1-2. Momo lie ci kuetele esilivilo oku lilongisa ulandu wa Samisone?

 ECI o yeva onduko Samisone, kovina vipi o sokolola? Citava okuti o sokolola ndomo eye a kuatele ongusu yalua. Ocili okuti wa kala ulume umue wa kuatele ongusu yalua. Pole, Samisone wa nõlele onjila yimue ka ya sungulukile, yina yo nenela ohali yalua. Ndaño ndoco, Yehova wa tiamisilile utima kulandu wekolelo wa Samisone kuenje wa kongela ulandu waye Vembimbiliya oco tu kuatisiwe lawo.

² Yehova wa nõla Samisone oku linga ovina vi komõhisa oco a kuatise afendeli vaye va nõliwile, va Isareli. Noke lianyamo alua, tunde eci Samisone a fa, Yehova wa vetiya upostolo Paulu oco a kongele onduko ya Samisone vulala walume vakuekolelo vo kosimbu. (Va Hev. 11:32-34) Ulandu wa Samisone, u pondola oku tu pamisa calua. Eye wa lekisa ekolelo ku Yehova ndaño vekalo ka lia lelukile. Vocipama cilo, tu konomuisa eci tu lilongisila ku Samisone kuenda ndomo tu pamisiwa longangu yaye.

3. Ocikele cipi Samisone a tambuile?

³ Eci Samisone a citiwa, va Filisiti va kala oku viala ofeka yo Isareli, loku va tata lãvi. (Olong. 13:1) Uviali wavo wa kokela ohali yalua va Isareli. Yehova wa nõla Samisone oku “kala usongui koku popela o Isareli peka lia va Filisiti.” (Olong. 13:5) Pole, ocikele caco ka ca lelukile! Oco Samisone a tẽlise ocikele caco, wa sukilile oku kolela ku Yehova.

4. Yehova wa kuatisa ndati Samisone oco a liyovole peka lia va Filisiti? (Olonganji 15:14-16)

 ⁴ Kũlĩhĩsa ulandu umue u lekisa ndomo Samisone a lekisa ekolelo ku Yehova kuenda oku kolela kekuatiso liaye. Vepuluvi limue, olohoka via va Filisiti vieya oco vi kuate Samisone ko Lehi, citava okuti ko Yuda. Alume vo ko Yuda va kuata usumba walua kuenje va nõlapo oku eca Samisone kovanyãli . Ovo va kuta Samisone lovikolo vivali viokaliye kuenje vo weca peka lia va Filisiti. (Olong. 15:9-13) Pole, “espiritu lia Yehova lio wĩha unene” kuenje ovikolo via kala kovoko a Samisone via kutuluka. Noke, “wa sanga olumbanjo lumue lu talala luocimbulu cimue,” eye lolumbanjo luaco wa ponda 1.000 kalume va va Filisiti.—Tanga Olonganji 15:14-16.

5. Samisone poku talavaya lolumbanjo luocimbulu ca situlula nye catiamẽla ko ku kolela ku Yehova?

⁵ Momo lie Samisone a talavayela lolumbanjo luocimbulu cimue? Momo ca kala ocimalẽho cimue ka ca siatele kotembo yaco! Ka kuli atatahãi, Samisone wa kũlĩhĩle okuti Yehova wa laikele oku u kuatisa oku ponda va Filisiti locimalẽho cosi a kuatele. Ulume u ukuekolelo wa talavaya leci a kuatele, oco a tẽlise ocipango ca Yehova. Ocili okuti Samisone wa tẽla oku ponda alume vaco vosi, momo wa kolelele ku Yehova.

6. Ulandu wa Samisone u tu ĩha ekolelo lipi?

⁶ Yehova o pondolavo oku tu ĩha ongusu tu sukila oco tu tẽlise ocikele cosi, ndaño ci molẽha ndu okuti ka ca lelukile. Yehova o pondola oku ci linga lonjila yimue yi komõhisa. Omo liaco, kolela Yehova. Ndeci a pamisa Samisone, eye o ka ku kuatisa oku tẽlisa ocipango caye, nda wa kolela kokuaye loku sanda ekuatiso Liaye.—Olosap. 16:3.

7. Tukula ulandu umue u lekisa esilivilo lioku sanda olonumbi via Yehova.

⁷ Vamanji valua va talavaya kupange woku tunga ovitumãlo viocisoko cetu, va siata oku lekisa okuti va kolela ku Yehova. Kosimbu, ca siatele calua vamanji oku sokiya, loku tunga onepa yalua yolonjango viusoma kuenda olosapalalo viocisoko. Pole, vokuenda kuotembo, omanu valua va papatisiwa kuenje ocisoko ca sukila oku linga apongoloko amue.  Vamanji va kuete ocikele covopange aco, va sanda ekuatiso ku Yehova kuenda va seteka olonjila viokaliye ndeci, oku landa olosapalalo via tungiwa ale, havio via semũlũiwa. Manji Robert, okuti kanyamo a sulako wa talavaya calua kovopange oku tunga voluali luosi, wa popia hati: “Kefetikilo, tua kuata atatahãi konjila ndomo ovina via laikele oku lingiwa. Momo ca litepele calua leci tua lingaile vokuenda kuanyamo alua. Pole, vamanji va tava konjila yaco kuenje ca situlula okuti Yehova wa kala oku sumũlũisa apongoloko aco.” Ulandu owu, u lekisa ndomo Yehova a kasi oku songuila afendeli vaye oco va tẽlise ocipango caye. Olonjanja vimue, ciwa okuti tu lipula ndoco: ‘Anga hẽ ndi sanda olonumbi via Yehova kuenda ndi lekisa onjongole yoku tava kapongoloko, oco ndi vumbe Yehova lonjila ya velapo?’

8. Nye Samisone a linga eci a kuata enyona lialua?

⁸ Citava okuti ove wivaluka ovina vialua vi komõhisa Samisone a linga. Ndeci, Samisone ndaño ka kuatele cimue peka, wa tẽla oku ponda ohosi yimue, noke wa ponda 30 kalume va va Filisiti volupale luo Asikelone. (Olong. 14:5, 6, 19) Samisone wa kũlĩhĩle okuti nda ka ca kaile lekuatiso lia Yehova, nda lalimue eteke eye a linga ocina caco. Eci ca situluiwa keteke eci a kuatele enyona lialua noke lioku ponda eci ci soka 1000 ya va Filisiti. Nye eye a linga? Eye ka sandele ovava, ale oku seteka oku potolola ocitangi caco eye muẽle, pole, wa pinga ekuatiso ku Yehova.—Olong. 15:18.

9. Nye Yehova a linga eci Samisone a likutilila oku pinga ekuatiso? (Olonganji 15:19 kuenda etosi)

⁹ Yehova wa tambulula epingilo liekuatiso lia Samisone kuenje locikomo wa yikula ono yimue yovava. Eci Samisone a nyua ovava aco, “ongusu yaye ya tiuka kuenda ka lambukile vali.” (Tanga Olonganji 15:19 kuenda etosi.) Citava okuti, ono yaco yovava, yamamako toke anyamo a kuamamo, eci uprofeto Samuele a soneha elivulu Liolonganji. Olonjanja viosi va Isareli va enda oku mola ono yaco yovava, ovo va ponduile oku ivaluka okuti, nda va kolela ku Yehova, eye wa laikele oku va kuatisa kovitangi viosi.

10. Nye tu sukila oku linga oco tu tambule ekuatiso lia Yehova? (Talavo ociluvialuvia.)

¹⁰ Tu sukilavo oku sanda ekuatiso lia Yehova, ndaño okuti tua loñolõha ale, tu kuete ovoloño alua, ale tua linga ovina vialua kupange waye. Tu sukila oku lekisa esunguluko, loku limbuka okuti tu ka tẽla lika oku linga eci Yehova a tu yonguila, nda tua kolela kokuaye. Ndeci Samisone a kuata vali ongusu eci a nyua kovava Yehova o wĩhile, etu tu pondolavo oku kuata ongusu konepa yespiritu nda tu kuama aliangiliyo osi Yehova a siata oku tu lingila.—Mat. 11:28.

11. Manji Aleksey wa lekisa ndati okuti wa kolelele ku Yehova kuenda tu ci lingavo ndati?

¹¹ Kũlĩhĩsa ulandu wa manji Aleksey ko Russia, o kasi oku liyaka lelambalalo lialua. Nye co kuatisa oku amamako oku pama, ndaño lekalo liaco lia tĩla calua? Eye kumue lukãi waye va kuete esokiyo liwa konepa yespiritu. Eye wa lombolola hati: “Nda siata oku likolisilako oku tẽlisa esokiyo liange lielilongiso lio pokolika kuenda oku tanga Embimbiliya eteke leteke. Olomẽle viosi ame lukãi wange tu kũlĩhĩsa ocisonehua ceteke leteke kuenda tu likutilila kumosi ku Yehova.” Nye tu lilongisila kulandu wa manji Aleksey? Tu lilongisilako okuti, tu sukila oku kolela ku Yehova okuti kokuetu muẽle hakoko. Ndamupi? Oku kuata esokiyo liwa lielilongiso lio pokolika, oku likutilila, oku endaenda kolohongele kuenda kupange woku kunda, ci pamisa ekolelo lietu.  Nda tua ci linga, Yehova o sumũlũisa alikolisilo etu oku u vumba. Eye wa pamisa Samisone kuenda tua kolela okuti o tu pamisavo.

12. (a) Onjila yipi ka ya sungulukile Samisone a nõlele? (b) Momo lie ukamba wa Samisone la Delila wa litepelele lowu a kuata lakãi vakuavo?

¹² Samisone wa kalavo omunu umue ka lipuile, ndeci etu. Kuenje olonjanja vimue wa enda oku nõla olonjila ka via sungulukile. Onjila yimue eye a nõlele, yo kokela ovitangi vialua. Noke lioku kala onganji vokuenda kuotembo yimue, “eye wa sola ukãi umue wo Kocimbota co Soreke okuti onduko yaye Delila.” (Olong. 16:4) Kotete, Samisone wa yonguile ufeko umue u Filisiti. ‘Yehova eye wa sapuila Samisone oku ci linga, momo ca laikele oku eca epuluvi lioku liyaka la va Filisiti.’ Vepuluvi likuavo, Samisone wa kala konjo yukãi umue ocipuepue, kolupale lua va Filisiti ko Gasa. Vepuluvi liaco Suku wa eca unene ku Samisone, oco a pangulule apito kuenje ca koka okuti olupale ka lu kuata vali eteyuilo. (Olong. 14:1-4; 16:1-3) Pole, ukãi waco wa litepele la Delila. Citava okuti wa kala u Isareli. Kuenje ukamba wa kala pokati kavo, nda ka wa ecele ku Samisone epuluvi lioku liyaka la va Filisiti.

13. Nye Delila a linga ku Samisone?

¹³ Va Filisiti va feta olombongo vialua ku Delila oco a pakule Samisone. Ocisola Samisone a kuatela Delila caluile calua okuti, ka tẽlele oku limbuka eci Delila a yonguile oku u linga. Delila wa lipilikila Samisone oco o sapuile esunga lieci a kuatela ongusu yalua. Noke, Samisone wo situluila cosi. Ci sumuisa calua, momo Samisone eye muẽle wa likokela ovitangi. Elinga liaye lĩvi, lio kokela okuti vokatembo kamue ka kuatele vali ongusu  kuenda Yehova wo yanduluka.—Olong. 16:16-20.

14. Ovitangi vipi Samisone a liyaka lavio omo lioku kolela ku Delila?

¹⁴ Samisone wa likokela ohali yalua omo lioku kolela Delila, okuti ku Yehova hakoko. Va Filisiti va kuata Samisone, va tofola ovaso aye, noke vo tuala ko Gasa. Vepuluvi limue, Samisone wa sepuile olonungi violupale luaco. Pole cilo, eye wa kala oku sepuiwa ndupika ukuakufula olomema. Va Filisiti vamamako oku sepula Samisone eci vo wambata kocipito cimue va lingila osuku yavo Dagoni. Ovo va simĩle okuti, osuku yaco yesanda oyo ya va kuatisa oku kuata Samisone. Va Filisiti va yonguile oku u yola epembe vepuluvi liaco kuenje va vilikiya Samisone vokayike ‘oco a va papalise.’—Olong. 16:21-25.

15. Samisone wa lekisa ndati okuti eye weya oku kolela vali ku Yehova? (Olonganji 16:28-30) (Talavo ociluvialuvia koñoño.)

¹⁵ Samisone wa lingile ekandu limue linene, pole, ka liwekelepo oku vumba Yehova. Eye wa sanda onjila oco a tẽle oku linga eci Yehova a yonguile, ale oku yaka la va Filisiti. (Tanga Olonganji 16:28-30.) Samisone wa pinga ku Yehova hati: “Ecelela okuti ndi fetuluinya ño va Filisiti.” Yehova wa tambulula epingilo lia Samisone kuenda wa eca vali ongusu kokuaye lonjila yimue yi komõhisa. Kuenje Samisone, wa tẽla oku ponda va Filisiti valua onjanja eyi, okuti kotete ci sule.

16. Nye tu lilongisila kocituwa Samisone a lekisa noke lioku lueya?

¹⁶ Ocili okuti Samisone wa liyaka lovitangi omo liakulueya aye muẽle, pole, eye ka liwekelepo oku linga ocipango ca Yehova. Cimuamue haico ci pondola oku pita letu. Nda tua linga ekandu limue kuenda tua sukila oku tambula epindiso limue, ale oku pumba ovikele vimue, ka tu ka liwekipo oku vumba Yehova. Ivaluka okuti, Yehova lalimue eteke a tu yanduluka. (Osa. 103:8-10) Ndaño lakulueya etu, tu pondola oku amamako oku kuata esilivilo ku Yehova, ndeci ca lipita la Samisone.

17-18. Nye wa lilongisila kulandu wa Michael? (Talavo ociluvialuvia.)

¹⁷ Kũlĩhĩsa eci ca lipita lumalẽhe umue o tukuiwa Michael. Eye wa kuatele upange walua vekongelo, wa kala oñuatisi yekongelo kuenda ukundi wotembo yosi. Pole, ci sumuisa ceci okuti, eye wa linga ekandu limue kuenje wa pumba ovikele viaye vekongelo. Eye wa lombolola  hati: “Ovina via kala oku enda ciwa kuenda nda kuata ovina vialua vioku linga kupange wa Yehova. Vocipikipiki, nda liyeva okuti sia ponduile vali oku linga cimue kupange wa Yehova. Nda kũlĩhĩle okuti Yehova lalimue eteke a ka njanduluka, pole, nda enda oku sokolola nda handi a tẽla oku kuata ukamba umuamue la Yehova kuenda ndi kamamako oku uvumba vekongelo, loku linga ovina vialua nda lingaile kosimbu.”

¹⁸ Ci sanjuisa ceci okuti, Michael ka liwekelepo. Vokuenda kuotembo wa tumbulula ovikele viaye vekongelo kuenje cilo ukulu wekongelo haeye ukundi wotembo yosi. Eye wa lombolola ndoco: “Ame nda tiamisilile utima koku tumbulula ukamba wange la Yehova poku likutilila olonjanja viosi ku Yehova, oku lilongisa kuenda oku sokolola kueci nda lilongisa. Ekuatiso kuenda evetiyo nda tambula, ca piãla enene kakulu vekongelo, via ñuatisa oku limbuka okuti Yehova handi o ndi sole. Cilo, mondola oku vumba vali vekongelo lutima wa yela. Eci ca ndongisa okuti, Yehova olonjanja viosi o ka ecela omunu wosi o li kekembela lutima wosi.” Nye tu lilongisilako? Tu pondolavo oku kolela okuti Yehova o ka ecelela okuti tu linga upange waye, loku tu sumũlũisa ndaño lakulueya etu, nda olonjanja viosi tu likolisilako oku yuvula akulueya aco kuenda oku amamako oku kolela kokuaye.—Osa. 86:5; Olosap. 28:13.

19. O liyevite ndati noke yoku lilongisa catiamẽla ku Samisone?

¹⁹ Vocipama cilo, tua ivaluka ovolandu amue a komõhisa a lipita komuenyo wa Samisone. Eye ka lipuile, pole, wa likolisilako oku vumba Yehova, ndaño ceci a lueya la Delila. Yehova ko yandulukile. Yehova wa ecelela vali okuti pocakati ca Samisone o tẽlisa ocipango caye lonjila yi komõhisa. Toke cilo, Yehova wa tenda Samisone ndulume umue ukuekolelo li komõhisa. Eli olio esunga lieci o kongelela kulala wa vakuekolelo tu sanga ku Va Heveru ocipama 11. Ci lembeleka calua oku kũlĩha okuti, tu kasi oku vumba isia umue ukuacisola calua una o yongola oku tu pamisa, ca piãla enene eci tu liyeva okuti tua hongua! Omo liaco, ndeci ca linga Samisone, tu pingi ku Yehova ndoco: “Mange ohenda njivaluke kuenda ndi pamise.”—Olong. 16:28.