lepandi esulilo lioluali lulo? (2 Petulu 3:8, 9)

⁵ Komanu vamue ci molẽla ndu okuti Yehova o kasi oku cilua poku nena esulilo lioluali lulo lũvi. Pole, olondaka via Petulu vi tu kuatisa oku kuata ovisimĩlo via sunguluka poku ivaluka okuti onjila ndomo Yehova a tenda otembo ya litepa calua lomanu. (Tanga 2 Petulu 3:8, 9.) Ku Yehova ohulukãi yanyamo yi sokisiwa leteke limosi. Yehova ukuepandi kuenda ka yongola okuti omunu umue o nyõliwa. Pole, eci epuluvi liaco li pitĩlapo Yehova o ka nena esulilo. Etu tu kuete esumũlũho linene lioku talavaya lotembo ya kambako oco tu kundile omanu voluali luosi.

6. Nye tu sukila oku linga oco tu ‘ivaluke olonjanja viosi’ eteke lia Yehova? (2 Petulu 3:11, 12)

⁶ Petulu o tu vetiya oku “ivaluka olonjanja viosi” eteke lia Yehova. (Tanga 2 Petulu 3:11, 12.) Tu pondola oku ci linga ndati? Nda citava, oloneke viosi sokolola kasumũlũho tu ka kuata voluali luokaliye. Sokolola oku kala pocitumãlo cimue ca posoka, oku fuima ofela yiwa, oku lia okulia kumue kupepa, oku yolela vangandiove lakamba va pinduiwa, ale oku longisa Embimbiliya komanu vo kosimbu ndomo ovitumasuku Viembimbiliya via tẽlisiwa. Oku sokolola ovina viaco, ci ku kuatisa oku amamako oku lavoka loku kolela okuti esulilo li kasi ocipepi. Omo okuti, tu “kuete ale ukũlĩhĩso” wovina vi keya kovaso yoloneke, ka tu “yapuisiwa” lalongiso esanda.—2 Pet. 3:17.

7. Tu pondola oku yapuisiwa ndati lusumba womunu?

⁷ Tua kũlĩha okuti eteke lia Yehova li kasi ocipepi kuenje tu yongola oku likolisilako oco tu kunde olondaka viwa komanu. Pole, olonjanja vimue ka tu kuata utõi. Momo lie? Momo pamue tu yuliwa lusumba womunu, ndeci ca lipita la Petulu. Kuteke Yesu a sombisiwa Petulu wa kuata usumba woku popia okuti wa kala umue pokati kolondonge viaye kuenda olonjanja vialua wo likala okuti ko kũlĩhĩle! (Mat. 26:69-75) Pole, Petulu wa  yula usumba kuenje noke wa soneha lekolelo okuti: “Ko ka kuateli usumba eci ovo va kuetele usumba, ndaño oku yokoka.” (1 Pet. 3:14) Olondaka via Petulu vi pondola oku tu kuatisa oku yuvula oku kuatela usumba omunu.

8. Nye ci tu kuatisa oku yula usumba womunu? (1 Petulu 3:15)

⁸ Nye ci pondola oku tu kuatisa oku yuvula oku kuatela usumba omunu? Petulu wa popia hati: “Limbuki vovitima viene okuti, Kristu eye Ñala.” (Tanga 1 Petulu 3:15.) Omu mua kongela oku sokolola kocikele kuenda kunene wa Ñala yetu Soma Yesu Kristu. Nda kua molẽha epuluvi limue lioku kundila olondaka viwa komanu vakuavo wa siata hẽ oku luluma loku kuata usumba? Ivaluka Soma yetu. Nda ca siata oku lipita love, sokolola okuti Yesu o kasi oku viala kilu kuenda wa ñualiwa lovangelo valua. Ivaluka okuti eye o kuete “unene wosi wo kilu lowu wo posi” kuenda eye o ka kala ‘kumue letu oloneke viosi, toke kesulilo lioluali.’ (Mat. 28:​18-20) Petulu o tu vetiya oku “lipongiyila olonjanja viosi,” oco tu popie ovina tua kolela. Oyongola hẽ oku kundila umue kupange wove, kosikola, ale kocitumãlo cikuavo? Tete sokolola kepuluvi o pondola oku ci linga kuenda pongiya eci o ka popia. Likutilila oco o kuate utõi kuenda kolela okuti Yehova o ku kuatisa oco o yuvule oku kuatela usumba omunu.—Ovil. 4:29.

9. Petulu vepuluvi limue wa liwekapo ndati oku lekisa ocisola? (Tala ociluvialuvia.)

⁹ Petulu wa lilongisa ndomo ocisola ci lekisiwa. Eye wa yeva eci Yesu a popia hati: “Ndu wĩhi ocihandeleko cokaliye, cokuti vu lisola pokati; ndeci ame ndo soli, ene lisolivo pokati.” (Yoa. 13:34) Ndaño ndoco, vokuenda kuotembo Petulu wa kupukila veyonjo lioku likala oku lia la vamanji vana okuti ka va kaile va Yudea. Upostolo Paulu wa popia okuti ocituwa eci ca Petulu ca kala ‘combambe.’ (Va Gal. 2:11-14) Petulu wa tava kelungulo liaco kuenda wa lilongisilako. Kovikanda viaye vivali, eye wa lombolola okuti ka tu sukila lika oku kuatela ocisola vamanji, pole, tu sukila oku ci lekisa.

10. Nye ci pondola oku tu kuatisa oku lekisa “ocisola cocili ku vamanji?” (1 Petulu 1:22)

¹⁰ Petulu wa popia okuti tu sukila oku lekisa “ocisola cocili ku vamanji” okuti, halombambeko. (Tanga 1 Petulu 1:22.) Oco tu lekise ocisola cocili ku vamanji, tu sukila oku “pokola kocili.” Vocili caco, mua kongela elongiso liokuti “Suku hokuacameko.” (Ovil. 10:34, 35) Pole, ka tu ka pokola kolonumbi via Yesu nda tu lekisa lika ocisola ku vamanji vamue vekongelo okuti, ku vakuavo sio. Ocili okuti, pamue tu lika ño lomanu vamue okuti vakuavo sio, ndeci Yesu a livalele lika ukamba la vamue pokati kolondonge viaye. (Yoa. 13:23; 20:2) Pole, Petulu o tu ivaluisa okuti tu sukila oku likolisilako oku ‘sola vamanji vosi’ okuti ocisola caco ca velapo vana va situe.—1 Pet. 2:17.

11. Nye ca kongela voku sola vakuetu “lutima wosi?”

¹¹ Petulu o tu vetiya okuti ci kuete esilivilo lialua oku ‘lisola pokati omunu lukuavo lutima wosi.’ Vocinimbu eci, ondaka “lutima wosi” ci lomboloka oku sola umue ndaño okuti ka ca lelukile oku ci linga. Ndeci, nye nda tua linga nda manji umue wa tu sumuĩsa, ale wa tu popia lãvi? Ocisimĩlo cetu catete, oku fetuluinya okuti, ka tu lekisa ocisola. Pole, Petulu wa lilongisa la Yesu okuti, ocituwa caco ka ci sanjuisa Yehova. (Yoa. 18:10, 11) Petulu wa soneha hati: “Ko ka fetuluinyi ũvi lũvi, puãi lingi ovina viwa.” (1 Pet. 3:9) Nda wa sola vamanji lutima wosi o ka lekisa ohenda ku vosi loku kuata elomboloko liekalo liomunu waco ndaño wa ku sumuisa.

12. (a) Oku sola lutima wosi ci tu kuatisa oku linga nye? (b) Ndomo ca lekisiwa vovideo losapi hati: Teyuila Ombanjaile ya Velapo Yomunga, nye o sukila oku likolisilako oku linga?

¹² Petulu kukanda waye watete wa tukula ondaka oku sola “lutima wosi.” Ocisola caco, ka ci tu kuatisa lika oku ecela akandu amue, pole, ci tu kuatisavo oku ecela “akandu alua.” (1 Pet. 4:8) Citava okuti noke lioku pita anyamo amue, Petulu wa ivaluka ovina a lilongisile la Yesu catiamẽla koku ecela. Kotembo yaco, Petulu wa simĩle okuti o kasi oku lekisa ohenda eci a popia hati, wa ponduile oku ecela manji umue “olonjanja epanduvali.” Pole, Yesu wa longisa Petulu kuenda vosi yetu oku ecela 77 kolonjanja, ale olonjanja viosi ci sukiliwa. (Mat. 18:21, 22) Nda okuti ka ca lelukile kokuove oku kapako elungulo liaco, ku ka sumue! Vosi yetu omo okuti ka tua lipuile, pamue ka ci leluka kokuetu oku ecela. Ca velapo oku eca ananga a sukiliwa oco ecele manjove kuenda oku linga laye ombembua. c

13. Nye ci kokela akulu vekongelo okuti pamue ka va kuata otembo yoku pamisa vamanji?

¹³ Ocili okuti Petulu lalimue eteke a ivaleleko ovina Yesu o sapuila noke liepinduko liaye.  Eye hati: “Lava otulomeme tuange.” (Yoa. 21:16) Nda ove ukulu wekongelo wa kũlĩha ciwa okuti olonumbi viaco vi tiamisiwilavo kokuove. Ocili okuti, pamue ka ci leluka kukulu wekongelo oku sanga otembo yoku tẽlisa ocikele caco ci kuete esilivilo. Momo ovo va sukila tete oku tẽlisa ovikele viavo viepata konepa yo ketimba, kovisimĩlo kuenda konepa yespiritu. Handi vali, akulu vekongelo va sukila oku lekisa ongangu yiwa kupange woku kunda, koku pongiya olonepa violohongele viekongelo, olohongele vimbo kuenda olohongele viofeka. Akulu vakuavo vekongelo va pangavo onepa Kocimunga Cikuatisa Vana va Vela, ale Koseketa Yupange Woku Tunga. Ocili okuti, akulu vekongelo va kuete upange walua!

14. Nye ci pondola oku kuatisa akulu vekongelo oku lava ocunda ca Suku? (1 Petulu 5:1-4)

¹⁴ Petulu wa sapuila akulu vekongelo hati: “Lavi ocunda ca Suku.” (Tanga 1 Petulu 5:1-4.) Nda okuti wukulu wekongelo, tua kũlĩha okuti ove o sole vamanji kuenda o yongola oku va tata ciwa. Pole, pamue o liyeva okuti o kuete upange walua, ale wa kava calua kuenje ku tẽla ndomo o tẽlisa ocikele cove. Konepa eyi, nye o sukila oku linga? Sapuila ku Yehova ndomo o liyevite. Petulu wa soneha hati: “Nda umue ukuakuvumba, a ci linge ndu a kolela kongusu yi tunda ku Suku.” (1 Pet. 4:11) Vamanji pamue va kasi oku liyaka lovitangi vina okuti ka vi tẽliwa oku tetuluiwa viosi voluali lulo. Pole, ivaluka okuti, “ungombo wa velapo” Yesu Kristu, o pondola oku va kuatisa lonjila yimue okuti ove ci sule. Eye o pondola oku ci linga cilo kuenda voluali luokaliye. Eci Yehova a yongola kakulu vekongelo ceci okuti, ovo va sola vamanji, loku va tata kuenda oku eca “ongangu yiwa kocunda.”

15. Manji umue wa siata oku kuatisa ndati vamanji vekongelo? (Talavo ociluvialuvia)

¹⁵ Manji William okuti, ukulu wekongelo anyamo alua, wa kũlĩha esilivilo lioku tata ciwa vamanji. Eci efengi lio KOVID-19 lia fetika, eye kumue lakulu vakuavo vekongelo va linga esokiyo lioku sandiliya vamanji vosi va tiamẽlele kovimunga viavo vioku kunda. Eye wa lombolola esunga liaco hati: “Omo okuti, vamanji valua va kala lika liavo kolonjo, ca lelukile oku kuata ovisimĩlo ka via sungulukile.” Nda manji umue o kasi oku liyaka locitangi cimue,  manji William u yevelela lutate oco a kuate elomboloko lia suapo ndomo manji a liyevite kuenda ovina a sukila. Noke o sanda alivulu, ale olovideo vonumbi yetu oco a tẽle oku pamisa manji yaco. Eye wa popia hati: “Cilo, ci kuete esilivilo lialua oku pamisa vamanji. Tua siata oku likolisilako calua oku kuatisa omanu oku lilongisa catiamẽla ku Yehova; kuenje tu sukila oku linga elikolisilo limuamue, oco tu kuatise vamanjetu oku amamako vocili.”

16. Tu kapako ndati ovina tua lilongisa vovikanda via Petulu?

¹⁶ Toke cilo, tua limbuka ovina vimue tu lilongisila kovikanda vivali Petulu a soneha. Pamue ove wa limbuka cimue o sukila oku mioñolola. Ndeci, o yongola hẽ oku sokolola vali calua kasumũlũho o ka kuata voluali luokaliye? Anga hẽ o yongola oku litumbikila ocimãho coku eca uvangi kupange, kosikola, ale kovitumãlo vikuavo? O tẽla hẽ oku limbuka olonjila vimue o pondola oku sola vamanji “lutima wosi?” Nye ci popiwa kakulu vekongelo? Wa li kapeliko hẽ oku tata ocunda ca Suku lutima wosi? Citava okuti wa limbuka okuti o sukila oku mioñoloha kolonepa vimue, pole, ku ka ecelele okuti ci ku sumuisa. “Ñala ukuahenda,” eye o ka ku kuatisa oku linga apongoloko a sukiliwa. (1 Pet. 2:3) Petulu wa popia hati: “Suku ukuahenda ya piãla una wo kovongi . . . o ka tẽlisa epindiso liene okuti, vu loñoloha koku vumba. Eye o vu kanguisi, haeye o vu pamisi loku vu talamisi ngõ.”—1 Pet. 5:10.

17. Asumũlũho api tu ka tambula nda tua pandikisa kuenda oku ecelela oku pindisiwa la Yehova?

¹⁷ Kefetikilo Petulu wa simĩle okuti ka sesamẽlele oku kala la Yesu. (Luka 5:8) Pole, lekuatiso liocisola ca Yehova kuenda ca Yesu, Petulu wa pandikisa kuenda wamamako oku kala ondonge ya Kristu. Kuenje Yehova wa ecelela okuti Petulu o “kuata epuluvi lioku iñila Vusoma ka u pui wa Ñala yetu haeye Upopeli Yesu Kristu.” (2 Pet. 1:11) Esumũlũhokuolio Petulu a kuata! Nda ove wa pandikisa ndeci Petulu a linga kuenda oku tava oku pindisiwa la Yehova, o ka tambulavo asumũlũho omuenyo ko pui. Lonjila eyi o ka ‘tẽlisa ocimãho cekolelo liove okuti, epopelo liove.’—1 Pet. 1:9.