OCIPAMA CELILONGISO 32
Pamisa Ekolelo Liove Kululiki
“Ekolelo . . . uvangi wovina ka vi letiwe.” —VA HEV. 11:1.
OCISUNGO 11 Oviluvo vi Sivaya Suku
OVINA TU LILONGISA *
NDA ove wa kulila vepata lina okuti Olombangi Via Yehova, citava okuti wa lilongisa eci catiamẽla ku Yehova tunde vumõla. Va ku longisa okuti Yehova eye Ululiki, o kuete ovituwa viwa kuenda o yongola oku pongolola ongongo oco yi kale ocumbo celau.—Efet. 1:1; Ovil. 17:24-27.
2. Ndamupi omanu vamue va tenda vana va tava Kululiki?
2 Omanu valua ka va tava okuti kuli Suku kuenda ka va tavavo okuti eye Ululiki wovina viosi. Pole, ovo va popia okuti omuenyo wa tukuluka ño, oku fetikila kovina visulemo. Vamue pokati komanu va tava kovina viaco, vana okuti va lilongisa calua. Ovo va popia okuti uloño u tava okuti Embimbiliya ka li vangula ocili kuenda omanu vana va kolela Kululiki aveke, ka va kũlĩhĩle cimue kuenda ka va tangele.
3. Momo lie ci kuetele esilivilo oku pamisa ekolelo lietu?
3 Ovina omanu vana va loñoloha va popia, vi tu kokela hẽ atatahãi atiamẽla ku Yehova Ululiki wetu ukuacisola? Cosi ca tamba lika kesunga lieci tu tavela okuti Yehova eye Ululiki. Anga hẽ tu ci linga omo okuti va tu sapuila oco tu tave kovina viaco, ale tu ci lingila omo okuti etu muẽle tua linga akonomuiso aco? (1 Va Kor. 3:12-15) Ndaño okuti tua kuama onjila ya litepa oco tu linge Ombangi ya Yehova, vosi yetu tu sukila oku amamako oku pamisa ekolelo lietu. Nda tua ci linga, ka tu ka yapuisiwa ‘lolondunge violuali lovisimĩlo viaño,’ okuti vi longisiwa lomanu vana va pengisa Ondaka ya Suku. (Va Kol. 2:8; Va Hev. 11:6) Oco tu kuatisiwe, ocipama cilo ci ka lombolola (1) esunga lieci omanu valua ka va tavela Kululiki, (2) ndomo o pamisa ekolelo liove ku Yehova, Ululiki wove kuenda (3) ndomo ove o pondola oku amamako lekolelo lia pama.
ESUNGA LIECI OMANU VALUA KA VA TAVELA KULULIKI
4. Ndomo ca tangiwa ku Va Heveru 11:1 kuenda etosi, nye Embimbiliya li popia catiamẽla oku kua kunamẽla ekolelo?
4 Omanu vamue va sima okuti oku kuata ekolelo ci lomboloka oku tava kocina cimue ka ci kuete uvangi. Pole, ndomo ci popia Embimbiliya, eci ka ci lomboloka ekolelo liocili. (Tanga Va Heveru 11:1 kuenda etosi.) Limbuka okuti ekolelo kovina ka viletiwe ndeci Yehova, Yesu kuenda Usoma wokilu, lia kunamẽla kuvangi wa koleliwa. (Va Hev. 11:3) Onoño yimue okuti noke ya linga Ombangi ya Yehova ya popia hati: “Olombangi Via Yehova vi tava kovina vi kuete ociseveto, pole, ka va pembula ovina viatiamẽla kuloño.”
5. Momo lie omanu valua va tavela okuti omuenyo wa tukuluka ño?
5 Pamue tu lipula ndoco, ‘Nda kuli ovovangi a lekisa okuti kuli Ululiki umue, momo lie omanu valua va tavela okuti Suku haeyeko wa sovola omuenyo?’ Omanu vamue ka va la konomuisa catiamẽla kuvangi waco. Robert okuti cilo Ombangi yimue ya Yehova, wa popia hati: “Omo okuti kosikola ka va lombolola okuti ovina viosi via lulikiwa, nda tavelevo kocisimĩlo caco. Eci nda kuata 20 kanyamo nda vangula Lolombangi Via Yehova kuenda nda lilongisa okuti Embimbiliya li tu ĩha uvangi uwa woku tava okuti Suku wa lulika ovina viosi.” *—Tala okakasia losapi hati, “ Elungulo Limue Kolonjali.”
6. Momo lie vamue ka va tavela okuti kuli Ululiki?
6 Vamue ka va tava Kululiki momo va popia okuti va tava lika kovina va lete. Pole, ovo va tava kovina ka vi muiwa ndeci, ongusu ovina vikuete, momo ovo va kolela kovina viaco. Ekolelo Embimbiliya li tukula, mua kongela “uvangi wovina ka vi letiwe.” (Va Hev. 11:1) Oco o kuate uvangi wokuti kuli ululiki, ci sukila otembo kuenda alikolisilako oku lilongisa, pole, omanu valua ka va yongola oku ci linga. Omunu una ka lingi akonomuiso a tiamẽla kovovangi aco, citava okuti o pitĩla petosi lioku popia hati, ka kuli Suku.
7. Anga hẽ omanu vosi va tanga calua ka va tava okuti Suku wa lulika ovina viosi? Ci lombolola.
7 Noke lioku linga akonomuiso atiamẽla koviluvo, olonoño vimue via siata oku tava okuti Suku eye wa lulika ovina viosi. * Ndeci ca pita la Robert wa tukuiwa ale, valua va sima okuti ka kuli Ululiki momo kolosikola via velapo ka ku longisiwa ovina viatiamẽla ku una wa lulika ovina. Pole, olonoño vialua via siata oku kũlĩha kuenda oku sola Yehova. Ndeci ca pita lolonoño evi, vosi yetu tu sukila oku pamisa ekolelo lietu ku Suku, ndaño tua loñoloha calua, ale sio. Lomue o tu ci lingila.
NDOMO O PAMISA EKOLELO LIOVE KULULIKI
8-9. (a) Epulilo lipi tu konomuisa cilo? (b) Oku linga akonomuiso atiamẽla koviluvo ci ku kuatisa ndati?
8 O pamisa ndati ekolelo liove Kululiki? Tu konomuisi olonjila vikuãla.
9 Lilongisa eci catiamẽla koviluvo. O pondola oku pamisa ekolelo liove poku luluvalela lutate kovinyama, kovikũla kuenda kolombungululu. (Osa. 19:1; Isa. 40:26) Poku linga akonomuiso kovina viaco, ci ka ku kuatisa oku tava okuti Yehova eye Ululiki. Valivulu etu mu sangiwa ovipama vi lombolola ovina vialua viatiamẽla koviluvo. Likolisilako oku konomuisa alivulu aco, ndaño pamue ka ci leluka oku kuata elomboloko. Linga cosi ci tava. Tala ovipama vietu vo Internete, jw.org, olovideo via posoka calua vi lombolola catiamẽla koviluvo via lekisiwa kohongele yofeka kanyamo a sulako!
10. Tukula ulandu umue u lekisa okuti oviluvo vi eca uvangi wokuti kuli Ululiki umue. (Va Rom. 1:20)
10 Eci o linga akonomuiso atiamẽla koviluvo, kapako lutate ovina o kasi oku lilongisa vina vi situlula ovina viatiamẽla kululiki wetu. (Tanga Va Roma 1:20.) Ndeci, utanya weca owuya locinyi okuti u kuatisa oviendalomuenyo vongongo. Pole, olosongo vimue viekumbi vi pondola oku panga lãvi. Etu tumanu tu sukila oku teyuiwa kolosongo viaco. Kuenda tu kasi muẽle oku teyuiwa! Ndamupi? Ongongo yetu ya pangiwa lonjila yimue okuti yi tu teyuila kolosongo viaco evi. Osimbu olosongo viocinyi cutanya ci livokiya ovina vi tu teyuila kolosongo vi livokiyavo. Kaliye ku tava hẽ okuti kuli Ululiki umue ukuacisola haeye wa loñoloha?
11. Pi o sanga olonumbi vi pondola oku pamisa ekolelo liove Kululiki? (Tala okakasia losapi hati, “ Ovimalẽho Vimue vi Pamisa Ekolelo.”)
11 O pondola oku sanga olonumbi vialua oco o pamise ekolelo liove koviluvo poku konomuisa o Índice das Publicações da Torre de Vigia kuenda vo jw.org. Citava okuti o fetika lovipama kuenda olovideo vi sangiwa vulala wosapi hati, “Kuli hẽ Umue wa Vilulika?” Ovio vimbumbulu, vi lekisa ovina vi komõhisa catiamẽla kovinyama kuenda koviluvo vikuavo. Handi vali, vi lekisavo ndomo olonoño vimue via siata oku setukula oku panga ovina va mola koviluvo.
12. Eci tu lilongisa Embimbiliya, ovina vipi tu sukila oku sokolola?
12 Oku lilongisa Embimbiliya. Onoño ya tukuiwa kocinimbu ca kuãla, kefetikilo ka tavele Kululiki. Noke wa tava okuti kuli ululiki umue. Eye hati: “Ekolelo liange ka lia kunamelele lika poku lilongisa ovina viatiamẽla kuloño. Pole, lia kunamelelevo poku lilongisa lutate Embimbiliya.” Pamue o kuete ukũlĩhĩso walua watiamẽla Kembimbiliya. Ndaño ndoco, oco o pamise ekolelo liove Kululiki, o sukila oku amamako oku lilongisa Ondaka ya Suku. (Yeh. 1:8; Osa. 119:97) Sokolola kovolandu a sangiwa Vembimbiliya. Sokololavo kovitumasuku viosi vieya oku tẽlisiwa kuenda ndomo asonehi Vembimbiliya va kuata ovisimĩlo vimuamue. Nda wa ci linga, o tava okuti Ululiki umue ukuacisola haiye weyuka olondunge wa tu lulika kuenda wa tuma oku soneha Embimbiliya. *—2 Tim. 3:14; 2 Pet. 1:21.
13. Olondaka vipi violondunge tu sanga Vondaka ya Suku?
13 Poku lilongisa Ondaka ya Suku limbuka ndomo alungulo alio a kuatisa. Ndeci, tunde osimbu Embimbiliya li lungula okuti ocisola coku sola olombongo ci koka oku “litoma lohali yalua.” (1 Tim. 6:9, 10; Olosap. 28:20; Mat. 6:24) Anga hẽ elungulo eli li kuetevo esilivilo koloneke vilo? Elivulu limue li lombolola catiamẽla kovituwa viomanu li popia hati: “Omanu va litumbika calua kovokuasi ka va kuete esanju kuenda veyuka asakalalo alua. Ndaño muẽle omanu vana va lilekisa okuti va kuete olombongo vialua, ovo va siata oku liyaka vali calua locitangi cuhayele.” Kuenje ci kuete esilivilo lialua oku kapako elungulo Liembimbiliya liatiamẽla koku yuvula oku sola olombongo! Ivaluka hẽ olonumbi vikuavo Viembimbiliya via ku kuatisa? Eci tu sokolola kalungulo osi awa a sangiwa Vembimbiliya, tu ka limbuka okuti Ululiki wetu ukuacisola wa kũlĩha ovina vi tu kuatisa kuenda olonjanja viosi tu ka kolela kalungulo aye. (Tia. 1:5) Poku ci linga tu ka kuata esanju lialua komuenyo.—Isa. 48:17, 18.
14. Oku lilongisa Embimbiliya ku tu longisa nye catiamẽla ku Yehova?
14 Lilongisa locimãho ciwa coku kũlĩha Yehova. (Yoa. 17:3) Osimbu o lilongisa ekalo lia Yehova kuenda ovituwa viaye o ka limbukavo ovituwa viaco kovina eye a lulika. Oku lilongisa catiamẽla kovituwa via Yehova ceca uvangi wokuti Yehova o kasiko muẽle. (Etu. 34:6, 7; Osa. 145:8, 9) Osimbu amamako oku kũlĩha ciwa Yehova, ekolelo liove kokuaye li livokiya, ocisola ukuetele ci livokiyavo kuenda ukamba woye laye u pama.
15. Oku vangula la vakuene catiamẽla ku Suku ci ku kuatisa ndati?
15 Vangula la vakuene catiamẽla ku Suku. Nda wa ci linga ekolelelo liove li ka kolapo. Pole, nda omunu o kundila o lekisa atatahãi okuti ka kuli Suku kuenje ove kua kũlĩhĩle ndomo u tambulula omunu waco? Sanda Ocisonehua cimue ci tambulula apulilo tu sanga valivulu etu kuenda noke sapela lomunu waco. (1 Pet. 3:15) O pondolavo oku pinga kukundi ukuavo oco a ku kuatise oku eca etambululo. Nda omunu o tava ketambululo Liembimbiliya ale sio, ove o kuatisiwa omo liekonomuiso wa linga. Ekolelo liove li pamisiwa calua. Kuenje nda wa ci linga, ove ku ka kembiwa la vana va lilekisa ndu okuti va loñoloha, pole, ka va tava okuti kuli Ululiki.
PAMISA EKOLELO LIOVE!
16. Nye ci pondola oku pita nda ka tua pamisile ekolelo lietu?
16 Ndaño tu kasi ale oku vumba Yehova vokuenda kuotembo yalua tu sukila oku amamako oku pamisa ekolelo lietu. Momo lie? Momo nda ka tua kuatele utate ekolelo lietu li hongua. Ivaluka okuti, ekolelo mua kongela uvangi wovina ka vi letiwe. Ovina ka tu pondola oku mola vi leluka oku vi vala. Paulu wa ci tukula okuti, ekambo liekolelo omo ‘liekandu li tu tanga tanga.’ (Va Hev. 12:1) Tu pondola oku amamako ndati oku pamisa ekolelo lietu?—2 Va Tes. 1:3.
17. Nye ci pondola oku tu kuatisa oku amamako oku pamisa ekolelo lietu?
17 Tete, pinga ku Yehova espiritu sandu liaye kuenda ci linga olonjanja viosi. Momo lie? Momo ekolelo, limue pokati kepako liespititu. (Va Gal. 5:22, 23) Tu pamisa lika ekolelo lietu Kululiki wetu lekuatiso liespiritu sandu liaye. Nda tuamamako oku pinga ku Yehova espiritu liaye, eye o ka tu lĩha. (Luka 11:13) Handi vali, tu pondola oku likutilila poku popia hati: “Tu vokiyeko ekolelo.”—Luka 17:5.
18. Ndomo ca tangiwa Kosamo 1:2, 3, esumũlũho lipi tu kuete cilo?
18 Olonjanja viosi tanga Ondaka ya Suku. (Tanga Olosamo 1:2, 3.) Eci osamo eyi ya sonehiwa, havosiko va Isareli va kuatele Ocihandeleko cosi ca Suku. Omo liaco, olosoma kuenda ovitunda via kuatele olokopia kuenje anyamo osi epanduvali, kua lingawaile esokiyo liokuti, “alume, lakãi, lomãla” kuenda ovingendeleyi ko Isareli va enda oku liongolola oco va yevelele oku tangiwa Kuocihandeleko ca Suku. (Esin. 31:10-12) Koloneke via Yesu, kua kala lika omanu vatito va kuatele oviña Viovisonehua kuenje oviña vikuavo via kala vosunangonga. Pole, koloneke vilo, omanu valua va kuete onepa yimue Yembimbiliya, ale liosi. Esumũlũho linene. Tu lekisa ndati okuti tua sanjukila ombanjaile yaco?
19. Nye tu sukila oku linga oco tuamameko oku pamisa ekolelo lietu?
19 Tu lekisa okuti tua sanjukila ombanjaile yoku kuata Ondaka ya Suku poku yi tanga eteke leteke. Tu sukila oku linga esokiyo limue lioku tanga loku lilongisa Embimbiliya, okuti ka tu ci lingi lika nda tu kuete otembo. Nda tua likolisilako oku lilongisa eteke leteke, tu ka amamako oku pamisa ekolelo lietu.
20. Nye tu sukila oku nõlapo oku linga?
20 Ca litepa la “vakualondunge lava va lilongisa” voluali lulo, ceci okuti ekolelo lietu lia kunamẽla Kondaka ya Suku. (Mat. 11:25, 26) Kuenje omo lioku lilongisa Embimbiliya tua kũlĩha esunga lieci ekalo voluali lua vihĩla kuenda eci Yehova a ka linga. Omo liaco, tu nõlipo oku pamisa ekolelo lietu loku kuatisa omanu valua nda citava oco va kolele Kululiki wetu. (1 Tim. 2:3, 4) Kuenda tuamamiko oku sivaya Yehova loku popia olondaka vi sangiwa Kesituluilo 4:11 hati: “A Yehova Suku yetu, ove o sesamẽla oku tambula ulamba . . . momo ove wa lulika ovina viosi.”
OCISUNGO 2 Yehova Oyo Onduko Yove
^ Ovinimbu 5 Embimbiliya lieca uvangi wasuapo wokuti Yehova Suku wa lulika ovina viosi. Pole, omanu valua ka va tava. Ovo va tava okuti omuenyo wa tukuluka ño. Anga hẽ ovina va popia vi tu kokela atatahãi, nda Yehova eye muẽle wa lulika ovina viosi? Sio, ka ci tu kokela nda tua pamisa ekolelo lietu. Ocipama cilo, ci lombolola ndomo tu cilinga.
^ Ovinimbu 5 Kolosikola vialua, alongisi ka va longisa okuti, Suku eye wa lulika ovina viosi. Alongisi vamue va popia okuti nda va ci linga, va kala ndu okuti va kasi oku kisika olondonge oku tava ku Suku.
^ Ovinimbu 7 Ci soka 60 kovolandu omanu va loñoloha calua oku kongelamo olonoño va tava okuti ovina via lulikiwa, a sangiwa vo Índice das Publicações da Torre de Vigia. Vemẽhi liosapi hati, “Uloño,” vokasapi hati, “olonoño vi tava kovina via lulikiwa.” Ovolandu akuavo a sangiwavo Velivulu Lioku Konomuisa Liolombangi Via Yehova. Vemẽhi liosapi hati, “Ukũlĩhĩso Lulonoño,” vokasapi hati, “Oku Pulisiwa (ovipama vio Despertai!)”
^ Ovinimbu 12 Ndeci tala ocipama losapi hati: “A ciência e a Bíblia são compatíveis?” vo Despertai! ya Kayovo 2011 kuenda ocipama losapi hati: “Cosi Yehova a Popia ci Tẽlisiwa” Vutala Wondavululi 1 ya Susu, 2008.
