1. Alikolisilo api valua va siata oku linga kupange wa Yehova?

 ETU tu kuete upange walua woku linga osimbu esulilo ka lieyile. (Mat. 24:14; Luka 10:2; 1 Pet. 5:2) Vosi yetu tu yongola oku vumba Yehova lutima wosi. Valua va vokiya upange wavo woku kunda. Vamue va litumbika kupange wakundi votembo yosi. Vakuavo va lieca oku talavaya ko Betele, ale kokutunga olonjango viusoma. Handi vali, vamanji valua alume va likolisilako oku sanda ocikele coñuatisi yekongelo, ale cukulu wekongelo. (1 Tim. 3:1, 8) Yehova o sanjuka calua eci a mola okuti valua pokati kafendeli vaye va lieca lutima wosi poku u vumba!—Osa. 110:3; Isa. 6:8.

2. Tu liyeva ndati nda ka tua tambuile ocikele cimue tua yonguile?

² Pamue tu yeva esumuo eci tu limbuka okuti tua fetika oku likolisilako tunde osimbu, pole ka tu kasi oku tẽlisile ocimãho cetu. Ale pamue tu sumua omo lioku kuka, ale omo liovitangi vikuavo vi tu kokela okuti ka tu kuata ovikele tua yonguile. (Olosap. 13:12) Eci oco ca pita la manji Melissa. * Eye wa yonguile oku enda ko Betele, ale Kosikola Yoku Pindisa Akundi Vusoma, pole, eye hati: “Anyamo ñuete cilo, ka a ngecelela vali oku litumbika kovopange aco. Olonjanja vimue, ndi yeva esumuo.”

3. Ananga api vamue va sukila oku eca oco va tambule ovikele vikuavo kupange wa Yehova?

 ³ Vamanji vana okuti amalẽhe haivo va kuete uwayele uwa pamue va sukila oku likolisilako oku lekisa ovituwa vina vi va kuatisa oku tambula ovikele vikuavo. Ndeci, citava okuti vamue va loñoloha, va nõla lonjanga onjila yimue kuenda va lekisa ombili poku linga upange umue, pole, ovo va sukila oku lilongisa vali oku kala vakuepandi, oku linga upange umue lutate loku sumbiwa la vakuavo. Nda wa likolisilako oku lekisa ovituwa vi sukiliwa citava okuti o ka tambula ocikele kua lavokaile. Tu konomuisi ulandu wa manji Nick. Eci eye a kuata 20 kanyamo, wa sumuile calua momo ka nõliwile ndoñuatisi yekongelo. Eye hati: “Nda kala oku sima okuti nda linga cimue cĩvi.” Pole, manji Nick ka liwekelepo. Eye wamamako oku likolisilako oku kuatisa ekongelo kuenda kupange woku kunda. Cilo, eye o talavaya Ndukulu Yofiliale.

4. Nye tu konomuisa vocipama cilo?

⁴ Ove hẽ wa sumua omo okuti ku kasi oku tẽlisa ovimãho vimue wa yonguile? Nda oco o kasi oku pita laco, sapuilako Yehova ndomo o liyevite. (Osa. 37:5-7) Handi vali, pinga ekuatiso ku manji umue wa pama kekolelo ndomo o pondola oku mioñolola kupange wa Suku kuenda seteka oku kapako olonumbi viaco. Nda wa ci linga, citava okuti o ka tẽlisa ovimãho o yongola. Pole, ndeci ca lipita la Melisa wa tukuiwa ale, pamue ku tẽla vali oku lingila upange Yehova ndomo o yongola. Nye o sukila oku linga? Ndamupi amamako lesanju liove? Oco ku tambuluiwe apulilo a-a, ocipama cilo ci ka lombolola (1) pi o sanga esanju, (2) ndomo o kuata vali esanju kuenda (3) ovimãho vikuavo o sukila oku kuata oco vi ku kuatise oku kuata esanju.

5. Oco tu kuate esanju, kovina vipi tu sukila oku tiamisila utima? (Ukundi 6:9)

⁵ Elivulu Liukundi 6:9, li lombolola eci ci pondola oku tu kuatisa oku kuata esanju. (Tanga.) Omunu o sanjuka poku tiamisila ‘ovaso kovina a lete,’ kovina akuete kuenda kovina ka kuete. Ca litepa lomunu una o yongola oku tẽlisa olonjongole noke ka vi tẽlisa ka kuata esanju. Nye ci tu longisa? Oco tu kuate esanju, tu sukila oku tiamisila utima kovina tu kuete kuenda kovina tu lavoka oku tambula.

6. Olusapo lupi tu konomuisa cilo kuenda pi tu tiamisila utima?

⁶ Anga hẽ citava muẽle oku kuata esanju lovina o kuete? Noke liotembo yimue, tu yongola oku sandiliya ovina vikuavo. Ocili okuti, citẽliwa. Tu pondola oku sanjukila ovina tu kuete cilo. Tu ci linga ndati? Oco tu kuatisiwe, tu konomuisi olusapu lua Yesu wolotalendo, u sangiwa ku Mateo 25:14-30. Tu tiamisili utima kueci tu lilongisilako ndomo tu sanga esanju kuenda asumũlũho cilo.

7. Loku teta onimbu lombolola eci catiamẽla kolusapo lua Yesu wolotalendo.

⁷ Volusapo, ulume umue wa laikele oku linga ungende. Osimbu handi ka endele, wa vilikiya apika vaye kuenda wa eca kupika lupika olotalendo oco va linge lavio olomĩlu. * Ulume wa kũlĩhĩle okuti apika vaye va kuatele ovoloño a litepa, kuenje ku umue wa eca olotalendo vitãlo, ukuavo vivali, handi ukuavo yimosi. Apika vavali, va likolisilako  calua oku talavaya lolotalendo via cime cavo. Upika watatu, ka lingile lacimue lotalendo a tambuile kuenje cime caye wo tundisa.

8. Ndamupi upika watete wa tukuiwa volusapo a ponduile oku sanjuka?

⁸ Upika watete wa ponduile oku sanjuka calua momo cime caye wo wĩha vali olotalendo vitãlo. Via kala olombongo vialua kuenje eci ca lekisile okuti cime wokolelele calua! Pole, nye ci popiwa kupika wavali? Eci ca ponduile oku u sumuisa calua momo eye ka tambuile olotalendo vialua ndeci upika watete. Pole, nye eye a linga?

9. Nye Yesu ka lomboluile catiamẽla kupika wavali? (Mateo 25:22, 23)

⁹ Tanga Mateo 25:22, 23. Yesu ka popele okuti upika wavali wa sumuile kuenda wa kala locikumbiti omo lioku tambula lika olotalendo vivali. Yesu ka popelevo okuti upika wa kala loku hoya ndu okuti: ‘Oceci lika ndi tambula? Momo ndi tẽlavo oku talavaya, ndeci upika wa tambula ndeti olotalendo vitãlo! Nda cime cange o sima okuti siunalavayiko yiwa, citava okuti ndi soleka olotalendo viaye kuenje ndi linga upange wange muẽle si talavaya vali laye.’

10. Nye upika wavali a linga lolotalendo viaye?

¹⁰ Ndeci ca linga upika watete, upika wavali wa kapeleko ocikele caye vo wĩhile kuenda wa talavaya lutima wosi loku limbuka okuti upange cime caye o wĩha wa kuatele esilivilo lialua. Kuenje kolotalendo vivali kuavokiya vali vivali. Cime, wa sumũlũisa upika waco omo lioku talavaya kuaye ciwa. Cime ka lekisile  lika esanju kupika, pole, wo kundika vali ovikele vikuavo!

11. Tu vokiya ndati esanju lietu?

¹¹ Tu pondola oku kuata esanju lialua eci tu likolisilako oku linga eci tu tẽla kovikele viosi tu kuete kupange wa Yehova. “Litumbika lutima wosi” kupange woku kunda kuenda koku linga ovopange ekongelo. (Ovil. 18:5; Va Hev. 10:24, 25) Pongiya ciwa ovipama viohongele, oco o tẽle oku eca atambululo a pamisa. Tẽlisa ovipama viosi o kuete vekongelo vokati kosemana. Nda wa lalekiwa oku kuatisa kupange umue vekongelo, u tẽlisa kuenda kala omunu umue wa koleliwa. Ku ka tende ovopange aco ndu okuti o kasi oku pesela otembo. Likolisilako oku loñoloha kupange wove. (Olosap. 22:29) Nda wa litumbika ciwa kovopange a Yehova loku tẽlisa ovikele vialio, o ka kula lonjanga konepa yespiritu kuenda esanju liove li ka li vokiya calua. (Va Gal. 6:4) Handi vali, ci ka leluka kokuove oku sanjukila vakuẽle nda va tambula ocikele cina ove wa yonguile oku kuata.—Va Rom. 12:15; Va Gal. 5:26.

12. Nye ca kuatisa manji Melissa kuenda Nick, oku kuata esanju lialua?

¹² Ivaluka manji Melissa wa yonguile oku ka talavaya ko Betele, ale oku enda Kosikola Yakundi Vusoma? Ndaño okuti ka ca tevele vali oku tẽlisa ovimãho viaco, eye wa popia hati: “Nda likolisilako kupange wakundi votembo yosi kuenda kolonjila vikuavo vioku kunda. Eci ca ndi sanjuisa calua.” Ndamupi manji Nick a yula esumuo eci eye ka nõliwile ndoñuatisi yekongelo? Eye hati: “Nda tiamisilile utima kovina nda ponduile oku linga ndeci oku kunda loku eca atambululo apamisa kolohongele. Nda sonehavo ocicapa coku talavaya ko Betele kuenje unyamo wa kuamamo va mbilikiya.”

13. Onima yipi o kuata nda wa likolisilako kocikele o kuete? (Ukundi 2:24)

¹³ Anga hẽ nda wa likolisilako kocikele o kuete, o ka tambula vali ovikele vikuavo? Citava okuti oco, ndeci ca pita la manji Nick. Pole, nda ka ca tẽlisiwile ndeci ca pita la manji Melissa, esanju liove lika livokiya kuenda o ka kuata vali esanju lialua omo lioku linga cosi o tẽla kupange wa Yehova. (Tanga Ukundi 2:24.) Handi vali, o ka kuata esanju lialua omo lioku kũlĩha okuti alikolisilo ove a sanjuisa Cime cetu Yesu Kristu.

14. Nye tu sukila oku ivaluka olonjanja viosi eci tu sokolola kovimãho vietu kupange wa Yehova?

¹⁴ Nda okuti tu kasi ale oku likolisilako kupange wa Yehova cilo, ci lomboloka okuti ka tu pondola oku linga vali cimue? Sio hacoko! Tu pondola oku kuata ovimãho vi tu kuatisa oku kala akundi vawa, alongisi vawa kuenda vioku kuatisa vamanjetu. Tu tẽlisa ovimãho viaco, nda tu tiamisila utima koku kuatisa omanu vakuavo okuti kokuetu muẽle ci sule.—Olosap. 11:2; Ovil. 20:35.

15. Ovimãho vipi vi pondola oku ku kuatisa oku vokiya esanju liove?

¹⁵ Ovimãho vipi o pondola oku litumbikila? Pinga ku Yehova oco a ku kuatise oku kũlĩha ovimãho o sukila oku tẽlisa. (Olosap. 16:3; Tia. 1:5) Citava hẽ oku seteka oku tẽlisa vimue pokati kovimãho via tukuiwa  kocinimbu catete cocipama cilo, ndeci, ukundi wasokamo, ukundi wotembo yosi, oku talavaya ko Betele, ale koku tunga olonjango viusoma? Ale, oku lilongisa elimi likuavo oco o sandeke olondaka viwa, ale oku ka kundila kocitumãlo cikuavo. O pondola oku kũlĩha vali ovina vikuavo catiamẽla kovimãho poku tanga elivulu Organizados para fazer  a vontade de Jeová kocipama 10 kuenda oku vangula lakulu vekongelo muna o kasi. * Eci o tẽlisa ovimãho evi, vakuene va ka limbuka oku kula kuove kuenda esanju liove li ka livokiya.

16. Nye o sukila oku linga nda okuti ku kasi oku tẽlisa ocimãho cimue o yongola?

¹⁶ Nda hẽ ku kasi oku tẽlisa lacimue pokati kovimãho via tukuiwa? Seteka ocimãho cikuavo o pondola oku tẽlisa. Konomuisa olonjila vimue vikuãimo.

17. Ndomo ca tangiwa ku 1 Timoteo 4:13, 15, nye manji umue ulume a sukila oku linga oco a kale ulongisi uwa?

¹⁷ Tanga 1 Timoteo 4:13, 15. Nda okuti ove u manji umue wapapatisiwa, seteka oku mioñoloha koku kala ohundi yiwa kuenda oku longisa ciwa. Momo lie? Momo nda wa likolisilako oku tanga ciwa, uhundi yiwa kuenda ulongisi uwa, o ka tẽla oku kuatisa vana va ku yevelela. Kuata ocimãho coku lilongisa loku kapako onepa lonepa yilomboluiwa vombrochura Litumbika Koku Tanga Kuenda Koku Longisa. Lilongisa olonepa viaco valivala a litepa kuenje kapako eci wa lilongisa eci o kuata ohundo yimue. Pinga olonumbi vikuavo ku manji ukuakueca alungulo, ale kakulu vakuavo vekongelo “okuti va likolisilako oku kala olohundi viwa kuenda alongisi vawa.” * (1 Tim. 5:17) Ku ka tiamisile lika utima kovina wa lilongisa vombrochura yaco, pole, kuatisavo olonjeveleli oku pamisa ekolelo liavo, ale va vetiya oku kapako eci va kasi oku lilongisa. Poku ci linga,  o ka vokiya esanju liove kuenda esanju liolonjeveleli li ka livokiyavo.

18. Nye ci tu kuatisa oku tẽlisa ovimãho kupange woku kunda?

¹⁸ Vosi yetu tu kuete ocikele coku kunda kuenda coku linga olondonge. (Mat. 28:19, 20; Va Rom. 10:14) O yongola hẽ oku mioñoloha kupange waco wa velapo? Tanga ombrochura Longisa kuenje noke kapako eci wa lilongisa. O pondolavo oku kuatisiwa lolonumbi vi sangiwa Vekalo Lietu Tuakristão Kuenda Oku Kunda kuenda lolovideo yombangulo yikuamiwa via siata oku lekisiwa kolohongele viovokati kosemana. Seteka olonjila vikuavo oco o limbuke evi via velapo. Nda wa kapako olonumbi evi, o ka kala ukundi umue wa loñoloha.—2 Tim. 4:5.

19. O lekisa ndati ovituwa Viukristão?

¹⁹ Eci o litumbikila ovimãho, ku ka ivaleko cimue pokati kavio ca velapo vali okuti, ovituwa vi sanjuisa Suku. (Va Gal. 5:22, 23; Va Kol. 3:12; 2 Pet. 1:5-8) Nye o sukila oku linga oco o tẽlise ocimãho caco? Ndeci, citava okuti o yongola oku kuata ekolelo lia pama. O sukila oku tanga alivulu etu a eca olonumbi viwa a ku kuatisa oku pamisa ekolelo liove. O pondolavo oku kuatisiwa poku tala ovipama vio JW Broadcasting^® vi lekisa ovolandu a vamanji, va siata oku amamako lekolelo ndaño lovitangi vialua va liyaka lavio. Kuenje konomuisa olonjila ndomo o setukula ekolelo liavo vomuenyo wove.

20. Nye tu sukila oku linga oco tu kuate esanju kuenda oku yuvula esumuo?

²⁰ Ka kuli atatahãi okuti, vosi yetu tu pondola oku likolisilako kupange wa Yehova cilo. Voluali luokaliye lua Suku, tu ka tẽla oku u vumba okuti lacimue ci ka tu tateka. Kuenje nda tua likolisilako kapuluvi osi tu kuete, tu kuata esanju lialua kuenda tu yuvula ovina vi tu sumuisa. Handi vali ocina ca velapo, tu eca esivayo lulamba ku Yehova, ‘Suku yetu ukuesanju.’ (1 Tim. 1:11) Omo liaco, tu sanjukili ovikele tu kuete!