1. Ovina vipi viwa amalẽhe valua va siata oku linga?

 ANYAMO osi, amalẽhe valua va siata oku papatisiwa. Ove hẽ wa eca ale enanga liaco? Nda wa ci linga ale, vamanji va ci sanjukila kuenda Yehova o sanjukavo! (Olosap. 27:11) Sokolola kovina vialua viwa wa siata oku tẽlisa. Citava okuti o kasi ale oku lilongisa Embimbiliya vokuenda kuanyamo alua. Ovina wa siata oku lilongisa vi ku kuatisa oku kolela okuti, Embimbiliya Ondaka ya Suku. Cilo, wa kũlĩha kuenda o sole usovoli Wembimbiliya. Ocisola o kuetele Yehova ca li vokiya kuenje ca ku vetiya oku li tumbika kokuaye loku papatisiwa. Ove wa nõla onjila yimue yiwa!

2. Nye tu konomuisa vocipama cilo?

 ² Osimbu amamako oku kula konepa yespiritu, citava okuti ekolelo liove lia setekiwa ale olonjanja vialua. Pole, osimbu o linga ukulu o ka liyaka loloseteko vikuavo. Satana o ka ku seteka oku liwekapo oku sola loku vumba Yehova. (Va Efe. 4:14) Ku ka ecelele oku yapuisiwa loloseteko viaco. Nye ci ku kuatisa oku amamako lekolelo ku Yehova loku tẽlisa ohuminyo wa linga yoku litumbika kokuaye? Ove o sukila oku amamako oku kala Ukristão umue wa pama kespiritu. (Va Hev. 6:1) O pondola oku ci linga ndati?

3. Noke liepapatiso nye Akristão vosi va sukila oku linga?

³ Noke liepapatiso tu sukila oku kapako elungulo upostolo Paulu a eca ku va Efeso. Eye wa va vetiya oco va kale Akristão “akulu vendamba.” (Va Efe. 4:13) Eci ci lomboloka okuti,  ovo va sukilile oku ‘amamako oku pamisa ekolelo’ liavo. Paulu wa sokisa oku kula kuetu konepa yespiritu ndeci omõla umue a kula konepa yetimba. Ocili okuti, olonjali vi sanjuka poku mola oñaña yavo. Pole, oyo ka yamamako oku kala oñaña. Osimbu yi kula, yi “siapo ovina vi lingiwa lomõla.” (1 Va Kor. 13:11) Akristão haico va sukilavo oku linga. Noke liepapatiso tu sukila oku amamako oku kula konepa yespiritu. Tu konomuisi atosi amue a tu kuatisa oku ci linga.

4. Ocituwa cipi ci tu kuatisa oku kula konepa yespiritu? Ci lombolola. (Va Filipoi 1:9)

⁴ Amamako oku sola Yehova. Ocili okuti, ove o sole ale calua Yehova. Pole, citava okuti o pondola oku pamisa vali ocisola caco. O ci linga ndati? Upostolo Paulu wa tukula yimue pokati kolonjila yoku ci linga ndomo ci sangiwa ku Va Filipoi 1:9. (Tanga.) Paulu wa likutilila oco okuti ocisola ca va Filipoi “camamako oku livokiya.” Tu sukila oku vokiya ocisola tu kuetele Yehova. Tu ci linga poku vokiya ‘ukũlĩhĩso wa suapo lolondunge.’ Osimbu tu amamako oku kũlĩha Yehova, ocisola cetu kokuaye ci livokiya, tu sanjukila ovituwa viaye kuenda onjila ndomo a linga ovina. Onjongole yoku u sanjuisa yilivokiya kuenje tu yuvula oku linga ovina viusumuisa. Etu tu likolisilako oku linga ocipango caye kuenda oku pokola kovina eye a tu ĩha oku linga.

5-6. Tu vokiya ndati ocisola cetu ku Yehova? Ci lombolola.

⁵ Tu vokiya ocisola cetu ku Yehova poku kũlĩha ciwa Omõlaye, una wa setukula lonjila ya suapo ovituwa via Isiaye. (Va Hev. 1:3) Onjila yimue yoku kũlĩha Yesu, poku lilongisa ovolandu a sangiwa Kavangeliu akuãla. Nda okuti ku kuete ocituwa coku tanga Embimbiliya eteke leteke, momo lie ku fetikila cilo poku tanga ovolandu a Yesu? Osimbu o lilongisa ovolandu a tiamẽla ku Yesu, sanda oku limbuka ovituwa viaye. Eye wa lianjele kuenda wa enda oku angata omãla. (Mar. 10:13-16) Olondonge via lianjelevo poku kala laye; ovo ka va kuatele ohele yoku u situluila ovisimĩlo viavo. (Mat. 16:22) Eci ci lekisa okuti, Yesu wa setukula ciwa Isiaye wokilu. Yehova o lekisavo esunguluko. Tu pondola oku likutilila kokuaye. Tu situlula ovisimĩlo vietu eci tu likutilila kokuaye. Tua kolela okuti eye ka tu pisa. Eye o tu sole; kuenda o tu tata.—1 Pet. 5:7.

⁶ Yesu wa kuatela ohenda omanu. Upostolo Mateo wa popia hati: “Eci a mola owiñi, wa va kuatela ohenda, momo va kala oku talisiwa ohali loku sakalaisua ndolomeme ka vi kuete ungombo.” (Mat. 9:36) Yehova o liyevavo ndati? Yesu hati: “Isiange o kasi kilu, ka yongola okuti pokati kava vatito pa nyelela umue.” (Mat. 18:14) Olondaka evi, vi tu sanjuisa calua! Osimbu tu likolisilako oku kũlĩha ciwa Yesu, ocisola cetu ku Yehova ci livokiya.

7. Oku livala ukamba la vamanji va loñoloha kespiritu ci ku kuatisa ndati?

⁷ O pondola oku lilongisa oku lekisa vali ocisola, poku kala la vamanji va loñoloha kespiritu vekongelo o kasi. Limbuka esanju ovo va kuete. Ovo ka va liveli omo lionjila va nõla yoku vumba Yehova. Pinga kokuavo oco va ku lomboluileko ovolandu avo, osimbu va vumba Yehova. Eci o sokiya oku nõla onjila yimue, pinga kokuavo olonumbi. Ivaluka okuti, “nda olondunguli vialua, kuli onima yiwa.”—Olosap. 11:14.

8. Nye o sukila oku linga nda o kuete atatahãi lieci Embimbiliya li popia?

⁸ Yula atatahãi. Ndomo ca lomboluiwa ale  vocinimbu 2, Satana o ka ku tateka oco o liwekepo oku kula konepa yespiritu. Onjila yimue eye a kuama, yoku ku kokela atatahãi  vovisimĩlo viove a tiamẽla kalongiso amue Embimbiliya. Ndeci, pamue o ka setekiwa lelongiso liokuti ovina viosi via tukuluka ño. Eci wa kala omõla citava okuti kua lasokolola kondaka yaco, omo okuti cilo wa linga ukulu citava okuti, o kasi oku yapuisiwa lovisimĩlo viaco kosikola. Ovina ulongisi wove a ku sapuila viatiamẽla kelongiso liokuti, ovina via tukuluka ño, citava okuti elongiso liaco li molẽha ndu liocili kokuove. Pole, citava okuti ovo ka va lakonomuisa lutate, uvangi wokuti kuli Ululiki umue. Ivaluka onumbi yi sangiwa Kolosapo 18:17 yokuti: “Omunu watete una o lombolola ocitangi caye ci sukila oku tetuluiwa, o sima okuti o kuete esunga, toke eci ku iya omunu ukuavo oco o konomuise.” Yuvula oku tava kalongiso esanda o yevelela kosikola, pole, konomuisa lutate kocili ci sangiwa Vondaka ya Suku, Embimbiliya. Linga akonomuiso valivulu etu. Sapela la vamanji vana okuti kosimbu va tavele kelongiso liokuti ovina viosi via tukuluka ño. Sapela la vamanji vaco oco va ku sapuileko ovina via va vetiya oku tava okuti kuli Ululiki umue o tu sole. Oku ci linga, ci ka ku kuatisa oku kolela okuti kuli Ululiki umue.

9. Nye wa lilongisa kulandu wa manji Melissa?

⁹ Manji umue ukãi o tukuiwa Melissa, wa kuatisiwa omo lioku linga ekonomuiso lia tiamẽla kovina via lulikiwa. * Eye hati: “Onjila ndomo alongisi va lombolola kosikola elongiso liokuti ovina via tukuluka ño, li molẽha ndu liocili.” Kefetikilo nda kala lohele yoku pula catiamẽla katatahãi ange. Sia yonguile oku linga akonomuiso, momo nda simĩle okuti ndi sanga uvangi wokuti, elongiso liokuti ovina via tukuluka ño liocili. Noke, nda sokolola okuti Yehova ka yongola okuti, tu u vumba latatahãi. Kuenje nda fetika oku linga akonomuiso. “Noke nda tanga elivulu losapi hati, Existe um Criador Que se Importa com Você? Kuenda olombrochura losapi hati, A Vida—Teve um Criador? Kuenda yikuavo hati, Efetikilo Liomuenyo—Apulilo Atãlo a Sukila Oku Tambuluiwa. Eci oco nda sukilile. Nda nda ci kũlĩhĩle, nda nda ci linga osimbu.”

10-11. Nye ci pondola oku ku kuatisa oku liyelisa kovituwa? (1 Va Tesalonike 4:3, 4)

¹⁰ Yuvula ovituwa ka via sungulukile. Osimbu omunu a kasi umalẽhe, oloñeyi vietimba  citava okuti vi livokiya kuenje pamue o vetiyiwa oku linga evĩho liukahonga. Eci oco Satana a yongola okuti o ci linga. Nye ci pondola oku ku kuatisa oku yula oseteko yaco? (Tanga 1 Va Tesalonike 4:3, 4.) Vohutililo yove yo pokolika sapuilako Yehova ovisimĩlo viove. U sapuila ndomo o liyevite kuenda pinga kokuaye, oco a ku ĩhe ongusu. (Mat. 6:13) Ivaluka okuti Yehova o yongola oku ku kuatisa, ka yongola oku ku pisa. (Osa. 103:13, 14) O pondolavo oku sanga ekuatiso Vondaka ya Suku. Manji Melissa wa tukuiwa ale, wa tamalãla poku yula ovisimĩlo ka via sungulukile eye a kuata. Eye wa popia hati: “Oku tanga Embimbiliya eteke leteke ca ñuatisa oku liyaka lovisimĩlo viange ka via sungulukile. Ca ñuatisavo oku limbuka okuti nda tiamẽla ku Yehova kuenda ndi yongola oku u vumba.”—Osa. 119:9.

¹¹ Ovitangi o liyaka lavio ku ka vi potolole lika liove. Sapuilako olonjali viove oloseteko o kasi oku liyaka lavio. Ocili okuti ka ca lelukile oku situlula ovitangi o kasi lavio pole, ci kuete esilivilo oku ci linga. Manji Melissa wa popia hati: “Nda enda oku likutilila oku pinga utõi kuenje nda situluila isiange ovitangi nda kala oku liyaka lavio. Noke yoku cilinga nda liyeva ciwa. Nda kolelele okuti Yehova wa sanjukila onjila nda nõla.”

12. O pondola oku nõla ndati olonjila via sunguluka?

¹² Songuiwa lolonumbi Viembimbiliya. Osimbu ove o kula, o ka kuata vali elianjo lioku nõla olonjila viove muẽle. Pole, kuli ovina vialua komuenyo okuti, handi kua vi kũlĩhĩle. Ndamupi o pondola oku yuvula oku linga cimue ka ca sungulukile okuti, ci kapa kohele ukamba wove la Yehova? (Olosap. 22:3) Manji umue o tukuiwa hati Kari o lombolola eci co kuatisa oku nõla olonjila viwa. Eye wa limbuka okuti oco o kale Ukristão umue wa pama, ka sukila ulala umue wovihandeleko. Eye hati: “Ndi sukila oku kuata elomboloko liolonumbi Viembimbiliya okuti ovihandeleko lika havioko. Eci o tanga Embimbiliya li pula ndoco: ‘Ulandu owu u ndi longisa nye catiamẽla ku Yehova? Olonumbi evi vi pondola oku ñuatisa ndati oku linga eci ca sunguluka? Ndi ka kuatisiwa ndati poku kapako olonumbi Viembimbiliya?’ (Osa. 19:7; Isa. 48:17, 18) Poku tanga Embimbiliya loku kapako olonumbi viaco, ci ka leluka kokuove oku nõla onjila yi sanjuisa Yehova. Osimbu amamako oku pamisa ukamba wove la Yehova, ku ka sukila ulala wovihandeleko kovina viosi, momo o ka kuata elomboloko liovisimĩlo via Yehova viatiamẽla konjila o yongola oku nõla.

13. Onima yipi yi tunda koku kuata akamba vawa? (Olosapo 13:20)

¹³ Nõla akamba va sole Yehova. Ndomo tua lilongisa kefetikilo, akamba o nõla va pondola oku ku kuatisa oku kala Ukristão umue wa pama. (Tanga Olosapo 13:20.) Manji umue o tukuiwa Sara, vepuluvi limue esanju liaye lia kala oku tepuluka. Pole, wa sanga cimue co kuatisa oku kuata vali esanju. Manji Sara wa lombolola hati: “Ndeya oku sanga akamba vawa. Ame la manji ukuavo tua enda oku lilongisila kumosi Utala Wondavululi. Ekamba likuavo lia ñuatisa oku eca atambululo kolohongele. Omo lioku vetiyiwa lakamba vange, nda fetika oku kuata elilongiso liopokolika kuenda oku likutilila olonjanja viosi. Ukamba wange la Yehova wa fetika oku pama kuenda esanju liange lia tumbuluka vali.”

14. Nye ca kuatisa manji Julien poku nõla akamba vawa?

¹⁴ O pondola oku nõla ndati akamba va ku vetiya oku linga ovina viwa? Manji Julien okuti cilo ukulu wekongelo, wa popia  hati: “Osimbu nda kala umalẽhe, nda linga akamba vawa la vamanji tua kundalaile kumosi. Vamanji vaco va kala vakuambili kuenda va ndi kuatisa oku limbuka esanju li tunda kupange woku kunda. Nda fetika oku kuata ocimãho coku kala ukundi wotembo yosi. Nda limbuka okuti nda kala oku pumba akamba vawa momo nda nõlele lika akamba vakuotunga wange. Noke nda kuatavo akamba vawa la vamanji vamue vo ko Betele. Ongangu yavo ya ndi kuatisa oku nõla ciwa ovitalukilo kuenje eci ca pamisa ukamba wange la Yehova.”

15. Elungulo lipi Paulu a eca ku Timoteo liatiamẽla koku nõla akamba? (2 Tim. 2:20-22)

¹⁵ Nye o sukila oku linga nda wa limbuka okuti manji umue wa lika laye vekongelo, ka kuete ovituwa viwa? Paulu wa kũlĩhĩle okuti Akristão vamue vokocita catete vekongelo, ka va lekisile ovituwa Viukristão, kuenje wa lungula Timoteo oco ka ka linge vali lavo ukamba. (Tanga 2 Timoteo 2:20-22.) Ukamba wetu la Yehova ocina cimue ca velapo. Tua siata oku linga alikolisilo alua, oco tu pamise ukamba tu kuete la Yehova, omo liaco, ka tu ka eceleli okuti omunu umue o nyõla ukamba waco.—Osa. 26:4.

16. Ovimãho vipi o sukila oku nõla?

¹⁶ Litumbikila ovimãho vi pondola oku ku kuatisa. Nõla ovimãho vi pamisa ekolelo liove haivio vi ku kuatisa oku kala Ukristão umue wa pama. (Va Efe. 3:16) Ndeci, ove o pondola oku nõla oku linga elilongiso lio pokolika kuenda oku tanga Embimbiliya olonjanja viosi. (Osa. 1:2, 3) Kuenda citavavo okuti o sokolola oku mioñolola olohutililo viove. Ale oku kuata utate kovitalukilo o nõla kuenda otembo o pesila kokuavio. (Va Efe. 5:15, 16) Eci Yehova a mola alikolisilo o linga oco o pamise ekolelo liove, eye o sanjuka calua.

17. Onima yipi iyilila koku kuatisa vakuetu?

¹⁷ O pondola oku kala Ukristão wa pama kekolelo eci o kuatisa omanu vakuavo. Yesu wa popia hati: “Esanju li tunda koku eca olio lia velapo, li tunda koku tambula li sule.” (Ovil. 20:35) O kuatisiwa calua nda o talavaya ciwa lotembo yove kuenda ongusu, oco o kuatise vamanji. Ndeci, o pondola oku kuata  ocimãho coku kuatisa vamanji va kuka kuenda vana va vela va sangiwa vekongelo o kasi. Handi vali, o pondolavo oku va kuatisa oku enda pocitanda ale, oku va longisa oku talavaya lotelefone ale lotablete. Nda okuti wumanji umue ukuenje, litumbikila ocimãho coku kala oñuatisi yekongelo oco o kuatise vamanji. (Va Fil. 2:4) O pondolavo oku lekisa ocisola komanu vakuavo poku va kundila olondaka viwa Viusoma. (Mat. 9:36, 37) Nda citava litumbikila ovimãho vimue vi panga onepa, kupange wotembo yosi.

18. Oku kala ukundi wotembo yosi, ci ku kuatisa ndati oku kula konepa yespiritu?

¹⁸ Oku litumbika kupange wotembo yosi, ci pondola oku ku ĩha apuluvi alua oku kula konepa yespiritu. Nda wa linga ukundi wotembo yosi, o pondola oku enda Kosikola Yakundi Vusoma. O pondolavo oku ka talavaya ko Betele, ale koku tunga ovitumãlo Viusoma. Manji umue ukãi o tukuiwa Kaitlyn wa popia hati: “Oku pita tembo kupange la vamanji va pama kespiritu, ca ñuatisa calua oku kula konepa yespiritu noke liepapatiso liange. Ongangu yavo ya ñuatisa oku vokiya ukũlĩhĩso wange Wembimbiliya kuenda oku mioñolola uloño wange woku longisa.”

19. Asumũlũho api o ka kuata osimbu amamako oku kula konepa yespiritu?

¹⁹ Osimbu amamako oku kula konepa yespiritu, ove o ka kuata asumũlũho alua. O ka yuvula oku linga ovina vi tateka oku tẽlisa ovimãho viove. (1 Yoa. 2:17) Oka yuvulavo ovitangi viyilila koku nõla olonjila ka via sungulukile. Kuenje o ka tẽla oku nõla onjila ya sunguluka loku kuata esanju liocili. (Olosap. 16:3) Ongangu yove yiwa yi ka vetiya vamanji cikale amalẽhe kuenda akulu. (1 Tim. 4:12) Kuenje ocina ca velapo vali, o ka kuata ombembua kuenda esanju li tunda koku sanjuisa Yehova, loku kuata ukamba wa pama laye.—Olosap. 23:15, 16.