1. Omunu umue o liyeva ndati nda umue ukuepata wa liwekapo oku vumba Yehova?

O KUETE hẽ umue vepata okuti wa liwekapo oku vumba Yehova? Eci ci koka evalo lialua kutima! Manji umue o tukuiwa Hilda wa popia hati, “Eci ulume wange a fa noke 41 kanyamo yolohuela vietu, nda simila okuti eli olio evalo li piãla nda pita lalio. * Pole, eci omõlange ulume a siapo ekongelo, ukãi waye kuenda omãla vaye, eci ca ñokela evalo lia piãla vali enene.”

2-3. Ndomo ca tangiwa Kolosamo 78:40, 41, Yehova o liyeva ndati eci umue a liwekapo oku u vumba?

² Sokolola esumuo Yehova a yeva eci ovangelo vamue va pangele onepa kepata liaye va lekisa esino kokuaye! (Yuda 6) Sokololavo esumuo Yehova a kuata eci a mola afendeli vaye va Isareli vana a solele vo sinĩla olonjanja vialua. (Tanga Olosamo 78:40, 41.) Kolela okuti Isietu wokilu ukuacisola, o sumuavo eci umue a siapo oku u vumba. Eye wa kũlĩha evalo o kasi oku yeva. Eye lohenda yalua o ku ĩha elembeleko kuenda ekuatiso o sukila.

³ Vocipama cilo, tu ka konomuisa eci tu sukila oku linga oco tu tambule ekuatiso lia Yehova eci tu liyaka lesumuo nda umue wa liwekapo oku vumba Yehova. Tu ka konomuisavo ndomo tu pondola oku kuatisa vamanji vekongelo oku liyaka locitangi caco. Pole, tete tu konomuisa ovisimĩlo vimue ka via sungulukile tu sukila oku yuvula.

4. Olonjali vimue vi liyeva ndati eci umue pokati komãla a liwekapo oku vumba Yehova?

⁴ Eci omõla umue o soliwe calua a liwekapo oku vumba Yehova,  olonjali via siata oku lipula eci ovo va sukilile oku linga, oco va kuatise omõlavo oku kala vocili. Manji umue o tukuiwa Luke noke liomõlaye oku liwekapo oku vumba Yehova, wa popia hati: “Ame nda livetela evelo. Ca enda oku ñokela ocipakupaku. Olonjanja vimue nda enda oku lila loku yeva evalo kutima.” Manji umue o tukuiwa Elizabeth wa liyakavo locitangi cimuamue wa lipula hati: “Nye ame ndinjali nda linga okuti oco cĩvi? Nda liyeva ndu okuti sia tẽlele oku pindisa omõlange vocili.”

5. Helie o kuete ekandu nda umue wa liwekapo oku vumba Yehova?

⁵ Tu ivaluki okuti Yehova wa eca komunu lomunu ombanjaile yelianjo. Eci ci lomboloka okuti, etu tu nõla nda tu pokola kokuaye ale sio. Amalẽhe valua okuti olonjali viavo ka vi vumbi Yehova, pole, ovo va nõlapo oku vumba Yehova loku amamako oku kolela kokuaye. Vakuavo va kuata olonjali via likolisilako oku va longisa oku sola Yehova, pole, noke omãla vaco veya oku siapo oku vumba Yehova. Kuenje eci ci lekisa okuti, omunu lomunu pokati ketu eye o nõla nda o vumba Yehova. (Yeh. 24:15) Omo liaco, olonjali vina via sumua omo liomõlavo wa siapo oku vumba Yehova, ka va ka sime okuti ovo va kuete eko!

6. Umalẽhe umue o liyeva ndati eci umue pokati kolonjali wa siapo oku vumba Suku?

⁶ Olonjanja vimue, umue pokati kolonjali o siapo oku vumba Yehova loku siapo epata liaye. (Osa. 27:10) Eci ci sumuisa calua omãla omo okuti olonjali via kala ndongangu yiwa kokuavo. Manji umue o tukuiwa Esther okuti isiaye wa tundisiwa vekongelo, wa popia hati: “Ame olojanja vialua nda enda oku lila, momo nda limbuka okuti isia ka kaile lika oku siapo ocili. Eye wa nõlelepo okuti lalimue eteke a ka vumba vali Yehova. Ndi sole calua isiange, kuenje eci eye a tundisiwa vekongelo, nda enda oku sakalala calua lekalo liaye. Ame sia kuatele esanju.”

7. Yehova o liyeva ndati eci umue pokati kolonjali viumalẽhe umue a siapo oku vumba Yehova?

⁷ Ene amalẽhe, nda umue pokati kolonjali viene wa siapo oku vumba Yehova, etu tu sumuavo calua! Kũlĩha okuti Yehova wa kapakovo esumuo liove. Eye o ku sole kuenda o sanjuka calua ekolelo u kuetele kuenje etu tu ku solevo kuenda tu vamanjove. Ivalukavo okuti, ku kuete eko lionjila olonjali viove vi nõla. Ndomo ca tukuiwa ale, Yehova wa eca komunu lomunu elianjo lioku nõla nda o vumba Yehova, ale sio. Omunu lomunu wa li tumbika loku papatisiwa, ‘ambata ocikele caye muẽle.’—Va Gal. 6:5 etosi.

8. Nye vakuepata va sukila oku linga osimbu va talamẽla umue ukuepata oku tiuka ku Yehova? (Talavo okakasia losapi hati, “ Tiuka ku Yehova.”)

⁸ Eci umue ukuepata a siapo Yehova, ove amamako oku lavoka okuti eteke limue eye o tiuka Kokuaye. Nye o sukila oku linga osimbu o talamẽla eye oku tiuka ku Yehova? O sukila oku amamako oku pamisa ekolelo liove. Poku ci linga, o ka lekisa ongangu yiwa ku vakuavo vepata kuenda ku una wa tundisiwa. Handi vali, o kuata ongusu yalua yoku pandikisa kesumuo lialua o yevite. Tu kũlĩhĩsi ananga amue o sukila oku kapako.

9. Nye o sukila oku linga oco o pamise ekolelo liove? (Talavo okakasia losapi hati, “ Ovisonehua Vimue vi Lembeleka Nda Umue Ukuepata wa Siapo Yehova.”)

⁹ Cosi o sukila oku linga, oku amamako oku pamisa ekolelo liove. Ci kuete esilivilo lialua oku amamako oku pamisa ekolelo liove kuenda lia vakuavo vepata. Ndamupi o ci linga? Pamisa ukamba wove la Yehova poku tanga Ondaka Yaye loku sokolola kovina wa tanga kuenda oku endaenda kolohongele. Manji umue o tukuiwa Joanna okuti isiaye kuenda manjaye va siapo ocili, wa popia hati: “Ame nda tulumũha eci nda tanga ovolandu a sangiwa Vembimbiliya ndeci, wa Avigaile, Ester, Yovi, Yosefe kuenda Yesu. Ongangu yavo ya ndi pamisa calua kuenda ya ñuatisa oku kuata ovisimĩlo via sunguluka. Ovisungo vietu vi sangiwa vo jw, via siata oku ndi pamisavo.”

10. Ndomo ca tangiwa Kolosamo 32:6-8, nye ci tu kuatisa oku pandikisa kesumuo?

¹⁰ Sapuilako Yehova ovina viosi vi ku sakalaisa. Eci o yeva esumuo lialua, ku ka liwekepo oku likutilila kokuaye. Amamako oku pinga ku Suku yetu ukuacisola, oco a ku kuatise oku sokolola lonjila yimuamue ndeci eye loku ‘eca kokuove olondunge kuenda oku ku pindisa vonjila o sesamẽla oku endela.’ (Tanga Olosamo 32:6-8.) Pamue ci tĩla calua oku sapuila Yehova ndomo o liyevite. Pole, Yehova wa kũlĩha evalo o yevite vutima. Eye o ku sole calua kuenda o yongola okuti u sapuila cosi o yevite vutima.—Etu. 34:6; Osa. 62:7, 8.

11. Ndomo ca tangiwa ku Va Heveru 12:11, momo lie tu kolelela kepindiso lia Yehova? (Talavo okakasia losapi hati, “ Oku Tundisiwa Vekongelo ci Lekisa Ocisola ca Yehova Kokuetu.”)

¹¹ Tava onjila ya nõliwa lakulu vekongelo. Oku tundisiwa vekongelo kupanga onepa yesokiyo lia Yehova. Epindiso liaye liocisola onjila yimue yoku kuatisa vana va liwekapo  oku vumba Yehova kuenda li kuatisavo omanu vosi. (Tanga Va Heveru 12:11.) Vamue vekongelo va pondola oku popia okuti akulu vekongelo ka va kuamele onjila yiwa yoku pindisa omunu wa tundisiwa, pole, ivaluka okuti ndomo kua tetuluiwa ocitangi caco, ca lingiwa oco ka ku ka sandekiwe elinga lĩvi omunu waco. Etu ka tua kũlĩhĩle ovina viosi via kongelamo. Kuenje ca sunguluka oku kolela okuti akulu vekongelo poku linga esombiso liaco, va kuama lutate olonumbi Viembimbiliya kuenda va sombisila “vonduko ya Yehova.”—2 Asa. 19:6.

12. Onima yipi yiwa vamue va kuata omo lioku tava kesokiyo lia Yehova lioku pindisa?

¹² Poku tava konjila akulu vekongelo va nõla yoku tundisa vekongelo umue ukuepata, citava okuti ove o kuatisa omunu waco oku tiuka ku Yehova. Manji Elizabeth, wa tukuiwa ale, wa lombolola hati: “Ca tĩla calua oku sokolola okuti ka tu pondola vali oku sapela lomõla wetu uveli. Kuenje eci eye a tiuka ku Yehova, wa popia okuti onjila ya nõliwilepo yoku ndi tundisa vekongelo ya sungulukile. Noke wa lombolola okuti nda lilongisilako ovina vialua viwa.” Manji Elizabeth hati: “Nda lilongisa okuti epindiso lia Yehova olonjanja viosi lia sunguluka.” Ulume waye Mark, wa popiavo hati: “Noke omõla wetu wa ndi sapuila okuti wa nõlapo oku tiuka momo ka tua endaile oku lika laye. Ndi pandula calua Yehova omo a tu kuatisa oku pokola kokuaye.”

13. Nye ci pondola oku ku kuatisa oku yula esumuo?

¹³ Sapela lakamba vana va kapako esumuo o kasi lalio. Linga ukamba la vamanji va pama kekolelo okuti, va pondola oku ku kuatisa oku amamako lovisimĩlo via sunguluka. (Olosap. 12:25; 17:17) Manji Joanna wa tukuiwa ale, wa popia hati: “Vutima wange nda liyeva okuti ñasi ulika. Pole, omo lioku kuata akamba va koleliwa, ca ñuatisa calua.” Nye o sukila oku linga nda vamue vekongelo va ku sapuila ovina vi ku kokela esumuo?

14. Momo lie tu sukilila oku ‘amamako oku likapako omunu lukuavo, loku liecela pokati lutima wosi’?

¹⁴ Kala ukuepandi la vamanji. Ka tu ka lavoki okuti vosi olonjanja viosi va vangula ovina via sunguluka. (Tia. 3:2) Vosi yetu ka tua li puile, omo liaco, ka ci tu komõhisa eci vamue va vangula, ale va tu lingila ovina vi tu kokela esumuo. Ivaluka okuti upostolo Paulu wa tu lungula hati: “Amamiko oku likapako omunu lukuavo, oku liecela pokati lutima wosi, ndaño umue o kuete esunga lioku kuatela ondaka ukuavo.” (Va Kol. 3:13) Manji umue ukãi okuti umue ukuepata wa tundisiwile vekongelo wa lombolola hati: “Yehova wa ñuatisa oku ecela vamanji vatata ocitangi caco lonjila yimue ya sunguluka, ndaño ka va lipuile.” Nye ekongelo li sukila oku linga oco li kuatise vakuepata?

15. Nye ci pondola oku kuatisa epata lina okuti li kuete umue ukuepata wa tundisiwa ndopo?

¹⁵ Kala ukuahenda kuenda kapako epata liaco. Manji umue ukãi o tukuiwa Miriam wa lombolola okuti, nda kuata ohele yoku enda  kolohongele noke lia manjange oku tundisiwa vekongelo. “Nda kala lusumba lieci omanu va laikele oku popia. Pole, vamanji valua va sumuile leci ca pita, lomue wa popia olondaka vĩvi catiamẽla ku manjange wa tundisiwa. Ngeca olopandu vialua kokuavo, omo sia liyevele ulika kevalo liange.” Manji ukuavo ukãi wa popia hati: “Noke liomõla wetu oku tundisiwa vekongelo, akamba veyile oku tu lembeleka. Vamue va lombolola okuti ka va kuatele eci va popia. Vakuavo va lilila kumue lame, vamue va ndi sonehela ukanda welembeleko. Eci ovo va linga ca ñuatisa calua!”

16. Ekongelo li pondola oku lembeleka ndati vana va kuete epata lia siapo oku vumba Yehova?

¹⁶ Amamako oku kuatisa epata lia una wa siapo oku vumba Yehova. Ca piãla enene cilo, ovo va sukila ocisola cove kuenda elembeleko. (Va Hev. 10:24, 25) Olonjanja vimue, epata lia una wa siapo oku vumba Yehova va siata oku limbuka okuti vamue vekongelo ka va vangula vali lavo, va va tenda ndu okuti, va siapovo oku vumba Yehova. Ka tu yongola okuti epata liliyeva ndoco! Amalẽhe vana okuti olonjali via siapo oku vumba Yehova, va sukila calua epandiyo kuenda elembeleko. Manji Maria una okuti ulume waye wa siapo oku vumba Yehova kuenda wa siapo epata, wa popia hati: “Vamue pokati kakamba vange veya konjo va teleka okulia kuenda va ñuatisa koku longisa omãla vange. Ovo va ñuatela ohenda yalua kuenje va lila lame. Ovo va ndi tundilako olunda oci omanu va kala oku sandeka ovina viuhembi viatiamẽla kokuange. Va ndembeleka calua!”—Va Rom. 12:13, 15.

17. Nye akulu vekongelo va sukila oku linga oco va lembeleke vana va sumua?

¹⁷ Akulu vekongelo va sanda otembo yoku pamisa epata lia una wa siapo oku vumba Yehova. Ove o kuete ocikele cimue cilikasi coku lembeleka epata liaco. (1 Va Tes. 5:14) Sanda oku va lembela osimbu handi ohongele ka yafetikile kuenda noke liohongele. Olonjanja vimue va pasuisa kuenda likutilila lavo. Va laleka oku talavaya lavo kupange woku kunda, ale olonjanja vimue va laleka oku likongela kefendelo liove liepata. Akulu vekongelo va sukila oku lekisa kolomeme via Yehova vina via  sumua, ohenda kuenda ocisola ovo va sukila.—1 Va Tes. 2:7, 8.

18. Ndomo ca tangiwa 2 Petulu 3:9, nye Suku a lavoka ku vana va liwekapo oku u vumba?

¹⁸ Yehova “ka yongola okuti umue o nyõliwa, puãi, o yongola okuti vosi va likekembela.” (Tanga 2 Petulu 3:9.) Ndaño okuti omunu umue wa linga ekandu linene, omuenyo waye handi u kuete esilivilo kovaso a Suku. Ivaluka okuti Yehova wa feta ondando yimue yinene poku eca omuenyo Womõlaye o soliwe ku vosi yetu. Yehova locisola calua o kuatisa vana va siapo oku u vumba oco va tiuke kokuaye. Yehova o lavoka okuti ovo va ci linga, ndomo Yesu a ci lekisa kolusapo luomõla ocisandui. (Luka 15:11-32) Valua va silepo ocili noke va tiuka ku Isiavo ukuacisola wokilu. Kuenje vamanji vekongelo va va yolela calua. Manji Elizabeth wa tukuiwa ale, eye wa kuata esanju lialua eci omõlaye a tambuiwa. Eye wa popia hati, “Ndi pandula calua vana va tu kuatisa oku amamako oku kuata elavoko.”

19. Momo lie tu sukilila oku amamako oku kolela ku Yehova?

¹⁹ Tu sukila oku kolela ku Yehova olonjanja viosi. Eye lalimue eteke a tu songuila kovina vi tu nenela ovitangi. Eye Isia ukuacali, ukuahenda okuti o kuetele ocisola calua ku vosi vana vo sole haivo vo vumba. Kuenje kolela okuti Yehova lalimue eteke a ka ku yanduluka votembo yovitangi. (Va Hev. 13:5, 6) Manji Mark wa tukuiwa ale, wa popia hati: “Yehova lalimue eteke a tu yandulukile. Eye olonjanja viosi o tu kuatisa eci tu kuata ovitangi.” Yehova o ka amamako oku tu ĩha “unene wa piãla.” (2 Va Kor. 4:7) Omo liaco, ove o pondola oku amamako lekolelo kuenda elavoko ndaño umue ukuepata wa siapo oku vumba Yehova.