SOKOLOLA okuti umue oku ĩha cimue cokulia okuti kua la cilia. Ove o pondola oku lilongisako cimue kokulia kuaco poku ku tala, oku lehako, oku kũlĩha ndomo kua pangiwa, ale oku pulisa vakuẽle catiamẽla kokulia kuaco. Pole, onjila yiwa yoku kũlĩha nda okulia kuaco o ku sole, poku ku maha.

1-2. Ndomo ca tangiwa Kolosamo 34:8, tu limbuka ndati okuti Yehova uwa?

² Tu pondola oku kũlĩha okuti Yehova uwa, poku tanga Embimbiliya, lalivulu etu kuenda oku yevelela vakuetu oku lombolola catiamẽla kasumũlũho va siata oku tambula ku Yehova. Pole, tu pondola oku kolela vali ciwa okuti Yehova uwa, poku seteka etu muẽle uwa waye. (Tanga Olosamo 34:8.) Tu kũlĩhĩsi ndomo ci lingiwa. Citava okuti tu yongola oku iñila kupange wakundi votembo yosi, pole, oco o tẽlise ocimãho caco o sukila oku leluisa omuenyo wove. Pamue tua siata oku tanga ohuminyo ya Yesu yokuti, nda tua sandiliya tete Usoma, Yehova o ka tu ĩha ovina tu sukila, pole, ka tua la limbuka oku tẽlisiwa kuolondaka viaco komuenyo wetu. (Mat. 6:33) Nda tua kolela kohuminyo ya Yesu tu yuvula oku pesela olombongo vialua kovina tu landa, loku linga apongoloko kupange wetu okuti tu kuata vali otembo yalua kupange woku kunda. Nda tua ci linga, tu ka limbuka okuti Yehova o ka tu ĩha ovina tu sukila. Tu ka ‘seteka’ komuenyo wetu okuti Yehova uwa.

3. Ndomo ca tangiwa Kolosamo 16:1, 2, helie o tambula ovina viwa via Yehova?

³ Yehova “uwa ku vosi,” ndaño muẽle ku vana ka vo kũlĩhĩle. (Osa. 145:9; Mat. 5:45) Pole, ca piãla enene vana va sole Yehova haivo vo vumba lutima wosi, va tambula asumũlũho alua a tunda kokuaye. (Tanga Olosamo 16:1, 2) Tu kũlĩhĩsa vimue pokati kovina viwa Yehova a siata oku tu lingila.

4. Yehova o lingila ndati ovina viwa ku vana vamela kokuaye?

 ⁴ Olonjanja viosi tu kapako ovina tu lilongisa catiamẽla ku Yehova, tu limbuka ndomo ci tu kuatisa komuenyo wetu. Osimbu tu lilongisa catiamẽla kokuaye kuenda kolonumbi viaye viesunga eye o tu kuatisa oku liwekapo oku sokolola kuenda oku linga ovina ka vi taviwa laye. (Va Kol. 1:21) Eci tu litumbika ku Yehova loku papatisiwa eye o tu ĩha ovina vialua viwa ndeci, oku kuata utima wa yela kuenda oku kuata ukamba uwa laye.—1 Pet. 3:21.

5. Tu limbuka ndati uwa wa Yehova kupange woku kunda?

⁵ Tu limbuka uwa wa Yehova osimbu tu likolisilako kupange woku kunda. Anga hẽ wumunu umue ukuasõi? Afendeli valua va Yehova vakuasõi. Citava okuti osimbu handi kua kaile ombangi yimue ya Yehova, kua la sima oku veta kepito liomunu una kua kũlĩhĩle loku sapela laye catiamẽla Kembimbiliya. Ocili okuti cilo, o kasi oku ci linga olonjanja viosi. Handi vali, lekuatiso lia Yehova wa siata oku limbuka esanju li tunda kupange woku kunda! Ove wa siatavo oku limbuka ekuatiso lia Yehova kolonepa vikuavo. Eye o ku kuatisa oku tulumũha eci umue kupange woku kunda a ku pembula. O ku kuatisavo oku sokolola ocisonehua cimue eci umue a lekisa onjongole kupange woku kunda. Yehova oku ĩhavo ongusu yoku amamako oku kunda, ndaño vocikanjo caco omanu ka va lekisa onjongole kesapulo liusoma.—Yer. 20:7-9.

6. Epindiso Yehova a siata oku eca li lekisa ndati uvangi wovina viwa a tu lingila?

⁶ Yehova o lekisavo uwa waye poku tu pindisa kupange woku kunda. (Yoa. 6:45) Kolohongele viovokati kosemana ku lingiwa ovindekaise vina okuti vi tu kuatisa kupange woku kunda. Kefetikilo tu kuata usumba woku fetika ombangulo yimue yokaliye, pole, eci tu ci linga tu limbuka okuti onjila yaco yi vetiya vana va kasi vocikanjo caco. Etu tua siatavo oku vetiyiwa kolohongele viekongelo kuenda kolohongele viofeka oku kuama olonjila vialitepa kupange woku kunda okuti lalimue eteke tua setekele oku ci linga. Handi vali, pamue tu siapo ocitumãlo cetu tua solele, pole, poku ci linga Yehova o tu sumũlũisa. Tu konomuisa ovina vimue viwa Yehova a tu ĩha eci tu kolela kokuaye loku seteka olonjila viokaliye vioku linga eci ca velapo kokuaye ndomo ci likuata lekalo lietu. Cilo, tu konomuisi olonjila tu pondola oku kuama oco tu vokiye upange wetu woku kunda.

7. Asumũlũho api tu tambula eci tu likolisilako oku vokiya upange wetu woku kunda?

⁷ Tu ameli ku Yehova. Kũlĩhĩsa ulandu wukulu umue wekongelo o tukuiwa Samuel, * o kasi oku kundila kumue lukãi waye ko Colombia. Ohueli eyi ya kuata esanju yoku talavaya ndakundi votembo yosi vekongelo va kala, pole, ovo va yonguile oku vokiya upange wavo woku kunda poku ka kuatisa ekongelo limue lia sukilile ekuatiso. Oco va tẽlise ocimãho caco, ovo va sukilile oku siapo ovina vimue ovo va solaile oku linga. Manji Samuel wa popia hati: “Tua kapako elivulu lia Mateo 6:33, kuenje tua liwekapo oku landa ovina ka tua sukilile. Pole, ka ca lelukile oku sia onjo yetu. Oyo ya tungiwa ndomo tua yonguile kuenda ka tua kuatele ofuka.” Eci ohueli ya ilukila kekongelo likuavo lia limbuka okuti ka va sukilile olombongo vialua. Manji Samuel wa popia hati: “Tua siata oku mola ndomo Yehova a tu songuila loku tambulula olohutililo vietu. Tua limbuka okuti Yehova wa sanjukila onjila tua nõla kuenda tua limbukavo ocisola  eye a tu kuetele.” O pondola hẽ oku vokiya upange wove woku kunda lonjila yimuamue? Nda wa ci linga, kolela okuti o ka pamisa ukamba wove la Yehova kuenda eye o ka ku ĩha ovina viosi o sukila.—Osa. 18:25.

8. Nye wa lilongisa kolondaka via popiwa la vamanji Ivan kuenda Viktoria?

⁸ Tua kuata esanju kupange wetu. Kũlĩhĩsa ulandu wa vamanji Ivan la Viktoria ohueli yimue yakundi votembo yosi ko Quirguistão. Ovo va nõlapo oku ambata omuenyo umue wa leluka okuti ci va ecelela oku lieca olumue kovopange osi oku kongelamo upange woku tunga. Manji Ivan wa popia hati: “Tua talavaya lutima wosi kovopange osi. Ndaño kesulilo lieteke tu yeva ekavo, tua enda oku kuata esanju omo lioku kũlĩha okuti ongusu yetu tua yi pesila koku linga upange wa Yehova. Tua kuatavo esanju omo tua linga akamba valua vokaliye kuenda tua kuata ovolandu alua awa.”—Mar. 10:29, 30.

9. Manji umue ukãi ovitangi vipi a siata oku liyaka lavio oco a vokiye upange waye woku kunda kuenda onima yipi ya siata oku yi ililako?

⁹ Tu pondola oku kuata esanju kupange wa Yehova ndaño okuti, tu liyaka lovitangi vialua. Ndeci, manji Mirreh okuti umue cimbumba wa kuka Kocifuka co Afrika wa kala ondotolo yu wa tambula epuyuko kupange kuenje wa litumbika kupange wakundi votembo yosi. Manji Mirreh o kasi luvei umue u vala calua okuti u tateka oku linga ungende woku enda kupange woku kunda konjo lanjo. Pole, eye o tẽla oku linga upange woku kundila vokololo. Eye o kuete apasu alua kuenda alilongiso Embimbiliya okuti vimue o vi lingila vo telefone. Nye ca vetiya manji Mirreh oku vokiya upange waye ku Yehova? Eye hati: “Utima wange weyukile ocisola nda kuatela Yehova la Kristu Yesu. Kuenje olonjanja viosi ndi likutilila oco Yehova a ñuatise oku likolisilako oku linga eci ndi tẽla kupange waye.”—Mat. 22:36, 37.

10. Ndomo ca tangiwa ku 1 Petulu 5:10, nye vana va likolisilako va ka tambula ku Yehova?

¹⁰ Tu tambula epindiso lilikasi ku Yehova. Manji Kenny ukundi wotembo yosi ko Maurisiu, wa limbuka okuti olondaka evi viocili. Eci a lilongisa ocili wa liwekapo oku tanga kosikola ya velapo, wa papatisiwa kuenda wa litumbika kupange wukundi wotembo yosi. Eye hati: “Nda likolisilako oku kapako olondaka viuprofeto Isaya una wa popia hati: ‘Ame ulo! Va nume ño!’” (Isa. 6:8) Manji Kenny wa talavaya kovopange alua oku tunga kuenda wa kuatisavo koku pongolola alivulu etu kelimi liaye. Manji Kenny wa popia hati: “Ame nda tambula epindiso lia ndi kuatisa oku loñoloha oku tẽlisa ovikele viange.” Pole, wa lilongisa vali ovina vikuavo. Eye wamisako hati: “Nda lilongisavo ovina sia tẽlele oku linga kuenda oku lekisa ovituwa vi ñuatisa oku kala ufendeli uwa wa Yehova.” (Tanga 1 Petulu 5:10.) Momo lie ku kũlĩhĩsila ekalo liove, oco o linge esokiyo lioku tambula vali epindiso li tunda ku Yehova?

11. Vamanji vamue ko Korea do Sul alikolisilo api va linga kupange woku kunda kuenda onima yipi va kuata? (Tala ociluvialuvia koñoño.)

¹¹ Ndaño muẽle vana okuti Olombangi Via Yehova vokuenda kuanyamo alua, va sukila oku pindisiwa eci ku molẽha onjila yokaliye yoku kunda. Vokuenda kuefengi lio COVID-19, akulu vekongelo vo ko Korea do Sul va soneha hati: “Vamanji vamue va simĩle okuti ka va ponduile oku linga upange woku kunda omo liocitangi cavo cuhayele, cilo, ovo va linga upange waco pocakati co videoconferencia. Vamanji vatatu okuti vakuete ci pitahãla 80 kanyamo va lilongisa oku talavaya lokombutador kuenda cilo, olonjanja viosi va linga upange woku kunda.” (Osa. 92:14, 15) O  pondola hẽ oku vokiya upange wove woku kunda kuenda oku seteka vali uwa wa Yehova? Kũlĩhĩsa olonjila vimue vi ku kuatisa oku tẽlisa ocimãho caco.

12. Nye Yehova a likuminya ku vana va kolela kokuaye?

¹² Lilongisa oku kolela ku Yehova. Eye wa likuminya oku tu lingila ovina vialua eci tu kolela kokuaye loku likolisilako. (Mal. 3:10) Manji umue ukãi ko Colombia o tukuiwa Fabiola wa limbuka ndomo Yehova a tẽlisa ohuminyo eyi vomuenyo waye. Eye wa yonguile oku kala ukundi wotembo yosi noke yepapatiso. Pole, ulume waye kuenda omãla vatatu va kolelele kolombongo a enda oku nganyala. Eci eye a pinga oco a tambule epuyuko kupange, eye wa likutilila lutima wosi ku Yehova oco o kuatise. Manji wa popia hati: “Olonjanja vialua oku pinga ocicapa coku tambula epuyuko kupange cambata otembo yalua, pole, konepa yange epingilo liaco lia taviwa lonjanga noke yosãi yimosi. Eci ca kala ocikomo cinene!” Noke yolosãi vivali eye wa fetika upange wukundi wotembo yosi. Cilo, o kuete eci ci pitahãla 70 kanyamo kuenda ukundi wotembo yosi ci soka 20 kanyamo. Vokuenda kuotembo yaco, wa kuatisa eci ci soka ecelãla komanu oku papatisiwa. Eye wa popia hati: “Ndaño okuti olonjanja vimue ndi yeva ehonguo, Yehova olonjanja viosi o ñuatisa oku amamako lupange wange.”

13-14. Ovolandu api a pondola oku tu kuatisa oku kolela ku Yehova loku lieca olumue?

¹³ Lilongisila kovolandu a vana va kolelele ku Yehova. Vembimbiliya mu sangiwa ovolandu  alua omanu va likolisilako kupange wa Yehova. Kolonjanja vialua, Yehova wa enda lika oku sumũlũisa afendeli vaye nda ovo va linga cimue ci lekisa okuti va kolela kokuaye. Ndeci, eci Avirahama a siapo onjo yaye “ndaño ka kũlĩhĩle oku a kala oku enda” Yehova wo sumũlũisa. (Va Hev. 11:8) Yakoba wa tambula lika esumũlũho li likasi noke lioku yaka lungelo. (Efet. 32:24-30) Eci va Isareli va laikele oku iñila Vofeka Yohuminyo, ca tẽliwa lika noke liovitunda oku yoka Olui Yordão kuenje eci ca ecelela omanu oku yoka.—Yeh. 3:14-16.

¹⁴ O pondolavo oku lilongisila kovolandu Olombangi Via Yehova koloneke vilo okuti va siata oku kolela ku Yehova loku lieca olumue. Ndeci, manji umue ulume o tukuiwa Payton kuenda ukãi waye Diana va sanjukila oku tanga eci catiamẽla ku vamanji va vokiyile upange wavo ku Yehova, kovipama viokuti, “Ovo va Lieca Olumue.” * Manji Payton wa popia hati: “Eci tua tanga ovolandu omanu ava, tua liyeva okuti tu kasi oku tala omunu umue wa sanjukila okulia kumue ku pepa. Osimbu tua kala oku konomuisa, tua yonguile oku ‘seteka kuenda oku limbuka okuti Yehova uwa.’” Kuenje manji Payton kuenda Diana va ilukila kocitumãlo cimue kuli esukila liakundi. Wa siata hẽ oku tanga ovipama viaco? Wa siata hẽ oku tala olovideo losapi hati, Oku Kundila Vocikanjo ci Kasi Ocipãla—Ko Australia kuenda Oku Kundila Vocikanjo ci Kasi Ocipãla—Ko Irlanda vi sangiwa vo jw.org? Olonepa evi citava okuti vi ku kuatisa oku limbuka olonjila vioku vokiya upange wove.

15. Oku kuata akamba vawa ci tu kuatisa ndati?

¹⁵ Sanda oku livala ukamba lomanu vawa. Ci leluka oku maha okulia kumue ka tua lalia eci tu kasi la vakuetu. Cimuamue haico okuti, nda tu livala ukamba la vana va pitisa kovaso upange wa Yehova komuenyo wavo, letuvo tu ka vetiyiwa oku vokiya upange wetu ku Suku. Ohueli yimue yi tukuiwa Kent la Veronica va limbuka okuti eci ocili muẽle. Manji Kent wa popia hati: “Akamba vetu kuenda epata va tu vetiya oku seteka olonjila vikuavo kupange woku kunda. Tua limbuka okuti poku livala ukamba la vana va sanda tete Usoma, ca tu kuatisa oku linga ovina vikuavo viokaliye.” Manji Kent la Veronica cilo, va kasi ndakundi va likasi ko Servia.

16. Ndomo ca lekisiwa volusapo lua Yesu lu sangiwa ku Luka 12:16-21, momo lie tu sukilila oku likolisilako oku lieca olumue?

¹⁶ Lieca olumue kupange wa Yehova. Etu ka tu sukila oku siapo ovina viosi tu kuete oco tu sanjuise Yehova. (Uku. 5:19, 20) Nda tua nõlapo oku litumbika vali calua koku linga ovina tu yongola okuti kupange wa Yehova ci sule, tu ka linga ndeci ca linga ulume wa tukuiwa volusapo lua Yesu okuti wa likolisilako calua oku kuata ovina vialua, pole, ka kapeleko Suku. (Tanga Luka 12:16-21.) Manji umue ulume o tukuiwa Christian o kasi ko Fransa, wa popia hati: “Ame sia kale oku eca otembo yange longusu yange ku Yehova kuenda kepata liange.” Eye lukãi waye va nõlapo oku kala akundi votembo yosi. Pole, oco va tẽlise ocimãho caco, va sukilile oku siapo upange wavo. Oco va likuatise, va fetika oku linga upange woku puenya kuenda oku sanjukila oku kuata olombongo vitito. Anga hẽ va nõla onjila yiwa? Manji Christian wa popia hati: “Cilo, tu kuete esanju kupange woku kunda kuenda esanju lioku mola olondonge Viembimbiliya lapasu tu linga oku lilongisa catiamẽla ku Yehova.”

17. Momo lie pamue ca tĩlila kokuetu oku seteka onjila yokaliye kupange woku kunda?

¹⁷ Sanjukila oku seteka onjila yokaliye kupange  woku kunda. (Ovil. 17:16, 17; 20:20, 21) Manji Shirley, ukundi wotembo yosi ko Estados Unidos wa linga epongoloko kupange woku kunda vokuenda kuefengi lio COVID-19. Kefetiko wa kuata ohele yoku kundila vo telefone. Noke yoku tambula epindiso vokuenda kuepasu lia manji onyula akongelo, eye wa fetika oku kunda lotelefone olonjanja viosi. Manji Shirley wa popia hati: “Kefetikilo nda kala lusumba, pole, cilo onjila yaco ndi yi sole calua. Tu kasi oku sapela lomanu valua okuti kupange wonjo lanjo ci sule!”

18. Nye ci pondola oku tu kuatisa nda tu kuete ocitangi coku vokiya vali upange wetu woku kunda?

¹⁸ Kuata ocimãho cimue kuenda ci tẽlisa. Eci tu liyaka lovitangi, tu likutilila oku pinga ekuatiso kuenda oku sokolola lutate catiamẽla kueci tu sukila oku linga koku tẽlisa ocimãho. (Olosap. 3:21) Manji Sonia ukundi wotembo yosi kocimunga celimi lio Romani ko Europa wa popia hati: “Ame ndi sole oku soneha ovimãho viange vopapelo, loku kapa opapelo yaco pocitumãlo okuti ci leluka oku yi mola. Komesa yange nda panga ociluvialuvia cimue catapalo avali a suñamela kolonepa via litepa. Eci ndi yongola oku nõla onjila yimue, ame ndi luluvalela kociluvialuvia catapalo avali kuenda ndi sokolola konjila ndi nõla nda yi ñuatisa oku tẽlisa ocimãho ndi yongola ale sio.” Manji Sonia o likolisilako oku lekisa esunguluko catiamẽla kovitangi viaye. Eye hati: “Ame nda sukilile oku nõla nda ndi tenda apongoloko osi a pita vomuenyo wange ndocimano cimue ci nateka oku tẽlisa ovimãho viange ale ndi vi tenda ndeyau li ñuatisa oku tẽlisa ovimãho viange.”

19. Tu lekisa ndati olopandu kovina viosi viwa Yehova a siata oku tu lingila?

¹⁹ Yehova o tu sumũlũisa volonepa viñi viñi. Tu pondola oku eca olopandu kovina eye a siata oku tu ĩha, poku linga cosi ci nena esivayo kokuaye. (Va Hev. 13:15) Omu mua kongela oku kuama olonjila viosi viokaliye vioku vokiya upange wetu woku kunda kuenje Yehova o pondola oku tu sumũlũisa calua. Eteke leteke, tu sandi onjila yoku ‘seteka loku limbuka okuti Yehova uwa.’ Omo liaco, linga ndeci Yesu wa popia hati: “Okulia kuange oku linga ocipango cu wa numa loku tẽlisa upange waye.”—Yoa. 4:34.