1. Ndomo ca tangiwa 1 Va Tesalonike 5:11, kupange upi vosi yetu tu pondola oku kuatisa?

 VEKONGELO o kasi, mu sangiwa hẽ Onjango yimue Yusoma ya tungiwa ndopo, ale yeyi ya semuluiwa? Nda oco, ka kuli atatahãi okuti ivaluka onjanja yatete wa endele kohongele, loku iñila Vonjango Yusoma. Ove wa lekisa olopandu ku Yehova. Citava okuti wa yeva esanju lialua lia ku kokela oku lila okuti, kua tẽlele oku imba ocisungo coku fetika. Olonjango vietu Viusoma, vi eca esivayo ku Yehova. Pole, ceca vali esivayo lialua kokuaye, nda tu litumbika koku linga upange ukuavo woku tunga. Vupange waco mua kongela vali ovina vikuavo via velapo okuti oku tungiwa kuonjo yimue ci sule. Mua kongela oku pamisa omanu vana veya kocitumãlo caco cefendelo. Upostolo Paulu wa kũlĩhĩle ovina viaco eci a soneha olondaka vi sangiwa 1 Va Tesalonike 5:11, okuti ocisonehua cosapi yetu.—Tanga.

2. Nye tu konomuisa vocipama cilo?

² Upostolo Paulu, ongangu yimue yiwa yomunu umue wa kũlĩhĩle ndomo a ponduile oku pamisa vamanji. Eye wa va kuatela ohenda. Vocipama cilo, tu konomuisa ndomo eye a kuatisa vamanji (1) oku pandikisa kovitangi, (2) oku kala vakuambembua omunu lukuavo kuenda (3) oku pamisa ekolelo liavo ku Yehova. Tu konomuisi ndomo tu pondola oku u setukula kuenda oku pamisa vamanjetu koloneke vilo.—1 Va Kor. 11:1.

3. Ocituwa cipi ca sunguluka Paulu a kuata?

³ Paulu wa solele calua vamanji. Eye wa pita lovitangi vialua,  kuenje eci vamanji va fetikavo oku liyaka lovitangi, Paulu wa lekisa ocikembe kuenda ohenda kokuavo. Onjanja yimue, Paulu ka kuatele olombongo kuenje wa sukilile oku sanda upange oco a sange cimue coku litekula eye muẽle kuenda vana va kala laye. (Ovil. 20:34) Eye wa enda oku tonga olombalaka. Eci a pitĩla ko Korindo, tete eye lakamba vaye vupange okuti Akuila la Prisila, va tonga olombalaka. “Kasambata osi” eye wa ponduile oku kundila va Yudea la va Helasi. Kuenje eci Sila la Timoteo va pitĩla, “Paulu wa fetika oku litumbika lutima wosi koku kunda ondaka.” (Ovil. 18:2-5) Paulu lalimue eteke a ivaleleko, ocimãho caye ca velapo komuenyo, okuti oku vumba Yehova. Eye wa kala ongangu yimue yiwa yoku pamisa vamanji. Paulu wa ivaluisa vamanji oco ka va ka ecelele okuti, asakalalo omuenyo kuenda oku sanda ovina vioku tekula epata, vi va tateka ‘kovina via velapo vali’ okuti, ovina viosi viatiamẽla kefendelo lia Yehova.—Va Fil. 1:10.

4. Paulu la Timoteo va kuatisa ndati vamanji oku pandikisa kelambalalo?

⁴ Eci ekongelo lio ko Tesalonike lia tumbikiwa, vana va tava ndopo, va liyaka lovitangi vialua. Eci owiñi kuenda vakuakulambalala ka va tẽlele oku sanga Paulu la Sila, vambata “vamanji vamue kolombiali violupale,” loku kaluka vati: “Vosi yavo va sinĩla ocihandeleko ca Kaisare.” (Ovil. 17:6, 7) O pondola hẽ oku sokolola usumba olondonge viokaliye via kuata, eci va limbuka okuti alume vovolupale va tiuka vali kokuavo? Citava okuti ovo va tepulula ombili yavo kupange wa Yehova, pole, Paulu ka yonguile okuti ku pita ovina evi. Ndaño okuti Paulu la Sila, va sukilile oku tunda, ovo va kũlĩhĩsa lutate okuti olondonge viokaliye vekongelo via kala oku tatiwa ciwa. Paulu wa ivaluisa va Tesalonike hati: “Tua tuma Timoteo manjetu . . . , oco a vu kolisi loku vu lembeleki catiamẽla kekolelo liene, oco okuti, lomue pokati kene o hongua omo liohali yaco.” (1 Va Tes. 3:2, 3) Citava okuti Timoteo wa pitavo lelambalalo kimbo liaye a citiwila okuti, ko Lustra. Eye wa mola ndomo Paulu a pamisa vamanji eci a kalako. Timoteo poku mola ndomo Yehova a va kuatisa, wa tẽla oku pamisa vamanji vokaliye okuti va ponduilevo oku litunda ciwa.—Ovil. 14:8, 19-22; Va Hev. 12:2.

5. Manji umue o tukuiwa Bryant wa kuatisiwa ndati lukulu umue wekongelo?

⁵ Konepa yipi ikuavo Paulu a pamisa vamanji? Eci Paulu la Barnaba va tiukila oku ka nyula o Lustra, o Ikoniyu kuenda o Antiokea, “va va nõlela akulu vekongelo lekongelo.” (Ovil. 14:21-23) Ka kuli atatahãi vokuti, akulu vaco vekongelo va kala ono yelembelo vekongelo, ndeci akulu vekongelo koloneke vilo. Kũlĩhĩsa olondaka via popiwa lamanji umue o tukuiwa Bryant, eye hati: “Eci nda tẽlisa 15 kanyamo, Isiange wa tunda konjo kuenda ina yange wa tundisiwa vekongelo. Nda yeva ulika kuenda esumuo.” Vepuluvi liaco, nye ca kuatisa manji Bryant oku pandikisa kocitangi eci? Eye hati: “Manji Tony ukulu umue wekongelo wa enda oku sapela lame kolohongele kuenda kapuluvi akuavo. Eye wa ndi sapuila ulandu wa vana va liyakavo lovitangi vialua, pole, handi va kuete esanju. Eye wa tanga lame Olosamo 27:10 kuenda olonjanja vialua wa lombolola eci catiamẽla ku Hesekiya okuti, eye wa vumba lekolelo ndaño isiaye ka kaile ongangu yiwa.” Eci ca kuatisa ndati manji Bryant? Manji Bryant wa lombolola hati: “Omo lielembeleko lia Manji Tony cilo nda nõla onjila yi ñokela esanju okuti upange wakundi votembo yosi.” Ene akulu vekongelo, kali vakuakulavulula vana va sangiwa vekalo ndeli lia manji Bryant, okuti va  sukila “ondaka yiwa” yi va lembeleka.—Olosap. 12:25.

6. Ndamupi Paulu a talavaya lovolandu omanu vo kosimbu oco a pamise vamanji?

⁶ Paulu wa ivaluisa vamanji okuti, omo liongusu yapama ya Yehova ‘elende linene liolombangi’ lia pandikisa kovitangi. (Va Hev. 12:1) Paulu wa kũlĩhĩle okuti oku tukula ovolandu a vana va pandikisa kosimbu ca ponduile oku kuatisa vamanji oku kuata utõi kuenda oku va kuatisa oku luluvalela “olupale lua Suku o kasi lomuenyo.” (Va Hev. 12:22) Cimuamue haico ci pita koloneke vilo. Helie ka la kuatisiwa poku lilongisa ndomo Yehova a kuatisa Gideone, Baraka, Daviti, Samuele kuenda vakuavo? (Va Hev. 11:32-35) Nye ci popiwa kovolandu omanu vakuekolelo koloneke vilo? Ombala Yolombangi Via Yehova voluali luosi, ya siata oku tambula ovikanda via vamanji va pamisiwa poku tanga ulandu wombangi yimue ya Yehova yi kasi oku pandikisa koloneke vilo.

7. Nye wa lilongisa kelungulo lia Paulu li sangiwa ku Va Roma 14:19-21?

⁷ Etu tu pamisa vamanjetu eci tu likolisilako oku koka ombembua vekongelo. Ka tu ka eceleli okuti ovisimĩlo vietu via litepa vi tepa omunga tu kuete. Tu lekisa esunguluko nda ovisimĩlo viaco ka vi lipatãla lolonumbi Viembimbiliya. Konomuisa ulandu owu. Vekongelo lio ko Roma, mua kala va Yudea kuenda Akristão vakualofeka. Eci ka kua sukiliwile vali oku pokola kocihandeleko ca eciwile ku Mose, ovikulia vina ka via tavele oku vilia, kaliye via taviwile oku vilia. (Mar. 7:19) Vokuenda kuotembo, Akristão vamue va Yudea va lianjele pokulia okulia kuosi. Pole, Akristão vakuavo va Yudea, kokuavo ca kala ndu okuti, ka ca sungulukile oku ci linga. Omo liocitangi caco, ekongelo ka lia li kuatele omunga. Paulu wa lekisa esilivilo lioku amamako oku koka ombembua kuenje wa popia hati: “Ka ca sungulukile oku kokela manjove ocilondokua omo lioku lia ositu, oku nyua ovinyu, ale oku linga ocina cikuavo.” (Tanga Va Roma 14:19-21.) Paulu wa kuatisa vamanji oku limbuka okuti elinga liaco ka liasungukile, ci kale kokuavo kuenda kekongelo liosi. Eye wa lekisilevo esunguluko lioku pongolola ovituwa viaye, oco a yuvule oku kokela ocilondokua ku vamanji. (1 Va Kor. 9:19-22) Tu pondolavo oku pamisa vakuetu loku koka ombembua nda tua yuvula oku velisapo lika ovisimĩlo vietu.

8. Nye Paulu a linga eci kua kala oku tetuluiwa ocitangi cimue ci kuete esilivilo oco ci koke ombembua vekongelo?

⁸ Paulu wa sia ongangu yimue yiwa yoku koka ombembua la vana va enda oku patãla ovina vi kuete esilivilo. Ndeci, vana ka va kaile va Yudea okuti veya oku linga Akristão va sukilile oku seviwa evamba, citava okuti va ci lingila oco ka va ka popiwe lãvi. (Va Gal. 6:12) Paulu ka tavele kocisimĩlo caco, pole, ndaño ndoco eye lumbombe walua, wa ecelela okuti ovapostolo kuenda akulu vo ko Yerusalãi va tetulula ocitangi caco. (Ovil. 15:1, 2) Omo liocituwa a lekisa, ca kuatisa Akristão vaco oku amamako lesanju kuenda ombembua vekongelo.—Ovil. 15:30, 31.

9. Tu kuama ndati ongangu ya Paulu?

⁹ Nda kua votuiwa ocitangi cimue, etu tu sanda ombembua poku ecelela okuti vana va nõliwa la Yehova oco va tate ekongelo va tetulula ocitangi caco. Olonjanja vimue tu pondola oku vi sanga olonumbi valivulu etu a sandekiwa locisoko. Nda tua kuama olonumbi viaco, okuti  ka tu kuama ovisimĩlo vietu, tu ka kuatisa ekongelo oku kuata ombembua.

10. Nye Paulu a linga oco a koke ombembua vekongelo?

¹⁰ Paulu wa koka ombembua poku tukula ovituwa viwa vamanji va kuatele, okuti vĩvi havioko. Ndeci, Paulu poku soneha ukanda waye wa sulako ku va Roma, eye wa tukula valua kolonduko loku va pandiya omo liovituwa viavo viwa. Tu pondola oku setukula Paulu, poku tukula ovituwa viwa vamanji va kuete. Poku ci linga, tu ka vetiya vamanji oku pamisa ukamba omunu lukuavo, loku kuatisavo ekongelo oku lekisa ocisola.

11. Tu pondola oku tumbulula ndati ombembua eci pokati ketu pa kala oku li patãla?

¹¹ Olonjanja vimue vamanji va pama konepa yespiritu, va patãla ovisimĩlo via vamanji vakuavo. Eci oco ca pita la Paulu kuenda ekamba liaye Barnaba. Alume ava vavali, va lihoya kueci catiamẽla koku ambata Marko kungende ukuavo va laikele oku linga wumisionaliu. “Kua kala oku lihoyisa kualua” pokati kavo kuenje va nõlapo oku litepa. (Ovil. 15:37-39) Pole, noke Paulu, Barnaba kuenda Marko va tumbulula ombembua pokati kavo, momo va velisilepo ombembua kuenda omunga vekongelo. Noke Paulu wa tukula ovina viwa viatiamẽla ku Barnaba kuenda Marko. (1 Va Kor. 9:6; Va Kol. 4:10) Tu sukilavo oku tetulula ovitangi vi pondola oku kala pokati ketu la vamanji loku amamako oku luluvalela kovituwa viavo viwa. Poku ci linga tu pondola oku koka ombembua kuenda omunga.—Va Efe. 4:3.

12. Ovitangi vipi vamanjetu va siata oku liyaka lavio?

¹² Tu kuatisa vamanjetu eci tu pamisa ekolelo liavo ku Yehova. Vamue va siata oku popiwa lãvi lapata avo, la vana va talavayela kumosi, ale vana va tangela kumosi. Vakuavo va kasi locitangi cuhayele, ale va kasi oku likolisilako oku liyaka lovisimĩlo ka via sungulukile. Handi vakuavo, Akristão va papatisiwa vokuenda kuanyamo alua kuenda va kasi ale oku lavoka esulilo lioluali lulo vokuenda kuotembo yalua. Ekalo eli li pondola oku kala ndoseteko Kakristão koloneke vilo. Akristão vokocita catete, va liyakavo lovitangi viaco. Nye Paulu a linga oco a pamise vamanji?

13. Paulu wa kuatisa ndati vana va enda oku popiwa lãvi omo liekolelo liavo?

¹³ Paulu wa talavaya Lovisonehua oco a pamise ekolelo lia va manji. Ndeci, Akristão va Yudea ka va kũlĩhĩle ndomo va tambulula apata ovo va enda oku popia okuti etavo lio Yudea olio lia velelepo. Ka kuli atatahãi okuti ukanda Paulu a sonehela va Heveru wa pamisa calua Akristão vaco. (Va Hev. 1:5, 6; 2:2, 3; 9:24, 25) Ovo va ponduile oku talavaya lunene wavo woku sokolola oco va tẽle oku tambulula vana va enda oku va lambalala. Koloneke vilo, tu pondola oku kuatisa vamanjetu okuti va siata oku popiwa lãvi omo lioku talavaya lalivulu etu oco va lombolole ovina ovo va tava. Nda okuti amalẽhe va kasi oku popiwa lãvi omo lioku tava okuti ovina via lulikiwa, tu sukila oku vakuatisa oku sanga olonumbi volombrochura ndeci A Vida—Teve um Criador? Efetikilo Liomuenyo—Apulilo Atãlo a Sukila Oku Tambuluiwa, oco va lekise esunga lieci va tavela okuti omuenyo wa lulikiwa.

14. Ndaño Paulu wa litumbikile calua kupange woku kunda kuenda woku longisa, nye a linga vali?

¹⁴ Paulu wa enda oku vetiya vamanji oco va lekise ocisola pocakati ‘covilinga viwa.’ (Va Hev. 10:24) Eye ka kuatisile lika vamanji kovina a popia, wa va kuatisavo kovina a linga. Ndeci, eci vamanji ko Yudea va kala oku liyaka locitangi conjala, Paulu wa kuatisa koku ava  ovina ovo va sukilile. (Ovil. 11:27-30) Ndaño okuti Paulu wa litumbikile calua kupange woku kunda loku longisa, eye olonjanja viosi wa sandiliya apuluvi oku kuatisa vana va sukilile ekuatiso ketimba. (Va Gal. 2:10) Poku ci linga, eye wa pamisa vamanjaye oku kolela okuti Yehova wa ponduile oku va tata. Koloneke vilo, eci tu eca otembo yetu, ongusu kuenda ovoloño etu oco tu kuatise vamanji va pita lovilunga, tu pamisa ekolelo liavo. Cimuamue haico ci pita, eci tu eca olombanjaile vietu oco tu kuatis. Poku ci linga, tu ka kuatisa vamanji oku kolela okuti Yehova lalimue eteke a ka va yanduluka.

15-16. Tu tata ndati vana va hongua kekolelo?

¹⁵ Paulu wamamako oku kuatisa vana va honguele kekolelo. Eye wa lekisa ohenda kokuavo, wa vangula lavo locisola kuenda lonjila yimue ya sunguluka. (Va Hev. 6:9; 10:39) Ndeci, pocakati kovikanda a sonehela va Heveru, eye olonjanja viosi wa tukula ondaka “etu” poku lekisa okuti eye wa endaile oku kapakovo elungulo a enda oku eca. (Va Hev. 2:1, 3) Ndeci ca linga Paulu, tu sukilavo oku kuatisa vana vahongua kekolelo. Handi vali, tu va pamisa poku lekisa kokuavo okuti tua va kapako. Lonjila eyi, tu lekisa okuti tu va sole. Ovilinga vietu vi pondola oku kuatisa vali okuti ovina tu popia ci sule.

¹⁶ Paulu wa lekisa ku vamanji okuti Yehova wa kapeleko ovilinga viavo viwa. (Va Hev. 10:32-34) Tu pondola oku linga ocina cimuamue eci tu kuatisa vamanjetu okuti ekolelo liavo lia hongua. Citava okuti tu u pinga oco a tu sapuileko ndomo a kũlĩha ocili, ale oku u vetiya oku sokolola vapuluvi Yehova o kuatisa. Eli epuluvi limue lioku u sapuila okuti Yehova ka ivaleleko ovilinga viocisola kuenda Eye ka ko yanduluka kovaso yoloneke. (Va Hev. 6:10; 13:6) Ombangulo yaco, citava okuti yi kuatisa  oku tumbulula onjongole yavo yoku amamako oku vumba Yehova.

17. Ocituwa cipi tu sukila oku amamako oku mioñoloha?

¹⁷ Ndeci ukuakutunga amamako oku loñoloha kupange waye, tu pondolavo oku loñoloha koku lipamisa pokati. Tu pondola oku kuatisa vakuetu oku kuata ongusu yoku pandikisa kovitangi poku va lombuluila ovolandu omanu vo kosimbu vana va pandikisa. Tu pondola oku sanda ombembua poku tukula ovina viwa tua siata oku muila ku vakuetu, oku amamako lombembua ndaño pamue li tatekiwa kuenda oku tumbulula ombembua eci pa molẽha oku lihoyisa. Tu pondola oku amamako oku pamisa ekolelo lia vamanji poku va lomboluila esilivilo lioku kũlĩha ocili ci sangiwa Vembimbiliya, poku va ĩha ekuatiso va sukila kuenda oku kuatisa wosi una wa hongua konepa yespiritu.

18. Nye wa nõlapo oku linga?

¹⁸ Vana va talavaya koku tunga ovitumãlo Viusoma, va yeva esanju poku linga upange waco. Tu pondola oku yeva esanju eci tu kuatisa koku pamisa ekolelo lia vamanji. Ca litepa lovimano vi tungiwa, ceci okuti ovio vi pondola oku kupuka, pole, onima iyilila kupange wetu wowu okuti u kala otembo ka yi pui! Omo liaco, tu nõlipo oku ‘amamako oku li vetiya pokati loku li pamisa pokati.’—1 Va Tes. 5:11.