1. Apulilo api tu linga eci tu sokolola kovina viosi Yehova a lulika?

ECI tu sokolola oluali Yehova a lulika, tu kuata ovisimĩlo ndevi viukualosamo Daviti wa likutilila ku Yehova hati: “Eci ndi vanja ovailu, ovopange ovaka ove, osãi lolombungululu vina ove wa pongiya, omunu hẽ nye okuti ove amamako oku u sokolola, kuenda omõla womunu hẽ nye okuti ove u tata?” (Osa. 8:3, 4) Ndeci Daviti, oku sokolola ndomo tu sule oku ci sokisa lolombungululu Yehova a lulika, tu komõha calua oku limbuka okuti, Yehova wa tu kapako. Ndomo tu ci lilongisa Yehova ka tatele lika omanu vatete Adama la Eva, pole, ovo va tiamẽlelevo kepata liaye.

2. Cipi ca kala ocipango ca Yehova lomãla vaye vatete palo posi?

² Adama la Eva va kala omãla vatete va Yehova palo posi kuenda Yehova wa kala Isiavo ukuacisola wokilu. Eye wa yonguile okuti ohueli yaco yi kuata omãla. Suku wa va sapuila hati: “Liciti, siati kuenda yukisi ilu lieve loku lu viala.” (Efet. 1:28) Yehova wa yonguile okuti ovo va kuata omãla loku tata ciwa ongongo. Nda Adama la Eva va pokuile loku linga ovina Suku a va pingile oku linga, ovo kumue locitumbulukila cavo nda vamamako oku tiamẽla vepata lia Suku otembo ka yi pui.

3. Nye ci lekisa okuti Yehova wa ecele ku Adama la Eva ocitumãlo cimue ca velelepo vepata liaye?

³ Adama la Eva va kuatele ocitumãlo cimue ca velelepo vepata lia Yehova. Ndomo ca lomboluiwa Kosamo 8:5 kuenda ketosi, Daviti wa popia eci catiamẽla kociluvo ca Yehova okuti omunu, poku popia hati: “Ove wo lingisa okuti, ongusu yaye ka yi lui calua ndeyi yovangelo, ove wo futisa lulamba kuenda leposo.” Ocili okuti, Yehova ka ecele unene komunu,  olondunge kuenda uloño ndowu wovangelo. (Osa. 103:20) Eci ci lekisa okuti omanu ‘ongusu yavo ka ya luile’ ndeyi yovangelo. Eci ci komõhisa! Yehova eci a lulika olonjali vietu viatete, wa ecele kokuavo omuenyo umue uwa!

4. Omo okuti Adama la Eva va sinĩla Yehova nye ca pita lavo kuenda nye tu konomuisa vocipama cilo?

 ⁴ Adama la Eva omo lioku sinĩla Yehova va siapo oku tiamẽla vepata lia Yehova. Esino liaco, lia kokela ovitangi vialua kovitumbulukila viavo ndomo tu ka ci mola vocipama cilo. Pole, ocipango ca Yehova ka ca pongolokele. Eye o yongola okuti omanu va kuepokolo va kala omãla vaye otembo ka yi pui. Tete, tu konomuisa ndomo Yehova a lekisa kokuetu okuti tu kuete esilivilo kokuaye. Kuenje tu konomuisavo eci tu sukila oku linga oco tu lekise okuti tu yongola oku tiamẽla kepata lia Suku. Oku sulako, tu konomuisa ovina viwa epata lia Yehova li ka kuata palo posi otembo ka yi pui.

5. Tu lekisa ndati ku Suku okuti tua sanjuka omo lioku tu lulika lesetahãlo liaye?

⁵ Yehova wa tu kapako poku tu lulika lesetahãlo liaye. (Efet. 1:26, 27) Omo okuti tua lulikiwa lesetahãlo lia Suku, tu pondola oku kuata loku lekisa ovituwa vialua viwa ndevi viaye ndeci, ocisola, ocikembe, oku kala vakuacili kuenda esunga. (Osa. 86:15; 145:17) Eci tu lekisa ovituwa evi, tu eca ulamba ku Yehova kuenda tu lekisa okuti tua sanjuka omo lioku lulikiwa lesetahãlo liaye. (1 Pet. 1:14-16) Eci tu lekisa ovituwa vi sanjuisa Isietu wokilu, tu kuata esanju. Handi vali, omo Yehova wa tu lulika lesetahãlo liaye, tu pondola oku kala omanu vomboka vana eye a yongola okuti va tiamẽla kepata liaye.

6. Yehova wa lekisa ndati okuti wa kapako omanu eci a lulika ongongo?

⁶ Yehova wa tu pongiyila ocitumãlo cimue ca posoka. Osimbu Yehova ka lulikile omanu vatete, eye wa va pongiyila ongongo. (Yovi 38:4-6; Yer. 10:12) Yehova omo liocisola caye kuenda ocali, wa lulika ovina vialua viwa oco vi tu sanjuise. (Osa. 104:14, 15, 24) Eye wa sokolola kovina a lulika kuenje wa “mola okuti ca posoka.” (Efet. 1:10, 12, 31) Yehova wa lekisa okuti wa kapeleko omanu poku va ĩha “unene” wovina viosi a lulika palo posi. (Osa. 8:6) Suku wa yonguile okuti omanu va li pua va sanjukila oku tata oviluvo viaye otembo ka yi pui. Ove hẽ olonjanja viosi o pandula Yehova omo liohuminyo eyi ya posoka calua?

7. Elivulu lia Yehosua 24:15, li lekisa ndati okuti omunu o kuete elianjo?

⁷ Yehova wa tu ĩha ombanjaile yelianjo. Etu tu nõla ovina tu yongola oku linga komuenyo. (Tanga Yehosua 24:15.) Ondaka oku nõla, yi lomboloka oku linga eci tua panga. Suku yetu ukuacisola o sanjuka calua eci tu nõla oku u vumba. (Osa. 84:11; Olosap. 27:11) Etu tu pondola oku talavaya lelianjo lietu kolonepa viosi. Tu konomuisi ongangu ya Yesu ndomo eye a talavaya lelianjo liaye.

8. Kolonepa vipi Yesu a talavaya lelianjo liaye?

⁸ Tu setukula Yesu poku nõla oku pitisa kovaso olonjongole via vakuetu okuti vietu muẽle ci sule. Eteke limue, Yesu kumue lovapostolo vaye va kavele calua kuenje va enda kocitumãlo cimue va lavokaile oku puyuka. Pole, ka ca tavele ovo oku puyuka. Owiñi wa va sanga kuenda va komõha calua poku longisiwa la Yesu. Yesu ka temẽle. Pole, wa kuatela ohenda omanu. Nye Yesu a linga? “Wa fetika oku va longisa ovina vialua.” (Mar. 6:30-34) Eci tu setukula Yesu poku  talavaya lotembo yetu kuenda ongusu oco tu kuatise vakuetu, tu eca ulamba ku Isietu wokilu. (Mat. 5:14-16) Tu lekisavo ku Yehova okuti tu yongola oku tiamẽla vepata liaye.

9. Ombanjaile yipi ya velapo Yehova a eca komanu?

⁹ Yehova wa eca komanu uloño woku kuata omãla kuenda ocikele coku va longisa oku sola loku vumba Yehova. Nda okuti unjali, anga hẽ wa sanjukila ombanjaile yaco? Ndaño okuti Yehova wa sumũlũisa ovangelo lonjila yimue ya velapo, pole, ovo ka va kuete esumũlũho lioku kuata omãla. Kuenje vana va tekula omãla va sukila oku sanjukila esumũlũho liaco. Olonjali, via tambula ocikele ca velapo coku tata omãla vavo ‘poku va pindisa ndomo ci likuata leci Yehova a popia.’ (Va Efe. 6:4; Esin. 6:5-7; Osa. 127:3) Oco olonjali vi kuatisiwe, ocisoko ca Suku ca siata oku pongiya ovimalẽho vialua via kunamẽla Vembimbiliya ndeci, alivulu, olovideo kuenda ovipama vikuavo vonumbi yetu yo Internet. Ocili okuti, Isietu wokilu kuenda Omõlaye va sole calua amalẽhe. (Luka 18:15-17) Eci olonjali vi kolela Yehova kuenda va likolisilako oku tata omãla vavo, Yehova o ci sanjukila. Olonjali viaco vi kuatisavo omãla vavo oku lavoka oku tiamẽla vepata lia Yehova otembo ka yi pui!

10-11. Nye Yehova a tu lingila pocakati cocisembi?

¹⁰ Yehova wa eca Omõlaye wa soliwa oco tu tiamẽle vali vepata liaye. Ndomo ca lombolola  ocinimbu 4, Adama la Eva eci va lueya ovo kumue locitumbulukila cavo, va pumba oku tiamẽla kepata lia Yehova. (Va Rom. 5:12) Adama la Eva omo okuti va nõlapo oku sinĩla Suku, ovo va siapo oku tiamẽla vepata liaye. Pole, nye ci popiwa kocitumbulukila cavo? Yehova locisola calua wa linga eliangiliyo liokuti ocitumbulukila ca Adama la Eva vana vo pokola va tiamẽla vepata liaye. Eye wa ci linga pocakati cocilumba Comõlaye wongunga, Yesu Kristu. (Yoa. 3:16; Va Rom. 5:19) Omo liocilumba ca Yesu, Yehova wa nõla eci ci soka 144.000 komanu vakuekolelo ndomãla vaye.—Va Rom. 8:15-17; Esit. 14:1.

¹¹ Handi vali, olohuluwa viomanu vakuekolelo va pokola koku linga ocipango ca Suku. Ovo va lavokavo oku tiamẽla vepata lia Suku noke lioseteko ya sulako Yohulukãi Yanyamo. (Osa. 25:14; Va Rom. 8:20, 21) Omo lielavoko liaco ovo va kuete, va tukula Yehova ululiki wavo okuti, ‘Isiavo.’ (Mat. 6:9) Vana va ka pinduiwa, va ka kuatavo epuluvi lioku lilongisa eci Yehova a lavoka kokuavo. Vana va ka nõlapo oku pokola kolonumbi viaye, va ka kuatavo epuluvi lioku tiamẽla vepata liaye.

12. Epulilo lipi tu tambulula cilo?

¹² Ndomo tua siata oku ci mola, Yehova olonjanja viosi o lekisa okuti wa tu kapako. Eye o tukula olombuavekua ndomãla vaye kuenda vana va tiamẽla ‘kowiñi wakahandangala’ va lavoka oku tukuiwavo ndomãla vaye voluali luokaliye. (Esit. 7:9) Nye tu sukila oku linga cilo, oco tu lekise ku Yehova okuti tu yongola oku tiamẽla vepata liaye otembo ka yi pui?

13. Nye tu sukila oku linga oco tu tiamẽle vepata lia Suku otembo ka yi pui? (Marko 12:30)

¹³ Lekisa ocisola cove ku Yehova poku u vumba lutima wove wosi. (Tanga Marko 12:30.) Suku wa siata oku tu ĩha olombanjaile vialua viwa, yimue pokati kavio yoku u fendela. Tu lekisa ku Yehova okuti tu u sole poku “pokola kovihandeleko viaye.” (1 Yoa. 5:3) Cimue pokati kocihandeleko Yehova  a yongola okuti tu ci pokola, ceci Yesu a tu handeleka okuti oku longisa omanu oco va linge olondonge kuenda oku va papatisa. (Mat. 28:19) Eye wa tu handelekavo oco tu lisoli pokati. (Yoa. 13:35) Vana va pokola kovihandeleko via Yehova, eye o va koka oco va tiamẽle kongongela ya vamanji voluali luosi.—Osa. 15:1, 2.

14. Tu lekisa ndati okuti tu sole vakuetu? (Mateo 9:36-38; Va Roma 12:10)

¹⁴ Lekisa ocisola ku vakuene. Ocisola oco ocituwa ca velapo ca Yehova. (1 Yoa. 4:8) Yehova wa lekisa ocisola kokuetu osimbu handi ka tuo kũlĩhĩle. (1 Yoa. 4:9, 10) Etu tu u setukula eci tu lekisa ocisola ku va kuetu. (Va Efe. 5:1) Onjila yimue yoku lekisa ocisola komanu poku va kuatisa oku kũlĩha catiamẽla ku Yehova, osimbu handi kuli otembo. (Tanga Mateo 9:36-38.) Nda tua ci linga, tu eca kokuavo epululu lioku tiamẽla vepata lia Suku. Eci umue a papatisiwa, tu sukila oku amamako oku u sola kuenda oku u kapako. (1 Yoa. 4:20, 21) Tu ci linga ndati? Onjila yimue, oku kolela kokuaye. Nda omunu waco wa linga cimue okuti ka tu kuete elomboloko liaco, ka tu ka simi okuti wa ci linga o cipango. Pole, tu sukila oku kapako manji loku u tenda okuti wa velapo etu tu sule.—Tanga Va Roma 12:10; Va Fil. 2:3.

15. Kulie tu lekisa ohenda kuenda ocisola?

¹⁵ Lekisa ohenda kuenda ocisola komanu vosi. Nda tu yongola oku tiamẽla vepata lia Yehova otembo ka yi pui, tu sukila oku kapako Ondaka yaye komuenyo wetu. Ndeci, Yesu wa longisa okuti tu sukila oku lekisa ohenda kuenda ocisola komanu vosi, ndaño muẽle kovanyãli vetu. (Luka 6:32-36) Pamue ci tĩla calua etu oku ci linga. Nda ci kasi oku pita letu, tu sukila oku sokolola Yesu loku u setukula. Eci tu likolisilako oku pokola ku Yehova loku setukula Yesu, tu lekisa ku Isietu wokilu okuti, tu yongola oku tiamẽla vepata liaye otembo ka yi pui.

16. Tu teyuila ndati ekalo liepata lia Yehova?

¹⁶ Teyuila ekalo liepata lia Yehova. Vepata limue, ca siata omãla vatito oku setukula vamanjavo akulu. Nda vamanjavo akulu va kapako olonumbi Viembimbiliya, va ka kala ongangu yiwa kokuavo. Nda ovo va linga eci cĩvi, vamanjavo va kuamavo ongangu yavo. Eci haicovo ci pita vepata lia Yehova. Nda Ukristão umue o linga onanguluke, ale o linga evĩho liukahonga, ale ovina vikuavo vĩvi, citava okuti vakuavo va li kongelavo kokuaye koku linga ovina vĩvi. Vana va linga ovina evi, va sepuisa ekalo liepata liafendeli va Yehova. (1 Va Tes. 4:3-8) Etu, tu sukila oku yuvula oku kuama ongangu yĩvi kuenda oku yuvula ovina viosi vi kapa kohele ukamba tu kuetele Isietu wokilu ukuacisola.

17. Ovisimĩlo vipi tu sukila oku yuvula kuenda momo lie?

¹⁷ Kolela Yehova kukuasi hakoko. Yehova wa likuminya kokuetu oku tu ĩha okulia, uwalo kuenda ocitumãlo coku kala nda tua velisapo tete Usoma waye, loku pokola kolonumbi viaye via li pua. (Osa. 55:22; Mat. 6:33) Eci tu kolela kohuminyo eyi, tu ka limbuka okuti ovokuasi oluali lulo ka a tu nenela ekalo liwa kuenda esanju ka lipui. Tua kũlĩha okuti tu kuata lika ombembua yovutima poku linga ocipango ca Yehova. (Va Fil. 4:6, 7) Eci tu landa ovina vialua, tu sukila oku kũlĩhĩsa nda tu kuete otembo kuenda ongusu yoku tata ovina viaco. Pomue tu pondola oku tiamisila lika utima kovina viaco. Tu sukila oku ivaluka okuti Suku wa tu ĩha ovina vialua vioku linga vepata liaye. Eci ci lekisa okuti ka tu ka eceleli okuti cimue ci tu tateka. Kuenje ka tu yongola oku kala ndumalẽhe una wa likala  oku kuama Yesu kuenda oku pumba esumũlũho lioku tukuiwa umue pokati komãla va Yehova omo lioku tiamisila utima kovokuasi!—Mar. 10:17-22.

18. Asumũlũho api omanu vana va pokola va ka kuata otembo ka yi pui?

¹⁸ Omanu vana va pokola va ka kuata esumũlũho lialua lioku sola kuenda oku fendela Yehova otembo ka yi pui! Vana va kuete elavoko lioku ka kala palo posi, va kuetevo esanju lioku ka tata ongongo yilo yina Yehova a tunga oco yi kale ocitumãlo cavo ca lipua. Ndopo Usoma wa Suku, u ka pongolola ongongo lovina viosi vi kasimo, oco vi linge viokaliye. Yesu Kristu o ka malako ovitangi viosi Adama la Eva va koka poku siapo oku tiamẽla vepata lia Suku. Yehova o ka pindula olohuluwa viomanu va fa kuenje o ka va ĩha omuenyo ka u pui luhayele wa lipua vongongo yina yi ka kala ocumbo celau. (Luka 23:42, 43) Eci omanu vana va vumba Yehova va ka lipua, omunu lomunu o ka limbuka ‘ulamba kuenda eposo’ vina Daviti a soneha.—Osa. 8:5.

19. Nye tu sukila oku ivaluka?

¹⁹ Nda ove wa tiamẽla ‘kowiñi wakahandangala,’ o kuete elavoko limue liwa. Suku o ku sole; eye o yongola okuti o kala omunu umue wa tiamẽla vepata liaye. Omo liaco, likolisilako oku linga ovina viosi viu sanjuisa. Oloneke viosi sokolola kolohuminyo via Suku vutima kuenda kovisimĩlo. Sanjukila esumũlũho lioku fendela Isietu wokilu ukuacisola kuenda kapako elavoko lioku u sivaya otembo ka yi pui!