1-2. (a) Ndomo ca tangiwa Kolosapo 16:31, tu tenda ndati vamanji va kuka? (b) Apulilo api tu ka tambulula vocipama cilo?

KULI ocitumãlo cimue ko Estados Unidos okuti ku sangiwa ulu walua. Ulu waco ka wa kanguiwile oco u lingiwe ovina vioku liposuisa. Vana va nyula ocitumãlo caco, pamue ka va limbuka okuti ulu kuenje va u pitahãla.

² Cimuamue haico okuti, vamanjetu va kuka va sokisiwa ndulu owu; ovo va kuete esilivilo lialua. Ondaka ya Suku yi sokisa owele wavo lekolowa lia posoka. (Tanga Olosapo 16:31; 20:29) Pole, pamue ka tu limbuka esilivilo lieposo liaco. Eci amalẽhe va limbuka esilivilo vamanji va kuka va kuete, va pondola oku kuatisiwa calua okuti oku kuata ovokuasi ci sule. Vocipama cilo, mu ka tambuluiwa apulilo atatu vokuti: Momo lie Yehova a tendela vamanji va kuka okuti va kuete esilivilo lialua? Ocitumãlo cipi vamanji va kuka va kuete vocisoko ca Yehova? Nye tu sukila oku linga oco tu kuatisiwe longangu yavo?

3. Ndomo ca tangiwa Kolosamo 92:12-15, momo lie vamanji va kuka va kuetele esilivilo ku Yehova?

³ Vamanji va kuka va soliwe calua la Yehova Suku. Eye o vanja kokuavo ndomo ovo va tuwa vokati kuenda wa va kũlĩha ciwa kuenje o sanjukila ovituwa viavo viwa. Yehova o sanjuka calua eci vamanji va kuka va lomboluila amalẽhe ukũlĩhĩso va kuete vokuenda kuanyamo alua wupange wa Suku. (Yovi 12:12; Olosap. 1:1-4) Yehova o sanjukilavo epandi liavo. (Mal.  3:16) Ndaño okuti vomuenyo wavo va liyakavo lovitangi, pole, ekolelo va kuetele Yehova lalimue eteke lia tepulukile. Elavoko va kuete lio kovaso yoloneke lia pama vali, okuti eci va fetika oku lilongisa ocili ci sule. Yehova o va sole calua, momo va kasi oku amamako oku sapula onduko yaye, “ndaño voku kuka.”—Tanga Olosamo 92:12-15.

4. Ovisimĩlo vipi vi pondola oku pamisa vamanji va kuka?

⁴ Nda o kasi oku kuka, kolela okuti Yehova ivaluka upange wosi ove wa linga tunde kosimbu. (Va Hev. 6:10) Ove wa lekisa ombili koku kuatisa kupange woku kunda kuenje eci ca sanjuisa Isietu wokilu. Wa liyaka lovitangi vialua, oku kongelamo vana va ku sumuisa kuenda wa pokola loku teyuila olonumbi viesunga Viembimbiliya, loku kuatisa kovopange osi a velapo vocisoko ca Yehova. Ove wa tava kapongoloko alua a lingiwa vocisoko ca Yehova. Wa kuatisa kuenda wa pamisa vana va kasi kupange wakundi votembo yosi. Yehova oku sole calua omo liepandi o lekisa. Eye wa likuminya okuti, “ka ka yanduluka vana vo kolela”! (Osa. 37:28) Yehova oku sapuila hati: “Toke eci o kala lowele, ndi kamamako oku ku tekula.” (Isa. 46:4) Omo liaco, ku ka sime okuti, omo cilo wa kuka calua ku kuete vali esilivilo vocisoko ca Yehova. Ove o kuete esilivilo lialua!

5. Ocina cipi vamanji va kuka va sukila oku ivaluka?

⁵ Vamanji va kuka vocisoko ca Yehova va kuete upange walua woku linga. Ndaño okuti pamue ka va kuete vali ongusu va kuatele, ovo va kuete ovolandu alua va lilongisa vokuenda kuanyamo alua. Yehova amamako oku va vetiya volonjila via litepa, ndeci ci lekisiwa kovolandu akuãimo o kosimbu, la-a o koloneke vilo.

6-7. Tukula ovolandu amue a lekisa ndomo Yehova a sumũlũisa vana va kuka haivo vo vumba lekolelo.

⁶ Tu sanga ovolandu alua awa Vembimbiliya omanu vakuekolelo va vumba ciwa Yehova voku kuka kuavo. Ndeci, Mose wa kuatele 80 kanyamo eci a nõliwa nduprofeto wa Yehova kuenda ndusongui wa va Isareli. Handi vali, citava okuti eci Daniele a kuata 90 kanyamo oco Yehova o nõla nduprofeto. Kuenda  upostolo Yoano wa kuata eci ci pitahãla 90 kanyamo eci a soneha elivulu Liesituluilo.

⁷ Valua vakuavo vakuekolelo ka va kũlĩhĩwile kuenda citava okuti omanu ka va endaile oku va kapako. Pole, Yehova wa mola ekolelo liavo kuenje wa va sumũlũisa. Ndeci, ulume umue ‘ukuesunga haeye wa sumbilile Suku’ o tukuiwa okuti Simeone, ka tukuiwa calua Vembimbiliya, pole, Yehova wo kũlĩhĩle ciwa kuenda wo wĩha esumũlũho lioku mola Yesu vuñaña loku tukula ocitumasuku catiamẽla ku Yesu la ina yaye. (Luka 2:22, 25-35) Sokololavo kuprofeta cimbumba Ana. Eci a kuata 84 kanyamo, olonjanja viosi “wa kala kala vonembele.” Eye omo lioku “kala kala vonembele” Yehova wo wĩhavo esumũlũho lioku mola Yesu eci a kala oñaña. Ci kale Simeone kuenda Ana va kapiwileko la Yehova.—Luka 2:36-38.

8-9. Nye manji umue a linga vocisoko ca Yehova eci a linga ocimbumba?

⁸ Koloneke vilo, vamanji valua okuti va kuka va linga ongangu yiwa kamalẽhe. Kũlĩhĩsa ulandu wa manji Lois Didur. Eye wa kuata lika 21 kanyamo eci a litumbika kupange wukundi wulikasi ko Kanada. Noke eye kumue lulume waye John, va kala anyamo alua kupange woku nyula akongelo? Noke va kala ko Betele yo Kanada ci soka 20 kanyamo. Eci manji Lois a kuata 58 kanyamo, eye kuenda manji John va lalekiwa oku ka tẽlisa upange umue kofeka yo Ukrania. Nye va sukilile oku linga? Anga hẽ va sokolola okuti va kuka ale kuenje ka va pondola vali oku ilukila kofeka yikuavo? Ovo va tava ocikele caco kuenje manji John wa nõliwa oku panga onepa Kocisoko Cakulu ko Betele. Eci pa pita anyamo epanduvali, manji John wa fa kuenda manji Lois wa nõlapo oku amamako kocikele caye. Cilo, manji Lois o kuete eci ci soka 81 kanyamo, o kasi oku amamako oku vumba Yehova lekolelo kumue lepata lio Betele kofeka yo Ukrania kuenje vamanji vosi vo sole calua.

⁹ Ovimbumba vialua ndeci manji Lois pamue ka vi kapiwako calua ndeci va kala eci ohueli yaye ya kala lomuenyo; pole, umbumba ka u tepulula esilivilo ovo va kuete. Yehova o sanjukila vamanji akãi vana va kuatisa alume vavo vokuenda kuanyamo alua kuenda cilo va kasi oku amamako oku u vumba lekolelo. (1 Tim. 5:3) Handi vali ovo va siata oku pamisa calua vana okuti handi amalẽhe.

10. Ongangu yipi yiwa ya lekisa manji Tony?

¹⁰ Vamanji valua va kuka okuti va kasi kolonjo vioku tata vana va kuka, lavovo va kuete esilivilo lialua. Ndeci manji umue o tukuiwa Tony, cilo o sangiwa kocitumãlo caco. Eye wa papatisiwila ko Pensilvânia ko Estados Unidos kosãi Yenyenye yunyamo 1942, eci a kuata 20 kanyamo. Noke yoku papatisiwa wa liyaka locitangi coku yuvula oku panga onepa kopulitika kuenje wa kapiwa vokayike loku kalamo anyamo avali. Eye lukãi waye Hilda va  tekula omãla vavali vocili. Vokuenda kuanyamo alua, manji Tony wa kuatisa akongelo atatu ndusongui (okuti cilo mitavaso yakulu vekongelo) kuenda wa kalavo mitavoso yolohongele vimbo. Eye wa enda oku songola olohongele kuenda alilongiso Embimbiliya vokayike. Eci manji Tony a tẽlisa 98 kanyamo, ka liwekelepo oku talavayela Yehova. Eye wamamako oku likolisilako oku vumba Yehova kuenda oku talavayela kumue la vamanji vekongelo!

11. Tu lekisa ndati okuti tuakapako vamanji va kuka vana okuti va sangiwa kolonjo vioku tata vana va kuka?

¹¹ Tu lekisa ndati esumbilo ku vamanji va kuka, vana okuti va sangiwa kolonjo vioku tata vana va kuka? Nda citava , akulu vekongelo va sukila oku linga esokiyo lioku va kuatisa oku yevelela olohongele kuenda oku panga onepa kupange woku kunda. Tu lekisavo okuti tua va kapako poku va nyula, ale oku va laleka pocakati covideo. Tu yongola oku kapako vamanji va kuka okuti va kasi kovitumãlo vina okuti ocipãla lekongelo. Nda ka tua kuatele utate tu ka ivala vamanji vaco va kuka. Vamanji vamue va kuka ka va tẽla vali oku ivaluka, ale ka ci leluka oku vangula catiamẽla kokuavo. Pole, tu pondola oku kuatisiwa nda tu sanda otembo yoku va linga apulilo loku yevelela ovolandu atiamẽla kesanju va kuata vocisoko ca Yehova.

12. Vamanji vapi tu pondola oku sanga vekongelo tu kasi?

¹² Tu pondola oku komõha oku mola vamanji vakuekolelo okuti vakuangangu yiwa vekongelo tu kasi. Manji umue o tukuiwa Harriette wa vumba Yehova vokuenda kuanyamo alua vekongelo a kala ko Nova Jersey ko Estados Unidos. Noke eye wa iluka oco a ka kale lomõlaye ukãi. Vamanji vekongelo a sangiwa cilo, va sanda otembo yoku u kũlĩha ciwa kuenje va limbuka okuti eye o kuete ovolandu alua awa. Manji Harriette wa siata oku va pamisa lulandu waye wupange woku kunda eci a fetika oku lilongisa ocili, kunyamo 1920. Kotembo yaco, eci a endaile kupange woku kunda wa enda oku ambata osikova yokovayo omo pamue wa ponduile oku kapiwa vokayike loku kalamo otembo yimue. Kuenje kunyamo 1933 eye wa kala vokayike osemana yimosi. Vokuenda kuotembo yaco, ulume waye okuti Hambangiko ya Yehova wo kuatisa poku tata omãla vaye vatatu vatito. Ocili okuti vana va kuka vakuekolelo ndeci manji Harriette, va sesamẽla epandiyo.

13. Nye tu lilongisa catiamẽla kesilivilo vamanji va kuka va kuete vocisoko ca Yehova?

¹³ Vamanjetu va kuka va kuete esilivilo lialua vocisoko ca Yehova. Ovo va mola ndomo Yehova a siata oku sumũlũisa ocisoko caye volonjila viñi viñi kuenda ovo muẽle. Ovo va lilongisa ovina vi kuete esilivilo kakulueya avo. Tu va tenda okuti “ono yolondunge,” kuenda oku lilongisila kulandu wavo. (Olosap. 18:4) Nda wopa otembo yoku va kũlĩha, ekolelo liove li ka pamisiwa kuenda ove o ka lilongisa ovina vialua!

14. Elivulu Liesinumuĩlo 32:7, li vetiya amalẽhe oku linga nye?

¹⁴ Sanda otembo yoku sapela la vamanji vana va kuka. (Tanga Esinumuĩlo 32:7.) Ocili okuti ovaso avo a pondola oku vuvala, ongendo londaka yi tepuluka, pole, vutima handi amalẽhe kuenda va kuete “onduko yiwa” ku Yehova. (Uku. 7:1) Ivaluka esunga lieci Yehova a va solile calua. Amamako oku lekisa ocisola kokuavo. Setukula Elisia. Eye wa lipilikile oku kala ocipepi la Eliya keteke liavo lia sulako. Elisia wa popia olonjanja  vitatu hati: “Si ku yanduluka.”—2 Olos. 2:2, 4, 6.

15. Apulilo api tu sukila oku linga ku vamanji va kuka?

¹⁵ Tu lekisa okuti tua kapako vamanji va kuka poku va linga apulilo locisola. (Olosap. 1:5; 20:5; 1 Tim. 5:1, 2) Linga apulilo ndeci: “Eci wa kala umalẽhe nye ca ku kuatisa oku tava okuti wa sanga ocili?” “Ovina via pita love via ku kuatisa ndati oku pamisa ukamba wove la Yehova?” “Ovina vipi wa pita lavio via siata oku ku kuatisa oku amamako lesanju kupange wa Yehova?” (1 Tim. 6:6-8) Kuenje yevelela lutate eci ovo va vangula catiamẽla kulandu wavo.

16. Momo lie oku sapela pokati ci pondola oku kuatisa ci kale vamanji va kuka kuenda amalẽhe?

¹⁶ Nda manji umue wa kuka kuenda umalẽhe umue va sapela pokati, vosi yavo va kuatisiwa. (Va Rom. 1:12) Ene amalẽhe ekolelo line li ka pamisiwa vali calua konjila ndomo Yehova a tata afendeli vaye kuenda manji wa kuka o ka liyeva okuti o soliwe. Eye o ka sanjukila calua oku ku sapuila ndomo Yehova a siata oku u sumũlũisa.

17. Momo lie tu popela okuti vamanji va kuka va posoka vali calua, osimbu anyamo a pita?

¹⁷ Eposo lioketimba li tepuluka osimbu omunu a linga ukulu, pole, vana va kolela Yehova va kala omanu va posoka kokuaye osimbu va kuka. (1 Va Tes. 1:2, 3) Momo lie? Momo vokuenda kuanyamo, ovo va ecelela okuti espiritu lia Suku li va pindisa kuenda oku va kuatisa oku kuata ovituwa viwa. Kuenje osimbu tu kũlĩha ciwa vamanjetu va kuka, oku va sola, loku lilongisila kovolandu avo, tu ka limbuka okuti va kuete esilivilo lialua kokuetu!

18. Nye tu ka lilongisa vocipama cikuãimo?

¹⁸ Ekongelo li pondola lika oku pama calua nda amalẽhe va kapako vamanji va kuka kuenda nda vamanji va kuka va kapakovo amalẽhe. Ocipama cikuãimo, tu ka lilongisa ndomo vamanji va kuka va lekisa okuti ovo va kapako amalẽhe vekongelo muna va kasi.