OCIPAMA CELILONGISO 34
‘Endeli Vocili’
“Oku endela vocili.”—3 YOA. 4.
OCISUNGO 111 Esunga Liesanju Lietu
OVINA TU LILONGISA *
1. Tu kuatisiwa ndati poku vangula ndomo tua kũlĩha “ocili”?
“WA KŨLĨHA ndati ocili?” Ka kuli atatahãi okuti olonjanja vialua wa siata oku tambulula epulilo eli. Eli limue pokati kapulilo tua siata oku linga ku vamanjetu, eci tu yongola oku va kũlĩha ciwa. Tu sole calua oku yeva ndomo vamanjetu va kũlĩha loku sola Yehova kuenda tu sanjuka oku sapela lavo esunga lieci tu solile oku kala Ombangi Yehova. (Va Rom. 1:11) Olombangulo viaco, vi tu kuatisa oku amamako oku sokolola ndomo tu sanjukila oku kala vocili. Handi vali, ci tu kuatisavo oku nõlapo “oku endela vocili” okuti oku amamako oku ambata omuenyo umue unena esumũlũho kuenda oku taviwa la Yehova.—3 Yoa. 4.
2. Nye tu konomuisa vocipama cilo?
2 Vocipama cilo, tu ka konomuisa asunga amue eci tu solile oku kala vocili. Kuenda tu konomuisa ndomo tu amamako oku lekisa ocisola kombanjaile yaco. Kakuli atatahãi okuti poku konomuisa asunga aco, ci ka tu kuatisa oku lekisa olopandu vietu ku Yehova omo lieci a siata oku tu lingila poku tu kokela vocili. (Yoa. 6:44) Eci ci pamisavo onjongole yetu yoku kundila omanu vakuavo.
MOMO LIE TU SOLILE “OCILI”
3. Esunga lipi lia velapo lieci tu solile ocili?
3 Etu tu sole ocili omo liasunga alua. Ocina ca velapo ceci okuti, tu sole Yehova Suku yetu, Ono yocili. Pocakati Condaka yaye Embimbiliya, ka tuo kũlĩhĩle lika Ndululiki wilu losi, pole, tuo kũlĩhavo okuti Isietu ukuacisola wokilu, haiye wa tu kapako. (1 Pet. 5:7) Tua kũlĩha okuti Suku yetu, “ukuahenda, ukuacikembe, o livala konyeño kuenda ukuacisola calua haico ka ci pongoloka, haeye ukuacili.” (Etu. 34:6) Yehova o sole esunga. (Isa. 61:8) Eye o sumua eci a mola okuti tu kasi oku tala ohali kuenda votembo ya sokiyiwa o ka malako ohali yosi. (Yer. 29:11) Ci ka kala esumũlũho linene kotembo yaco! Eli limue pokati kesunga lieci tu solile calua Yehova!
Ocili Cembimbiliya ci Kasi . . . Ndonjundo
Ndeci onjundo yi teyuila owato, elavoko lietu lia kunamẽla Vembimbiliya li pondola oku tu teyuila eci tu liyaka loloseteko. Ocili Cembimbiliya ci tu vetiyavo oku sapuilako vakuetu catiamẽla kelavoko tu kuete kovaso (Tala ovinimbu 4-7)
4-5. Momo lie upostolo Paulu a sokisila elavoko lietu lonjundo?
4 Lipi esunga likuavo lieci tu solile ocili? Ocili ci tu nenela asumũlũho alua. Kũlĩhĩsa ocindekaise cimue. Vocili Cembimbiliya mua kongela elavoko tu kuete liokovaso yoloneke. Upostolo Paulu poku tukula esilivilo lielavoko liaco, wa soneha hati: “Tu kuete elavoko liaco ndonjundo kovimuenyo vietu, lina lia kolapo.” (Va Hev. 6:19) Ndonjundo yi teyuila owato, elavoko Liembimbiliya li tu kuatisa oku tula utima eci tu liyaka lovitangi komuenyo.
5 Konepa eyi, Paulu wa kala oku tukula elavoko liokilu Akristão olombuavekua va lavokaile. Pole, olondaka viaye vi tiamisiwilavo Kakristão va kuete elavoko lioku kala otembo ka yi pui vocumbo celau palo posi. (Yoa. 3:16) Ocili okuti, oku lilongisa catiamẽla kelavoko liomuenyo ko pui, ci tu kuatisa oku kuata ocimãho komuenyo.
6-7. Yvonne wa kuatisiwa ndati poku lilongisa ocili catiamẽla kovaso yoloneke?
6 Kũlĩhĩsa ulandu wa manji umue ukãi o tukuiwa Yvonne. Eye ka kulile Ndombangi yimue ya Yehova kuenje eci a kala omõla wa kuatele usumba wolofa. Eye wa ivaluka etosi limue a tangele okuti lalimue eteke a ivaleleko, olio liti: “Eteke limue ka ku ka kala vali eteke likuavo.” Eye wa popia hati: “Olondaka evi via ñokela ocipakupako oku sokolola catiamẽla kovaso yoloneke. Yu nda sokolola ndoco, ‘Momo lie tu kalela komuenyo otembo yitito noke tu fa?’ Ame si yongola oku fa!”
7 Kuenje Yvonne eci a linga ufeko, wa li sanga Lolombangi Via Yehova. Eye o lombolola hati: “Nda fetika oku tava okuti ñuete elavoko lioku ka kala otembo ka yi pui Vocumbo Celau palo posi.” Oku lilongisa ocili, ca kuatisa ndati manji Yvonne? Eye wamisako hati: “Cilo, si kuete vali ocipakupaku omo lioku sakalala lovina viokovaso ale lolofa.” Ndomo wa ci kũlĩhĩsa, ocili ci kuete esilivilo lialua ku Yvonne kuenda eye o kuete esanju lialua lioku sapuilako omanu vakuavo catiamẽla kelavoko liaye liokovaso yoloneke.—1 Tim. 4:16.
Ocili Cembimbiliya ci Kasi . . . Ukuasi
Oku vumba Yehova cilo kuenda oku amamako oku ci linga otembo ka yi pui vemẽhi Liusoma waye, ci sokisiwa ndukuasi umue. Omo liaco, ci kuete esilivilo oku linga alikolisilo osi a sukiliwa (Tala ovinimbu 8-11)
8-9. (a) Volusapo lua Yesu, ulume umue eci a sanga ukuasi umue wa liyeva ndati? (b) Ocili ci kuete esilivilo lie kokuove?
8 Vocili Cembimbiliya mua kongelavo olondaka viwa viatiamẽla Kusoma wa Suku. Yesu wa sokisa ocili Cusoma, lukuasi umue wa solekiwa. Ndomo ci sangiwa ku Mateo 13:44, Yesu hati: “Usoma wovailu u sokisiwa lukuasi umue wa solekiwa vepia, ulume umue a sanga kuenda wa u soleka, omo liesanju a kuete, wa enda yu wa landisa ovina viaye viosi kuenje wa landa epia liaco.” Limbuka okuti ulume ka kaile oku sanda ukuasi. Pole, eci a u sanga wa likolisilako oco a u lande. Omo liaco, eye wa landisa cosi a kuatele. Momo lie? Momo wa kũlĩhĩle esilivilo liukuasi waco. Owo wa kuatele vali esilivilo lialua kokuaye okuti, ovina a kuatele ci sule.
9 Anga hẽ o liyevitevo ndoco poku kũlĩha ocili? Ka kuli atatahãi okuti oco o liyevite! Tua kũlĩha okuti, lacimue oluali lulo lu pondola oku tu ĩha oku ci sokisiwa lesanju tu kuete lioku vumba Yehova, lelavoko lioku kuata omuenyo ko pui vemẽhi liuviali Wusoma wa Suku. Esumũlũho lioku kala akamba vocili va Yehova, li tu vetiya oku linga alikolisilo osi a sukiliwa. Esanju lietu li tunda ‘koku u sanjuisa calua.’—Va Kol. 1:10.
10-11. Nye ca vetiya Michael oku linga apongoloko komuenyo?
10 Valua pokati ketu tua linga alikolisilo anene oco tu taviwe la Yehova. Valua va siapo oku kuata oluhimo voluali. Vamue va siata oku liwekapo oku sanda ukuasi. Handi vali, vakuavo va pongolola ekalo liomuenyo wavo eci va fetika oku lilongisa ocili catiamẽla ku Yehova. Eci oco ca linga Michael. Eye ka kulilile vocili. Osimbu a kala umalẽhe, eye wa lingaile omapalo yoku litĩla. Eye hati, “Ame nda velisilepo omapalo yaco, momo ya enda oku posuisa etimba liange. Olonjanja vimue, nda simĩle okuti lomue o pondola oku ndi yula.” Pole, eci Michael a fetika oku lilongisa Embimbiliya wa limbuka ndomo Yehova a tenda ungangala. (Osa. 11:5) Michael poku vangula catiamẽla ku vamanji vakala oku u longisa Embimbiliya, eye hati: “Ovo ka va la ndi sapuila okuti ndi sukila oku siapo omapalo yaco; va enda oku ndi longisa lika ocili Cembimbiliya.”
11 Osimbu Michael a kala oku lilongisa catiamẽla ku Yehova, ocisola caye kokuaye ca livokiya. Eye wa vetiyiwa calua lohenda Yehova a kuetele afendeli Vaye. Olonjanja vimue Michael wa limbuka okuti wa sukilile oku linga apongoloko komuenyo waye. Eye wa popia hati: “Oku liwekapo oku linga omapalo yaco, ca tĩlile calua kokuange. Pole, oku ci linga ca ponduile oku sanjuisa Yehova kuenda nda kolelele okuti oku u vumba oco ocina ca velelepo, okuti ocina cikuavo ci sule.” Michael wa limbuka okuti ocili Cembimbiliya a sanga cavelelepo kuenje co vetiya oku linga apongoloko komuenyo.—Tia. 1:25.
Ocili Cembimbiliya ci Kasi . . . Ondiyelo
Ondiyelo yi tu kuatisa oku mihila vonjila yina mua tekava. Cimuamue haico okuti, Ondaka ya Suku yi tu lekisa ndomo tu sanga onjila ya sunguluka osimbu tu kasi voluali lulo lua Satana (Tala ovinimbu 12-13)
12-13. Ocili Cembimbiliya ca kuatisa ndati Mayli?
12 Embimbiliya poku lombolola catiamẽla kesilivilo ocili ci kuete, olio li sokisa ocili londiyelo yi mihĩla vowelema. (Osa. 119:105; Va Efe. 5:8) Mayli wo ko Azerbaijãu, wa sola calua ekuatiso a tambula Vondaka ya Suku. Olonjali viaye via kuata atavo a litepa. Isiaye wa kala ukuetavo lio muçulmano, pole, ina yaye wa kala ukuetavo lio Yudea. Eye wa popia hati: “Ndaño nda kũlĩhĩle okuti kuli Suku, pole, nda kuata apulilo alua. Nda enda oku lipula ndoco, ‘Momo lie omunu umue a talela ohali vokuenda kuomuenyo waye wosi kuenda oku talisiwa ohali vifelu otembo ka yi pui?’ Omo okuti amanu va popia vati, cosi ci pita kilu lieve ocipango ca Suku, nda enda oku lipula ndoco, ‘Nda Suku eye o kasi oku viala oluali, anga o sanjukila oku mola omanu oku tala ohali?’”
13 Mayli, wamamako oku sanda atambululo apulilo eye a kuata. Vokuenda kuotembo wa tava oku lilongisa Embimbiliya kuenda wa linga Ombangi ya Yehova. Eye wa popia hati: “Oku tava kelongiso Liembimbiliya ca ñuatisa oku sanga esanju komuenyo. Alomboluilo aleluka nda sanga Vondaka ya Suku, a ñuatisa oku kuata utima wa tula.” Ndeci ca linga Mayli, vosi yetu tu sivaya Yehova ‘Una wa tu kovonga oku tunda vowelema okuti, tuiya vocinyi caye ci komõhisa.’—1 Pet. 2:9.
14. Tu vokiya ndati ocisola cetu kocili? (Tala okakasia losapi hati, “ Ovina Vikuavo vi Sokisiwa Locili Cembimbiliya.”)
14 Evi vimue ño pokati kovolandu a lekisa ndomo ocili ci kuete esilivilo. Citava okuti wa kũlĩha omanu vakuavo. Momo lie kelilongiso liove liopokolika ku kuatela ocimãho coku sanga asunga akuavo eci tu solile ocili? Osimbu tu amamako oku sola ocili, ci ka leluka kokuetu oku sanga olonjila vikuavo vioku lekisa ocisola cetu kokuayo.
NDOMO TU LEKISA OKUTI TU SOLE OCILI
15. Kolonepa vipi tu pondola oku lekisa okuti tu sole ocili
15 Tu lekisa okuti tu sole ocili, poku tanga Embimbiliya olonjanja viosi kuenda alivulu akunamela Vembimbiliya. Kuenje ndaño tu kasi ale otembo yalua vocili, ale otembo yitito, olonjanja viosi tu kuete vialua vioku lilongisa. Ocipama catete Cutala Wondavululi wa sandekiwa tete, ca popele hati: “Ocili ci sokisiwa lonelẽho ya tunda pokati kosoka. Oco omunu a sange onelẽho yaco o likolisilako oku yi sandiliya lutate. . . . Eci omunu a yi sanga, ka sanjukila lika onelẽho yimosi yocili. . . . Olonjanja viosi likolisilako oku sanda ocili Cembimbiliya.” Oku kuata ocituwa coku lilongisa ci sukila alikolisilo, pole, cikuete onima yiwa.
16. Onjila yipi yelilongiso ove o sanjukila oku kuama? (Olosapo 2:4-6)
16 Havosiko tu sole oku tanga kuenda oku lilongisa. Pole, Yehova o tu sapuila oco tu ‘amameko oku sandiliya’ kuenda oku “amamako oku vanjiliya,” oco tu kuate elomboloko liwa liatiamẽla kocili. (Tanga Olosapo 2:4-6.) Nda olonjanja viosi tu likolisilako, tu kuatisiwa. Manji Corey wa lombolola hati, olonjanja viosi eci ndi tanga Embimbiliya, ndi tiamisila utima kocinimbu locinimbu. Eye wamisako hati: “Ndi tanga atosi osi pombuelo yemẽla, ovisonehua viakuavo via tukuiwa kuenda oku linga akonomuiso akuavo. . . . Oku kuama onjila eyi ci ñuatisa oku lilongisa ovina vialua!” Nda tua kuama onjila eyi, ale vikuavo, tu ka lekisa olopandu vietu kocili, eci tu sanda otembo loku likolisilako oku lilongisa.—Osa. 1:1-3.
17. Nye ci lomboloka oku endela vocili? (Tiago 1:25)
17 Tua kũlĩha okuti, oku lilongisa ocili ka ci tẽla. Oco tu kuatisiwe tu sukila oku endela vocili, ale oku kapako ovina tu lilongisa. Nda tua ci linga, ocili ci ka tu nenela esanju lialua. (Tanga Tiago 1:25.) Tu kolela ndati okuti tua kapako ocili? Manji umue wa popia hati, tu sukila oku likũlĩhĩsa etu muẽle, oco tu limbuke kolonepa tu kasi oku enda ciwa kuenda konepa tu sukila oku mioñoloha. Upostolo Paulu wa popia hati: “Ndaño okuti wa kuli ale, amamiko oku ci linga lonjila ndeyi.”—Va Fil. 3:16.
18. Momo lie tu sukilila oku likolisilako oku “endela vocili”?
18 Sokolola ndomo tu pondola oku kuatisiwa poku “endela vocili!” Ka tu mioñoloha lika kekalo liomuenyo wetu, pole, tu ka sanjuisavo Yehova kuenda vamanji. (Olosap. 27:11; 3 Yoa. 4) Ka tu kuete hẽ esunga alua oku sola ocili kuenda oku endela vocili?
OCISUNGO 144 Imbi Ovaso Konima!
^ Etu olonjanja viosi tu kapako ovina tu tava konjila ndomo tu ambata omuenyo wetu “vocili.” Ci kale okuti ndopo tua linga Ombangi ya Yehova, ale tu kasi ale osimbu, tu pondola oku kuatisiwa calua poku konomuisa esunga lieci tu solele ocili. Poku ci linga, ci ka tu kuatisa oku nõlapo oku sanda oku taviwa la Yehova.
